Wai Du Rengbe Mo Kadu Na Wene Raka?

RAKA areme wa gu Mbori aaida si du ti tonatonaha te. Ka gi kpotosende re ima hi be agu aboro du na irisa kuti ga Mbori bakere pagbia, na nagbia undo ti gako ngbembatayo, na kini wiriki gu sinoko nga nyemuse gbiati agu akuraha. Mbori aaida aboro du na ngbarago wa i nika sonosa awiriyo, ni wiriki vovo apai na ki sa kpotosende dunduko ni paradizo.

MBORI KIDOHE TIPA KA ARIA RAKA AURU KPOTOSENDE SI DA WAI KO AAIDA SI DU

• “Ko namanga pai, vura nyasi digida kpotosende yo.”​—Atambuahe 46:9.

• “Rago gbarasa agu yo nagbarasa kpotosende” ki da.​—Yugoti 11:18.

• “A nga boro kporo sa ayá, ‘Mi nawoka te.’”​—Yesaya 33:24.

• “Gimi siasia aboro ará zezeredi tipa gbanga rago mbiko gu mangapai nga ga beyo.”​—Yesaya 65:22.

Wai du gi sangbaanebi re nika digiso tihe? Mbori ima sia Wiriko nga Yesu ko du ni Bakindo gu wene zogarago du ngbangbaturũ yo nga gu nika zogarago ku auru kpotosende ane. Baibiri nayambaha nga ga Mbori Kindo. (Daniere 2:44) Baibiri nafura tipa Yesu nga: “Mbori amáa ko ni bakindo . . . , ko ki zogo[rago].”​—Ruka 1:32, 33.

Ho Yesu adu ni auru kpotosende, ko amangi dungu iʹiriwoapai tipa ka yugo na ni nga ho ko kada ni ni Bazogo ko nika sa ga aboro raka ni wenehe kisusi gu du awere.

YESU AIMA YUGO GU WENE APAI KO NIKA MANGAHA FU ABORO GIASANGBA

• Ko ahusi ngbatunga akaza dunduko, nga gu naayugo wai ko nika nyasariipa akaza ti aboro.​—Matayo 9:35.

• Ko arugusi baime, nga gu naayugo wai ko nika banda aboro be agu aome nga ga zegino.​—Marako 4:36-39.

• Ko arigi akutu aboro, nga gu naayugo gupai nga ko nika fu riahe afu fu aboro.​—Marako 6:41-44.

• Ko asa ime ku rogo imekakue, nga gu naayugo gupai nga ko nika undo aboro aundo i du na ngbarago.​—Yoane 2:7-11.

Wai du rengbe mo ka gbia gu ngbatunga raka Mbori ambakadaha tipa agu aboro nakpinyemu ko? Pai kinaho si aida mo mangihe. Baibiri naya “gu gene nangbe koyo du unga ni, . . . aboro nabi he ni kina umba yo.”​—Matayo 7:14.

MO GBATA GU GENE NGA GA NDIKIDI UNGA

Ginihe nga gu gene nga ga unga? Mbori naya: “Mi nga Yekova ga Mbori, nayugo pai foro sa u, nga gu ko nangbe ku mbata yo foro ngba gu gene mo ka ndu ngba ha.” (Yesaya 48:17) Ka mo pekefuo agi arugute re gamo raka rengbe kadu ni bawenehe gbe.

Yesu aya: “Mi nga gene, nga rengo, nga unga a.” (Yoane 14:6) Ka ani mangi gupai Yesu agumbaha na kini wiriki gako kpiapai, si nika mbedisa rani koyo du Mbori ni na gaani raka ki da ni bawenehe.

Wai du rengbe mo ka gbia gu gene nandu sa unga? Dungu apambori du ti ni, ono Yesu azahe nga: “Agu yo naya ti re, ‘Gbia, Gbia,’ i aríma nga ku rogo gu ngbi nga ga ngbangbaturũ dunduko te; kina gu ni namanga wa Buba akpi nyemu he du ngbangbaturũ yo.” (Matayo 7:21) Ko aya berewe: “Oni aína yo ti zuzuyo.” (Matayo 7:16) Baibiri rengbe ka undo ro mo ini ndikidi pambori ti iraira irisombori.​—Yoane 17:17.

Wai du rengbe mo ka tona ndu ngba gu gene nga ga unga? Si nika ida gupai nga mo inipai tipa gu boro nafu Unga: Da du nga ko? Rimoko nga da? Gini ngbatunga boro nga ko? Ginipai ko amangaha? Ginipai ko aida ani mangihe?a

Mbori naida mo mangi dungu apai ti gu gbua nga ka mangasunge, ri riahe, ngi mbaro, na vunga agude. Ani ima rengba ka ino Bakusirani na ki da ni abakureako. Ani rengbe ka yugoho nga ani nakpinyemuko ni manga ani gupai ko akpinyemuhe. Yesu aya: “Nyenye unga nga gere, nga i ini ro nga bangisa ndikidi Mbori.”​—Yoane 17:3.

GU BAMBATA DIANDUE RENGBE MO KA MANGAHA

Wirika ka ino gupai ndikidi Mbori aidaha rengbe ka ida na gupai nga mo mangi aʹariapai rogo gamo raka yo. Gipai re rengbe kadu wa si ima kpakara. Ono ka pe rengo, si nga gu kpakarakpakara nunguro aboro dunduko atonaha na bambata diandue. Tipa ka undo ro mo gbia dungu akaragapai kuti agu asanahe du tipa Mbori, aDezire Yekova rengbe ka wirika Baibiri na mo rogo gu ba na ti gu regbo ngba tiro. Mo rengbe ka ndu ku rogo gaani bangiriba nga ga Internet nga www.jw.org/zne