Ya Mo Bangironi Niruruhe?
1. Rogo gupai yo nga du na ‘ruru bangirise’ nga gine?
1 Guhe bangirani abihe gbe ima rengba kadu na ome kurii gaani mangapai. Ru gupai aru Yesu agumbaha ki yaa: “Were ka bangiro du ni ruru he, kpotoro yo [hi ahi] be imarago dunduko.” (Mt. 6:22) Ho du bangirani ni niruruhe wa gu Yesu agumbaha, si nasa rani ani moi berãrani kuti bangisa pai sa, nga pa manga gupai Mbori akpinyemuhe. Si nasa rani ani peresipa Kindo mbatayo zanga mbu aũzegino watadu gu kura apai si gbe berã rani kusayo ti sunge tungusapai.
2. Gini apai rengbe ka aria gaani berãpai, ono ginihe rengbe ka undo rani?
2 Si Naida Ani Niwisigi Tirani Awisigo: Gu bipai du ani nani ima rengba ka ariatihe mbiko agu ahe aũgbandaka apangbanga agumbaha nga si naida si du berani watadu mbiko bi ani agu ahe dube kura aboro adunga berani ya. Mbata fu manga ani gupai watadu ngbe ani guhe nika dia bakere regbo, marã, gbiati ome tipa ani ngbehe, si angba angba ka ani “sungu mbata” ka wisigopa gu marã si nika diaha berani na ki sana tirani nga: ‘Ya mo gihe re aundo re mi mbakadi gi sunge fu Yekova watadu si nika rugusa gi sunge arugusa fu Yekova?’ (Ruka 14:28; Frp. 1:9-11) Si naida ani naawisigo tirani dedede ka bi wai rengbe ani ka sa gaani raka si du taata wa ka ani ruho ka kiiso gaani sunge tungusapai.—2 Kor. 13:5; Ef. 5:10.
3. Ginipai ani awirikaha ti gu wirina namangi ariapai tipa ka sa gari raka si du taata?
3 Ho wirina sa atona tungusapai ni ninazakigene ti aregbo dunduko, ri asia gupai nga kaa mangasunge marã ti aregbo dũ wa si avura du vuru nga ka ri aamanga gu sunge du tipa bete regbo, si undo ri aundo na agu ahe ri azingo tipaha. Niyangaraha, ri agumba gupai nga: “A nga boro sa ka ra fu abaira ue te. Si aidi mi mbupa agu ahe mi aidaha ka ngerafuo agu ahe mi adu na zingoho. Mi aini gupai nga aũzegino nakurugba akurugba, na omere bati abata ka mi aasada tire ka gbia agu ahe dunduko mi aida nani.” Agu apai nadu tipa ri aima mbugene furi tipa ri mangi ariapai rogo gari raka yo tipa ka saha taata, na ki aria gari sunge kuti gu narengbe ka mbu ri ri nindu kumbatayo na gari sunge nazakigene.
4. Tipagine duhe ti ni ninyanyakipa pai ka banda bangirani niruruhe awere?
4 Gi regbo ani araka ti ni re nzunzu nga gu regbo si aida ani mbu bangirani si du niruruhe. Auru dunduko ani ambeda na digido gi zegino re gbiati tonatona ga Mbori vovo zegino. (1 Kor. 7:29, 31) Nimanga ani sunge tungusapai, ani nika batasa tirani na agu aboro nagia paha ngbarani.—1 Tim. 4:16.