Kparakpee Gbiati Berãkuriipai nga Nyanyakipa Ahe Fu Zaaza Abatungusipai
1. Ginihe naundo Yesu ka i gbenga berãko kusayo ti sunge tungusapai ya?
1 Nyemu adu kinaho sa Yesu ata husa aboro kini do adaimona ti aguyo. Fuo gako abawiriki biko fuo giro rago, i aya fuko wee: “Aboro nagbata ro dunduko,” i asosoda ko tipa ko naamanga iiriwoapai amanga kindi. Wa si avura duwo, i agbenga berã Yesu ti gu nyanyakipa sunge nga ga tungusa wene pangbanga ko aye ka mangaha te. Ko akaragapai fuyó ki yaa: “Ani ndú ku rogo kura akporo, mi tungusi pai yo a; bambiko si du mi nikuru ti ni.” Ginihe naundo Yesu ka i gbenga berãko kusayo ti sunge tungusapai ya? Ko azingi pamanangba wiso ki ndu ku ngbakungbo yo ka kpara na ki berẽkuriipai. (Mk. 1:32-39) Wai rengbe kpee na berãkuriipai ka undo rani ani du ni zaaza abatungusipai?
2. Gini apai rengbe ani ka berẽkuriihe tipa si undo rani ani nye ni zaaza abatungusipai?
2 Ginipai Si Aida Ani Berẽpai Kuriihe? Yesu abi gupai nga aboro “arungo, ki nigbandaka, wa kina agu akandoro adu nga na babandara ti ra ya.” (Mt. 9:36) Teketeke a, ani rengbe ka berãkuriipa wai si aida ani tungusi wene pangbanga. Ani rengbe arengba a ka berãkurii pa wai regbo nanye koyo gbua tooni. (1 Kor. 7:29) Ani ima rengba ka makiapa ga Yekova asunge na asinoko, gu momu du ani nani nga kadu ni aDezire Yekova, na gu wene apai nga ga toro wiriki ani he rogo Ziazia Kekeapai nga gu du kindi nigbugbuhe fu agu aboro zegino du rogo gaani dagbarago.—Tam. 77:11-13; Yes. 43:10-12; Mt. 13:52.
3. Ti gini aregbo rengbe ani ka berãkuriipai?
3 Gini Regbo Si Aida Ani Berẽkuriipai? A wa Yesu amangihe, kura aboro nazinga kina boro wiso ho du rago ni zanga woro ahe. Gu kura aboro ninaaberãkuriipai nyemu mbata fu i ra. (Bam. P. 24:63) Ka apai vura nge tirani wai vurũ, ani rengbe arengba ka gbia regbo tipa ka berãkuriipai. Gu kura aboro ninaaberãkuriipai ho i andu ni rogo aũnduge. Gu kura aboro ninaandu kaa sungo rogo gu ba adunga wawa rogoho ya ti regbo riahe nga ga bebere uru tipa kaa berãkuriipai. Badungu aboro nabi gupai nga berã yó kuriipai mbata fu i ndu gene tungusapai yo tipa bete regbo naundo yó i tungusipai zaaza.
4. Tipagine si aida ani berẽ ti ni kuriipai?
4 Kpee na berãkuriipai nika nyakasa gu nyemu mangasunge fu Yekova du tirani, ki sa rani ani nibi irisombori ni nyanyakipa he rogo gaani raka, na ki nyakasi gaani diaberã tipa kaa tungusapai atungusa kindi. Ga Mbori bangbasia bamangisunge nga Yesu aima gbia undu ti berãkuriipai, ani nika gbia undo agbia a.