Oni Gbata Aboro ka Ndu ka Tungusapai Fuyo
1. Tipagine i naakparaka adagbarago ti ni ti adungurati ringbisihe kuti agu afugo aboro apehe?
1 Rago Pendekote rogo gu garã nangia 33 F.B.K., ziazia toro azoro kurii ga Yesu abawiriki “i ki tona fura ni kura ngbatunga afugo” fu agu aboro naadu ho nga aguyo naye rogo dungu apapara zegino. (Amo. 2:4) Nisangbana gipai re, aboro 3,000 ki zi bapatiza. Na si nawira gupai nga dungu agu aboro naye ku Yerusarema yo angia agu aboro naape gu fugo ape aboro anaapehe yo gbe, nga pa-Ebere watadu pa-Giriki. Ono wa si avura duwo, Yekova aidi i tungusi gu pangbanga nga ga Kindo fuyo rogo payo. Na ani ima ino gupai nga aboro naida na wene pangbanga niipo ho i atungusaha ni fuyo rogo payo. Sidu tie, rogo agu arago aboro ape dungu afugo rogoho, i nakparaka adagbarago nga ga adungurati ringbisihe kuti agu afugo aboro apehe. (Organized, kpe. 107, genewa. 2-3) Agu abadona nga ga agu afugo nga ga ayeaye, i afunga kparakpara dagbarago fuhe si nitungusipai rogoho te, ono si natungusapai fu agu aboro nape gu fugo re rogo gu dagbarago nga ga gu dungurati duhe ku tiibehe gbiati ga gu kura adungurati du rogo gu rago re.
2. (a) Gine nga sunge gbata aboro, na tipagine nyakipaha ti ni? (b) Wai rengbe adungurati ka undo tihe dagbaha nibipa mangasunge rogo agu arago aboro ape dungu afugo rogoho? (c) Ginipai si aida ani mangihe ho ka ani gbia gu boro ni nape gu fugo du kia nga guni duna nyemu rengo?
2 Ka oni araka rogo gu ba aboro dunduko ape bangisa fugo rogoho, oni rengbe ka tungusapai rogo akporo nga gu tifuo kuraha. Ono apai kia ho oni araka ni rogo gu rago aboro ape dungu afugo rogoho. Gu kura adungurati nga ga kura afugo rengbe kaa tungusapai kina rogo gu bangisa rago re. Wa vura duhe nga agu adungurati re rengbe ka gumbapa agu aboro furoni i nagbiayo nga aguyo nape gaoni fugo, gaoni sunge du gbe nga ka gbata agu aboro nape gu fugo nga ga gaoni dungurati watadu badona. (Oni bi gu sanduki nga “Oni Undo Akuaroni.”) Sidu tie, aregbo kinaho si aida oni gbata agu aboro agbata nape gu fugo oni aida ka tungusapai rogoho. Wai rengbe ani ka manga gi sunge nga ga gbata aboro re?
3. Wai rengbe dungurati watadu badona ka manga wene mbakadapai nibipa gu ba si aida i ta rogoho na gu bakio regbo si aida i dihe kuti sunge gbata aboro?
3 Mbakadatise Tipa Sunge Gbata Aboro: Gu bakio regbo si aida oni dihe kuti sunge gbata aboro rogo gaoni dagbarago nabipa agu apai du tipa gu rago re. Nikpiapai, bange aboro wa wai rogo gu rago re nape gu fugo oni agbata agu aboro napehe? Bange abatungusipai wai duho? Bange aadresi wai naima duho be dungurati watadu badona? Anga si nga si naida dungurati gbata aboro rogo arago dunduko kina sa te ono si rengbe ka bihe nga si naida i moi berãse gbe tipa kina agu arago duna aboro rogoho nidunguyo rogo gayo dagbarago na rogo agu arago aturongo aturo gbe ya. Ono tie, si ninyanyakipa pai ka manga wene mbakadapai ka gbata aboro tipa wa ka badungu aboro gbia momu ka kpara nirimo Yekova.—Rom. 10:13, 14.
4. (a) Wai si aida i mbakadipai tipa sunge gbata aboro? (b) Gini bete agene duho rengbe oni ka gbia aboro rogoho nga aguyo nape gaoni fugo?
4 Tipa gupai nga ka awirina yengo ka ta kina rogo gu ba kura awirina naima ta rogoho ya, gu gbuu nga ga abaakumba, gbe gu babiapai nga ga sunge tungusapai ko, si naida ko mangi mbakadapai tipa sunge gbata aboro na kini ngerekuriihe. (1 Kor. 9:26) Rogo agu abadona nga ga agu aboro nape gu fugo nga ga ayeaye, gu dungurati du gu badona re kutii behe nasia gu wirina rẽarẽ, gbe bakumba watadu moundo abaakumba, tipa ní ningbembatayo. Dungu adungurati na abadona duna wene mbakadapai behe tipa manga tonatona gbata aboro. Aguyo namangasunge na gu buku duna rimo aboro rogoho na gayo adresi na namba terefuni watadu Internet tipa ka dungura agu arimo nge gbe rogo gu fugo i agbata agu aboro napehe. Fuo gure, i ki mangisunge gbata aboro niyambayo yó rogo terefuni watadu ninduyo ka biyo tipa ka ino agu aadresi si aida i rimisihe ku dagba agu nga ga gayo dagbarago. Ka gene du tipa mangaha wo, agu abaakumba du badona kutii behe rengbe arengba ka manga mbakadapai tipa dungurati naabaha ndu ka gbata aboro ti kura aregbo.—Oni bi gu sanduki nga “Wai ka Gbia agu Aboro Nape Gaoni Fugo.”
5. (a) Gini bete aberãpai duho fu agu abatungusipai namanga sunge gbata aboro? (b) Ginipai rengbe ani ka gumbaha fu aboro ho ani agbata aboro ni?
5 Si naida ani duna wene sásá berãrani yo ai gu regbo ani andu ka gbata aboro. Wadu he nga gi sunge re nga papara gaani sunge tungusapai, si naida ani vo tirani niiriirihe. Dungu aboro bi gupai nga mbakada yó gupai i andu ka gumbaha wenengai na kini fura rogo gu fugo i agbata agu aboro napehe ho i agbata yó ni nasayo i du zaaza na i fura wenengai rogo gu fugo re. Ani rengbe arengba ka geda gu regbo ani nadihe kuti gbata aboro ono angianga gu regbo ani nadihe kuti mbakada kpia dagbarago watadu tangara arimo ya. Ho ani abi gu boro ni nape gu fugo re, si naida ani mangi asadatise ka gumba wene pangbanga funi na fuo gure, ani ki tingidi pani nibasa fu gu babiapai nga ga sunge tungusapai ko watadu gu boro ko nasia ní tipa ní rimisi pa gu boro re kurogo gu waraga du tipa kepa dagbarago. Kina gu bangisapai re si aida si mangi ka si vura du nga gu boro ani agbia ní re aadunga na nyemu gaani pai te. Wa vura duhe nga sunge gbata aboro paha ima nyaka, si aidanga ani fu tirani sa kinaha ki mbu kura angbatunga sunge tungusapai te.—Oni bi gu sanduki nga “Gupai Rengbe Ani ka Gumbaha Ho Ani Agbata Aboro Ni.”
6. Gini kpakaraapai duho ti gbata airangbiängä?
6 Oni Gbata Airangbiängä: Gbata airangbiängä na kina kpakarapai ti ni na si naida bakere asadatise gbiati kakutipai. Ani arengbanga ka ino irangbiängä gbua ti keke rimoni watadu ti kpotoni singia ti gani votise te. Kurigure, gani aborokporo watadu abakureani rengbe arengba ka gunde ka kusa pani fu gu batungusipai nasanahe. Gi bete aberãpai du kusende re tipa gbata airangbiängä rengbe arengba ka undo a ho ani agbata agu aboro ni nafura afura.
7. (a) Wai rengbe ani ka gbata agu aboro nga airangbiängä? (b) Wai rengbe ani ka sa irakporo ka ní dunga na kapa kuti rani ya?
7 Agu adungurati na abadona nga ga fugo nibee aima gbia wenepai mbiko sasana yó he rogo agu aba aboro araka rogoho. Oni rengbe arengba ka sana gu boro rogo gu rago oni ata rogoho nga guni nika ya furoni ní aima bi gani murakporo, badiasunge, watadu badia wirikapai ní nifura nibee. Watadu ní aima bi kekepai pangba gene nayugo gupai nga agu agude nga airangbiängä kina baraho. Watadu gumeni kina ti ni nga irangbiängä. Oni tingidi gupai nga aboro rengbe arengba ka kapa kuti paye oni. Ono tie, oni rengbe ka zeresa aboro ka i kapanga kuti roni ya nifura oni niguruhe wa bakure, nirengo, na niirisa. Kura awirina naakusa Ziazia Kekeapai watadu aDVD nga ga fugo nibee ho i asana irakporo ni singia ní ini gu boro nga irangbiängä. Fuoho, i ki gumba gupai funi nga i naida ka yugopa gu maabangirise Ziazia Kekeapai afuhe funi. Ka irakporo akapa akapa, isoke ní rengbe arengba ka ida ka dia gaoni karete nga ga adresi watadu waraga yambahe tipa dunguratise tipa ka ndu ka fuhe fu gu gumeni watadu bakureani nga irangbiängä.
8. Wai rengbe gu dungurati du mbembedii ka undo gu dungurati nga ga fugo nibee?
8 Gu dungurati nga ga fugo nibee rengbe arengba ka sana gu kura dungurati du mbembedii nani bara sa watadu bara ue rogo garã sa tipa si undoyo ti ta tipa aboro rogo gayo bakere dagbarago. Ka si duwo, si naida gu dungurati nga ga fugo nibee mangi dunguratise tipa tungusapai na ki fu arugute tipa ndu ka ta tipa aboro na ki mangi kpia wai ka manga gu sunge re. I rengbe ka fu batungusapai kandara sa kurogo agu abadona dunduko nandu ka manga sunge gbata aboro na ki fu kpia gu rago fuyo i andu ka ta rogoho.
9. Wai rengbe ani ka manga sunge gbata aboro rogo agu aba airangbiängä naadungura tiyo kurogoho tipa sungo na tipa mbaro watadu tipa ka gbia undo?
9 Ani rengbe arengba ka gbata airangbiängä a rogo agu aba ani naini nga i naadungura tiyo kurogoho tipa sungo na tipa mbaro watadu ka gbia gu undo i afuhe fuyo. Si naida abatungusipai vo agu arokoo rẽarẽ na gu ba i andu kurogoho. Si angba gbe ka ani fura na boro sa watadu ue ti bangisa regbo, na kidu na tatamana angianga kaa fura fu aboro dunduko ti bangisa regbo ya. Ka si du nga nyemupai ti gu boro oni nafura na ní, oni mangi mbakadapai tipa ka gbia tironi berewe.
10. Wai rengbe abatungusipai ka gbata aboro rogo ababagaahe?
10 Gu kura gene nga ka mbakada kpia arago nga gu nayugo ababagaahe na ki ndu kurogoho ti wene regbo. Kpiarago sa rengbe kadu na ababaga benzimi rogoho. Gu kuraha kidu na abazunda rokoo, amataamu, abambu rame ti marã, watadu gu kura aba. Ka kpiarago sa duna bangisa ngbatunga aba rogoho, abatungusipai rengbe ka ndu ka gbata aboro rogoho ngba bangisa gene na i ki gbia inohe. Nikpiapai, wa duhe nga dungu airangbiängä ninaaraka rogo abambu rame ti marã, ani rengbe ka sakapa gaani sunge niguruhe fu gu bakeapai duho na ki fu voovo DVD funi gbiati waraga yamba aboro tipa dunguratise tipa i fuhe fu agu airangbiängä duho. Rogo kura aba nga ga bagaahe, ani rengbe ka sanahe gbua singia abamangisunge ho nga airangbiängä watadu airangbiängä ho nga aguyo ninaaye kuho dedede. Ka si du nga sukuru ho tipa airangbiängä rogo gu dagbarago re, ani rengbe arengba ka fu bete gaani aDVD tipa si sungu dagba agu awaraga nga ga sukuru.
11. Tipagine du sunge gbata aboro ti ni ninyanyakipa papara gaani sunge tungusapai?
11 Nyanyakipa Sunge: Si rengbe kadu nibakere sunge tipa ka gbata agu aboro nape gaoni fugo. Kurigure, rogo kura adagbarago, aboro nata ata na vovo aboro nataye kini ndu, si kini du nikpakarapai tipa dungurati nirimisi pa vovo aboro kurogo gu waraga du tipa kepa dagbarago. Ono wa vura duhe wo, rogo dungu arago, sunge gbata aboro nga nyanyakipa papara gaani sunge tungusapai. Yekova, nga gu boro nafu sunge tungusapai furani, ko akparanga aboro te. (Amo. 10:34) Ko “nakpi nyemu aboro bati dunduko, ki ye sa gu inahe nga ga rengo.” (1 Tim. 2:3, 4) Sidu tie, ani mangingo sunge sa na Yekova gbiati akuarani tipa ka gbia aboro dagba arikaaboro na afugoyo dũ nga aguyo duni ‘weneringiyo na kidu na rengo kpotoyo yo.’—Rk. 8:15.
[Box on page 5]
Oni Undo Akuaroni
Ka si du nga dungurati watadu badona naida undo tipa ka gbia agu aboro nape gayo fugo tipa ka tungusapai fuyo, gu babiapai nga ga sunge tungusapai ko rengbe ka sana agu abaakumba du rogo kura adungurati du barambeda ho. Si angba gbe ka ko sana agu adungurati aturongo aturo gbe ya watadu nge agu aboro ange nape gu fugo re rogo gaha rago. Agu adungurati i nasanaha tipa undo re rengbe ka tingidaha fu gaha abatungusipai nga ka i gbia gu boro nape gu fugo re, i ki ke gani adresi ki fuhe fu gu babiapai nga ga sunge tungusapai ko tipa ko fuhe fu gu dungurati watadu badona naida undo re. Agu ababiapai nga ga sunge tungusapai yó du rogo agu adungurati re rengbe ka mangasunge wenengai sa tipa ka undo awirina i tungusipai wenengai rogo gu dagbarago aboro ape dungu afugo rogoho re na tipa ka undo agu aboro duna nyemu rengo i ndu kurogo gu dungurati nape gayo fugo.
Ka abatungusipai gbia gu boro nape gu fugo du kia ní kidu na nyemu rengo tiní (watadu gu boro nga irangbiängä), si naida i hiisi gu fuomu nga Please Follow Up (S-43) nibasa na ki fuhe fu gu bakeapai nga ga gayo dungurati. Gipai re nika sa gupai nga gu boro re gbia gu undo nga ga toro niipo.—Oni bi km 5/11 kpe. 3.
[Box on page 6]
Wai ka Gbia agu Aboro Nape Gaoni Fugo
• Oni sana kura aboro, singia gaoni abawiriki Ziazia Kekeapai, gaoni aborokporo, gaoni abadiasunge, na kura aboro.
• Oni mangisunge na gu buku duna rimo aboro rogoho gbiati gayo anamba terefuni tipa ka gbia agu arimo nge gbe rogo gu fugo re. Oni rengbe arengba ka gbata gu buku du na arimo re rogo Internet watadu rogo agu asirika nga ga terefuni.
• Oni sanahe nitatamana rogo agu aba nafu undo fu aboro, wa gu nga ba geda abuku yo, rogo agu abasunge nga ga irangbii, na rogo asukuru.
• Oni bi gu waraga apangbanga duho tipa ka ino singia atingidapai ho i afuhe fu agu aboro nape gu fugo nga ga ayeaye.
• Oni ndu ku babagaahe yo nga gu nge agu aboro rogoho naye rogo kura ringara.
• Oni moi mbisa na awaraga riihe rogo agu aba agude yunivasiti asungo rogoho, watadu ba aũnduge yo nga gu agu aboro nape gu fugo re asungo rogoho gbe. Oni sana agu aboro asana nangerakurii agu aba re tipa ka mangaha wo.
• Ka gu ndiko nga ga gaoni ringara idihe, oni ngbe gu buku duna arimo aboro rogoho gbiati gayo aadresi watadu gu ringbisapai nga ga kompiuta nagbata arimo aboro rogo Internet.
[Box on page 7]
Gupai Rengbe Ani ka Gumbaha Ho Ani Agbata Aboro Ni
Ka ani duwa abakure na kini gumba rengo ziazia, si rengbe ka sa gupai nga ka aboro kapanga kuti rani ya. Si nidu gbe niwenepai ka yugo waraga rogo gu fugo ani agbata agu aboro napehe.
Fuo fu oni sene, oni rengbe ka yaa: “Ani nagbata agu aboro nape gu fugo nga ․․․․․ tipa wa ka ani yugu gu maabangirise fuyo Ziazia Kekeapai afuhe. Ya mo oni iningo gu boro nape gu fugo re?”
Ho oni agbata airangbiängä ni, oni rengbe ka yaa: “Sene. Ya mo ka mi yugu kurapai foro? [Oni mangisunge na gu masini nga ga vidio i ataata nani bese, ki zaki veresi funi sa rogo gu DVD nga New World Translation—On DVD.] Gere nga papara Ziazia Kekeapai rogo American Sign Language. Gu kura avidio kina berani a nga gu i ambakadihe si undo airangbiängä rogo toro yo. Ya mo mo iningo gu boro nga irangbiängä watadu gu boro agianga pai kusende ya?” Ka si du nga gu boro re arengbanga ka tingidapa boro kandara sa te, si ngba angba ka yamba rimo aba wa gu nga sukuru yo, basunge yo, watadu rogo gu rago ní araka rogoho singia gu ho ní abi ní rogoho.