Ya Mo Oni Rengbe ka Gbia Undo ka Oni Du na Gaoni Dagbarago?

1. Gine nga ga boro dagbarago?

¹ Gine nga ga boro dagbarago? Rogo gu dungurati du na bakere dagbarago behe, ga boro dagbarago nga gu dagbarago i afuhe funi tipa ní naatungusapai rogoho. Isoke, si rengbe kadu barambeda na gu ba ní araka rogoho. Gu buku nga Organized nagumba gupai ti kpewaraga 103 nga: “Padu mo na ga dagbarago barambeda na mo rengbe ka undo ro mo mangisunge na gu regbo du bero bakere gbe tipa tungusapai. Berewe a, mo rengbe ka yamba kura batungusipai ní ye ka tungusapai na mo rogo ga dagbarago.”

2. Wai rengbe boro kaa tungusapai rogo gani dagbarago kini tungusipai berewe na badona?

² Ka Songoda Manga Dezirepai Nga ga Badona: Ka i fu dagbarago furoni barambeda na gaoni basunge, oni rengbe ka tungusapai rogoho ti regbo ongoda watadu mbata fu oni ga ku kporo yo nyemu, na ka gene du, oni rengbe ka kura na gu batungusipai kaa mangasunge barambeda ho. Ka i fu dagbarago furoni barambeda na kpuroni, oni rengbe ka manga dezirepai rogoho nyemu na gaoni aborokporo. Ka si du nga oni ndu tipa tungusapai zanga ndu tipa gu dunguratise du tipa sunge tungusapai, si naida oni mangi kparakpee amanga mbata fu Yekova tipa ko rugu roni. (Frp. 4:6) Kurigure, si aidanga oni naga kina kubani kisusi te, ono si naida oni kparaka gu regbo oni adiaha kaa mangasunge rogo gaoni dagbarago na gu regbo oni adiaha kaa songoda gu mbakadapai nga ga dungurati du tipa gu tungusapai nga ga badona nirengberengbehe. Ti digido aposo ho badungu aboro adunguratiyo ni tipa gu dunguratise nga ga tungusapai, si naida gupai nga oni ndu ka songoda gaoni badona nga ga sunge tungusapai.

3. Gini amaku du ti du boro na gani dagbarago nga ga tungusapai?

³ Amaku: Ho du boro ni na gani dagbarago, ní rengbe ka tungusapai ti ai gu regbo du ní na regbo beni. Ní nadia bakere regbo kuti tungusapai kuba gu nga ka dia bakere regbo kuti nduge. Si nasaha taata fu kura aboro i mangisunge ni amoundo abazakigene watadu ni abazakigene. Wa duhe nga agu aboro duna nyemupai barambeda na ní, si taata tipa ka karagatise berewe fuoyo ka wirika Ziazia Kekeapai naayo. Badungu aboro bi gupai nga tungusapai rogo gayo dagbarago naundo yó tipa i inidi tiyo na airakporo na ki sayo i du naa kido, gbe ka gene du tipa i tungusipai rogo gu dagbarago re bara dunguhe mbata fu i gasihe fu dungurati wa ka i fuhe fu kura batungusipai. Ya mo oni nabihe nga ka oni mangisunge rogo gaoni dagbarago na gaoni aborokporo, si rengbe ka undo roni oni kiisi gaoni sunge tungusapai?—2 Tim. 4:5.