Agarã Sa Kama Kuti Takapande Kindo!
1. Ginipai i angarasi ga Yekova aboro i mangihe agarã sa kama kisayo?
1 “Oni bi Bakindo wa ko azogarago! Oni nga gako abandusunge. Sidu tie, oni takipande, oni takipande, oni takipande Bakindo na gako zogarago.” Agu afugo i agumbaha agarã wa sa kama kusayo re, si angarasi ga Yekova aboro i takipande Kindo rogo zegino dunduko. Gure nga gupai ani namangihe! Wakina agu aKristano naadu mbata, ani ima tungusa gu wene pangbanga nga ga Kindo “rogo arago tii ngbangbaturũ” no dunduko. (Koro. 1:23) Ka ani ngere agarã wa sa kama kusayo, ginipai ani namangihe tipa ka takapande ga Mbori Kindo? Wai rengbe ani ka ndu ku mbatayo kindi kaa takapande gu Kindo re wa ani ambeda ka kiso agarã 100 wa gu Kindo re atona zogarago?
2. Wai gaani abuku natakipande ga Mbori Kindo?
2 Agu Apai Mangi Kusayo: Tipa dungu agarã, gaani abuku aima undo na takapande ga Mbori Kindo. Natona rogo gu garã nangia 1939 gaani bangua magazini na gu riipai nga: Ngbaõbambu Sinziri Natakapande ga Yekova Kindo. Gi magazini re nafura dedede tipa Kindo na gupai gu Kindo re nika mangaha. Gu magazini nga Awake! nafura a tipa Kindo kini nyakasi gupai nga kinaha sa nika nyasa riipa gu kpakaraapai aboro agbia tiyo na ni. Si rẽarẽ si du nga kina agi amagazini re sa i asaha ku rogo badungu afugo na kini kparakaha fu badungu aboro kisusi kura amagazini rogo zegino dunduko!—Yugo. 14:6.
3. Gini ngbatunga aũsunge ani namangisunge na ni tipa ka takapande ga Mbori Kindo?
3 Ga Yekova aboro mangisunge na abiri ngba arikoho dũ tipa ka takapande ga Mbori Kindo. Bakuru kusayo, ani amangisunge na afonoo, agu atarambiri naadu na aũkiiso-fugo rogo yo, na aradio tipa ka gbandaka wene pangbanga nga ga Kindo. Agi aũsunge re aundo rani ani gbandaka wene pangbanga ti gu regbo atakipande pa Kindo angenga ya. (Tam. 19:4) Vuru agu agarã susi bambeda kusayo, ani tona ka mangasunge na gu gaani bangiriba nga ga Internet nga jw.org tipa ka takapande Kindo fu amirioni aboro—kodi he na agu aboro naraka rogo agu aringara i naima rugusa gaani sunge tungusapai rogoho.
4. Gini kparakpara agene tungusapai ani namangisunge na ni?
4 Ga Yekova aboro ima mangasunge a na kparakpara gene tungusapai tipa ka takapande gu pangbanga nga ga Kindo. Nikpiapai, natona bara gu garã nangia 1995, kodihe kuti tungusapai kini tanga na ni ti akporo, ani atona tungusapai rogo agu aba aboro arugusa atarambiri rogoho, ba bagaahe, gbiati agu aba aboro andu kaa susungo rogoho. Bambeda kusayo, ani atona gu du rimoho nga kparakpara manga dezirepai vuru bakere gbata, rogo gu bakere agbata du rogo zegino dunduko. Kurigure, badungu adungurati natungusapai rogo gayo dagbarago nigbaraga yo abuku rii guhe i aturaha atura ki ndu na ni ku rogo agu aba du aboro rogoho ni badungu yo. Ono tie, tungusapai kini tanga na ni ti akporo nga gaani bangua gene tungusapai.—Amo. 20:20.
5. Gini amomu dungu rani nika du na ni rogo gu garã nga ga sunge naye re?
5 Agu Apai Nika Manga ku Mbatayo: Ti tonatona vovo gu garã nga ga sunge rogo Mbirinvuo, badungu aboro nika tona tungusapai ni abazakigene. Ya mo mo rengbe ka tonaha na yo? Ka gene adunga ya, ya mo mo rengbe kaa tungusapai ni moundo abazakigene dedede? Singia mo rengbe ka tungusapai ni bazakigene watadu gene wa ka mo mangihe wo te, Yekova nika fu maku afu kurii agu asadatise dunduko mo nika mangaha tipa ka takapande Kindo.—Mara. 3: 10.
6. Tipagine gu diwi nga Tanvuo 2014 nika du ti ni ni kparakpara diwi?
6 Rogo gu diwi nga Tanvuo 2014, agarã nika da nga 100 wa i asigira ga Mbori Kindo. Si ni bawenepai nga rogo gu diwi re, Ngbaõbambu Sinziri nikaa takapande ga Mbori Kindo. Si angba gbe ka oni kparakaha fu badungu aboro. Wa ani angera ku mbatayo, ani ni ndunga andu kindi ku mbatayo wa du ani nibasasa dunduko kaa tungusa “wene pangbanga tipa ga Mbori ngbi” fu agu aboro dunduko nadegatuyo.—Amo. 8:12.