Gaani Sanduki-Aũsunge Nga ga Yugopai
1. Ngba gini gene du aKristano wakina abambakadiahe?
1 Abambakadiahe naamangasunge na dungu aũsunge. Kura aũsunge kinaho i amanga kina kparakpara asunge na ni ti kura aregbo, ono kura bangua aũsunge kinaho i amangasunge na ni dedede. Agu abambakadiahe du na inohe nidu dedede na gayo bangua aũsunge rogo gayo sanduki-aũsunge, na si nga agu i naini mangasunge na ni gbe. Ziazia Kekeapai nangarãsa aKristano dunduko i futiyo tipa sunge tungusapai na kidu “wa gu mangisunge adu nga na zee ya.” (2Tim. 2:15) Gini ũsunge duho nyakipaha gbe rogo gaani sanduki-aũsunge? Si nga Fugo Mbori, nga gu nyanyakipa ũsunge ani amangasunge na ni ka ‘sa aboro ni abawiriki.’ (Mt. 28:19, 20) Sidu, si naida ani mangi ome tipa ka ino mangasunge na ni wenengai wa ka ani ‘yugu ga rengo pai nzunzu.’ Ono tie, kura aũsunge kina rogo gaani sanduki-aũsunge ani amangasunge na ni dedede nga gu si aida aKristano dunduko ini wai ka mangasunge na ni wenengai tipa ka yugo rengo fu aboro. —Snz. 22:29.
2. Gini bangua aũsunge nga ga yugopai du berani?
2 Gaani Bangua Aũsunge Nga ga Yugopai: Gini kura aũsunge si aida ani mangisunge na ni kupati Ziazia Kekeapai? Gu bangua ũsunge ani ayugo gu rengo nga ga Ziazia Kekeapai na ni nga Gini Apai Nzunzu Ziazia Kekeapai Ayugoho? Fuo nyasa ani gi buku re na gaani bawiriki Ziazia Kekeapai, ani naamangasunge na “Keep Yourselves in God’s Love” tipa ka undo ní ní mangisunge na agu arugute nga ga Ziazia Kekeapai rogo gani raka. Sidu, si naida ani ini mangasunge na agi awaraga du ue re wenengai. Kura aburosua kinaho si aida si duadu rogo gaani sanduki-aũsunge nga ga yugopai. Gu Wene Pangbanga Naye be Mbori du dagba gaani bangua aũsunge ka tona wisigo Ziazia Kekeapai na aboro. Ka si du nga gaani dagbarago na agu aboro ainongo gedapai gbe ya watadu nape gu fugo du na kina bete awaraga rogoho watadu adunga awaraga rogoho ya, ani ima rengba ka mangasunge na Oni Degeturoni fu Mbori watadu Oni Degeturoni fu Mbori Tipa ka Raka Nyeanye Kindi. Gu bangua ũsunge du tipa undo abawiriki Ziazia Kekeapai i ini riigbu nga Ada Namanga Gupai Yekova Akpinyemuhe Areme? Agu avidio rengbe ka undo rani ani sa aboro ni abawiriki nga Gupai Si Aida Mo Wiriki Ziazia Kekeapai Ti Ni na Ginipai Ninaamanga Bambu Kindo yo?, si nga agu aũsunge si aida ani wiriki mangasunge na ni wenengai a.
3. Gu Gaani Sunge Nga ga Kindo nikaa kura ku mbatayo nika undo rani ani mangi ginipai?
3 Gu Gaani Sunge Nga ga Kindo nikaa kura ku mbatayo nika undo rani ani ini mangasunge na gu bangua awaraga du berani rogo gaani sanduki-aũsunge nga ga yugopai. Ka ani asadi ka mangasunge wenengai na agi aũsunge re, gure nga ani namangapai kuti gu rugute naya: “Mo bérẽ pa tiro, na ga yugopai; ki ka kuti agi apai re; bambiko manga mo wa gere mo abátasa tiro na agu yo nagia paha ngba ro.”—1Tim. 4:16.