Mo Ima Rengba ka Gbia Agu Amaku Nga ga Bakusirani Nyeanye kindi

Mbori akido gu nebi nangia Abarayama nga titako sa nika ye na amaku fu “arikaaboro zegino dunduko.” (Bambata Pai 22:18) Da du nga gu tita Abarayama re?

Agarã wa 2,000 bakuru kusayo, Mbori afu ome fu Yesu nangia tita Abarayama ko mangi iiriwoapai. Gu iiriwoapai re aayugo gupai nga gu kidohe Mbori amangihe fu Abarayama nika ye fu arikaaboro vurube Yesu.—AGaratio 3:14.

Gu iiriwoapai Yesu amangihe aundo agu aboro naabiko i ini gupai nga ko du Mbori asiako ko fu maku fu aboro, na gu iiriwoapai re aayugo wai a Mbori nika mangasunge na ko ka fu maku fu aboro nyeanye kindi. Mo bingo wai ga Yesu iiriwoapai ayugopa gu wene asino du tiko.

Nyemuse—Yesu ahusi aborokaza.

Ti kura regbo sa, boro ngbataka azungodi Yesu tipa ko husi ko. Yesu atai beko ki zadi ko na ki gumba gupai nga: “Mi nakpi nyemu he!” nibasa, gu ngbataka re ki go kusayo.—Marako 1:40-42.

Gu sino nga ga gamahe—Yesu arigi agu aboro naadu na gomoro.

Yesu anaaidanga gupai nga aboro ra na gomoro te. Ko arigi akutu aboro bara ue ngba iiriwo gene ni ngesa ko gu bete kpakuto na bete atĩo naadu ho. (Matayo 14:17-21; 15:32-38) Tingbafuo aboro ri riahe, i dunduko nambiki na yangara riahe ki nye kpaima.

Nunga—Yesu azingisi agu aboro nakpiki.

“Nunga” afõngbadu Yesu yo ko zingisi bangisa wiri dekurugbo nga guri naadunga na kura boro ka ngerafuo ri berewe ya.—Ruka 7:12-15.