Gamo Nyemuse Gbiati Tambuahe Tipa Yekova Nika Fõngbaduroyo Mo Zi Bapatiza

1-2. A wa duhe rogo Amokedi 8:27-31, 35, 36, 38, ginipai nafõngbadu gu banyaki yo nangia boro Etiopia ko zi bapatiza?

YA MO mo nakpinyemu ka zio bapatiza ni ga Kristo bawiriki? Nyemuse gbiati du na tambuahe ima fõngbadu dungu aboro yo i mangi gu siapai re. Ani wisigingo pai tipa gu banyaki naamangasunge kua gu nakindo yo nangia ga Etiopia ri.

² Gu boro Etiopia re amangipai ni ipiipihe kuti gupai ko awirikihe rogo Ziazia Kekeapai yo. (Oni gedi Amokedi 8:27-31, 35, 36, 38.) Ginipai nafõngbadu ko yo? Si tie ziazia nga ko aima du na tambuahe tipa Fugo Mbori; ko aageda bete averesi rogo Yesaya wa ko aandu rii gako ngbagida vura. Na ho Firipo afura ni na gu kumba re, ko aima yugo tambuahe tipa agu apai Yesu amangihe fuko. Ono tipagine gu banyaki re andu ti ni ku Yerusarema yo? Mbiko ko aima sonosa nyemuse tipa Yekova. Waigu ani aino gipai re? Ko aima digo niirisi Yekova Yerusarema yo. Si nawira gupai nga, gi kumba re aima mbu gu pambori i avunguko ku rogoho na ki kodi tiko na gu yangara rikaaboro nga aguyo naakpara gayo raka fu ndikidi Mbori. Kina gi bangisa nyemuse tipa Yekova re du nasako ko mangi kura nyanyakipa diandue berewe nga ka zio bapatiza na ki da ni ga Kristo bawiriki.—Mt. 28:19.

3. Ginipai rengbe ka ká na boro ti zio bapatiza? (Oni bi gu Sanduki nga, “Kpotoroyo wa Gini Ngbatunga Sende?”)

³ Nyemuse tipa Yekova rengbe arengba ka fõngbaduroyo mo zi bapatiza. Ono nyemuse rengbe arengba a ka ká na mo ti zio bapatiza. Ngba gini gene? Ani berẽnga kurii gi bete akpiapai re. Si ima rengba kadu nga mo ima kpinyemu abakureamo gbiati gu gamo aborokporo angianga ndikidi aidipase ya kisusi, na mo ima rengba kaa bakabangiro nga ka mo zi bapatiza, i nika soga ro asoga. (Mt. 10:37) Watadu mo ima rengba ka kpinyemu agu apai Yekova asogaha, na si ima rengba kadu ni mbumbuhe foro mo mbu agu apai re. (Tam. 97:10) Watadu si rengbe kadu nga mo asono na gu sino nga ga irisa agu asino atitase du na ngbanya dagbaha na ziree pambori. Mo ima rengba kaa kpinyemu berãpa gu weneapai ninaamanga ti regbo agu apumbo re. Ni sangbana gipai re, si ima rengba kadu foro ni mbumbuhe mo mbu iriso gu sino atitase nga gu naba gberãrago ti Yekova. (1 Kor. 10:20, 21) Gu sanahe si aida mo sana tiro na ni nga, “Ginihe watadu da mi nakpinyemu ni kisusi?”

GU BORO SI AIDA ANI KPINYEMU NI KISUSI

4. Gini bangua ndupai rengbe ka sa boro ni zi bapatiza?

⁴ Badungu weneapai gu duho foro si aida mo kpinyemuhe na kidu na tambuahe tipaha. Ni kpiapai, zavura mbata fu mo tona wisigo Baibiri na aDezire Yekova, si ima rengba kadu nga mo aima sonosa dudunguro irisa tipa Baibiri. Na si ima rengba kadu nga mo aima sonosa nyemuse tipa Yesu. Na fuo ino mo aDezire Yekova, si rengbe kadu nga mo ima kpinyemu kaa koda tiro na yo. Ono anga pa kpi mo nyemu gu weneapai re rengbe ka saro mo kparatiro fu Yekova na ki zi bapatiza te. Gu bangua ndupai rengbe ka saro mo zi bapatiza nga gamo nyemuse tipa Yekova Mbori. Ho mo nakpinyemu Yekova ni kisusi apai dunduko, mo ambunga ai pai watadu ai boro ni ká na mo ti irisoko te. Nyemuse tipa Yekova nika fõngbadu ro yo tipa mo zi bapatiza na si nika undo ro a tipa mo nye ni ruru ro fuko tingbafuo gamo bapatiza.

5. Gini asanahe ani nika sakapai tipaha?

⁵ Yesu aya si naida ani kpinyemu Yekova na ngbadurani yo dũ, na mbisimorani dũ na gaani berã dũ na gaani ome dũ. (Mk. 12:30) Waigu rengbe mo ka wirika ngbatunga gi dudunguro irisa gbiati nyemuse re tipa Yekova? Pa berã ani kuriipa ga Yekova nyemuse tipa rani nasarani ani kpinyemuko a. (1 Yo. 4:19) Gini kura bipai gbiati sino mangaapai mo nika du na ni ho mo nika sonosa gu ngbatunga nyemuse ni du na nyanyakipaha re?b

6. Ringbisihe kuti ARomo 1:20, gini kura gene sa rengbe mo ka wirikapai tipa Yekova ngbaha?

⁶ Mo wirikipai tipa Yekova vurube gako kusikusiahe. (Oni gedi ARomo 1:20; Yugo. 4:11) Mo berẽkuriipa gu tatamana du ni yuguyuguhe rogo gu gene Yekova akusi angua gbiati anya ngbaha. Mo wiriki bete apai tipa gu banaru gene i ambakadi kpotoro ngbaha. (Tam. 139:14) Na mo berẽnga kuriipa gu ome Yekova amoihe ku rogo uru yo, na mo tingidi gupai nga uru nga kerekuru sa dagba abirioni akerekuru yo.c (Yes. 40:26) Ho mo aberã ni kuriipa ga Yekova kusikusiahe, mo nadu na bakere irisa koyo du ko ni. Ono tie, pa ino mo gupai nga Yekova nga iratatamana na ko na ome tiko nga papara mburu gamo pagume na ko gbua. Tipa ka sonosa dudunguro nyemuse tipa Yekova, si naida mo ini dungu apai tipa ko.

7. Tipa kadu na dudunguro nyemuse tipa Yekova, ginipai si aida mo idi kutini?

⁷ Si naida mo idi kuti gupai nga Yekova ima kpinyemu ro nzunzu. Ya mo mo naabihe ni mbumbuhe ka ida kuti gupai nga Bakusi ngbangbaturũ na kpotosende ima inopai tipa ro na ko nangera angera fuo ro? Kangia wo duhe, mo tingidi gupai nga Yekova “aturã nga na ani wa sa te.” (Amo. 17:26-28) Ko “nawisiga kpoto aboro yo dunduko,” na ko nakido ro kina wai Davide akido Soromo nga “ka mo agbata ko, mo abí ko abi.” (1 Peka 28:9) Nirengo mo nawirika Ziazia Kekeapai awere mbiko gu ndupai Yekova aima gumbaha nga, ‘mi ima gbero’ fuo re. (Yere. 31:3) Wa mo nikaa rugatiro bakere gbe na pa gu dungu apai Yekova namangihe foro, kinawo a gamo nyemuse tipa ko nikaa kio ni bakerehe gbe.

8. Waigu rengbe mo ka mangapai kuti ga Yekova nyemuse?

⁸ Gene sa ani amanga pai ngbaha kuti ga Yekova nyemuse nga nifura ani na ko rogo kparakpee yo. Gamo nyemuse tipa Mbori nika sona wa mo nikaa pe gamo akpakarapai fuko na kini tambua ko tipa agu apai dunduko ko namangihe foro. Na gu pabakure du dagbaro na Yekova nika nyaka a wa mo nikaa bi wai ko akaragapai kuti gamo akparakpee. (Tam. 116:1) Mo nika du na gu kido nga ko ima rugatiko na mo. Ono tipa kadu mbembedi na Yekova, si naida mo rugutiro na gako gene aberãpai. Na si naida mo ini gupai ko aidaha bero. Gene sa rengbe mo ngbaha ka gbia gu inohe re nga ni wirika mo Fugoko, nga Ziazia Kekeapai.

9. Waigu rengbe mo ka yugoho nga mo na tambuahe tipa Baibiri?

⁹ Mo wiriki wai ka yugo tambuahe tipa Fugo Mbori, nga Baibiri. Kina Baibiri sa du na agu arengo rogoho du tipa Yekova na gako ringbisapai tipa ro. Mo rengbe ka yugo gamo tambuahe tipa Baibiri ni geda mo ho na aˈuru dunduko, ni mbakada mo tiro wenengai tipa gamo wirika Baibiri, na ni manga mo pai kuti gupai mo awirikaha. (Tam. 119:97, 99; Yo. 17:17) Ya mo mbakadapai bero tipa geda Baibiri? Ya mo mo naagedaha na aˈuru dunduko?

10. Ginipai sa dagba agu apai yo nasa Baibiri si du kia?

¹⁰ Pai sa dagba agu apai yo nasa Baibiri si du kia nga, si na apangbanga rogoho be agu aboro naaima bi Yesu ni bangiriyo. Si nga gu yangara buku nasakapai tipa agu apai Yesu namangihe tipa ro. Wa mo nikaa wirikapai tipa gupai Yesu apehe na ki mangihe, si nawira wa mo nika duadu na nyemu ka zio bakure na ko.

11. Ginipai nika undo ro mo kpinyemu Yekova?

¹¹ Mo sonosi gamo nyemuse tipa Yesu, na gamo nyemuse tipa Yekova ki sono. Tipagine? Mbiko Yesu na kina boro agu asino tiko duti Bako. (Yo. 14:9) Sidu, wa mo nikaa ndu kindi kumbatayo kaa wirikapai tipa Yesu, kinawo a mo nikaa rugatiro na Yekova na kini bi ko na nyanyakipa ko. Mo berẽnga pa gu nunga Yesu ayuguhe fu agu aboro kura aboro anaabi yo nga sunge tiyo te bambiko gupai nga i angia rungorungo aboro, aboro kaza, gbiati agu aboro adunga gene beyo ya. Mo berẽnga a kuriipa agu arugute ko afuhe foro na wai gamo raka ada ni wenehe mbiko dega mo turo kutini.— Mt. 5:1-11; 7:24-27.

12. Wa mo nikaa wirikipai tipa Yesu, ginipai si nika fõngbaduroyo mo mangihe?

¹² Si nawira wa gamo nyemuse tipa Yesu nika da ni ba nyanyakihe gbe ho mo ni kaa berã ni dudunguro kuriipa gu motumo ko afuhe tipa i mbupai furani ti gaani aingapai. (Mt. 20:28) Ho mo aruga tiro ni na gupai nga Yesu du naadu na nyemu kafu tiko tipa ka kpi tipa ro, si ima rengba ka fõngbaduroyo tipa mo saberã ro ti gamo aingapai na ki gbata ga Yekova mbupai. (Amo. 3:19, 20; 1 Yo. 1:9) Na wa mo nikaa kpinyemu aYesu na Yekova, si nika saro a mo du na nyemu kadu mbembedi na agu aboro nakpinyemuyo.

13. Ginihe Yekova nafuhe foro?

¹³ Mo sonosi gamo nyemuse tipa agu aboro nakpinyemu Yekova. Gu gamo aborokporo angianga ndikidi aidipase ya gbiati agu abakureamo mo anidu na yo mbata arengbanga ka ino ndu gupai mo aida ka kpara tiro ti ni fu Yekova te. I ima rengba ka tona kaa soga ro. Yekova nika undo ro aundo ni fuko agu aborokporo foro nga ga toro yo. Ka mo nye mbembedi na agu aborokporo nga ga toro yo re, mo nika gbia gu nyemuse agbia gbiati undo mo aidaha. (Mk. 10:29, 30; Eb. 10:24, 25) Wa regbo nikaa susa, gamo aborokporo ima rengba ka kodatiyo na mo oni irisi Yekova na yo na kini raki ringbisihe kuti gako arugute.—1 Pet. 2:12.

14. A wa du he rogo 1 Yoane 5:3, ginipai mo nainihe tipa ga Yekova arugute?

¹⁴ Mo wiriki wai kadu na tambuahe tipa ga Yekova arugute na kini mangipai kutini. Mbata fu mo ye ka ino Yekova, si ima rengba kadu nga mo aima sia agu apai du ni wenehe tipa ro watadu gu du ni gbegberẽhe, ono awere, mo ima bi gupai nga ga Yekova arugute ima ngba kisusi. (Tam. 1:1-3; oni gedi 1 Yoane 5:3.) Mo berẽnga kuriipa gu rugute nga ga Baibiri du tipa akumbakuadee, dereakumba, avunguagude, gbiati agude. (Ef. 5:22–6:4) Ya mo gamo riikporo gbianga bakere ngbarago mbikopa manga oni pai kuti agu arugute re? Ya mo mo da ni wene boro mbikopa gia mo sangba gu ga Yekova rugute du tipa gini ngbatunga abakure si aida mo sia yo? Ya mo mo na bakere ngbarago awere? (Snz. 13:20; 1 Kor. 15:33) Si nawira wa karagapai kuti agu asanahe re nga ii.

15. Ginipai rengbe mo ka mangaha ka si du nga mo naida undo tipa wai ka mangapai kuti agu arugute nga ga Baibiri?

¹⁵ Ti kura aregbo, si ima rengba kadu foro ni mbumbuhe tipa mo ini wai ka mangapai kuti agu arugute nga ga Baibiri nga gu mo awirikaha. Si nga ndu gupai Yekova amangasunge ti ni na gako riigbu tipa si kusi agu awaraga foro du mburuhe rii Baibiri nga gu rengbe ka undo ro mo ini wai ka kpara wenepai ti gbegberẽhe. (Eb. 5:13, 14) Ho mo ageda agu awaraga re ni na kini wirikihe, mo nika bi agu apai abi rogoho nga gu rengbe mo ka mangapai kutini, na si nawira wa mo nika duadu na nyemu kadu ni papara ga Yekova riigbu.

16. Waigu Yekova nambakadi gako aboro?

¹⁶ Mo wiriki badungu apai tipa ga Yekova riigbu na kini songodihe. Yekova ima mbakada gako aboro ku rogo adungurati; Wiriko nga Yesu nga barii agu adungurati re dunduko. (Ef. 1:22; 5:23) Yesu ima sia umba badona akumba nga mbedimbedi aKristano tipa i naangbembatayo kaa rugapa agu asunge ko aida si mangi ti gi gaani regbo re. Yesu ayambu gi badona akumba re nga “kangara moyambu,” na i nabi gu gayo tindiro nga ga undoro mo mbedi na Yekova na ki banda gamo pagume na ko na nyanyakipaha. (Mt. 24:45-47) Gene sa dagba agu akuraha yo ruru kangara moyambu aundo ro ngbaha nga, i nasia agu abaakumba naima rẽ tipa i naabanda ro rogo toro yo. (Yes. 32:1, 2; Eb. 13:17; 1 Pet. 5:2, 3) Abaakumba na nyemu ka manga ai gupai rengbe yo ka mangaha tipa ka fu wasa foro, na ka undoro mo du mbembedi gbe na Yekova. Ono gu kura nyanyakipa pai sa dagba agu akuraha yo rengbe yo ka mangaha foro nga ka undo ro mo yugupai fu kura aboro tipa Yekova —Ef. 4:11-13.

17. Ringbisihe kuti ARomo 10:10, 13, 14, tipagine ani afura na kura aboro ti ni tipa Yekova?

¹⁷ Mo undo gu kura aboro i wiriki wai ka kpinyemu Yekova. Yesu aya fu apefuoko i yugupai fu kura aboro tipa Yekova. (Mt. 28:19, 20) Ani ima rengba ka mangapai kuti gi zinahe re mbiko ani ima inoho nga si nga gupai si aida ani mangihe. Ono wa gamo nyemuse tipa Yekova nikaa sona, mo nika du na kina gu bangisa bipai agu amokedi nangia Petero gbiati Yoane adu na ni nga aguyo naya: “Ani arengbanga ka mbu fura tipa agu apai ani abihe na ki gihe te.” (Amo. 4:20) Ka ani undo boro ni kpinyemu Yekova, si nika sarani ani du na bakere ngbarago. Mo berẽnga pa gu bakere ngbarago gu batungusipai nangia Firipo adu na ni ho ko aundo boro Etiopia ni ko wiriki agu arengo du rogo Ziazia Kekeapai yo na ki zi bapatiza! Ho mo awirika Firipo ni na ki gisangba gu ga Yesu zinahe du tipa tungusapai, mo nayugo na ni nga mo naida kada ni Dezire Yekova. (Oni gedi ARomo 10:10, 13, 14.) Ti gu regbo re, si nawira wa mo nika sana kina gu bangisa sanahe boro Etiopia asanaha nga: “Gine naza re ti bapatiza?”—Amo. 8:36.

18. Ginipai ani nika wisigoho rogo gu kekeapai naye fuo gere?

¹⁸ Mo nika manga kere nyanyakipa diandue kisusi rogo gamo raka yo ho mo nika diaberã ni ka zio bapatiza. Mbiko wa duhe nga si nga kere nyanyakipa diandue, si naida mo wisigipa agu apai si akodaha sirisiri. Ginipai si aida mo inihe tipa bapatiza? Gini apai si aida mo mangihe mbata fu bapatiza na tingbafuo bapatiza? Gu kekeapai naye fuo gere nika karagapai kuti agu asanahe re.