Wai ka Undo Abawiriki Ziazia Kekeapai I Mangi Sonakumbatayo ki Da ti Zio Bapatiza—Bambata Paparaha

1. Ginipai 2 AKorindo 3:1-3 apehe nga gu naundo rani ani rugutirani na gupai nga pa yugo Ziazia Kekeapai fu boro na ki bi ni ni nazi bapatiza nga nyanyakipa gamahe be Yekova? (Oni bi gu sura duti kpotoho.)

WAIGU mo nidu ho mo nibi bawiriki Ziazia Kekeapai ni nga gu ni du rogo gu dagbarago nga ga gamo dungurati ni nazi bapatiza? Nirengo, mo nidu na bakere ngbarago. (Mt. 28:19) Na ka si du nga mo du nawisigi Ziazia Kekeapai na gu vovo bawiriki re, mo naadu na bakere ngbarago ho ni azio bapatiza ni! (1 Tesa. 2:19, 20) Gu vovo abawiriki nazio bapatiza re nga wene ‘awaraga tipa mbakada rimo,’ angianga fu kina agu aboro nawisigi Ziazia Kekeapai na yo sa ya, ono fu dungurati dunduko a.—Oni gedi 2 AKorindo 3:1-3.

2. (a) Gini nyanyakipa sanahe si aida ani berẽkuriihe, na tipagine? (b) Ginihe nga wisigo Ziazia Kekeapai? (Oni bi rukutu kekeapai.)

² Si ni wenepai ka bi gupai nga rogo agu agarã biama susi kusayo, ani ima wisigo Ziazia Kekeapaib na aboro du bangeyo wa amirioni bawe rogo adiwi dunduko rogo zegino dũ. Na rogo kina gu bangisa agarã re, bange aboro naima susa 280,000 naazi bapatiza rogo agarã dunduko ni aDezire Yekova na ni vovo abawiriki nga ga Yesu Kristo yo. Waigu rengbe ani ka undo badungu amirioni abawiriki Ziazia Kekeapai i zi bapatiza? Yekova nafu momu kindi fu aboro tipa i da ni gako aDezire. Si du nga ndu gupai si aida ani mangi asadatise ti ni ka undo yo i mangi sonakumbatayo ki da ti zio bapatiza ni ipiipihe. Regbo nasusa ni kina boro ipo!—1 Kor. 7:29a; 1 Pet. 4:7.

3. Ginipai ani nika sakapai tipaha rogo gi kekeapai re nibipa wisigo Ziazia Kekeapai na boro?

³ Mbiko gupai nga si ni nyanyakipa pai ka sa aboro ni abawiriki awere, Riigbu Bipasunge asana abe-basunge tipa gupai rengbe ani ka mangaha tipa ka undo badungu gaani abawiriki Ziazia Kekeapai i mangi sonakumbatayo ki da ti zio bapatiza. Rogo gi kekeapai re gbiati gu ngbefuoho, ani nika bi gupai rengbe ani ka wirikaha be agu abazakigene, amokedi, na ababi adungurati du na bakere inohe.c (Snz. 11:14; 15:22) Si nika sakapai tipa gupai si aida abayugu Ziazia Kekeapai gbiati gayo abawiriki Ziazia Kekeapai mangihe tipa ka sa wisigo Ziazia Kekeapai si du na bakere diabese. Rogo gi kekeapai re, ani nika sakapai tipa apai bisue si aida bawiriki Ziazia Kekeapai mangihe tipa ka manga sonakumbatayo ka zio bapatiza.

MANGA WISIGO ZIAZIA KEKEAPAI NA APOSO DUNDUKO

4. Ginipai si aida ani inihe nibipa wisigo Ziazia Kekeapai na boro ngbadimo kpuni?

⁴ Badungu awirinarani namanga wisigo Ziazia Kekeapai na aboro kina ngbadimo ga agu aboro re akporo. Wa vura duhe nga gere nga wene gene tipa ka tona sonosa nyemu Ziazia Kekeapai ti boro, gi ngbatunga sakapai re nidu dedede ni guruhe na si naamanganga rogo aposo yo dunduko te. Tipa ka sonosa nyemupai kumbatayo, gu kura awirina ninaasana gu boro du na nyemupai tipa gani namba terefuni na ki yambu ni watadu ki kepai fu ni tipa ka pepa pai rogo Ziazia Kekeapai yo fu ni. Ngbatunga gi sakapai re ima rengba ka ndu tipa adiwi ka si akusanga wene surungbaha ya. Ya mo bawiriki Ziazia Kekeapai amanga sonakumbatayo nzunzu ki da ti kparatise na ki zi bapatiza ka si du nga gure nga gu yangara regbo ni adiaha na gu ome ni amangaha tipa kaa wisigo Fugo Mbori? Si nawira gupai nga ni amanganga sonakumbatayo te.

5. Ringbisihe kuti Ruka 14:27-33, ginipai Yesu anyakasipaha nga gu rengbe ka undo rani rogo sunge sa aboro yo ni abawiriki?

⁵ Ti kura regbo sa, Yesu amangisunge na kpiapai tipa ka sakapai tipa gupai si aida boro mangihe ka ni aida kada ni gako bawiriki. Ko afura tipa gu boro naida ka dua gbanga bambu na tipa bakindo nga gu ni naida ka ndu tipa vura. Yesu agumba gupai nga si naida gu boro naida ka me bambu ‘sungu mbata, ka geda paha’ watadu ka ino pa gu marã si aidaha tipa ka nyasa dua gu gbanga bambu re, na si naida gu bakindo re ‘sungu ka baka bangirini mbata’ tipa ka bihe singia gani aborovura adigiso gupai i aida ka mangaha. (Oni gedi Ruka 14:27-33.) Wakina gure a, Yesu aima ino gupai nga si naida gu boro naida kada ni gako bawiriki wisigi agu apai wenengai si aidaha tipa kada ni gako bawiriki. Mbiko gu ndupai re, si naida ani ngarasi gaani abawiriki Ziazia Kekeapai tipa i naawisigo Ziazia Kekeapai na aposo dunduko. Waigu rengbe ani ka manga gupai re?

6. Ginipai rengbe ani ka asada ka mangaha tipa kadu na agu abawiriki Ziazia Kekeapai berani namanga sonakumbatayo?

⁶ Mo tonaha na dia mo regbo ni wiri gbangaha kuti gu wisigo Ziazia Kekeapai mo amangaha na boro ngbadimo kpu ni re. Isoke mo ima rengba ka saka averesi ue na ni rogo Ziazia Kekeapai yo ti ai gu regbo mo andu fuo ni. Ho irakporo nika du ni na nyemu ka wirikapai ni gbangaha, mo ima rengba ka sana ni singia ba ho nga gu rengbe oni ka sungo rogoho tipa ka ndu na gaoni wisigopai kumbatayo. Gu karagapai irakporo nika fuhe nika yugo pa wai nyakipa wirika Ziazia Kekeapai fu ni. Niyangaraha, tipa ka undo ni ni wirikipai ni ipo, mo ima rengba ka sana ni singia ni rengbe ka ida kaa wirikapai bara ue vuru poso yo. Wa vura duhe wo, kura dungu apai kinaho si aidaha kisusi gu gbua nga kaa wirikapai na ni bara sa watadu bara ue vuru poso yo.

MO MBAKADI GUPAI MO ANDU KA WIRIKAHA NA BORO

7. Waigu rengbe bayugupai ka mbakada gupai wenengai ni nika wirikaha na boro?

⁷ Wangia mo bayugupai, si naida mo mbakadi gupai wenengai mo andu ka wirikaha na boro ti ai gu regbo mo andu fuo ni. Mo rengbe ka tonaha na geda mo gupai mo nika wirikaha na ni na ki bi agu averesi du rogoho. Mo moi gu memeapai ku berãro yo mo nika fura tipaha. Mo berẽkurii rii gu wirikapai re, gu rukutu riiapai du rogoho, agu asanahe du rogoho, agu averesi du tipa “gedaha,” asura, na ai gu vidio rengbe ka undo na sakapai tipa gupai re. Na mo ki berẽpa gamo bawiriki Ziazia Kekeapai na wai mo nika saka gupai re ngba taata gene si kidu ziazia tipa gupai nga si du taata fu ni ni gi rogoyo na ki mangipai kutini.—Nem. 8:8; Snz. 15:28a.

8. Ginipai afugo gu mokedi nangia Pauro du ni kekehe rogo AKorosaio 1:9, 10 ayugoho furani tipa manga kparakpee tipa gaani abawiriki Ziazia Kekeapai?

⁸ Ni papara gamo mbakadatise, mo kpari fu Yekova tipa gamo bawiriki Ziazia Kekeapai gbiati gani azingo. Mo sana Yekova tipa ko undo ro mo yugupai vuru Ziazia Kekeapai yo ngba gu gene nika zio ngbaduniyo. (Oni gedi AKorosaio 1:9, 10.) Mo sana tiro singia pai ho rengbe kadu ni kpakarakpakaraha fu ni tipa ni rugutini na ni watadu pai ho ni narengbe ka zanga ida kutini. Mo moi gupai ku berãro yo nga gamo sasa nga ka undo ni ni mangi sonakumbatayo ka zio bapatiza.

9. Waigu rengbe bayugupai ka undo gani bawiriki Ziazia Kekeapai ni mbakadi tini tipa gani wirikapai? Oni sakingo rogoyo.

⁹ Ani na maabangirise nga ka ani awirika Ziazia Kekeapai na bawiriki Ziazia Kekeapai dedede, si nika undo ni ni du na tambuahe tipa agu apai dunduko aYekova na Yesu namangihe si ki sa gupai nga ni idi ka wirikapai ni bakerehe. (Mt. 5:3, 6) Tipa bawiriki Ziazia Kekeapai gbia undo ni bakerehe ti wirikapai, si naida ni moiberã ni kuti gupai ni awirikaha. Tipa ka undo ni ni mangi gipai re, mo sakipai tipa wai duhe ni nyanyakipa pai funi ka mbakada gani wirikapai ni geda ni gupai re mbata fu oni wirikihe na ki berẽkurii wai ni narengbe ka mangapai kutini. Waigu rengbe mo ka undo ni ni mbakadi gani wirikapai? Oni mbakadi wirikapai sa na ni tipa ka yugo wai fu ni ni narengbe ka mbakada gani wirikapai.d Mo yugu wai fu ni ni narengbe ka gbia akaragapai kuti asanahe na wai pa gbaka ni he ti memeapai narengbe ka undo ni ni tingidi akaragapai. Na mo ki sana ni ni fu gu karagapai naye kina boro ngbaduniyo. Ka ni mangihe wo, si nika sa gupai nga mo rengbe ka ino singia ni rugu tini wenengai na gupai re. Ono tie, kurapai kinaho mo narengbe ka ngarasa gamo bawiriki Ziazia Kekeapai ni mangihe.

MO YUGUPAI FUNI TIPA NI NAAFURA NA YEKOVA NA AˈURU DŨ

10. Tipagine duhe ti ni ni nyanyakipa pai ka geda Ziazia Kekeapai na aˈuru dũ, na ginipai si aida bawiriki Ziazia Kekeapai mangihe tipa ka gbia undo ti geda Ziazia Kekeapai?

¹⁰ Kurii gupai nga bawiriki Ziazia Kekeapai naawirikapai na aposo dunduko na gani bayugupai, ni rengbe ka gbia undo ka ni amanga kura apai ni tiní na aˈuru dũ. Si naida ni naafura na Yekova. Ngba gini gene? Ni dega ni tuni fu Yekova na kini fura na ko. Ni rengbe ka degatuni fu Mbori ni geda ni Ziazia Kekeapai na aˈuru dunduko. (Yos. 1:8; Tam. 1:1-3) Mo yugu wai fu ni ka mangasunge na gu mbakadapai nga ga geda Ziazia Kekeapai du rogo jw.org.e Ono tipa ka undo ni ni gbia undo gbe ti gani geda Ziazia Kekeapai, mo ngarasi ni tipa ni naaberãkurii agu apai Ziazia Kekeapai ayugoho fu ni tipa Yekova na wai rengbe ni ka mangapai kuti agu apai ni awirikaha rogo gani raka yo.—Amo. 17:11; Yak. 1:25.

11. Waigu rengbe bawiriki Ziazia Kekeapai ka wirika wai ka manga kparakpee wenengai, na tipagine duhe ti ni ni nyanyakipa pai kaa manga kparakpee dedede?

¹¹ Mo ngarasi gamo bawiriki Ziazia Kekeapai ni naafura na Yekova rogo kparakpee yo na aˈuru dũ. Mo mangi gu kparakpee naye ngbaduroyo ti tonatona gaoni wirikapai na tifuo digiso oni wirikapai, na ki gumbapa gamo bawiriki Ziazia Kekeapai rogo gamo kparakpee yo. Wa ni nikaa degatuni kuti gamo akparakpee, ni nika wirika wai kaa manga kparakpee kina boro ngbaduniyo na ni nikaa kpara fu Yekova Mbori ti rimo Yesu Kristo. (Mt. 6:9; Yo. 15:16) Mo berẽnga pa wai rengbe geda Ziazia Kekeapai na aˈuru dũ (degatue fu Yekova) na kparakpee (fura fu Yekova) ka undo gamo bawiriki Ziazia Kekeapai ni mbedi gbe na Mbori! (Yak. 4:8) Ka ni aamanga gipai re na aˈuru dũ, si nika undo ni ni mangi sonakumbatayo ki da ti kparatise na zio bapatiza.

MO UNDO NI NI SONOSI GANI PAGUME NA YEKOVA

12. Waigu rengbe bayugupai ka undo gani bawiriki Ziazia Kekeapai ni sonosi pagume na Yekova?

¹² Si aidanga gupai bawiriki Ziazia Kekeapai awirikaha sungu sa kina riniyo te, ono si naida si zi ngbaduniyo a. Tipagine? Mbiko ani naida gaani bawiriki Ziazia Kekeapai wirikipai tipa Yekova. Ono si naida gupai ni awirikaha zi ngbaduniyo tipa gupai nga si sa ni ni mangi gupai ni awirikaha. Yesu ayugu dungu apai fu aboro na i aima kpinyemu gupai nga kaa wirikapai beko. Ono aboro anaapeka ko mbiko gupai nga gako ayugopai anaazio ngbaduyo yo a. (Rk. 24:15, 27, 32) Si naida gamo bawiriki Ziazia Kekeapai naabi Yekova nga ko nga ndikidi Boro, gu boro ni narengbe ka sonosa pagume na ni, na kini bi Ko wa Ba ni, gani Mbori, na ni Bakureani. (Tam. 25:4, 5) Ti regbo wirika Ziazia Kekeapai, mo gbeberã bawiriki Ziazia Kekeapai kuti gu wene asino du ti gaani Mbori. (Gate 34:5, 6; 1 Pet. 5:6, 7) Rogo agu apai yo dunduko oni nikaa sakaha, mo gbeberã ni kuti gu ngbatunga Boro du Yekova nga ni. Mo undo bawiriki Ziazia Kekeapai ni rugutini na gu wene asino duti Yekova—gako nyemuse, wenesino, gbiati nunga. Yesu agumba gupai nga, “gu rugute nga bakumba ha susi” nga “mo kpí nyemu Gbia nga ga Mbori.” (Mt. 22:37, 38) Mo asadi ka undo gamo bawiriki Ziazia Kekeapai ni kpinyemu Yekova.

13. Oni funga kpiapai tipa wai ka undo bawiriki Ziazia Kekeapai ni wirikipai tipa gu wene asino duti Yekova.

¹³ Rogo gamo afugoyo na gamo bawiriki Ziazia Kekeapai, mo sakipai tipa ndu gupai mo nakpinyemu Yekova ti ni. Gipai re ima rengba ka undo gamo bawiriki Ziazia Kekeapai ni rugutini na gupai nga si naida ni da a ni bakurea Yekova na ki wiriki wai ka kpinyemuko. (Tam. 73:28) Ni kpiapai, ya mo pai ho rogo gu waraga oni awirikaha watadu rogo Ziazia Kekeapai yo nga gu nayugopa pai tipa Yekova—gako nyemuse, tatamana, ruru sarangbanga, watadu ome—nga gu zi ngbaduro yo? Mo pehe fu gamo bawiriki Ziazia Kekeapai, na ki sa ni ni ini gupai nga si nga ndupai sa dagba kura nduapai yo mo nakpinyemu gu Barani du ngbangbaturũ yo ti ni. Gu kurapai kinaho berewe si aida bawiriki Ziazia Kekeapai mangihe tipa ka manga sonakumbatayo ki da ti zio bapatiza.

MO NGARASI NI NI YE TIPA AGU ADUNGURATISE NGA GA DUNGURATI

14. Ginipai AEbere 10:24, 25 apehe furani tipa agu adunguratise nga ga dungurati nga gu rengbe ka undo bawiriki Ziazia Kekeapai ni mangi sonakumbatayo?

¹⁴ Ani dunduko naida gupai nga gaani abawiriki Ziazia Kekeapai mangi sonakumbatayo ki zi bapatiza. Nyanyakipa gene sa rengbe ani ka undo yo ngbaha nga ka ngarasa yo i ye tipa agu adunguratise nga ga dungurati. Agu abayugu Ziazia Kekeapai du na bakere inohe ninaape gupai nga, agu abawiriki Ziazia Kekeapai natona ye tipa adunguratise nibasa namanga sonakumbatayo ni ipo. (Tam. 111:1) Gu kura abayugupai ninaape gupai fu gayo abawiriki Ziazia Kekeapai nga, badungu apai duho i nika wirikaha ba adunguratise yo kisusi gu i awirikaha ti regbo gayo wirika Ziazia Kekeapai. Mo gedi AEbere 10:24, 25 na gamo bawiriki Ziazia Kekeapai, na ki sakipai funi tipa agu aundo ni nika gbiaha ka ni ye tipa adunguratise. Mo moi gu vidio fu ni nga, Ginipai Ninaamanga Bambu Kindo Yo?f Mo undo gamo bawiriki Ziazia Kekeapai ni diberã ka zanga kpa adunguratise.

15. Ginipai rengbe ani ka mangaha ka ngarasa bawiriki Ziazia Kekeapai tipa ni naaye tipa adunguratise dedede?

¹⁵ Ginipai rengbe mo ka mangaha ka si du nga gamo bawiriki Ziazia Kekeapai ata yengo tipa adunguratise te watadu ni ayengo tipaha dedede te? Mo pe pa gu wene apai fu ni mo awirikihe bambeda kusayo ba adunguratise yo. Ho ni nika bi wai ni mo abi adunguratise, ni ima rengba ka ida ka ndu tipaha. Mo fu gu Ngbaõbambu Sinziri watadu gu Waraga Dunguratise Nga ga Gaani Raka na Sunge fu ni nga gu i awisigoho ti gu regbo re ba adunguratise yo. Mo yugu gupai fu ni i nika wirikaha ti regbo gu dunguratise naye kumbatayo na ki sana ni tipa gini paparaha ngba ti ni gbe. Gupai gamo bawiriki Ziazia Kekeapai nika bihe na ki gihe ba dunguratise yo ti gu bambata regbo ni nika ndu, si nika ngba kisusi ai gupai ni naabihe na kini gihe ti regbo agu adunguratise nga ga kura apambori. (1 Kor. 14:24, 25) Ni nika gbia kura aboro nga aguyo rengbe ni ka wirika gayo wene akpiapai na nga agu aboro nika undo ni ni mangi sonakumbatayo ki zi bapatiza.

16. Ginipai si aidaha tipa ka manga gu wisigo Ziazia Kekeapai nga gu nandu kuti zio bapatiza, na ginipai ani nika wirikaha rogo gu kekeapai ngbefuo gere?

¹⁶ Waigu rengbe ani ka manga gu wisigo Ziazia Kekeapai nga gu nandu kuti zio bapatiza? Ani ima rengba ka undo ai bawiriki Ziazia Kekeapai tipa ni bi wai du pa wirikapai na nyanyakipaha fu ni ni ngarasa ani ni tipa ni naawirikapai na aposo dunduko na kini mbakadi gupai ni nika wirikaha. Si naida ani ngarasi ni a ni naafura na Yekova na aˈuru dũ na ni sonosi gani pagume na Ko. Si naida ani fõngbaduniyo tipa ni ye tipa adunguratise nga ga dungurati. (Oni bi gu sanduki nga, “Gupai si Aida Abawiriki Ziazia Kekeapai Mangihe Tipa ka Manga Sonakumbatayo ka Zio Bapatiza.”) Ono tie, a wa gu kekeapai ngbefuo gere nika sakapai tipaha, gu kura apai kinaho bisue si aida abayugu Ziazia Kekeapai mangihe tipa ka sa bawiriki Ziazia Kekeapai ni zi bapatiza.