Gu Gene Rengbe Kparakpee ka Undo Ro Ngbaha

Pamela aawoka nikerehe, na ri kini gbata undo be munganga. Ono tie, ri aima kpara fu Mbori a tipa ko nyakasi ri tipa ri nihi gu kpakarapai ri adu rogoho. Ya mo kparakpee aundo ri?

Pamela agumba gupai nga, “Ti gu regbo mi aagbia husa nga ga kansa, mi aagunde nikerehe. Ono ho mi amangi kparakpee ni, mi agbia zereda na mi adu narengba ka hi gimi kpakarapai zanga gunde. Mi nawoka kindi nikerehe, ono tie, kparakpee naundo re mi du na ruru bipai tipa gu kpakarapai du mi rogoho. Ho aboro asana re ni tipa wai du mi, mi naya, ‘mi wenengai te, ono mi na ngbarago!’”

Ono tie, si aidanga ani sungudi kina gu regbo mbata ani ka gbiatirani na kerepai ani kini ru ka manga kparakpee te. Ani dunduko nagbiatirani na kpakaraapai, singia bakerehe watadu tooni he, na dedede, ani naaida na undo tipa ka mangapai kutini. Ya mo kparakpee rengbe ka undo ro?

Ziazia Kekeapai naya: “Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.” (Atambuahe 55:22) Ka ngba gia agu afugo wasa re! Sidu, wai gu rengbe kparakpee ka undo ro? Ho mo amanga kparakpee ni fu Mbori ngba ruru gene, ko nika undo ro mo mangipai kuti gamo kpakaraapai.—Mo bi gu sanduki nga, “Gupai Rengbe Kparakpee ka Mangaha Foro.”

Gupai Rengbe Kparakpee ka Mangaha Foro

Zereda nga ga berãse

“Ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (AFiripoio 4:6, 7) Ho mo apeka agu apai ni nafuda ro fu Mbori, ko nika undo ro mo du zezeredi na mo ki mangipai na tatamana ho du mo ni na fuda berãse yo.

Tatamana be Mbori

“Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya; ko ki fu he afu fu ni.” (Yakoba 1:5) Ho du ani ni rogo kpakarapai yo, ani arengbanga ka manga wene diaberã te. Ka mo kpari tipa tatamana, Mbori ima rengba ka undo ro mo tingidi pa agu abangua rengo du rogo Fugoko yo nga Baibiri.

Ome na wasa

“Mi rengbe na manga apai dunduko rogo gu ko nanyakasa re.” (AFiripoio 4:13) Wa duhe nga Yekova nga gu Mbori du na tandu apai dũ, ko ima rengba ka fu gu ome furani ani aidaha si undo rani ho du ani rogo kpakarapai yo. (Yesaya 40:29) Baibiri nayamba Yekova “nga Mbori wasa dunduko.” Ko ima rengba ka fu wasa furani rogo “gaani gberãngbi yo dunduko.”—2 AKorindo 1:3, 4.

YA MO MO NAIDA KA GBIA UNDO TI KPARAKPEE?

Yekova aziongo ro ngbaome mo kpari fuko te. Kuba gure, ko nayamba ro ni nyemuse mo kpari fuko. (Yeremaya 29:11, 12) Ono na ka si du nga mbata kusayo mo anabihe nga Mbori aakaraganga pai kuti gamo akparakpee te? Ka rago gberẽnga tiro watadu ka mo mbunga manga kparakpee ya. Zavura agu avunguagude du na nyemuse i arengbanga ka mangapai fu awiriyo kina boro ngba gu gene i aidaha watadu ti kina boro gu regbo agude aidaha ti ni te. Si ima rengba kadu nga avunguagude ima ino gupai wenengai si aida i mangihe. Ono pai sa akpanga ya nga: Agu avunguagude du na nyemuse naundo awiriyo aundo.

Yekova nga gu baagude ngba kisusi na ko na nyemu ka undo ro. Ka si du nga mo nika wisigo agu arugapai ani nasakipai tipaha rogo Baibiri yo na ki mangi asadatise ka maaha ku rogo mangapai yo, Mbori nika karagapai akaraga kuti gamo akparakpee ngba agu agene ngba kisusi!—Atambuahe 34:15; Matayo 7:7-11.