“Awere, Mi Ima Kpinyemu Sunge Tungusapai!”

MI AZANGA GIMI NGBARAGO

Si nafu kina gberãrago nga, ho garãre adu ni wa bawe na biata, gimi mbembedi pagume na Yekova atona rungbura. Si aangera wa ka i ya akuare sukuru yo adu na bakere ranirii beyo, na mi aaida na ngbatunga gu ranirii re a. Mi aberẽ gupai nga, ga avungure arugute gbiati gu sino gene raka nga ga aKristano afunga ranirii fu boro te, na mi aberẽ gupai nga iriso Yekova nga bakere sunge. Mi aima ida kuti gupai nga Yekova kina ti ni, ono mi aambedanga na ko te.

Mi aambunga tungusapai te, ono mi anaatungusapai ni wiri betehe gbua. Ho mi anaandu ni gene tungusapai yo, mi anaambakadanga tire te, sidu, mi anaasota asota ka tona fugo na boro na ka sa gu fugo re si naandu kindi kumbatayo. Ni sangbanaha, mi anaadunga na aboro bere mi anaakaraga tire fuoyo watadu abawiriki Ziazia Kekeapai te na mi anaagbianga ngbarago ti tungusapai te, gipai re asa re mi sogo sunge tungusapai kina kumbatayo. Mi anaasana tire nga, ‘Waigu rengbe boro ka ndu kindi kumbatayo kaa tungusapai na aposo dunduko, na adiwi dunduko?’

Ho garãre ada ni nga 17, mi aaida kadu na gimi ranirii. Sidu, mi adungura gimi ahe, ki guari kporo, na ki ga ku Austroria yo. Avungure aima du na gberãrago ho mi ambu raka ni na yo kporo. I abaka bangiriyo abaka, ono i aberẽ gupai nga mi nikaa ndu andu kindi kumbatayo kaa iriso Yekova.

Gimi sunge fu Yekova aaumba kina kumbatayo kisusi Austroria yo. Mi atona kaa kpa adunguratise. Mi azi bakure na gu paranga aboro naadu wakina re naadu na ngbarago kadu pati adunguratise, ono tingbafuo, ani kini ndu ka mbira buda yuru badogbere yo. Ho mi atingidapa gu regbo re ni rogo gimi raka yo, mi nabi gupai nga mi adu rogo rengo yo na kidu a berewe rogo zegino, ono ba ho rago angba tire rogo yo te.

MI AWIRIKI NYANYAKIPA PAI NGA GU MI AABERÃNGA NGA MI NIKA WIRIKAHA YA

Fuo agarã wa ue kusa, mi agbia kura wirina ni dee nga guri naainongo gupai nga ri asa re mi berẽkurii gimi gene raka ya. Ani aaraka kporo bisue ni agu awirina nangia anakuparanga, na ani ayambu babi rimbasa gbiati diako nangia Tamara i ye ka raka na ani tipa poso sa. Ho kumbaku Tamara anaadia regbo ni kuti agu apai nangia ga dungurati, ri anaadia regbo na ani nangia adegude na ani kini momu wa sa. Gupai re aima ngba tire. Ri angia wene boro na si kidu taata boro fura na ri. Si aima ngba tire ka bi gupai nga boro naima nyaka rogo toro yo wa gure nagbia wene regbo na aboro na kini momu.

Tamara angia zaaza boro. Gari nyemuse tipa rengo gbiati sunge tungusapai adu ni gupai boro abihe si ki sa ni ni mangipai. Tamara adu na ngbarago ka fu guhe fu Yekova omeri arengbe na ni, mi kidu tigimi na gberãrago mbiko mi aamanganga gupai fu Yekova omere arengbe na ni te. Gari wene bipai gbiati gu ndikidi ngbarago ri adu na ni aima du na bakere maapai kurii gimi raka. Gari kpiapai asa re mi berẽkurii gu nyanyakipa rengo nga: Yekova naida gupai nga, ani dunduko naairisoko “na ngbarago” na ki “nibi bia” ni ngbarago.—Tam. 100:2.

MI ATONA KPINYEMU SUNGE TUNGUSAPAI BEREWE

Mi aaida kadu na gu ngbatunga ngbarago Tamara adu na ni, ono tipa mi gbia ngbatunga gu ngbarago re, si aaida mi mangi bakere aˈariapai. Si aima dia regbo tipa mi mangi aˈariapai, mi aamanganga aˈariapai ni kina boro ipo te, ono mi atona ka mangaha rukutu rukutu. Mi atona ka mbakada tire tipa tungusapai, na mi anaamanga sunge moundo abazakigene ti kura aregbo. Gipai re naundo re ka mi naadunga na bakere gunde ya na mi du na kido. Mbiko gupai nga mi anaamangasunge na Ziazia Kekeapai ni bakerehe dedede gene tungusapai yo, mi atona ka gbia ngbarago ni bakerehe ti sunge tungusapai. Fuoho aaturongo te, mi ki tona mangasunge moundo abazakigene na adiwi dunduko.

Mi atona ka sia abakure nga aguyo naadu na agarãyo ni bakiakia nga aguyo naadu wenengai rogo rengo yo na nagbia ngbarago ti mangasunge fu Yekova. Gayo akpiapai aundo re mi berẽkurii gupai naadu na nyanyakipaha rogo gimi raka yo na ki tona geda Ziazia Kekeapai na aˈuru dunduko. Mi atona ka gbia ngbarago ni bakerehe gbe ti sunge tungusapai, na niyangaraha, mi atona mangasunge ni nazakigene. Si angia bambata regbo vuru dungu agarãyo mi du na ngbarago na kidu wenengai rogo dungurati.

MI AGBIA GU BAZAKIGENE NANGIA GIMI NYENYE MOUNDO

Fuo garã sa kusa, mi agbia Alex nangia wene sino boro na ni gu boro naaima kpinyemu Yekova gbiati sunge tungusapai. Ko aamangasunge ni moundo abaakumba na ko aima mangasunge ni bazakigene tipa agarã sita ti gu regbo re. Alex aima mangasunge a tipa bete regbo rogo gu ba naadu na zingo abatungusipai gbe rogoho Malawi yo. Ko adi regbo yo na amokedi nangia bawene kpiapai fuko na i angarasiko ko naandu kindi kumbatayo kaa maa sunge Kindo ni bambatapai rogo gako raka yo.

Rogo 2003, mi gbiati Alex amangi rogatise, na naatona ti gu regbo re ka ndu kumbatayo, ani naamanga sunge Kindo kindi ti aregbo dũ. Ani ima wirika badungu wene apai na Yekova ima fu maku furani ngba dungu agene.

YEKOVA AFU MAKU FURANI BEREWE NI BAKEREHE

Rogo 2009, i asana rani ani ndu ka mangasunge ni amokedi Timor-Leste yo, nga tooni ringara Indonesia yo. Kina ngbarani nazere, ani kidu na bakere ngbarago, na ti kina gu bangisa regbo re, ani kidu na gunde. Fuo adiwi bisue kusa, ani ada rogo gu bakere gbata nga Dili.

Raka ti ngba gu vovo sunge re adu kia ti gu raka ani aarakaha mbata. Si aaida ani inidi tirani na vovo sino mangaapai, fugo, riahe, gbiati wai aboro araka. Gene tungusapai yo, dedede, ani anaabi agu aboro naanidu ni kere airarungo, aguyo nawirikipai tooni watadu naawirikanga pai ya, na aguyo i anaarungosi yo. Na ani anaabi dungu aboro naanidu na serõ ti kpotoyo na kidu na gberãrago mbiko gu kpakaraapai nga ga vura na zuu.a

Tungusapai aima ngba ni kerehe! Ni kpiapai, ti kura regbo sa, mi agbia degude naadu na gberãrago garãri adu nga 13 rimori angia Maria.b Nari akpi tifuo bete agarã kusayo, na ri anaabingo bari dedede te. Wakina gu dungu agude du garãyo wa ga Maria, Maria aainongo gupai ri aaida ka mangaha rogo gari raka yo te. Mi natingidapa kura regbo sa ri akpari wa ri aakusuko kpotori yo fere. Ono tie, mi aaruganga tire na gupai ri aagumbaha te, mbiko ti gu regbo re, mi aainongo ka pe gu fugo ri aapehe wenengai te. Mi amangi kparakpee fu Yekova ko undo re mi ngarasi ri, na fuo gure, mi ki tona ka geda averesi furi nga ga wasa. Vuru agu agarãyo nangbefuo gure, mi aima bi wai rengo aˈaria ga Maria asino, gari vo roko, na gari raka. Ri azi bapatiza, na awere, ri na gari abawiriki Ziazia Kekeapai ti ni ri awisigopai na yo. Areme, Maria na badungu aborokporo beri nga ga toro yo, na ri nabihe abi nga i ima kpinyemu ri.

Yekova nafu maku afu kurii gu sunge tungusapai namanga Timor-Leste yo. Wa vura duhe nga badungu abatungusipai ima zio bapatiza vuru agu agarãyo bawe susi, badunguyo namangasunge ni abazakigene, amoundo abaakumba, watadu ni abaakumba. Agu akurayo namangasunge rogo agu abasunge nga ga sa fugo na i naundo na kusa agu ariahe nga ga toro rogo gayo afugo yo. Si nasa re mi du na bakere ngbarago ho mi abiyo ni i nibibia ba adunguratise yo, ka bi mongo kpakpuyo yo, na kini bi yo i nisono rogo toroyo.

SI ANGIA GU RAKA NAADU NA BAKERE NGBARAGO ROGOHO

Raka Timor-Leste yo adu kia ti gu raka naadu Austroria yo, ono si angia gu raka naadu na bakere ngbarago rogoho. Kura aregbo anidu kinaho ani anaandu nunguro na tarambiri na badungu aboro rogoho, ngbagene, ani anaangbe ugu atĩo gbiati akpepasio ba ngbeahe yo. Rogo kura aˈuru, ani anaawirika Ziazia Kekeapai na boro rogo gu kporo naanidu ni umbaha ni ba fofoihe, biriko kidu sande na akondo kini otoko. Wa agu akpakarapai re avura du vurũ, dedede, mi anaaberã gupai nga, ‘Ngbatunga gi raka du mi rogoho re ima ngba!’

Ho mi aberã ni kurii agu apai nasusi kusayo, mi na bakere tambuahe nga avungure amangi ome ka yugopai fere tipa ga Yekova agene na ka songoda re zavura ho gimi pagume na Yekova adu ni ni rurungburaha. Asanza 22:6 ima yugo tihe ni rengo tipa re. Anina na Buba na bakere ngbarago na mi gbiati Alex; i na ngbarago ka bi gupai nga Yekova namangasunge na ani. Naatona rogo 2016, ani ninaata na sunge biko adungurati rogo gu dagbarago nga ga gu be-basunge nga ga Australasia.

Si ima kpakara mi idi kuti gupai nga, regbo adu kinaho mi aakpingo nyemu sunge tungusapai ya. Awere, mi ima kpinyemu sunge tungusapai! Mi ima ye ka rugatire na gupai nga, ka kina ginipai vura manga rogo raka yo, ndikidi ngbarago naye sa kina ti mangasunge fu Mbori na kpotoseyo dunduko. Ni rengo, agu agarã 18 ani na Alex nadihe kuti mangasunge fu Yekova ima du ni agu agarã mi nagbia bakere ngbarago rogoho kisusi rogo gimi raka yo. Awere, mi ima rugatire na rengo gupai gu bake papara Atambuahe nangia Davide apehe fu Yekova nga: “Agu yo nafu tiyo ku be ro i ngi angi, i ningbiko na ngbarago. . . . agu yo nakpi nyemu rimoro i du pusiapusia rogo ro yo.”—Tam. 5:11.