Oni Natingidaha?

Ya mo mo gedinga agu aNgbaõbambu Sinziri nga ga gi garã re? Sidu, mo bingoho singia mo rengbe ka karagapai kuti agi asanahe re:

Waigu ani nika gbia mosoro ka ani aadia regbo kaa fura, kini degeturani, na kini berẽ tipa Yekova?

Ani nikaa manga wene adiaberã, kingia wene abayugupai, kidu na nyanyaki idapase, na gaani nyemuse tipa Yekova nika sona.​—w22.01, kpe. 30-31.

Waigu ani nika gbia undo ka si du nga ani wiriki ka kido kuti Yekova na gako riigbu?

Awere nga gu regbo si aida ani wiriki ka kido kuti ga Mbori gene mangaapai ni zanga kaa kapa kuti agu arugapai na adiaberã abaakumba amangaha. Ho bakere gberãngbi nika tona ni, ani nika du adu regerege tipa ka giasangba ka ani vura ka gbia agu arugapai vurũ nika du bangirani kia watadu nikaa runga ya.​—w22.02, kpe. 4-6.

Ginipai maraika aaida ka gumbaha fu Zekaraya tipa gu “giri ringbisa ahe [nadu be gu Banyaki nangia] Zerubabera”? (Zek. 4:8-10)

Gi yuguyugupai re akido ga Mbori aboro nga gu yekaru re nika nyasa anyasa na kidu kina wai Mbori aaida si du.​—w22.03, kpe. 16-17.

Waigu rengbe ani kadu “ni kpia pai . . . rogo fugo”? (1 Tim. 4:12)

Ani nafura na weneringise gbiati irisa gene tungusapai yo, ani nikaa bibia na kpotorani yo dunduko, kini fu akaragapai dedede ba adunguratise yo, kini pe kina rengo, na kini fura ngba gu gene nika nyakasa kura aboro, na ki ne gbegberẽ afugo.​—w22.04, kpe. 6-9.

Tipagine i aya ti ni tipa agu apai du tipa agu anyarinde biama (akindo) i nafura tipa ra rogo Daniere kapita 7 nga agu apai re dunduko tipa bangisa nyarinde sa a wa i nasakipai tipa ha rogo Yugoti 13:1, 2?

Gu nyarinde du paru rogo Yugoti 13 arunga kuba bangisa kindo sa wa gu nangia ga Roma te. Kuba gure, gi nyarinde re narukuba agu azogarago dunduko ninaazoga aboro.​—w22.05, kpe. 9.

Gini bangua gene du ho rengbe ani ka yugo gaani kido ngbaha kuti ga Mbori ruru sarangbanga?

Ka si dunga boro senge rani, ni imisi rani, watadu ni ingipai kuti rani, si naida ani asadi ka mbu zinga na kpipai, ki mbu apai kina ku be Yekova yo. Ko nika dia gu gbegberẽ apai dunduko kusayo ingapai naye na ni.​—w22.06, kpe. 10-11.

Ginipai si aida gu wirina namanga kparakpee badunguratise yo bandaha berãko yo?

Si aidanga kparakpee du tipa ka fu rugute fu dungurati watadu ka manga atingidapai te. Gbe, ho dunguratise atona ni, si aidanga ka mangasunge na “badungu” afugo te. (Mt. 6:7)​—w22.07, kpe. 24-25.

Ngba gine gene “agu yo nanamanga gbegberẽpai” nika gbia “gu zingabekpio nga ga sapangbanga”? (Yo. 5:29)

I asapanga ngbangayo ni gbegberẽhe ringbisihe kuti agu apai i amangihe mbata kusayo te. I nika wisigo yo ringbisihe kuti gayo aberã na mangapai tifuo i zingisiyo be kpio.—w22.09, kpe. 18.

Gini wene gumbapai J. F. Rutherford amangihe ti regbo gu bakere dunguratise namangi rogo Mbirinvuo 1922?

Ti regbo gu bakere dunguratise namangi Cedar Point yo, Ohio yo, Amerika yo, ko aya: “Oni bi Bakindo wa ko azogarago! Oni nga gako abandusunge. Sidu tie, oni takipande, oni takipande, oni takipande Bakindo na gako Kindo!”—w22.10, kpe. 3-5.

Yesaya kapita 30 nape pa gini agene biata Mbori aundo rani ngbaha ani hipai?

Gi kapita re nayugo gupai nga (1) ko nadega tuko kuti gaani akparakpee na kini karagapai kuti ni, (2) ko nafu arugapai furani, na (3) ko nafu amaku awere furani na ko nika mangaha wo kumbatayo.​—w22.11, kpe. 9.

Tipagine rengbe ani kada ti ni kuti gu digisopai nga agu afugo du rogo Atambuahe 37:10, 11, 29 aima digisotihe mbata na si nika digisotihe adigiso kumbatayo?

Afugo Davide nasakapai tipa agu amaku nadu rogo gu Yisaraere nadu mbata wa gu nadu ti regbo gu zogarago nangia ga Soromo. Yesu afura tipa gu paradizo du kumbatayo na ki di pai rogo veresi 11. (Mt. 5:5; Rk. 23:43)​—w22.12, kpe. 8-10, 14.