Rurupai na Irairapai: Gupai Dungu Aboro Ninaamaa Mburu Gayo Adiaberã Riihe

Badungu aboro ima ida kuti gupai nga gu kura mangaapai kinaho du ni ruruhe na agu akuraha kinaho du ni irairaha. Ni kpiapai, imo boro, pi na dee ngbaome, kodaba na gude ni gupai aboro naima sogaha rogo zegino dunduko, na aboro kini tambua agu aboro ni bakerehe gbe namangapai ngba ruru gene, wenesino, na nunga. Na ginipai ti gaha du tipa gu kura asiapai, wa gu nga da si aida boro mangi kodaba na ni, singia ka pe rengo, watadu wai ka sonosa agude?​—Dungu aboro naberã gupai nga siapai ho du ni wenehe watadu niirairaha tipa agi apai re te. I naberã gupai nga asiapai dunduko nangera wa si ni kina ruruhe. Aboro dedede ni namanga gayo adiaberã riimburu wai i abi apai na wai agu aboro du patiyo abi gupai ngaha re. Ya mo gi berãapai re ruaru?

YA MO SI NAIDA ANI MANGI ADIABERÃ RII MBURU GAANI BIPAI?

Dedede ani ninamanga adiaberã nibipa gupai ani abihe singia si ni ruruhe watadu si ni irairaha, nga gu i ayambaha nga sangbakpotoseyo. (ARomo 2:14, 15) Zavura rukutu agude ima ino gu kparakparapai du dagba gu mangapai du ni ruruhe na irairaha na sangbakpotoyo yo nambusa yo ambusa ho i amanga gupai ni du ni irairaha. Wa ani nika sona, ani naye ka wirikapai tipa gupai du ni ruruhe na irairaha be agu aboro ani adia regbo na yo. Ho ani amanga adiaberã ni, sangbakpotoraniyo napehe ape furani singia gaani diaberã nandu sa na gupai ani nawirikihe tipa rurupai na irairapai.

Gaani bipai tipa gupai du ni ruruhe na irairaha ima rengba ka sa rani ani yugu nunga, tambuahe, ruru sarangbanga na rungo gu kura aboro ki zi rani. Si ima rengba ka sarani ka ani mangingo gupai rengbe ka imisa agu aboro ani akpinyemu yo watadu gupai rengbe ka sarani ani du na zee na sangbakpotoraniyo kini kitingbanga rani ya.

Ya mo gaani bipai ti aregbo dunduko ni ruruhe? Paranga kumba du rimoko nga, Garrick asia gu gene raka ko abihe nga si naida ko mangi gupai ngba tiko. Ko aya: “Mi anaamanga gupai naaningba tire.” Ko abi gupai nga, manga agu apai nangba tiko anaayenga na wene sangbanaha te. Ko aye ka sakapai tipa gako raka kusa nga ko aadu nga na ngbarago te, bambiko ko anamanga wasiwasi kodaba, kini di kere angua kutii kpotoko yo, kini kpibuda na zuu.

YA MO SI NAIDA ANI MANGI ADIABERÃ NIBIPA WAI ABORO ABI APAI?

Kupati pa wai ani abi apai, ani namanga diaberã dedede kuti wai aboro nika bi gaani diaberã. Gipai re ima rengba ka undo rani ani gbia undo ti gayo inohe na tatamana. Gaani aborokporo, abakurearani na agu aboro ani araka dagbayo nabi rani na irisa ho ani amanga gupai ni i abihe nga si ni ruruhe.

Ya mo ga aboro biapai ti aregbo dunduko ni ruruhe? Ho Priscila adu ni niparanga degude, ri amangi gupai dungu anakureari anaamangaha, na ri amangi kodaba mbata fu ri mangi rogatise. Wa vura duhe nga gu kura aboro abi gupai ri amangihe re ni gupai naadu ni ruruhe, ri aadunga na ngbarago te. Ri aya: “Manga gupai aboro dunduko amangaha aasanga re mi du wenengai te. Si asa re mi mangi agu apai nangia pa mungo na ki moi gimi raka ngbapai.”

YA MO GU KURA GENEHO DU NI WENEHE KA MANGA WENE ADIABERÃ NGBAHA?

Ho ani amanga diaberã ni tipa gupai du ni ruruhe na irairaha, gaani bipai gbiati gu bipai nga ga kura aboro na nyanyakipaha. Ono gipai re nisaha arengbanga ka ndu kuti wene sangbanaha te. Ti kura aregbo, ani naimisa tirani watadu gu kura aboro bambiko ani abingo gu sangbanapai gaani adiaberã narengbe ka ye na ni te. (Asanza 14:12) Na zavura ti kura aregbo, ka ani berẽ gupai nga gaani aberã na ga gu kura aboro ni ruruhe tipa pai, sangbanaha ima rengba kadu ni gbegberẽhe na si ki idi ani ariaha. Na kurigure, gu kura apai kinaho aboro anaabihe ni gbegberẽhe ono awere aboro ima ida na ni, baraho gu kura asino mangaapai aboro anaabihe nga si ni wenehe, aboro nabihe awere ni gbegberẽhe.

Ya mo he ho nga gu rengbe ka undo rani tipa ani mangi diaberã tipa gupai du ni ruruhe na gu du ni irairaha? Ya mo arugute ho nga gu rengbe ani ka pekafuo ho areme na ka ani abiranga tirani tipaha awere na tingbafuo dungu agarã kumbatayo ya?

Si nipa ngbarago tie nga arugute kinaho nga gu naima rengba ka undo aboro dunduko na rogo arago dunduko. Gu kekeapai ngbefuo gere nika sakapai tipa wari rengbe ani ka gbia wene arugute ni tipa ka diaberã tipa gupai du ni ruruhe na irairaha.