Gu Gene Yekova Aida Dungurati Mangipai Ngbaha na Agu Aboro Mangi Kere Ingapai

1. Ginipai Yekova aidaha tipa aboro dunduko?

YEKOVA akusi aboro na ranirii ka siapai. Mo namangasunge dedede na gu gamahe re ho mo amanga adiaberã ni. Gu nyanyakipa diaberã rengbe boro ka mangaha nga ka diaberã ka kpara gani raka fu Yekova na ki da ni ga Yekova papara aborokporo. Yekova nakpinyemu aboro dunduko mangihe wo. Tipagine? Bambiko ko ima kpinyemu aboro na ko naida wenepai tipa yo. Ko naida i du na wene pabakure na ko na ki raki nye anye kindi.​—Pa Rug. 30:19, 20; Gara. 6:7, 8.

2. Ginipai Yekova aidaha be agu aboro ata sanga berã yo ya? (1 Yoane 2:1)

² Ono tie, Yekova amanganga aboro ngbaome tipa i irisiko te. Ko nambu gene fu aboro dunduko i diberã tipa gupai i nika mangaha. Ginipai si aida abaakumba mangihe ka si du nga gu Kristano niima zio bapatiza mangi kere ingapai? Ka si dunga ni asanga berã te, si naida i kusi ni kusayo rogo dungurati. (1 Kor. 5:13) Ono ka i vura kusa gu boro re kusayo rogo dungurati, Yekova kindi naida nzunzu gu boro re saberã na kidu na mbembedi pagume na Ko berewe. Ni rengo, gu nyanyakipa ndupai Yekova afu motumo tumorii ti ni nga wa ka ko du na rengba ka mbupai fu agu aboro saberã yo ti gayo aingapai. (Oni gedi 1 Yoane 2:1.) Yekova nga Mbori nyemuse nazungodi agu aboro mangi kere ingapai tipa i saberã yo.​—Zek. 1:3; Rom. 2:4; Yak. 4:8.

3. Ginipai ani nika sakapai tipaha rogo gi kekeapai re?

³ Yekova nape wai du gako bipai furani tipa ingapai na tipa agu aboro mangi kere ingapai. Rogo gi kekeapai re, ani nika sakapai tipa gu gene rengbe ani ka mangaha ngbaha. Wa mo nikaa geda gi kekeapai re, mo ngere tipa (1) gu gene i amangipai ngbaha sa gu kere ingapai boro amangihe rogo bambata sa kama agarã rogo gu dungurati nadu Korinda yo, (2) gu rugapai gu mokedi nangia Pauro afuhe ho gu boro namangi ingapai re asaberã ni ni, na (3) gupai gu pangbanga nga ga Baibiri re ayugoho tipa ga Yekova bipai tipa agu aKristano mangi kere ingapai.

GUPAI NAMANGI HO WIRINA AMANGI KERE INGAPAI NI

4. Ginipai namangi rogo bambata sa kama agarã rogo gu dungurati nadu Korinda yo? (1 AKorindo 5:1, 2)

⁴ Oni gedi 1 AKorindo 5:1, 2. Ti regbo ga Pauro biata nduge ni mokedi ku Korinda yo, ko agi gbegberẽpai naamanga rogo gu dungurati nadu yo. Wirina sa rogo gu dungurati re aakodaba na diabako. Ngbatunga gu mangapai re aima gberã nikerehe na si “adu nga dagba aGendiria a” te! Ono dungurati aberẽ gupai nga si adu adu ni wenepai fu gu wirina naamanga pai wa gure ko nye rogo dungurati. Isoke, kura aboro rogo dungurati aberẽ gupai nga i namangapai rogo inapai yo wakina Yekova fu kpakpa aboro. Ono Yekova aidanga na gbegberẽ mangapai dagba gako aboro te. Mbiko gi gako gbegberẽ mangapai re, kina ngba gu bete aboro naairisongo Yekova ya nazere na i kini pe gbegberẽ apai tipa ga Yekova aboro. Na ka ko anye rogo dungurati, ka kura aKristano aima tona ka wirika ko. Sidu, ginipai Pauro arugu dungurati si mangihe?

5. Ginipai Pauro aya fu dungurati i mangihe, na ginipai ko aaida ka gumbaha? (1 AKorindo 5:13) (Oni bi sura a.)

⁵ Oni gedi 1 AKorindo 5:13. Yekova afõngbadu Pauro yo ko ke waraga fu gu dungurati re na ki saki rogo gupai yo nga si naida i kusi gu boro ingapai asanga berã ni re ya kusayo rogo dungurati. Waigu si aaida agu aboro nadu rogo dungurati mangipai na ko? Pauro ape gupai fuyo nga ka i ‘kódi nga tiyo’ na ko ya. Ginipai gipai re aayugoho? Pauro asaki rogo yo nga si aakoda gupai nga ka i ‘ringa riahe a’ na ko ya. (1 Kor. 5:11) Ka mo ari riahe na boro, mo nadia regbo na ni na kini fura na ni. Ni sangbanaha, mo natona kaa dia bakere regbo wa sa na ni. Si tie ziazia nga, gupai Pauro aaida ka pehe nga si aaidanga dungurati naakoda tiyo na gu kumba re te. Gipai re arengbe ka banda dungurati be gako gbegberẽ maapai kurii. (1 Kor. 5:5-7) Berewe a, gipai re aima rengba ka undo gi kumba re ko rugu tiko na gupai nga ko ima manga kere gbegberẽpai, na ko aima rengba kadu na gberãrago tipaha na si ki sa ko ko saberã.

6. Waigu dungurati amangipai kuti ga Pauro waraga, na ginipai gu kumba re amangihe ni sangbanaha?

⁶ Tingbafuo Pauro kedi gako waraga fu agu aKristano nadu Korinda yo, ko atona kaa baka bangiriko tipa wai gu dungurati re nika mangapai kuti ni. Niyangaraha, Tito aye na gu pangbanga fuko nasa ngbarago tiko. Dungurati aima pekafuo ga Pauro arugapai na ki kusi gu bamangi gbegberẽ pai re kusayo. (2 Kor. 7:6, 7) Na gupai nangba gbe nga, tingbafuo dungurati mangipai kuti ga Pauro waraga, gu kumba re amangi saberã! Ko amangi ariapai ti asinoko na ki tona ka pekafuo ga Yekova arugute du tipa ruru mangapai. (2 Kor. 7:8-11) Ginipai Pauro arengbe ka ruga dungurati awere tipa si mangihe?

GU GENE SI AAIDA DUNGURATI MANGIPAI NGBAHA NA GU KUMBA NAMANGI SABERÃ

7. Ginipai gu kumba re amangihe tifuo i kusi ko kusayo rogo dungurati? (2 AKorindo 2:5-8)

⁷ Oni gedi 2 AKorindo 2:5-8. Pauro aya gi “mbusa re rengbe fu gu boro re, nga gu dungu aboro ambusi ni na ni.” Ka pepai ngba kura gene, gi rugute re ima manga gupai si aidaha tipa ko. Ginipai? Si ima sa gupai nga ko mangi saberã.​—Eb. 12:11.

8. Ginipai Pauro agumbaha fuo gure tipa dungurati mangihe?

⁸ Mbiko gupai nga gu kumba re aima saberã, Pauro aya fu abaakumba i karaga ko berewe ku rogo dungurati. Na ko agumba gupai berewe fuyo nga, i ‘ka vu ko na ki fu wasa’ fu ko na ki ‘nyákasi gayo nyemuse koyo du ko ni.’ Pauro aaida gupai nga awirina yuguhe rogo gayo afugo na mangaapai nga i ima mbupai fuko nzunzu na i nakpinyemuko akpi. Ngba gi gene re, i arengbe ka yugoho ziazia nga i aima diako kugume rogo dungurati.

9. Tipagine bete aboro arengbe kadu ti ni na ndundu ka mbupai fu gu wirina nasaberã re?

⁹ Ya mo bete aboro adu adu na ndundu ka dia gi boro ingapai kugume nasa berãko re ku dagbayo? Gu pangbanga re apenga ha wo furani te, ono si ima rengba kadu wo. Isoke, bete aboro adu na gberãrago kindi mbiko ko aye na akpakarapai ku rogo dungurati. Agu aboro nadu rogo dungurati amangi ome nyanyaki ka mangapai kuti ga Yekova aNdiko. Sidu, bete yo aima rengba ka bihe nga si arẽnga tipa i karaga gu boro namangi kere aingapai wa gure ku rogo dungurati te. (Oni ringbisinga ha na Ruka 15:28-30.) Tipagine tie, si adu ti ni ni nyanyakipa pai fu dungurati ka yugo ndikidi nyemuse fu gu wirina nakaraga tiko re?

10-11. Ginipai narengbe ka manga ka abaakumba aká ka mbupai fu gu boro ingapai nasaberã re?

¹⁰ Ani berẽnga gupai narengbe ka manga ka si adu nga abaakumba aká ka karaga gi kumba naima manga ndikidi saberã re ku rogo dungurati watadu tifuo ko karaga tiko, dungurati kini ká ka yugo nyemuse fuko. Ka bakere gberãrago afu riko na ko ki mbu manga ome. Ko aima rengba kaa bi tiko nga ka ko irisingo Yekova berewe te. Ko aima rengba ka berã gupai nga ka Yekova mbunga pai fuko te na ndupai ho tipa ko mangi ariapai te.

¹¹ Ginipai berewe ka mangi ka awirina aká ka mbupai fu gi kumba nasaberã re? Ka gipai re agberesi gayo pabakure na Yekova. Tipagine? Bambiko ka i arengbe nga ka wirika Yekova nga guko nambupai fu aboro ingapai te. Kuba gure, ka i awiriki kina Satana nga guko nga gbegberẽ boro ayugongo inapai ya. Ka i ambu Bakitingbanga ko mangisunge nayo i rugusi gu kumba re ti iriso Yekova.​—2 Kor. 2:10, 11; Ef. 4:27.

12. Waigu dungurati arengbe ka wirika Yekova?

¹² Waigu tie, ka gu dungurati nadu Korinda yo arengbe ka wirika Yekova angianga Satana ya? Ni mbu yo pai fu agu aboro ingapai nasaberã yo wa gu Yekova amangaha. Oni bingo gupai bete agu aboro naake Baibiri apehe tipa Yekova. Davide aya, mo “du ni wene ro, ki du zaza tipa vu aboro.” (Tam. 86:5) Mika akepai nga: “Da du ni Mbori wa mo, navu aboro ti irairapai ki mbu pa samungu?” (Mika 7:18) Na Yesaya aya: “Gbegberẽ boro mbú gani pai, na gu boro zanga rurupai mbú gani aberã; ni káraga tini koyo du Yekova ni, ko ini pai fu ni, na koyo du gaani Mbori ni, mbiko ko avú ni avu kpaima.”​—Yes. 55:7.

13. Tipagine i akaraga gu kumba nasaberã ko ti ni berewe ku rogo dungurati? (Oni bi gu sanduki nga, “Gini Regbo I Akaraga gu Kumba Nadu Korinda yo Ti Ni?”)

¹³ Tipa ka wirika Yekova, si aaida gu dungurati naadu Korinda yo di gu kumba kugume nasaberã ko re na ki yugu gupai fuko nga i nakpinyemu ko akpi. Pauro aya ka i mbupai fu gu kumba nasaberã ko re, i nika yugo gupai nga, i nagia “sangba rogo apai dunduko.” (2 Kor. 2:9) Wa si avura du nga, wa i akusi gu kumba re rogo dungurati si adi kina bete adiwi gbua, ko aima saberã. Sidu, ndupai aadunga ho fu abaakumba tipa i sungudi mbata kini ru ka karaga ko te.

GU GENE RENGBE ANI KA WIRIKA GA YEKOVA RURU SARANGBANGA NA INAPAI NGBAHA

14-15. Gini apai rengbe ani ka wirikaha ti gupai namangi Korinda yo? (2 Petero 3:9) (Oni bi sura a.)

¹⁴ I ake gu pangbanga ku rogo Baibiri yo du tipa gu gene i amangipai ngbaha tipa gupai nadu Korinda yo re tipa “gaani wirikapai.” (Rom. 15:4) Ani nawirika gupai ti gu pangbanga re nga, Yekova aidanga agu aboro mangi kere ingapai ka i asanga berã ya, i nye rogo dungurati te. Gu kura aboro ima rengba ka berã gupai nga mbiko wa du Yekova nga Mbori inapai, ko ima rengba ka mbu gu boro asanga berã ya ni nye rogo dungurati, ono anga wo du Yekova ayugo inapai te. Wa vura duhe nga Yekova nga Mbori inapai, ko aidanga na ngbatunga mangaapai dunduko te. Gako arugute tipa gupai du ni ruruhe na gu du ni irairaha aˈarianga tihe te. (Yuda 4) Ka Yekova mbu agu aboro ingapai asanga berã ya i nye rogo dungurati, gure arengbanga kadu nga inapai te bambiko gipai re ima rengba ka gbarasapa dungurati.​—Snz. 13:20; 1 Kor. 15:33.

¹⁵ Wa vura duhe wo, ani nawirika gupai nga Yekova aidanga ai boro kpi te. Ko naida ka batasa aboro a wa rengbehe. Ko nayugo inapai fu agu aboro namanga aˈariapai ngbaduyo yo na nga agu aboro naida ka mbakada gayo pabakure na ko. (Yeze. 33:11; oni gedi 2 Petero 3:9.) Sidu, ho gu kumba nadu Korinda yo asaberã ni na ki mangi aˈariapai rogo gako mangaapai yo, Yekova arugu dungurati tipa i mbupai fuko na ki diko kugume rogo dungurati.

16. Gamo bipai nga gine tipa Yekova tifuo wirika mo pai tipa gupai namangi Korinda yo?

¹⁶ Gu kpiapai nangia ga gu dungurati nadu Korinda yo nayugo gupai furani nga Yekova nga Mbori nyemuse, ruru mangapai, na Mbori ruru sarangbanga. (Tam. 33:5) Ya mo gipai re afõnga ngbadurani yo ani idi ka tambua Mbori ni bakerehe te? Ani na tambuahe nga ko na inapai bambiko ani dunduko nga aboro ingapai na ani naida na gako mbupai. Ani a na bakere tambuahe fu Yekova nga ko afu motumo tumorii furani tipa wa ka ko rengbe ka mbupai furani ti gaani aingapai. Nairiwo wai duhe nipa wasa ka ino gupai nga Yekova ima kpinyemu gako aboro nzunzu na ko naida bawene apai tipa yo!

17. Ginipai ani ka sakapai tipaha rogo gu kekeapai ngbefuo gere?

¹⁷ Ka boro mangi kere ingapai areme, waigu rengbe abaakumba rogo dungurati ka wirika ga Yekova nyemuse na ki undo gu boro re tipa ni saberã ni? Waigu si aida dungurati mangipai ho ka abaakumba diberã ni ka kusa boro kusayo rogo dungurati watadu ka karaga ni? I nika karagapai kuti agi asanahe re rogo gu kekeapai ngbefuo gere.