Du Mbembedi na Akuarani Nga Wenepai Furani!

1-2. Ginihe nyakipaha fu Yekova, na ginipai ko aida ani mangihe?

WAI ani amangapai na kura aboro na nyanyakipaha fu Yekova. Yesu ayugu gupai nga, si naida ani kpinyemu akuarani wa ani akpinyemu tirani. (Mt. 22:37-39) Gure nakoda yugo wene sino zavura fu agu aboro adunga na ani rogo idapase yo ya. Ho ani ayugo gi weneringise re ni, gure nga ani nawirika Yekova Mbori nga gu “ko nafu uru si kuru tipa agu yo nga gbegberẽ yo na agu yo nga wene yo a, ki kedi mai tipa ruru aboro na iraira yo a.”​—Mt. 5:45.

² Wa vura duhe nga Yekova ima kpinyemu aboro dunduko, ko ima kpinyemu agu aboro gbe namanga gupai du ni ruruhe. (Yo. 14:21) Ko naida gupai nga ani wiriki ko. Sidu, ko nazungodi rani ani du na ‘bakere nyemuse’ tipa awirinarani na kini yugu wesewese ‘nyemuse’ fuyo. (1 Pet. 4:8; Rom. 12:10) Gi ngbatunga nyemuse re wakina gu ani ayugoho fu gumerani watadu bakurearani nga guni mbedi ani na ni gbe.

3. Ginipai si aida ani tingidihe tipa nyemuse?

³ Kina wai ani naangerafuo gaani rukuruku ahe rogo gaani ati tipa si sono, kinawo a si aida ani ngerefuo gaani nyemuse tipa kura aboro si sono. Gu mokedi nangia Pauro ape gupai fu aKristano nga: “Nyemu awirina nye dagba roni.” (Eb. 13:1) Yekova naida ani naasonosa gaani nyemuse tipa akuarani kindi. Gi kekeapai re nika sakapai tipa ndu gupai si aida ani nye ti ni mbembedi na awirinarani airisi Yekova na wai rengbe ani kaa ndu kindi kumbatayo kaa mangaha wo.

NDU GUPAI SI AIDA ANI DU MBEMBEDI TI NI GBE NA AWIRINARANI

4. Ringbisihe kuti Atambuahe 133:1, waigu rengbe ani kaa ndu kumbatayo kindi kaa bi gu kodatise nga ga awirina na nyanyakipaha? (Oni bi asura a.)

⁴ Oni gedi Atambuahe 133:1. Ani ima ida kuti gupai bake papara atambuahe akehe nga du ni bakurea agu aboro nakpinyemu Yekova nga “wenepai” na “wenerago.” Ono kina wai boro narengbe kaa bi ngua zanga si du na nyakipaha fu ni nga gu ni naabihe na aˈuru dũ, ani ima rengba ka zanga bi wai ngba gu kodatise du dagba awirina. Ani nabi awirinarani dedede ti kura regbo bara dunguhe rogo poso yo. Waigu rengbe ani kaa ndu kindi kumbatayo kaa biyo na nyanyakipa yo? Gaani nyemuse tipa yo rengbe ka sona ka si du nga ani di regbo ka berã tipa wai nyakipa yo nibasasa fu dungurati na furani.

5. Gini sangbanapai rengbe gu nyemuse du dagbarani kadu na ni kurii kura aboro?

⁵ Kina iriworago nati ti agu aboro naye tipa gaani adunguratise ni bambataha ho i abi gu nyemuse ni du dagbarani. Ho i abi gu nyemuse re ni, i nada kuti gu digisopai nga i ima gbia rengo. Yesu aya: “Ka oni akpi nyemu akuaroni​—si ka aboro ini ti ni dunduko ya gimi abawiriki nga oni.” (Yo. 13:35) Oni bingo gu kpiapai nga ga Chaithra, nga gu ri du yunivasiti yo naawirika Baibiri na aDezire Yekova. Ri adi yambahe kugume tipa kadu pati bakere dunguratise nga ga rame biata. Tingbafuo ri ndu kupati ni rogo bambata uru, ri ape gupai fu gu boro naawirika Baibiri na ri nga: “Avungu re aadungongo re te. Ono pati gaoni bakere dunguratise, aboro ima dungo re bangeyo naima da 52 rogo bangisa uru sa gbua! Mi naabihe nga Yekova namangasunge na gako aboro tipa mi bi tire nga ko ima kpinyemu re. Mi naida kadu ni papara agu aborokporo re.” Chaithra amangi sona kumbatayo na ki zi bapatiza rogo 2024. Ni rengo, ho vovo aboro abi gu wene sunge ni ani amangaha, kodihe na gu nyemuse du dagbarani, si nasa yo i tona ka iriso Yekova.​—Mt. 5:16.

6. Waigu pa mbeda ani na awirinarani aKristano narengbe ka banda rani?

⁶ Du mbembedi na awirinarani ima rengba ka banda rani. Pauro ape gupai fu akurako aKristano nga: “Oni rugu tironi dagba roni na uru na uru . . . ngbadu gu ni dagba roni ka nyaka be gu nangahe nga ga ingapai.” (Eb. 3:13) Ka si du nga ani na bakere gberãrago na si ki du furani ni kpakarakpakaraha tipa ani mangi gupai du ni ruruhe, Yekova ima rengba ka sa kuarani idipase nga gu ni bi gipai re nifu gu undo furani ani aidaha. (Tam. 73:2, 17, 23) Ngbatunga gu undo re ni wenehe tipa rani.

7. Gini ngbanya du dagba nyemuse na kodatise? (AKorosaio 3:13, 14)

⁷ Ani rogo gu badona nga ga agu aboro namanga ome nyanyaki ka yugo nyemuse fu akurayo, sidu, ani nagbia dungu amaku. (1 Yo. 4:11) Ni kpiapai, nyemuse nasarani ani ‘nihi pai fu akuarani,’ na gupai re nasarani ani du ni kodikodi rani na awirinarani aKristano. (Oni gedi AKorosaio 3:13, 14; Ef. 4:2-6) Sidu, ba gaani adunguratise yo, ani rogo gu ba ani agbia ngbarago rogoho ka iriso Yekova kisusi kura ariigbu rogo zegino.

ONI YUGU IRISA FU AKUARONI

8. Waigu Yekova aundo rani tipa ani du ni kodikodi rani na awirinarani?

⁸ Gu kodatise du dagba awirinarani rogo zegino dunduko naye be Yekova. Yekova nasa gipai re si mangi wa vura duhe nga ani nga kpakpa aboro. (1 Kor. 12:25) Baibiri nape gupai nga “Mbori nayugo pa nyemu akuaroni fu roni tigaoni.” (1 Tesa. 4:9) Gere nayugo gupai nga Yekova namangasunge na Baibiri ka yugo gupai furani si aida ani mangihe tipa kadu mbembedi na akuarani. “Mbori nayugo” pai furani ho ani awisigo gako ayugopai ni na kini mangihe rogo gaani raka yo. (Eb. 4:12; Yak. 1:25) Na gere nga kina boro gupai aDezire Yekova aˈasada ka mangaha.

9. Ginipai ani awirikaha rogo ARomo 12:9-13 tipa yugo irisa fu kura aboro?

⁹ Waigu Fugo Mbori ayugopai furani tipa ani du mbembedi na akuarani aidipase? Oni bingo gupai Pauro apehe tipa gipai re a wa duhe ni kekehe rogo ARomo 12:9-13. (Oni gedihe.) Oni bi gupai nga ko aya, “tipa irisa, oni mói kina akuaroni mbata yo.” Rogo gipai re yo nga gine? Si naida ani mangi bambata diandue tipa ka yugo “ngbadu inapai” fu kura aboro ni mbu ani pai fuyo, kini di yo kugume na kini gamuhe fuyo. (Ef. 4:32) Si aidanga ani sungudi wirinarani tipa ni mbedi na ani mbata te. Mo ima rengba ka maa ‘akuaro mbata yo’ ni manga gipai re. Na mo nika ka bi gupai Yesu apehe si nimangi ho ko aya ni: “Fu he ngba ti dia ha.”​—Amo. 20:35.

10. Waigu rengbe oni kadu zanga nyomoro kidu kakaka ni “maa kina akuaroni mbata yo”? (Oni bi sura a.)

¹⁰ Kina ngba nazera nga nibasa tingbafuo Pauro pe gupai nga ani mói kina akuarani mbata yo, ko angarasi rani nga “ka oni nyómoro nga ya.” Gu boro anyomoro nga ya, ni zaaza na kini mangisunge nyanyaki. Ho ni agbia sunge ni, ni namangaha sirisiri. Asanza 3:27, 28 nazungodi rani nga: “Ka mo niká nga na manga wenepai fu agu yo du he fu yo ya, ho rengbe mo arengba ni namanga ha.” Mbiko agi apai re, ho ani abi gu boro ni naida na undo, ani namangapai niipo ka undo ni. Ani asungudongo watadu ka berã gupai nga gu kura boro nika undo aundo te.​—1 Yo. 3:17, 18.

11. Ginipai rengbe ka undo rani ani du mbembedi na akuarani?

¹¹ Gu kura gene rengbe ani ka yugo irisa fu akuarani aidipase ngbaha nga ni mbu ani pai niipo fuyo ho i naingipai ni kuti rani. AEfeso 4:26 naya: “Ka uru ti nga gaoni zinga ya.” Tipagine? Veresi 27 nape gupai nga ka ani mangihe wo, gure nga ani ‘nambakada gene fu bakitingbanga.’ Yekova nape gupai furani rogo Fugoko yo bara dunguhe nga ani mbupai fu akuarani. AKorosaio 3:13 nape gupai furani nga “nivu akuaroni.” Mbupai fu kura aboro ti gayo aingahe nga gu wene gene rengbe ka mbedisa rani koyo du kura aboro ni. Ho ani amangaha ni wo, ani naundo ka “ka kuti gu du sa nga ga Toro zikazika, ni gu ũkpamiatise nga zereda.” (Ef. 4:3) Si tie ziazia nga, ho ani ambupai ni fu akuarani, ani naundo ga Yekova aboro i du ni kodikodi yo na zereda.

12. Waigu Yekova aundo rani ani naambupai?

¹² Kina rengo du nga ha nga, si ima rengba kadu furani ni kpakarakpakaraha ani mbupai fu agu aboro imisi rani watadu ba gberãrago tirani. Ono ani ima rengba ka mbupai fuyo mbiko gu undo nga ga ga Mbori ziazia toro. Tifuo ngarasa yo rani tipa ani ‘ngbá angba yee na akuarani’ na ‘ka ani nyómoro nga ya,’ Baibiri nape gupai furani nga: “Oni dú kakaka toro yo.” Gu boro du “kakaka” ni zaaza ni sangbana ga Mbori ziazia toro. (Rom. 12:11) Sidu, ga Mbori ziazia toro ima rengba ka undo rani tipa ani yugu nunga na ki mbupai fu akuarani. Si du nga ndu gupai ani azungodi Yekova ti ni ko undo rani.​—Rk. 11:13.

“KA ONI KPARAKA NGA DAGBA RONI YO YA”

13. Ginipai rengbe ka kusa kparakaro dagbarani?

¹³ Dungurati na ngbatunga aboro rogoho “dunduko” nga aguyo naye rogo aba ni bakiakia. (1 Tim. 2:3, 4) Mbiko gipai re, ani dunduko nibasasa ima rengba ka manga asiapai ni bakiakia nibipa agu apai du wa vo roko, wai ani ambakada tirani, gu ngbatunga gene husa ani aidaha, watadu agu ambaro ani aidaha. Ka ani adunga na rubangirise ya, gi kparakparaapai du tipa rani re ima rengba ka ye na kparakaro. (Rom. 14:4; 1 Kor. 1:10) Mbiko gupai nga Mbori ima yugopai furani ani kpinyemu akuarani, si naida ani du na rubangirise ka zanga ka kina kuti agu apai ngba tirani kini berẽhe nga si ngba ti ga kura aboro.​—Frp. 2:3.

14. Ginipai si aida ani asadi kaa mangaha ti aregbo dũ, na tipagine?

¹⁴ Ani nane kparakaro rogo dungurati a ho ani amanga ome ni ka pe agu afugo rengbe kafu wasa kura aboro ti aregbo dũ. (1 Tesa. 5:11) Barambeda kusayo, dungu agu aboro naima zera rogo toro yo watadu agu aboro i akusiyo rogo dungurati ima karaga tiyo. Ani nadia yo esuesu kugume! (2 Kor. 2:8) Oni bingo gupai namangi tipa gu kura wirina nga dee nazere tipa agarã bawe ho ri aye ni ku Bambu Kindo yo. Ri aya, “Aboro dunduko naamoma ku ngbare na kini fu sene fere.” (Amo. 3:19) Waigu gi taata mangapai nga ga wene sino re adu namaapai kuriri? Ri aya, “Si asa re mi bi tire nga Yekova naundo re tipa mi gbia ngbarago berewe.” Kristo ima rengba ka mangasunge na ani ka fu wasa fu agu aboro “nambu dunduko, ki du na rõrõi tindiro,” ka ani aˈasada kaa ngarasa kura aboro.​—Mt. 11:28, 29.

15. Gini kurapai rengbe ani ka mangaha tipa ka undo dungurati si du na kodatise? (Oni bi sura a.)

¹⁵ Gu kura gene rengbe ani ka sa gupai nga kodatise naandu kumbatayo kindi ngbaha nga gu gene ani afura ngbaha. Eyobo 12:11 naya: “Tue naasada nga pai wa vuru ngba yo naina ngbanya riahe, te?” Kina wai wene bamangi riahe ninaˈasada gu riahe ni apasa ha mbata ka bi he si ngia si wenengai mbata fu nifuhe fu kura aboro, si naida ani berẽkurii gupai ani nika pehe mbata fu ani pehe. (Tam. 141:3) Si naida gaani sasa ti aregbo dunduko du nga, gupai ani nika pehe nika fu ngarasaro, wasa na kidu ni gupai nika “fu undahe fu agu yo nagia ha.”​—Ef. 4:29.

16. Ada du gbe si aida i namangasunge na agu afugo nafu ngarasaro?

¹⁶ Si naida kumbakuadee na avunguagudee, du na rubangirise tipa wai i afura, wa ka afugo yo du ni gupai nafu ngarasaro. (Koro. 3:19, 21; Tito 2:4) Si naida abaakumba du a nimburu ngarasaro na wasa wangia yo ga Yekova babanda akandoro. (Yes. 32:1, 2; Gara. 6:1) Gu sanza nga ga Baibiri natingida rani na gupai nga: “Gu pai nakura ti kina ragoho​—ngba ha angba!”​—Snz. 15:23.

NYEMUSE “ROGO MANGAPAI YO NA ROGO RENGO YO”

17. Waigu rengbe ani ka yugoho nga ani nayugo ndikidi nyemuse fu awirinarani?

¹⁷ Gu mokedi nangia Yoane nangarasa rani nga “ka ani du nga na nyemuse kina rogo fugo yo, ni mirãse a ya; kina rogo mangapai yo na rogo rengo yo.” (1 Yo. 3:18) Ani naida gaani nyemuse tipa awirinarani ye kina boro kpotorani yo. Waigu rengbe ani ka manga gipai re? Ho ani adia bakere regbo ni na awirinarani gbe, si nasarani ani mbedi na yo na gaani nyemuse tipa yo kini nyaki a. Sidu, ani gbata amamu tipa ka dia regbo na kura aboro​—ba dunguratise yo na gene tungusapai yo. Ani di regbo ka ndu kaa bi kura aboro. Ho ani amangaha ni wo, ani nayugo na ni nga Mbori ima yugopai furani tipa ani kpinyemu kura aboro. (1 Tesa. 4:9) Na ani nika ndu kumbatayo kindi kaa ino rengo gupai nga, si ni “wenepai na wenerago a ka awirina sungu sa na berã sa!”​—Tam. 133:1.