Pambori na gu Vura du Ukraine Yo—Ginipai Baibiri Ayugoho?

Mo wisigingo agi apai du kusende re nibipa agu abaworimo ni abarumbatayo nga ga pambori yo na gu vura du Ukraine yo:

• “Barii gu Kanisa nga ga Orthodox nga gu du Russia yo nga Patriarch Kirill, abisiranga gu zubohe nga ga Russia te. . . . Gako Kanisa andu kumbatayo kaa gbaraga aziree apangbanga tipa Ukraine, na Putin ima mangasunge na agi apangbanga re tipa ka songoda gako vura.”—EUobserver, Marungu 7, 2022.

• “Patriarch Kirill . . . ima songodapai nyanyaki tipa gu zubohe nga ga Russia kuti Ukraine ni pe ko gupai nga gi vura re nga papara gupai si aidaha ka sovura kuti ingapai.”—AP News, Marungu 8, 2022.

• “Gu barumbatayo nga ga gu Kanisa nga ga Orthodox du Ukraine yo nga Metropolitan Epiphanius gu bambata ko du Kyiv yo, afu maku Rago Sa Sunge kurii gako aboro i ‘sovura kuti agu abanzengere nga ga Russia yo’ . . . [Ko] ape gupai a nga imo agu abanzengere nga ga Russia yo nga ingapai te.”—Jerusalem Post, Marungu 16, 2022.

• “Ani nga UCCRO [gu Riigbu nga ga AKanisa na gu Riigbu Nga ga Apambori Nga ga Ukraine] nasongoda agu abanzengere nga ga Ukraine yo na agu aboro dunduko nasovura ka banda gaani ringara. Ani nafu maku kurii gu ome i amangaha tipa ka banda Ukraine be avurarani, na ani namanga kparakpee tipa yo.”—UCCROa Statement, Wegebe 24, 2022.

Ginipai mo aberãha? Ya mo si naida agu apambori naya si napekafuo Yesu Kristo ngarasi gayo aboropambori i ndu tipa vura? Ginipai Baibiri ayugoho?

Gu pangbanga nga ga pambori nibipa vura

Apangbanga nayugo gupai nga pambori nape gupai dedede nga si naida aida aboro ndu tipa vura, na si ni wenepai ka ndu tipa vura, watadu zavura si ni nyanyakipa pai ka ndu tipa vura, baraho i amanga tiyo ni nga i namangapai tipa zereda. Tipa dungu bawe agarã, aDezire Yekova ima kusa ngbatunga gi biriki nga ga pambori re ku yangura. Mo wisigingo bete agu akpiapai du rogo gaani awaraga.

• Gu kekeapai nga “The Crusades—A ‘Tragic Illusion’” nayugo wai gu Kanisa Nga ga Katoriko Nga ga aRomo adu kugii gu bakere imotise i amangaha ti rimo Mbori na ti rimo Kristo.

• Gu kekeapai nga “The Catholic Church in Africa” nasakapa wai pambori aarugusanga agu avura nga ga angbatunga ya, zavura gu vura nga ga imo tunga aboro kusayo kpäkäyä.

• Gu kekeapai nga “Is Religion to Blame?,” “Religion’s Role in Man’s Wars,” na “Religion Takes Sides” nasakapa wai agu abarumbatayo rogo agu aKanisa nga ga Catholic, Orthodox, na Protestant nasongodi pai kubara gayo aboro yo tingba badungu avura.

Ya mo si naida agu apambori nga ga aKristano songodi vura?

Gupai Yesu ayuguhe: “Mo nikpí nyemu kuaro wa mo akpi nyemu tiro.” (Matayo 22:39) “Oni kpí nyemu avuraroni.”—Matayo 5:44-47.

Gupai Yesu apehe: “Gi ngbi aenga nga rogo gi zegino te re; ka gi ngbi aenge rogo gi zegino re; ka gimi amoyambu naso vura tie, i ka fu re.” (Yoane 18:36) “Agu yo dunduko naroga basape i akpi kina be basape.”—Matayo 26:47-52.

Mo berẽnga kurii gipai re: Ka si du nga si aaidanga aKristano sovura zavura ka banda Yesu te, ya mo ndu pai ho si aida i sovura tipaha? Mo gedi gu kekepai nga “Is War Compatible With Christianity?” ka bi wai bambata aKristano adu ni ruruyo ni peka yo fuo ga Yesu kpiapai na ayugopai.

Ginipai nika manga tipa agu apambori nga gu nasongoda avura?

Baibiri nayugo gupai nga Mbori nasoga agu apambori asoga naya si narukuba Yesu ono ka si apekanga fuo gako ayugopai ya.—Matayo 7:21-23; Tito 1:16.

• Gu kitabu nga Yugoti nayugo gupai nga Mbori nabi ngbatunga agi apambori re nga si du kugii pakpio “agu yo dunduko i aimi yo auru kpotosende.” (Yugoti 18:21, 24) Tipa ka ino gupai duhe ti ni wo, mo gedi gu kekepai nga “What Is Babylon the Great?”

• Yesu ayugu gupai nga agu apambori dunduko nga gu Mbori asogaha i nika gbarasaha tipa gaha gbegberẽ mangapai, kina wai i nidewe gu gbegberẽ ngua nazu gbegberẽ rinde “ki bafu he ku we yo.” (Matayo 7:15-20) Mo gedi gu kekeapai nga “Digido Zire Pambori Ima Mbeda Ka Da!” tipa ka ino wai gipai re nika manga.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images