Ya mo Abazogo Rengbe ka Kodatiyo Tipa ka Ne gu Kerepai Naye Mbiko Wai Rago Asakatihe?—Ginipai Baibiri Ayugoho?

Rago Poso, Ngbangba 20, 2022, gu Rondo Nga ga Kodikodi Aringara Tipa Wai Rago Asakatihe i ayambaha nga COP27 adigi. Abazogo na wene ainihe nga aguyo nadu pati gu rondo re adakuti gupai nga ka fu marã fu agu aringara du ni kere rungorungoho tipa si undo yo i mangipai kuti gu kere sangbanapai naye mbiko pa wai rago asakatihe. Ono dungu aboro idi kuti gupai nga gipai re arugusanga gu kpakarapai namanga mbiko pa wai rago asakatihe te.

• “Mi na ngbarago nga ani ima diaberã ka maya marã tipa ti undo agu aboro narungo mbiko wai rago asakatihe. Ono ani ima ino gupai nga kpotosende ima da ni kurugbo ho na si ngba kerepai ka gberã ki da ti gu bangiriba nga gu i arengbanga na mbakadaha ya, wakina gu boro nakaza ni kerehe nga gu ni naida na undo ni ipiipihe nga ga munganga.” Gere nga sangba António Guterres, bangere kurii gu riigbu nga ga Yu-en (United Nations), rogo Ngbangba 19, 2022.

• “Barambeda kpotosende ima rengba ka gbiatihe na bakere ariapai mbiko pa wai rago asakatihe nga gu nika du na kere sangbanaha kurii aboro dunduko.”—Sangba Mary Robinson, kuru nazogo nga ga Ireland na kuru namangisunge rogo gu basunge nabipa gu Rengo Nga ga Aboro rogo gu riigbu nga ga Yu-en (UN High Commissioner for Human Rights), Ngbangba 20, 2022.

Paranga aboro nabaka bangiriyo ni bakerehe tipa gupai nika manga kumbatayo tipa gi kpotosende re. Ono tie, ya mo abazogo rengbe ka kodatiyo ka mangapai kina sa na ki digisi gayo kidohe du tipa ka mbakada gu kpakarapai naye be pa wai rago asakatihe? Ginipai Baibiri Ayugoho?

Ya mo abazogo akodatiyo na kidu na diabese?

Baibiri nayugo gupai nga, wa vura duhe nga abazogo ima rengba ka mbakada gu kpakarapai naye be pa wai rago asakatihe, i ambakadanga gu kpakarapai re dunduko te. Mo bingo ndu apai ue duhe ti ni wo:

• “Gu he du ni nuganuga ha ka i rugu nga ha te.”—Batungusipai 1:15.

  Nayugo gupai nga: Abazogo arengbanga ka manga agu apai dunduko i aida ka mangaha te bambiko i aakusanga aboro i nizogo tiyo te. (Yeremaya 10:23) Ka si vura du vurũ nga abazogo nika kodatiyo i adunga na rengba tipa ka mbakada gu kpakarapai nga ga gi zegino re te, ka i vura manga asadatise wai vurũ.

• “Bambiko aboro akpi kina nyemu tiyo, ki du ni airakpinyemumarã, . . . aguaurundika.”—2 Timoteo 3:2, 3.

  Nayugo gupai nga: Baibiri aima gumba gupai nga badungu aboro ti gi gaani regbo re nika kpi kina nyemu tiyo na i adunga na nyemu ka mangasunge kina sa tipa ka mbakada gu raka nga ga aboro dunduko te.

Gu maabangirise duho

Ono tie, gupai du tipa gaani kpotosende kumbatayo arunga riipa agu akidohe agu abazogo nga wiri aboro amangaha te. Mbori ima maa gu Bazogo nika zoga zegino du na rengbanapai, nga Yesu Kristo. Baibiri nape gupai tipa ko nga:

• “Pa zogaaboro adú ku pagorõko, i ayámba rimoko nga “Baiiriwo, Barugupai, Mbori du na tandu apai dũ, Nyenye Ba, Gbia Zereda.”—Yesaya 9:6,

Yesu nga Bakindo ga Mbori Kindo, watadu gu zogarago nga ga ngbangbaturũ. (Matayo 6:10) Ko na ome, tatamana, na ko na nyemu ka ngerafuo gi gaani kpotosende re na agu aboro naraka rogoho. (Atambuahe 72:12, 16) Tiibe gako zogarago, gi zogarago nga ga ngbangbaturũ re nika nyasa riipa aguyo “nagbarasa kpotosende” na ki sa kpotosende ni bawenehe berewe—Yugoti 11:18; Yesaya 35:1, 7.

Tipa ka wirika kura apai tipa gupai nzunzu nika rugusa gu kpakarapai naye be pa wai rago asakatihe, mo gedi gu kekeapai nga “Climate Change and Our Future—What the Bible Says.”