Kere Faarago Rogo Zegino Dunduko Rogo gu Garã Nga 2023—Ginipai Baibiri Apehe?

Badungu aboro rogo zegino dunduko nahi gu kere faarago awere nga gu naamanga mbata ya na gu kura agberãngo nga gu naye be wai du rago ni kere fofoihe. Mo bi agi atingidapai du kusende re:

• Gu basunge nangera tipa wai du ba faa rago watadu pa zeraha nga gu du Amerika yo ape gupai nga “Gere nga gu bambata regbo gu diwi nga ga Banzinga na foi ki susi agu ni du mbata kusayo wa agarã 174”. (National Oceanic and Atmospheric Administration) Bamburu 13, 2023.

• “Italy, Spain, France, Germany na Poland nga agu aringara nagbia tihe awere na kere faarago gbiati fofoi wege nga gu niima bita kuari kuti 48°C [118°F] rogo agu a kisanga nga Sicily na Sardinia–gere ima rengba kadu nga bambata regbo tipa i pepa faarago wa gure Putu yo.”—Gu basunge nga European Space Agency, Bamburu 13, 2023.

• “Wa kpotosende ada ni kere fofoihe awere, si tie ziazia nga si nikaa ndu kindi kumbatayo na bakere nana mai ima rengba kadu nga gu rengbe ka ye na bakere hihi ime.”—Fugo bangere kurii gu sunge nangerakurii pa ime na pa wai du rago ni zezerehe nga Stefan Uhlenbrook rogo gu basunge nga ga World Meteorological Organization, Bamburu 17, 2023.

Ya mo agi apangbanga nafura tipa wai rago afaa kina kumbatayo re asanga ro mo du na bakere bakabangirise te? Mo bingo gupai Baibiri apehe tipa gi nyanyaki pa riipai re.

Ya mo gu kere faarago susi gu nidu mbata namanga nadigiso gu sangbaanebi nga ga Baibiri?

Ii. Gu kere faarago susi gu nidu mbata namanga rogo zegino dũ re nadigiso agu apai adigiso Baibiri aima gumbaha nga si nika manga kumbatayo ti gi gaani regbo re. Ni kpiapai, Yesu agumba sangbanebi nga ani ka bi “baiiriwo apai ni kere he.” (Ruka 21:11) Bambiko wai rago afaa nikerehe kina kumbatayo susi gu nidu mbata, badungu aboro nagunde nga gu mangaapai nga ga aboro nika sa kpotosende si da ni gu ba aboro arengbanga ka raka rogoho berewe ya.

Ya mo kpotosende ada ni gu ba aboro nikaa rengbanga ka raka rogoho berewe ya?

Oó. Mbori akusi kpotosende ni gu ba si aida aboro raki rogoho nyeanye kindi. (Atambuahe 115:16; Batungusipai 1:4) Kuba gupai nga ko mbu gene fu awiri aboro i gbarasihe, ko nika ‘gbarasa agu aboro nagbarasa kpotosende,’ kina wai ko nakidohe.—Yugoti 11:18.

Baibiri nayugo gupai nga Yekova nika banda kpotosende abanda be agberãngo.

• “[Mbori] aza yuge bazigizo, si ru zaa, ngambiringambiri ngiri aime ki tidi.” (Atambuahe 107:29) Mbori na ome beko kurii kusikusi ahe. Ko na kina gu rengba beko nga ga rugusa agu akpakarapai nga ga gi kpotosende re nga gu nasa aboro i narungo be kere faarago.

• “Mo nangera ku kpotosende no ki nikedi mai ku auru he, mo ninakumukosi he gbe.” (Atambuahe 65:9) Mbiko ga Mbori amaku, kpotosende nika da ni paradizo.

Tipa ka wirika kura apai tipa ga Baibiri akidohe tipa karaga kpotosende berewe kubaha, mo bi gu kekeapai nga “Who Will Save the Earth?”