Ya mo Mbori na Rimoko Ti Ni?

Ga Ziazia Kekeapai karagapai

Aboro dunduko du na rimoyo ti ni. Ya mo si arẽnga Mbori du na rimoko ti ni te? Du na rimo na kini mangisunge na ni nga papara gu pabakure nga ga aboro. Ya mo si naida gipai re du kia na gaani pabakure na Mbori?

Rogo Ziazia Kekeapai yo, Mbori naya: “Mi nga Yekova, gere nga rimore.” (Yesaya 42:8) Wa vura duhe nga ko na dungu arimo nga ga sunge wa “Mbori du na tandu apai dũ,” “Gbia,” na “Bafuahe,” ko nabi airisi ko na nyanyakipa yo ni fuko momu fuyo i naayamba ko kina ti rimoko.—Bambata Pai 17:1; Amokedi 4:24; 1 Petero 4:19.

Dungu aZiazia Kekeapai namangasunge na rimo Mbori rogo Gate 6:3. Si naya: “Mi nayugu tire fu Abarayama, na fu Yisaka, na fu Yakoba, wa Mbori du na tandu apai dũ, ono i aina nga re ti gu rimore nga Yekova te.”

Rogo pa-Ingirisi yo i aima mangasunge na gu rimo Mbori nga Jehovah tipa dungu kama agarã. Wa vura duhe nga badungu abawirikipai idi na gu kekehe nga “Yahweh,” dungu aboro rogo zegino ima ino gu rimo nga Jehovah. I aakenga bambata papara Ziazia Kekeapai rogo pa-Ingirisi te ono rogo pa-Ebere, nga gu fugo i atona gedaha tona kumbabee yo ku garebee yo. Rogo gu fugo re, rimo Mbori kuru na kekeapai biama, יהוה. Gu bangiri afugo du biama re, i saha nga YHWH—nga gu i ayambaha nga Tetragrammaton.