Ginipai Baibiri Apehe Tipa Gamahe?
Gu karagapai nga ga Baibiri
Baibiri nangarasapa gu gamahe boro ni tini adiaberã ka fuhe na ngbaduni yo dũ. Si nayugo gupai nga ngbatunga agu agamahe re afunga undo sa fu kina gu boro i afuhe fu ni te ono zavura fu gu boro a na gamahe. (Asanza 11:25; Ruka 6:38) Yesu aya: “Fu he ngba ti dia ha” watadu bakere ngbarago du ti gamahe kisusi ti diaha.—Amokedi 20:35.
Gini regbo du fu gamahe na undo ti ni?
Gamahe na undo ti ni ho boro adiaberã ni ka fuhe ni tini na kpotoni yo dũ. Baibiri naya: “Aboro dunduko i nimangi wa i akpi nyemu he kpotoyo yo, ni ngbaduse te, ni dingisaro a te. Bambiko Mbori nakpi nyemu kina gu boro nagama he esuesu.”—2 AKorindo 9:7.
Gu gamahe naye kina boro ngbaduse yo nga papara gu “idapambori” nga gu Mbori aida na ni. (Yakoba 1:27) Gu boro nagamahe na kpotoni yo dũ fu agu aboro du rogo zingo namangasunge wa sa na Mbori, nga gu ko nabi gu wene sino nga ga gamahe re nga bape du i afuhe fuko. (Asanza 19:17) Baibiri nayugo gupai nga Mbori nitiko nika gasa ahe fu gu boro nagamaha re.—Ruka 14:12-14.
Gini regbo adunga fu gamahe na undo ti ni ya?
Ka si du nga boro nagamahe na iraira ndupai. Ni kpiapai:
Ka ba iriwo rago ti aboro.—Matayo 6:2.
Ka gbia gu kurahe kuba gu ni nagamuhe.—Ruka 14:12-14.
Ka asada ka fu marã fu abarumbatayo rogo apambori tipa wa ka ni gbia bata.—Atambuahe 49:6, 7.
Ka si dunga i nika mangasunge na gu gamahe re si songodi agu apai watadu agu asino Mbori asogaha. Ni kpiapai, si rengbe kadu ni gbegberẽhe ka fu marã fu boro ni ba ake na ni watadu ni mangisunge na adawa watadu buda na ni ngba gbegberẽ gene. (1 AKorindo 6:9, 10; 2 AKorindo 7:1) Wakina gure a, si arunga ka fu gamahe fu gu boro duadu na rengba ka mangasunge marã tipa ka undo ti ni na ni ono kina ni kini diberã ka zanga mangasunge ka undo ti ni te.—2 ATesaroniko 3:10.
Ka si dunga ani nagamahe ni bakerehe ka he adunga berewe berani ka ngerafuo gaani aborokporo na ni ya. Baibiri nayugo gupai nga abariikporo du wa ka i gbata agu ahe du gayo aborokporo na zingoho. (1 Timoteo 5:8) Si arengbanga ka du ni wenepai fu bariikporo ni gamuhe fu kura aboro ni bakerehe si ki da ti gu pai nga he ho berewe ka ni ngerefuo gani aborokporo na ni te te. Wakina gure a, Yesu aima bisirapa agu aboro naká ka gamahe fu sosono avunguyo nipe yo gupai nga gayo ahe dunduko “si ni fufu he fu Mbori.”—Marako 7:9-13.