Mi Naida Ka Kpi—Ya Mo Baibiri Rengbe Ka Undo Re Ho Mi Aberãpa Imo Tire Ni?
Gu karagapai nga ga Baibiri
Ii! Baibiri naye be Mbori nga “gu ko nafu wasa fu agu yo nga abayee” watadu aguyo du na rungo kpotoyo yo. (2 AKorindo 7:6) Wa vura duhe nga Baibiri nga gu buku du na agu atingidapai rogoho nabipa agu akpakarapai nga ga berãse yo te, si ima undo dungu aboro i dibe gu berã nga ga imotise. Gaha arugute rogo mangapai yo ima rengba ka undo ro a.
Gini arugute rogo mangimangipai yo Baibiri afuhe?
● Mo gumba pa agu abipai du mo na ni.
Gupai Baibiri agumbaha: “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.”—Asanza 17:17.
Rogoyo nga: ani naida gu undo nga ga gu kura aboro ti gu regbo du ani rogo kere fuda berãseyo.
Ka si du nga mo agumbanga pa gu bipai du mo na ni fu kura aboro te, gamo iraira aberãpai ima rengba ka fu rii ome ro. Ono ka mo pe pa gu bipai du mo na ni, si ima rengba ka zogosa ome gamo aberãpai na zavura mo ki gbia kura wene vovo aberãpai tipa gupai re.
Mo asadingo gipai re: Mo fura na boro isoke gamo boro kporo watadu gu bakureamoa du mo na kido kuti ni. Mo ima rengba a ka fura tipa agu abipai du mo na ni ni keka mo ho kurogo waraga.
● Mo gbia undo be amunganga.
Gupai Baibiri agumbaha: “Agu aboro nyaki anyaka i aida nga na munganga te, ono kina agu yo du na kaza.”—Matayo 9:12.
Rogoyo nga: Si naida ani gbata undo be amunganga ho ani awoka ni.
Berãpa imotise ima rengba kadu ni gupai naye be gu kaza nga ga berãseyo, watadu be agu akaza nasaka rii boro yo. Si wa kina gu kaza namanga boro ti kpotoni, si aidanga boro mangi zee na ni te. Gu kaza nga ga fuda berãseyo gbiati gu nasaka rii boro yo, i ima rengba ka husa ha.
Mo asadingo gipai re: Mo gbata undo ni ipiipihe be wene munganga.
● Mo tingidi gupai nga Mbori naberãpa ro aberã.
Gupai Baibiri agumbaha: “I nabaga abavurukporo bisue tipa rukutu marã ue te? Bangiri Mbori ago nga ti gu ru wa sa te. . . . Ka oni gúnde nga ya; oni nga bahe ti dungu abavurukporo.”—Ruka 12:6, 7.
Rogoyo nga: Mbori nabi ro na nyanyaki paro.
Mo ima rengba kaa bi tiro nga mo nisaro, ono Mbori nabi gupai abi mo andu rogoyo. Ko nangera angerafuo ro ka si vura du vurũ nga mo nabihe nga gene berewe bero rogo raka yo te. Atambuahe 51:17 naya: “Gu kpoto yo naima be rungo ingapai, Ako Mbori, mo apáyasi nga ha te.” Mbori naida mo naaraka mbiko ko ima kpi nyemuro.
Mo asadingo gipai re: Mo wisigingo agu agopai du rogo Baibiri nga gu nayugo gupai nga Mbori ima kpinyemuro. Ni kpiapai, mo bingo kapita 24 nga ga gu buku du mburuhe rii Baibiri du rimoho nga, Draw Close to Jehovah.
● Mo kpari fu Mbori.
Gupai Baibiri agumbaha: “Oni bá agu apai nafuda roni ku auru [Mbori]; mbiko ko naberã pa roni.”—1 Petero 5:7.
Rogoyo nga: Mbori naida mo fura fuko kpadio tipa agu apai dunduko nafuda berãro yo.
Mbori ima rengba ka fu zereda fu ro gbiati ome mo naandu kindi kumbatayo. (AFiripoio 4:6, 7, 13) Ngba gi gene re, ko nasongoda aguyo nakpara fuko tipa undo na ruru kpotoyo yo.—Atambuahe 55:22.
Mo asadingo gipai re: Mo kparingo fu Mbori areme. Mo mangisunge na rimoko nga Yekova na ki pe pa agu abipai fu ko du mo na ni. (Atambuahe 83:18) Mo sanako ko undo ro mo naandu kindi kumbatayo.
● Mo berẽ kurii gu maabangirise nga ga Baibiri du tipa kumbatayo.
Gupai Baibiri agumbaha: “Gi du be rani re wa ũzada mbisimo, nga maabangirise du ni nyanyaki he nganganga.”—AEbere 6:19.
Rogoyo nga: Ga bipai ima rengba ka ariatihe niipo ti wenehe kuti gbegberẽhe wakina gu kurungba nandu bangiri ime ti regbo bavugumo, ono gu maabangirise du rogo Baibiri ima rengba ka undo ro mo du na ruru bipai.
Anga kungba pa musumo gbia nga gu maabangirise re te, mburuhe rii gu kidohe Mbori namangihe tipa ka dia agu apai kusayo dunduko naye na imisiri.—Yugoti 21:4.
Mo asadingo gipai re: Mo wirikinga kura dungu apai tipa gu maabangirise du rogo Baibiri ni geda mo wirikapai 5 nga ga gu burosua nga Gu Wene Pangbanga Naye be Mbori!
● Mo mangi gupai mo naagbia ngbarago ti mangaha.
Gupai Baibiri agumbaha: “Wasawasa kpoto boro yo du wa wene ngua kaza.”—Asanza 17:22.
Rogoyo nga: Ho ani amanga agu apai ni nafu ngbarago furani, ani ima rengba ka sa kpotorani si du wenengai.
Mo asadingo gipai re: Mo mangingo gupai mo naagbia ngbarago ti ni gbe. Ni kpiapai, mo degenga turo kuti gu manzigo nafu wasa foro, mo gedinga gupai rengbe ka fu ngarasa ro, watadu mo mangingo gupai ni ngbaangba tiro gbe. Mo ima rengba ka kiiso gamo ngbarago a ka mo mangipai tipa ka undo gu kura aboro ka si vura du vurũ rogo rukutu agene yo.—Amokedi 20:35.
● Mo ngerefuo padu kpotoro wenengai.
Gupai Baibiri agumbaha: “Mbiko nyakasa borose nakiisa pai.”—1 Timoteo 4:8.
Rogoyo nga: Ani nagbia undo ho ani amanga mangonvo ni, ho ani ara ni wenengai, na ho ani ari agu ariahe ni du ni wenehe tipa kpotorani.
Mo asadingo gipai re: Mo nindu nga ka taa wiri nduro ka si vura du vuru nga tipa aminiti 15.
● Mo tingidi gupai nga, bipai gbiati gu kura apai rogo raka yo naˈariatihe aˈaria.
Gupai Baibiri agumbaha: “Oni aina nga gu pai nikamanga gba te.”—Yakoba 4:14.
Rogoyo nga: Gu kere akpakarapai nga gu naye na fuda berãseyo zavura gu mo abihe nga si ima fu riro ima rengba ka du gbua tipa bete regbo.
Ka agu apai du tipa ro vura du ni kere gbegberẽhe areme, si ima rengba ka ariatihe gba. Sidu, mo ngere tipa agu agene rengbe mo ka mangapai kuti ni ngbaha. (2 AKorindo 4:8) Agu akpakarapai du tiro naye na fuda berãseyo, si nawira wa si ima rengba ka ariatihe wa regbo ni kaa susa, ono ho mo naimi tiro ni, ka mo mangingo pai berewe sa ni te.
Mo asadingo gipai re: Mo gedinga gu pangbanga nga ga Baibiri du tipa agu aboro nadu rogo kere gberãrago i kini bi tiyo nga si naida i kpi, na mo ki bingo wai gayo raka aye ka ariatihe kusa ni wenehe—dedede, rogo agu agene yo nga gu i aaberãnga paha ya. Mo bingo bete akpiapai.
Ya mo Baibiri nagumba pa agu aboro furani naaida ka kpi?
Ii. Baibiri nagumbapa gu bete aboro naya, “Mi naida ka kpi.” Mbori aadunga na zinga nayo te, ono ko afu undo fuyo. Ko ima rengba ka manga kina gu bangisapai re foro a.
Eriya
● Da nangia ko? Eriya angia gu nebi nadu na ngarã. Ono ti kura aregbo, ko ani du adu a na bakere gberãrago. Yakoba 5:17 naya: “Eriya adu ni boro nihi dungu apai wa kina rani.”
● Tipagine ko aaida ka kpi ti ni? Ti kura regbo sa, Eriya aabi tiko nga ko nisako, ko kidu rogo gunde, na ko kini bihe nga sunge tiko berewe te. Sidu, ko azungodi Yekova nga: “Yekova, pai di be re; mo di ungare ti re awere.”—1 Abakindo 19:4.
● Ginipai naundo ko? Eriya auka agu apai nadu kpotoko yo fu Mbori. Waigu Mbori angarasi ko? Mbori ayuguhe nga ko naberãpa ko aberã na ki yugu kpia wai fuko ko amangasunge na Gako ome. Mbori ayuguhe a nga Eriya kindi na nyanyaki pa ko na ko ki fu gu moundo fuko nga gu ko naangerafuo ko wenengai.
▸ Mo gedipai tipa Eriya: 1 Abakindo 19:2-18.
Eyobo
● Da nangia ko? Eyobo angia gu kumukokumuko kumba nadu ni ruruko naairiso ndikidi Mbori.
● Tipagine ko aaida ka kpi ti ni? Ga Eyobo raka atona ka gberã ki da ni gbegberẽhe ki susi. Ko aima zanga gako aũkumuko dunduko. Awiriko dunduko akpiki ti regbo tunguotunguo pai. Ko agbia tiko na gu kere kaza naye na imisiri. Na ni yangaraha, i akiti ngbanga ko ni ziree ya ko du ye na agu akpakarapai re kuti ko. Eyobo aya: “Mi mbu pa ungare, mi akpi nga nyemu ka du ni ungare kindi te.”—Eyobo 7:16.
● Ginipai naundo ko? Eyobo akpari fu Mbori na ki fura na kura aboro. (Eyobo 10:1-3) Ko agbia ngarasaro be wene bakureako nangia Eriu, nga gu ko naundoko ko nibi agu akpakarapai du ko rogoho ngba wene gene. Kurii gure dunduko, Eyobo adi gu undo kugume Mbori afuhe gbiati rugute.
▸ Mo gedipai tipa Eyobo: Eyobo 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moize
● Da nangia ko? Ko angia bangbembatayo fu agu aYisaraere nadumbata na kidu ni gu nebi nadu ni ruru ko.
● Tipagine ko aaida ka kpi ti ni? Moize adu na dungu asunge si aida ko mangihe, i anaabisira pa ko ti aregbo dunduko na ko anaabi tiko nga ome berewe ti ko te. Sidu, ko akpari fu Mbori nga: “Mo imi re aimo ni ba sa kindi.”—Pa Geda Aboro 11:11, 15.
● Ginipai naundo ko? Moize agumba pa gu bipai ko adu na ni fu Mbori. Mbori aundo Moize ka akpurasi bete agu atindiro nadu beko tipa ka dia bete fuda berãseyo kusayo ti ko.
▸ Mo gedipai tipa Moize: Pa Geda Aboro 11:4-6, 10-17.
a Ka sidu nga berãpa imo tiro ima du awere ni bakerehe na agu aboro du mo na kido kutiyo ho te, mo yambu gu namba nga ga agu aboro nangerafuo tunguotunguo apai.