Gu Sukuru Nga ga Girada—Aboro Nandu Tipaha Rogo Zegino Dunduko

Rogo agarã dunduko, i naayamba kparakpara amangisunge Kindo ti aregbo dũ rogo zegino dunduko i ndu tipa Gu Sukuru Nga Girada nga gu i naamangaha rogo gu Bawirikapai Nga ga Riigbu Patterson yo, New York yo.a Ti regbo gi sukuru re, agude sukuru nawirika wai kada ni bawene abamangisunge ti ngba gayo asunge ni bakiakia rogo ga Yekova riigbu. Gi rabahe re naundo yo i nyakasi adungurati gbiati abe-basunge rogo zegino dunduko.

Gu Sukuru Nga Girada ima du nirengo ni gupai nakoda aboro rogo apapara zegino dunduko. Ni kpiapai, gu namba 147 riko nga ga gu sukuru re namangi rogo 2019, agude sukuru adu pati ni nga 56, rogo aringara nga 29. Agu agude sukuru ninaandu tipa Gu Sukuru Nga Girada ninaamanga sunge tingba sunge Kindo ti aregbo dũ ni aboro Betere, ababi adungurati, amokedi, watadu kparakpara abazakigene.

Mbakadatise tipa gu sukuru re ninaatona mbu regbo koyo kindi mbata fu wirikapai tona. Ni kpiapai, gu basunge nangerafuo agu apai nga ga nunguro nga World Headquarters Travel Department (WHQ Travel) ninaatumo marã atiyara fu agu aboro i nayambu yo tipa gu sukuru re. Tipa gu namba 147 riko nga ga Gu Sukuru Nga Girada, gu marã tiyara si aidaha tipa gude sukuru sa guari rogo gani ringara ka ndu ku Patterson yo na ki karaga tini angia adorari 1,075. Agu agude sukuru naaye rogo gu ringara nga Solomon Islands, i adi atiyara nga biama tipa kada Patterson yo, na kusa, i adi atiyara nga biata tipa ka ga ku rogo gayo ringara—bagizo gu nduge i anduhe dunduko aima susa akirometere 35,400 (amairo 22,000)! Agu atiyara re dunduko adi marã nga adorari 2, 300 tipa gude sukuru sa. Tipa ka banda marã, gu basunge nangerafuo agu apai nga ga nunguro nga WHQ Travel namangasunge na ũsunge nga ga kompiuta tipa ka gbia agu agino tiyara akiongo akio gbe ya. Na zavura tingbafuo tumoyo marã tipa atiyara, gu mbakadapai nga ga kompiuta re nandu kindi kumbatayo kaa ta tipa aposo na zavura tipa adiwi tipa ka bihe singia geno atiyara zorõ. Amomu kinaho aira tiyara naafuhe fu aboro tipa gu bange amairo i nandu na ni na tiyara watadu tipa ngbeka yo ahe na guhe i ayambaha nga credi card, na karte kinaho a i naafuhe fu aboro tipa i tumo na ni tipa tiyara kuba marã, sidu, gu basunge nga WHQ Travel namangasunge amanga a na agi amomu re tipa ka tumo marã atiyara na ni.

Tipa ka rimo ku Amerika yo, badungu agude sukuru naida na waraga ida pa rimo ku rogo kura ringara. Tipa gipai re mangi, gu basunge nga World Headquarters Legal Department naundo yo i gbia gu waraga ida pa rimo ku rogo kura ringara du tipa agude sukuru. Gu marã si aidaha tipa gu waraga re fu gude sukuru sa na tipa ke rimo, si nga adorari 510.

Waigu ani agbia undo ti gu rabahe agi agude sukuru re agbiaha? Hendra Gunawan namangasunge ni bakumba rogo gu Papara Asia du Bangbanda Sudiyo na Uroyo. Ko rogo dungurati na agu arogotise nanyasi gu Sukuru Nga ga Girada. Ko aya: “Mbata kusayo, abazakigene aadunga rogo gaani dungurati te. Ono fuo agu arogotise nanyasi Girada re ye, wai i amangasunge zaaza na gu toro du tiyo nga ga futise, i asa kura aboro i du kina wo, na i ki diberã ka tona mangasunge ni abazakigene. Kusa, zavura kura wirina ni dee rogo gaani dungurati aima ndu tipa Gu Sukuru Du Tipa Abatungusipa Kindo!”

Sergio Panjaitan amangisunge wa sa rogo gu Betere du rogo gu Papara Asia du Bangbanda Sudiyo na Uroyo na agu awirina nanyasi Girada. Ko aya: “Gu rabahe i agbiaha aangianga pa maku fu kina yo te; si ima du ni pa maku furani a. I aima wirika badungu apai! Ono kuba gupai nga i naasada kaa ngera wa i nyakipa yo gbe kisusi kura aboro, i aagumbapa agu apai i awirikihe. Gipai re nangarasa rani, na ani tigaani kini ngarasi kura aboro a.”

Waigu riigbu atumo tipa gi sukuru re? I namangasunge na agu agamahe i afuhe si undo gu sunge Kindo namanga rogo zegino dunduko, na badunguhe i afuhe rogo gene sa dagba agu agene yo du rogo donate.jw.org. Tambuahe furoni tipa agu agamahe oni afuhe, nga gu nasongoda gi sukuru aboro aye tipaha rogo apapara zegino dũ re.