Rago Poso, Ngbangba 2
Si du tie ka ani raki nga wa agu yo ya, ono ani nikparia rago ki nirugu tirani.—1 Tesa. 5:6.
Nyemuse na nyanyakipaha tipa kaa ngera angera kindi na kini banda gaani regbo. (Mt. 22:37-39) Nyemuse tipa Mbori naundo rani ani hipai ti ngba tungusapai ka si vura du nga si nika ye na kina gini kpakarapai furani vurũ. (2 Tim. 1:7, 8) Bambiko ani nayugo nyemuse fu agu aboro airisongo Yekova ya, ani natungusapai kindi zavura kini mangi dezirepai rogo terefuni na rogo keka awaraga. Ani ambunga du na gu maabangirise nga, rogo kura uru sa, gaani amurakporo nika manga ariapai na ki tona ka manga gupai du ni ruruhe te. (Yeze. 18:27, 28) Ani ima kpinyemu awirinarani a. Ani nayugo ngbatunga gu nyemuse re ‘nizúngadi tirani na akuarani, ki ninyakasa tirani dagba rani.’ (1 Tesa. 5:11) Kina wai abanzengere naamangapai sa kube kube ba vura yo, kina wo a ani anyakasa akuarani. Ka ani ta inongo aino kini imisi awirinarani watadu ka karaga gbegberẽpai fu yo kuba gbegberẽpai te. (1 Tesa. 5:13, 15) Ani nayugo gaani nyemuse a ni yugo ani irisa fu agu awirina nangbembatayo rogo apai yo rogo dungurati.—1 Tesa. 5:12. w23.06 10 ¶6; 11 ¶10-11
Rago Sa Sunge, Ngbangba 3
Gu pai gumba [Yekova], ko amánga nga ha te?—Geda 23:19.
Gene sa rengbe ani ka nyakasa gaani idapase ngbaha nga, ni berã ani kuriipa motumo tumorii. Motumo tumorii nafu gu kido furani nga ga Mbori akidohe nika da ada ti rengo. Ho ani aberã ni dudunguro kuriipa gupai i afu motumo tumorii ti ni na agu apai si akodihe, ani nanyakasa gaani idapase kuti gu ga Mbori kidohe nga ga raka nyeanye kindi rogo bawene zegino nga si nika digiso tihe adigiso. Tipagine ani pehe ti ni wo? Sidu, motumo tumorii akodi gini apai? Yekova akedi bambata Wiriko, nga gu boro i aima mbeda na ni gbe, ko ye ngbangbaturũ yo ku auru kpotosende no i vunguko ni rengberengbe boro. Ho Yesu adu ni auru kpotosende, ko ahi dungu ngbatunga akpakarapai. Ko arungo na ki kpi kere iigirã kpio. Nairiwo gu nyanyakipa he Yekova afuhe re! Gaani Mbori nyemuse aarengbanga ka mbu Wiriko ko ye ka rungo na ki kpi tipa ani raki wene raka nga gu nika du ni wiri guruhe te. (Yo. 3:16; 1 Pet. 1:18, 19) Bambiko wa Yekova afu nyanyakipa he nga Wiriko ko ye ka kpi tipa ka undo rani, Yekova nika bi gupai nga ani ima du na rengba ka raka nyeanye kindi rogo vovo zegino. w23.04 27 ¶8-9
Rago Ue, Ngbangba 4
Ako Kpio, wari du ga tata akaza ni?—Osea 13:14.
Ya mo Yekova na nyemu ka zingisa agu aboro kpiki? Zanga kapa, ko ima du na nyemuhe nzunzu. Ga Mbori toro adu kugii badungu agu aboro naake Baibiri tipa i ke gako akidohe tipa zingabekpio kumbatayo. (Yes. 26:19; Yugo. 20:11-13) Na ho Yekova ninaamanga kidohe ni, ko naadigisoho ti aregbo dunduko. (Yos. 23:14) Yekova na bakere nyemu ka zingisa kpikpi aboro be kpio. Oni berẽnga pa gupai Eyobo apehe. Ko aima du na gu kido nga, ka si vura du nga ko kpi, Yekova na bakere nyemu ka biko ko ni raki berewe. (Eyo. 14:14, 15) Kina gu bangisa nyemupai re du Yekova na ni tipa agu airisiko dunduko kpiki. Ko na nyemu ka zingisayo berewe be kpio tipa i raki na kpotoyo kidu wenengai na i kidu na ngbarago. Ga Yekova bipai nga gine tipa agu aboro dunduko kpiki zanga i gbia gu momu nga ga wirika rengo tipa ko? Gaani Mbori nyemuse naida aida ka zingisayo be kpio a. (Amo. 24:15) Ko naida gupai nga i du na gu momu nga ga da ni abakureako na ki raki nyeanye kindi auru kpotosende.—Yo. 3:16. w23.04 9 ¶5-6