Ya Mo Apambori Dunduko Kina Sa? Ya Mo Si Nandu Dunduko Koyo du Mbori Ni?

Gu Karagapai nga ga Baibiri

Oó, anga apambori dunduko kina sa te. Baibiri na dungu akpiapai rogoho nga ga agu apambori nasa gberãrago tiko. Si kparaka ku rogo bangua apaparaha ue.

Bambata paparaha: Iriso ziree ambori

Baibiri nafura tipa iriso ziree ambori ni mangaha sunge na ngbatunga agu afugo du wa “kungba he.” (Yeremaya 10:3-5; 16:19, 20) Yekovaa Mbori arugu agu aYisaraere nadu mbata ki ya: “Ka kura Mbori dú nga be ro fuo kina re ya.” (Gate 20:3, 23; 23:24) Ho aYisaraere anaairiso kura ambori ni, “Ga Yekova zinga ki rungudi” kuti yo.—Pa Geda Aboro 25:3; Pa Amotumo 20:2; Abasapungbanga 2:13, 14.

Mbori na kina gu bangisa bipai re areme tipa iriso ‘agu ahe i aya ti ni ambori.’ (1 AKorindo 8:5, 6; AGaratio 4:8) Ko nazinahe fu agu aboro naida ka irisoko i mbu kodatiyo na agu aboro du rogo ziree pambori, ni ya: “Oni kúru dagba yo yo, ki kparaka.” (2 AKorindo 6:14-17) Ka si dunga apambori dunduko kina sa na si dunduko nandu na aboro koyo du Mbori ni, tipagine tie du ka Mbori afu ngbatunga zinahe ti ni wa gure?

Ue paparaha: Iriso Ndikidi Mbori ngba gu gene ko aidanga ha ya

Ti kura aregbo, aYisaraere anaairisombori ni mangayo sunge na agu aida gbiati agu asino mangaapai i abihe be agu aboro naairiso ziree ambori, ono Yekova aima soga gipai nga ga koda ndikidi Irisombori na ziree irisombori re. (Gate 32:8; Pa Fu Rugute ni Ue he 12:2-4) Yesu asogo agu abarumbatayo rogo apambori nadu ti rago ko mbiko gu gene i airisombori ngbaha; i anaamanga tiyo aboro nibiyo nga i nga aboro pambori, ono tie, i aningia airabiriki na i ki “he manga gu pai kii dagba arugute, nga sapangbanga, na inapai, na idapase.”—Matayo 23:23.

Wakina gure areme a, kina gu pambori du mburuhe rii rengo nandu na aboro koyo du Mbori ni. Gi rengo re mburuhe rogo Baibiri yo. (Yoane 4:24; 17:17; 2 Timoteo 3:16, 17) Agu apambori adunga mburu gaha ayugopai rogo Baibiri ya nagbe aboro kusayo ti Mbori. Dungu agu ayugopai aboro aberãha nga si naye be Mbori nakoda Tirinita, gu yugopai nga mbisimo akpingo te, gbiati nyenye rungosi nga agu ayugopai i adihe be agu aboro nanaairiso ziree ambori. Gu irisombori nasongoda agu ayugopai re nga kungbo airisombori mbiko si naaria agu apai Mbori akpinyemuhe kini mangi asino apambori watadu asino atitase.—Marako 7:7, 8.

Mbori ima soga gu biriki nga ga apambori. (Tito 1:16) Tipa ka undo aboro i mbedi na Mbori, pambori du wa ka si du namaapai kurii ga aboro raka na auru dũ angianga si du gbua na kina sunge vuga ahe rogoho watadu sino atitase ya. Ni kpiapai, Baibiri na ya: “Ka boro yá dagba roni tigani wẽ, boro idapambori nga ni, ono ni aruga nga mirãni te ni ki ingisi ngbaduni, ga gi boro idapambori re, si ki du gbua. Ziazia idapambori barangba gaani Mbori, Barani, nga gu agberã nga ya nga gere, nga ka ndu ka bi awirinyaure na adekurugbo rogo gayo rungo, ki nibanda tini be zegino, ka birikoho adu nga ti ni ya.” (Yakoba 1:26, 27) Gu sasa fugo Baibiri nga King James Version mangisunge na gu fugo nga “ziazia idapambori” tipa gi gigiri irisombori adunga na biriki rogoho re ya.