Si ni kpakarapai fu kura aboro i kpinyemu Mbori. I nabi Mbori wa gu boro ka i agianga tise na ní ya na ko ima turo ti aboro, watadu ko nga kere gbegberẽ boro. Mo bingo agi apai du kusende re:

• Marco du Itaria yo aya: “Mi akpari fu Mbori tipa undo, ono ti kina gu regbo re, mi ki bi gupai nga ko ima turõ ni kerehe. Mi aabihe nga Mbori wa gu boro aberãnga pa aboro ya.”

• Rosa du Guatemala yo aya: “Wa vura duhe nga mi aaida aida ka iriso Mbori, mi aabiko nga ko ima turõ. Mi aberẽhe nga ko nga gu kere boro nambusa aboro gbua. Mi aaidanga kuti gupai nga ko na nunga tiko te.”

• Raymonde du Kanada yo aya: “Ho mi adu ni ni gude, mi aidi kuti gupai nga Mbori nagbata kina gaani aingahe tipa ka mbusa rani. Kusa, mi aabiko wa gu boro aziongo bakure na aboro ya. Mbori adu wakina gu gbia namangapai tipa agu apai nga ga agu aboro ko azoga yó, ono ka nyemuyo adunga tiko ya.”

Ginipai mo aberãha? Ya mo Mbori na nyemuse tiko te? AKristano aima digo nisana gu sanahe re tipa dungu akama agarã. Nirengo, bangbanda agu agarã nga 500 na 1500, dungu agu aboro naadu rogo agu akanisa i aya tipaha wẽ si nga ga aKristano anaakparanga fu gu Mbori Duna Tanduapai Dũ te. Tipagine? Aboro anaagunde agunde beko. Gu bakeke kuru apangbanga nangia Will Durant aya: “Gini boro ingapai ka rengbe ka ya ní nakpara fu ngbatunga gu kere boro naima turõ ti aboro re?”

Wai gu aboro atona ka bi Mbori ni ‘gu kere boro naima turõ ti aboro’? Ginipai nzunzu Ziazia Kekeapai ayugoho tipa Mbori? Ya mo wirika mo rengo tipa ko rengbe ka undo ro mo kpinyemuko?

GUPAI DUNGU ABORO NAIDI KUTINI

Bakere bayugupai tipa agu aida nga ga pambori nga David Cunningham aya: “Ani ata danga kuti gupai nga Mbori na rimoko ti ni te, na ka si du wo, gu rimo re nga gine te.”

GU RENGO DU ROGO ZIAZIA KEKEAPAI

Mbori aya: “Mi nga Yekova, gere nga rimore.” (Yesaya 42:8) “Yekova” nga pa-Ebere du rogoyo nga “ko nasa tiko kadu ni gu boro ko aida kadu nga ní.”

Yekova naida ani mangisunge na rimoko. Ziazia Kekeapai naya furani: ‘Oni yámbu he ti rimoko; oni táki pande gako mangaapai dagba arikaaboro, oni pé pa rimoko ya si du ni irisiirisi he.’​—Yesaya 12:4.

Yesu amangisunge na rimo Mbori. Ko aya fu Yekova rogo kparakpee yo wẽ: “Mi yugu rimoro fu yo, [gako abawiriki] mi ayúgo ho ayugo.” Tipagine Yesu ayugu rimo Mbori ti ni fu gako abawiriki? Ko ape kurapai nga: “Ya gu nyemuse mo nakpi nyemu re na ni, si du rogo yo yo, mi ki du rogo yo yo.”​—Yoane 17:26.

GUPAI NYAKIPAHA TI NI

Bawisigipai tipa agu aida nga ga apambori nangia Walter Lowrie aya: “Gu boro ainongo Mbori ti rimoko ya, ní ainongo gu boro nga ko nzunzu te, na ní arengba ka kpinyemuko ka ní iniko nga kungbo ome nga ko te.”

Kumba du rimoko nga Victor anaandu ku kanisa yo na aposo dũ, ono ko aabi tiko nga ko ainongo Mbori nzunzu te. Ko aya: “Ono mi aye ka ino gupai kusa nga rimo Mbori nga Yekova na si ki sare mi iniko. Mi abi tire nga mi ima bi gu Boro mi naagia kina pa ní. Mi aye ka biko wa ndikidi boro na ki sonosi pabakure na ko.”

Yekova nambeda na agu aboro na mangasunge na rimoko. Nibipa “agu yo nagunde ti Yekova ki niberẽ pa rimoko,” ko na kidoyo nga: “Mi abánda yo a wa boro nabanda awirini nga agu yo namanga pa ni.” (Maraki 3:16, 17) Ko nafu mosoro afu a fu agu aboro nayamba rimoko. Ziazia Kekeapai naya: “Agu yo dunduko ka kpara ti rimo Yekova i abáta abata.”​—Yoere 2:32.

GUPAI DUNGU ABORO NAIDI KUTINI

Gu ga aKristano “bangua apambori du biata nga Katoriko, Orthodoxy, na Purusitanti idi kuti gupai nga Mbori sa aboro rogoko yo biata: Mbori Ba, Mbori Wiri, na Mbori Ziazia Toro. Ringbisihe kuti gu yugopai agu akanisa nga ga aKristano ayugoho tipa Mbori, i naya anga gipai re nga ambori biata te, ono agi aboro biata re dunduko kina kubanisa.”​—The New Encyclopædia Britannica.

GU RENGO DU ROGO ZIAZIA KEKEAPAI

Yesu nga Wiri Mbori aapenga gupai nga ko kina sa na Bako te. Kuba gure, ko aya: “Mi nandu koyo du Buba ni; bambiko Buba susi re.” (Yoane 14:28) Ko ape gupai a fu gu kura pefuoko nga: “Mi naga koyo du Buba ni nga Baroni, nga gi Mbori nga gaoni Mbori.”​—Yoane 20:17.

Ziazia toro nga boro te. Agu aKristano naadu mbata ‘ahiki ahika be Ziazia Toro,’ na Yekova aya: ‘Mi auka Torore ku ri aboro dunduko.’ (Amokedi 2:1-4, 17) Ziazia toro nga Tirinita te. Si nga ga Mbori zaaza ome mangapai.

GUPAI NYAKIPAHA TI NI

Karl Rahner na Herbert Vorgrimler ape gupai nga: “Boro arengbanga ka inopai tipa Tirinita zanga yugoti te, na ka yugoti vura duadu ka boro ginga rogoyo dunduko te.” Ya mo mo rengbe ka kpinyemu gu boro mo arengba nga ino ní ya? Gu yugopai nga ga Tirinita na ká na gene be aboro ti ino Mbori.

Marco, ani nifura tipa ko rogo gu kekeapai ye mbata fu gere abi gupai nga Tirinita nga guhe na ká na gene be aboro ti ini Mbori. Ko aya: “Mi aberẽhe nga Mbori aoka tiko aoko bere na gipai re aturũsi ko bangire, ko ki duwa mistirio, na wa gu boro ka mi ambedanga na ní ya.” Ono tie, Ziazia Kekeapai naya: “Mbori ni Mbori ruguzuruguzu apai te.” (1 AKorindo 14:33) Ko aokanga tiko berani te. Ko naida ani iniko aino. Yesu aya: “Ani nairisa gu he ini ani.”​—Yoane 4:22.

Marco aya: “Ho mi awiriki gupai ni nga Mbori nga Tirinita te, mi aye kadu na wene pagume dagba re na ko.” Ka ani abi Yekova wa ndikidi boro angianga misiterio ya, si rengbe kadu furani taata tipa ani kpinyemuko. Ziazia Kekeapai naya: “Gu ni adu nga na nyemuse ya, ni aina nga Mbori te; bambiko Mbori nga nyemuse.”​—1 Yoane 4:8.

GUPAI DUNGU ABORO NAIDI KUTINI

Fuo kpio aboro ingapai, mbisimo yó nandu ku “inferno yo, yo gbegberẽ aboro ahima ni be we na Asitani nibasa kindi.’” (Katekismo Rogo Pa Zande) Bete abarumbatayo rogo pambori naya iferno nga gu ba duni kparakparaha ti Mbori.

GU RENGO DU ROGO ZIAZIA KEKEAPAI

‘Gu mbisimo ka ainga pai si akpí akpi.’ (Yezekere 18:4) “Kpikpi aboro aina nga pai te.” (Batungusipai 9:5) Ka mbisimo kpi ka si ainongo pai ya, wai rengbehe ka mbu rogo “Inferno yo” watadu ka kpara tihe nyeanye kindi ti Mbori kusayo?

Gu pa-Ebere na pa-Giriki i asaha nga “Baatoro kpikpi aboro” rogoyo nga murã. Ni kpiapai, ho Eyobo ambu ni be kaza ko akpari ki ya: “Ako, ka mo oko re ku Baatoro kpikpi aboro yo.” (Eyobo 14:13) Anga gu ba toro kpikpi aboro Eyobo aida ka ongoda rogoho re nga inferno nga ba mbusa te, ono murã yo.

GUPAI NYAKIPAHA TI NI

Gbegberẽ pai ambedisanga rani na Mbori te, ono si naturũso rani tiko. Rocío, naraka Mekisiko aya: “I ayugupai fere tipa inferno mbure kindi ni gude. Mi agunde ni kerehe, na ki berẽ gupai nga Mbori na wiri wene sino tiko kandara tooni te. Mi aberẽhe nga zingizingi boro nga ko na ko ambunga pai fu aboro te.”

Gupai Ziazia Kekeapai apehe tipa ga Mbori sapangbanga na gupai du tipa kpikpi aboro aʹaria ga Rocío bipai tipa Mbori. Ri aya: “Mi aabi tire nga i ima dia gu rõrõi tindiro naadu rire kusayo. Mi atona ka kido kuti Mbori nga ko naida wenepai tipa rani, ko nakpinyemu rani na mi ima rengba ka kpinyemuko. Ko wakina gu baagude na nungusa awirini ngba wene gene, na naida wenepai tipa yó.”​—Yesaya 41:13.

Dungu aboro nairisombori mbiko gupai nga i na gunde be inferno, ono Mbori aidanga mo irisiko mbiko gupai nga mo na gunde beko te. Kuba gure, Yesu aya: ‘Mo kpi nyemu Gbia nga ga Mbori.’ (Marako 12:29, 30) Kurigure, ho ani aino gupai ni nga Mbori amanganga irairapai areme te, ani ima rengba kadu na kido kuti gu gako sapangbanga du ku mbatayo. Wakina gu bakurea Eyobo nangia Eriu, ani ima rengba ka ya: “Ka manga gbegberẽpai, si turũ ti Mbori, na ti gu Ko du na tandu apai dũ, ka manga irairapai.”​—Eyobo 34:10.

Rogo kura uru sa Yerusarema yo, Yesu afura tipa Bako nga Yekova, na kini kusi gu ziree abarumbatayo rogo pambori anaayugoho. (Yoane 8:12-30) Gupai ko apehe tigu regbo re nayugo wai rengbe ani ka wisigo agu aida du tipa Mbori areme. Ko aya: “Ka oni nye na gi pai, oni du adu tie ni gimi abawiriki ni rengo.”​—Yoane 8:31, 32.

Agi afugoko nga “oni nye na gi pai” re naundo rani ani wisigi agu ayugopai nga ga pambori singia si nga “rengo.” Ho mo agia pai ni tipa Mbori, si naida mo sana tiro nga, ‘Ya mo gipai re na ngbaya dagbaha na afugo Yesu gbiati agu apai du rogo Ziazia Kekeapai yo?’ Mo wirikipai be aboro Beroya ‘nawisigi Ziazia Kekeapai na aʹuru dũ’ tipa ka ino singia agu apai Pauro aatungusaha angia rengo.​—Amokedi 17:11.

Marco, Rosa, na Raymonde, nga agu aboro du fugoyo ti tonatona gi kekeapai re, i awisigi gayo aida ni wirika yó Ziazia Kekeapai na aDezire Yekova. Ginipai i abihe?

Marco: “Gaani bayugupai aamangasunge na kina Ziazia Kekeapai tipa ka karagapai kuti agu asanahe ani adu na ni na diare. Gaani nyemuse tipa Mbori atona kaa sona, na ani kidu na wene pagume dagbarani na diare!”

Rosa: “Ti tonatonaha, mi aberẽhe nga Ziazia Kekeapai nga gu buku nafura tipa gu bipai du aboro na ni tipa Mbori. Ono tie, si atona ka karagapai tooni tooni kuti gimi asanahe. Awere, mi nabi Yekova ni ndikidi boro. Ko nga gu boro mi narengbe arengba ka kido kutini.”

Raymonde: “Mi akpari fu Mbori tipa ko undo re mi wirikipai tipa ko. Fuo gure ngbutuko, mi gbiati kumbami atona ka wirika Ziazia Kekeapai. Ni yangaraha, ani awiriki rengo tipa Yekova! Ani adu na bakere ngbarago ka ino gu ngbatunga Mbori nga ko.”

Ziazia Kekeapai afuranga sa kina tipa agu aziree aboro apehe tipa Mbori te, ono si nayugo gu rengo du tipa wene asinoko. Si nga gu buku gako toro adu kugiipa kehe, na si naundo rani tipa “ani ini agu apai Mbori nafu fu rani gbua.” (1 AKorindo 2:12) Si angba gbe ka mo bi agu akaragapai Ziazia Kekeapai afuhe tipa agu asanahe du tipa Mbori, gako ringbisapai, na gupai du ku mbatayo. Mo ima rengba ka sanahe tipa ka wisigo Ziazia Kekeapai a rogo gaani bangiriba nga ga Internet nga www.pr2711.com/zne watadu mo sana boro sa dagba aDezire Yekova. Ani na kido nga ka mo mangihe wo, si ni kadu foro taata mo kpinyemu Mbori ni bakerehe.