1. Ga Mbori ringbisapai nga gine tipa kpotosende?

GA Mbori ringbisapai tipa kpotosende ima ngba kisusi. Ko nakpinyemu gupai nga kpotosende hi dunduko na agu aboro du na ngbarago na kpotoyo kidu wenengai zanga kaza. Ziazia Kekeapai naya wẽ ‘Yekova Mbori amoi ati Edene yo’ na “ki mangi angua dunduko si nisono ti sende, nga gu ngba bi he nga gu ngba tipa riahe.” Fuo Mbori kusi bambata kumba na dee nangia Adamu na Eva, ko amoiyo rogo gu bawene ati re na ki ya fuyo: “Oni zúga azuga, ki nge ange, ki hisi kpotosende berewe ki zogo ho.” (Bambata Pai 1:28; 2:8, 9, 15) Sidu, ga Mbori ringbisapai nangia aboro vungu agude, ki kiisi gu kpuyo nangia ati re rogo kpotosende dunduko, na kini ngerefuo anya.

2. (a) Wai ani aino ya ga Mbori ringbisapai tipa kpotosende nika manga amanga? (b) Ginipai Ziazia Kekeapai agumbaha tipa pa raka aboro nyeanye kindi?

² Ya mo mo naberã gupai nga aboro araka rogo paradizo kpotosende a wa Mbori aringbisihe? Sangba Mbori nga: ‘Mi gumbaha, mi arugaha aruga si du ni mangimangihe a.’ (Yesaya 46:9-11; 55:11) Nirengo, gupai Mbori agumbaha, ko namangaha amanga! Mbori naya wẽ ko ‘aamanganga kpotosende ni kungbo he te,’ ono ko “ambakadi he aboro niraki rogo ho!” (Yesaya 45:18) Gini ngbatunga aboro Mbori akpinyemu i raki auru kpotosende? Na ko naida i raki tipa bagizo regbo wai? Ziazia Kekeapai nakaragapai niya: ‘Ruru aboro adia kumbo ringara [nga kpotosende], ki nyeanye kindi.’​—Atambuahe 37:29; Yugoti 21:3, 4.

3. Gini gbegberẽ apai du areme auru kpotosende, na gini asanahe agi apai re asa rani ani sanaha?

³ Kada ku awere, aboro ata tonanga ka raka nyeanye kindi te. Aboro nawoka kini kpiki; i naso avura kini imi tiyo. Pai kinaho namangi. Mbori aaringbisanga pai tipa kpotosende si duwa gi ani abihe areme re te! Si amangi wai? Tipagine ga Mbori ringbisapai amanganga ti ni ya kada ku awere? Buku pangbanga ho boro akehe rengbe ka gumba gupai furani namangi te, bambiko gupai re atona ngbangbaturũ yo.

MARAIKA ASA TIKO NI VURA MBORI

4, 5. (a) Da nzunzu nafura fu Eva rogo woo yo? (b) Wai rengbe wene boro ka sa tiní ni iradĩ?

⁴ Gu bambata kitabu nga ga Ziazia Kekeapai napepa gu basovura kuti Mbori nakuru ati Edene yo. Si naya wẽ ‘woo’ naadu, ono anga ndikidi woo naadu te. Gu yangara kitabu nga ga Ziazia Kekeapai naya furani wẽ maraika du nafura rogo woo yo. I naya tiko ko nga “Bakitingbanga nga Satana, nga banangi aboro kpotosende yo dunduko.” I nayambako a nga ‘bakuru woo.’ (Bambata Pai 3:1; Yugoti 12:9) Ko afura fu Eva rogo woo yo si ki duwa woo du nafura. Si nawira gupai gbe nga, gu maraika re adu kinaho ho Mbori ambakadi kpotosende ni tipa aboro.​—Eyobo 38:4, 7.

⁵ Wa duhe nga Yekova akusi aboro na amaraika dunduko ni kina wene yo, Satana Bakitingbanga aye tigako wari? Satana adu ni kina wene maraika, kinako nitiko kini sa tiko ni Bakitingbanga. Ko awiripa sa tiko wai? Areme, wene boro rengbe arengba ka sa tiní ni iradĩ. Si naamanga wai? Si naamanga nga, boro natona ka sonosa gbegberẽ nyemuahe kpotoniyo. Ka ní aberãpaha kindi, gu nyemuahe re rengbe arengba ka nyaka gbe. Fuo manga momu, ní kini dĩ he nibasa.​—Mo gedi Yakoba 1:13-15.

6. Wai wiri Mbori sa asatiko ni Satana Bakitingbanga?

⁶ Ginipai namangi tipa Satana Bakitingbanga? Si nawira gupai nga ko aima gia gupai Mbori apehe fu Adamu na Eva ki ya i vungu agude ki hiisi kpotosende na awiriyo. (Bambata Pai 1:27, 28) Si nawira gupai nga Satana aya fu tiko, ‘Tipagine ka agi aboro re airisongo re ti ni kuba irisoyo Mbori ya?’ Si ki tadu wo, gbegberẽ nyemupai kini tona ka sona rogoko yo. Ni yangaraha, ko kini guari ka ndu ka nanga Eva ni gumbako ziree furi tipa Mbori. (Mo gedi Bambata Pai 3:1-5.) Gu maraika re kini da ni “Bakitingbanga,” du rogoyo nga “gu boro nagumba gbigbita ziree kuti kurani.” Ti kina gu bangisa regbo re, ko ada ni “Satana,” du rogoyo nga “Batikango.”

7. (a) Tipagine Adamu na Eva akpiki ti ni? (b) Tipagine awiri Adamu agbinza ti ni na kini kpiki?

⁷ Satana Bakitingbanga agumba ziree na ki biriki aAdamu na Eva i basasangba Mbori. (Bambata Pai 2:17; 3:6) Ni sangbana gipai re, i araki i ki kpiki, a wa Mbori agumbaha nga si nika manga ka i basasangbako. (Bambata Pai 3:17-19) Wa duhe nga Adamu ada ni kpakpa boro ho ko aingipai ni, awiriko na atitako dunduko adi ingapai gbiati zangarengba tiko. (Mo gedi ARomo 5:12.) Gipai re wakina gupai du tipa gu kpatamarã i aba kpakuto rogoho. Ka gu kpatamarã re du na kutu vuruhe yo, agu akpakuto dunduko i nikaa baha rogoho nikaa du na norõnorõ vuroho. Teketeke a, aboro dunduko ni basasa adi zangarengba ti Adamu, bambiko i aenge tiko. Si du aboro agbinza agbinza ti ni dunduko na kini kpiki.​—ARomo 3:23.

8, 9. (a) Ginipai Satana akusihe kuti Mbori? (b) Tipagine Mbori aaimongo agu abasamungu re ti ni nibasa ya?

⁸ Ho Satana asa Adamu na Eva ni i ingipai kuti Mbori, gure nga ko angbembatayo sa samungu. Ko akusipai kuti Yekova nibipa gu gene Yekova azogarago ngbaha. Gure wa ko aya: ‘Mbori nga gbegberẽ bazogo. Ko nagumba ziree na kini ká na weneapai be gako aboro. Ndupai ho tipa Mbori nizogo aboro te. I nitiyo rengbe ka sia gupai du ni wenehe na gudu ni gbegberẽhe. Na ka si du nga mi du nazogayo, apai ngba angba tipa yo kisusi.’ Ginipai si aidi Mbori mangihe sa gupai re? Gu kura aboro naya wẽ gupai ka Mbori amangihe gbua nga ka imo agu abasamungu re kusayo. Ya mo ka si afu karagapai kuti gupai Satana akusihe re? Ya mo ka si ayugu gupai nga gu gene Mbori azoga aboro ngbaha si du ni ruruhe?

⁹ Yekova nga gu boro nasarangbanga ni ruruhe. Kuti gako rurupai, ko aarengbanga ka imo agu abasamungu re nibasa te. Gupai ko adiberã tipaha nga ka mbu regbo fu Satana tipa wene karagapai ye vuru gu regbo re ka yugo Satana ni iraziree. Sidu, Mbori adiberã ka mbu aboro i zogo tiyo nisayo tiibe Satana tipa bete regbo. Rogo Kapita 11 nga ga gi buku re, ani nika sakapai tipa ndu gupai Yekova amangihe ti ni wo na ndu gupai ko ambu gbanga regbo ti ni si susi mbata ko nika mbakada gipai re. Awere tie, si ni wenepai tipa ani berẽkurii agu asanahe nga: Ya mo Adamu na Eva adu na wene ndupai beyo ka ida kuti Satana nga gu boro naamanganga wiri wenepai fuyo ya? Ya mo si aruaru fuyo i idi kuti gupai nga wẽ, Yekova nga gu boro nafuku agu ahe dunduko naadu beyo, ko nga gbegberẽ iraziree? Wa kangia mo naadu ba Adamu na Eva, ginipai ka mo amangihe?

10. Wai rengbe mo ka songodapai kubara Yekova yo ni karagapai kuti gupai Satana akusihe?

¹⁰ Ngbaha angba ani berẽkurii agi asanahe re mbiko ani dunduko ni basasa du apai tipa rani wakina ngbatunga gure. Mo na momu bero ka songodapai kubara Yekova yo rogo gu ngbanga Satana akusihe kuti Yekova. Si naida mo idipa Yekova ni gamo Bazogo tipa ka yugo na ni nga Satana nga iraziree. (Atambuahe 73:28; mo gedi Asanza 27:11.) Si nafu kina gberãrago nga, kina bete aboro gbua dagba gu dungu abirioni aboro du areme rogo zegino namanga gupai re. Gipai re nakusa nyanyakipa sanahe nga, Ya mo Ziazia Kekeapai nayugo gupai nzunzu nga Satana du nazoga gi zegino re?

DA NAZOGA GI ZEGINO RE?

11, 12. (a) Wai gu asada Satana aye na ni fu Yesu ayugo gupai nga Satana nga bazogo gi zegino re? (b) Gini kurapai nayugoho nga Satana nga bazogo gi zegino re?

¹¹ Yesu aatinga kango gupai nga Satana du nazoga gi zegino re te. Ti kura regbo sa, Satana ‘ayugu angbii fuko zegino dunduko, na gaha taarimo.’ Fuo gure, ko akido Yesu ki ya: “Ka mo ti sande ki irisi re, agi ahe dunduko re mi afú he foro.” (Matayo 4:8, 9; Ruka 4:5, 6) Mo berẽnga tipa gipai re. Ya mo wa ka Satana angianga bazogo agu angbii re ya, ka pa fu agu angbii re fu Yesu adu nga asada? Yesu aatinga kango gupai nga Satana du nga baira agu angbii nga ga zegino te. Nirengo, wa ka Satana angianga baira agu angbii re ya, ka Yesu atikango ati.

¹² Rengo ngaha nga, Yekova nga gu Mbori du na tandu apai dũ, nga gu boro nakusi zegino naabaha dunduko. (Yugoti 4:11) Ono wa vura duhe wo, ba ho rogo Ziazia Kekeapai si aya rogoho wẽ Yekova Mbori watadu Yesu Kristo nga bazogo gi zegino re te. Yesu agumba gupai zukazuka nga, Satana nga ‘bakindo gi zegino re.’ (Yoane 12:31; 14:30; 16:11) Ziazia Kekeapai nafura tipa Satana Bakitingbanga ya ko nga “mbori gi zegino re.” (2 AKorindo 4:3, 4) Gi Batikango nga Satana re du gu mokedi nangia Yoane akepai tipa ko ki ya: “Zegino dunduko du ni zogozogo ho be gbegberẽ ko.”​—1 Yoane 5:19.

WAI I NIKA DIA GA SATANA ZEGINO KUSAYO

13. Tipagine si aida aida ti ni ga Mbori vovo zegino ye?

¹³ Wa agarã asakatihe, zegino nagberã kina ku mbatayo. Zegino ima hi be abasovura, na aboro birĩ-zogarago nga aguyo gasi ngba pe ziree, na agu abarumbatayo rogo pambori du na biriki, gbiati amangi kere gbegberẽ apai. Ba mbakada zegino kubaha berewe te. Ziazia Kekeapai nayugo gupai furani nga regbo ima mbeda tipa Mbori guari ka dia gi gbigbita zegino re kusayo na gako vura i ayambaha nga Aramegido. Si nika zakagene fu ruru vovo zegino si ye.​—Yugoti 16:14-16.

14. Da du Mbori nasia ní ní du ni bazogo gako Kindo, na wai du i aima gumba gere?

¹⁴ Yekova asia Yesu Kristo ko du ni bazogo gako Kindo nga ga ngbangbaturũ. Ziazia Kekeapai aima pehe bakuru kusayo ki ya: “I vungu gude fu rani, i fu wiri fu rani nga kumbagude; pa zogaaboro adú ku pagorõko, i ayámba rimoko nga . . . Gbia Zereda. Kia pa gako zoga aboro na pa zereda digidaha adú nga ti ni te.” (Yesaya 9:6, 7) Yesu arugu apefuoko i nikpari tipa gi zogarago re kini ya: “Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.” (Matayo 6:10) A wa ani ka bihe kusa rogo gi buku re, mbembedi, ga Mbori Kindo nika dia agu azogarago nga ga gi zegino re dunduko kusayo, si ki diba agi azogarago re dunduko. (Mo gedi Daniere 2:44.) Fuoho tie, ga Mbori Kindo kini zogo aboro rogo paradizo kpotosende no.

VOVO ZEGINO IMA MBEDA KADA

15. Gine nga “vovo kpotosende”?

¹⁵ Ziazia Kekeapai naya: “Mbiko [ga Mbori] kidohe, ani nangera tipa vovo angbangbaturũ na vovo kpotosende, nga gu ruru apai nikanye rogo ho.” (2 Petero 3:13; Yesaya 65:17) Ho Ziazia Kekeapai afura ni ti kura aregbo tipa “kpotosende,” si nayugopa agu aboro naraka auru kpotosende. (Bambata Pai 11:1) Sidu, gu “vovo kpotosende” re nga gu riko nga ga agu aboro Mbori nika biyo ni ruruyo.

16. Gine nga gu nyanyakipa gamahe Mbori nika fuhe fu agu aboro du ni ruruyo bangiriko, na gini apai si aida ani mangihe tipa ka gbiaha?

¹⁶ Yesu akidohe ki ya wẽ rogo vovo zegino nga gu naye, agu aboro du ni ruruyo bangiri Mbori nika gbia “nyenye unga.” (Marako 10:30) Mo zaranga gamo Ziazia Kekeapai rogo Yoane 3:16 na 17:3, na ki gedi agu apai Yesu agumbaha ya si si aida ani mangihe tipa ka gbia nyenye unga. Awere tie, ani furanga tipa gu weneapai aboro nika ­gbiaha nga aguyo Mbori nika biyo nga i ima rẽ tipa ka gbia gu bawene gamahe nga nyenye unga rogo gu Paradizo naye.

17, 18. Gine nayugo gupai nga aboro nika raka auru kpotosende rogo zereda na ni bandabanda yo?

¹⁷ Gbegberẽ apai, avura, kuondiko, na zuu adunga berewe te. “Gbegberẽ boro adú nga ho berewe te. . . . Ono bayee aboro adía kumbo ringara.” (Atambuahe 37:10, 11) Zereda nika du bambiko ‘Mbori nika mangapai vura nyasi da ku digido kpotosende yo.’ (Atambuahe 46:9; Yesaya 2:4) Fuo gure, ‘rurupai azuga, zereda kidu kpaima, daho diwi kaa dunga ni ya,’ du rogoyo nga nyeanye kindi.​—Atambuahe 72:7.

¹⁸ Airisi Yekova araka ni bandabanda yo. Ho aYisaraere anaagiasangba Mbori ni ti agu aregbo naadu kusayo, i aaraka ni bandabanda yo. (Pa Amotumo 25:18, 19) Nairiwo wai apai nika ngba fu airisi Yekova rogo Paradizo ho ba yo nika ngba ni wa gure!​—Mo gedi Yesaya 32:18; Mika 4:4.

19. Ani naino wai ya riahe nika du kpaima rogo ga Mbori vovo zegino?

¹⁹ Zingo riahe adunga te. Bake apapara Atambuahe abibia ki ya: ‘Zende ahe azuko rogo ringara kpaima; si aduwo rii abaagangara yo.’ (Atambuahe 72:16) “Sende azugasi gaha zuzu ahe,” mbiko Yekova Mbori nika fu maku fu gako ruru aboro.​—Atambuahe 67:6.

20. Tipagine rengbe ani ka ya ti ni wẽ kpotosende dunduko nika du nga paradizo?

²⁰ Kpotosende dunduko nika du nga paradizo. Wene akporo na aˈati nika rengba rogo agu arago dunduko iraira aboro agbarasihe. (Mo gedi Yesaya 65:21-24; Yugoti 11:18) Wa regbo nikaa ndu, aboro nika sa apapara kpotosende dunduko ni bawenehe na ahe kini idi rogoho wa gu si adu Ati Edene yo. Mbori ‘aza beko ki mbiisi gu nyemu ahe nga ga unga ahe dunduko.’​—Atambuahe 145:16.

21. Gine nayugo gupai nga zereda nika du dagba aboro na anya?

²¹ Zereda adu dagba aboro na anya. Anya-nvuo na zogozogo anya arika rogo ba sa. Zavura tooni gude, ndupai adunga ho tipa u naagunde be agu anya du ni kere ra awere te.​—Mo gedi Yesaya 11:6-9; 65:25.

22. Ginipai nika manga tipa akaza?

²² Akaza ago kusayo. Wangia Yesu Bazogo ga Mbori Kindo, ko nika mangasunge na gu tandu du beko ka husa aboro auru kpotosende susi gu ko amangihe ti gu regbo ko adu ane. (Matayo 9:35; Marako 1:40-42; Yoane 5:5-9) Fuo gure, “a nga boro kporo sa ayá, ‘Mi nawoka’ te.’ ”​—Yesaya 33:24; 35:5, 6.

23. Wai zingabekpio nika ye na ngbarago furani?

²³ Mbori nika zingisa gu gaani aboro nakpiki, na ka i nye ni ruruyo, i raki nyeanye kindi. Agu aboro dunduko nara rogo kpio yo, nga agu aboro Mbori atingida payo atingida, ko nika zingisayo azingisa. Nirengo, “ruru aboro azinga be kpio na iraira yo a.”​—Amokedi 24:15; mo gedi Yoane 5:28, 29.

24. Mo nabi pa raka rogo Paradizo auru kpotosende wai?

²⁴ Nairiwo gu weneapai napido agu aboro idi ka wirikapai tipa Yekova Mbori na kini irisiko! Gi Paradizo nga ga kpotosende re du Yesu akidopaha fu gu iradĩ i akengeko patiko. Ko aya fuko: ‘Ani adu na mo Paradizo yo.’ (Ruka 23:43) Si ni nyanyakipa pai ani wirikipai tipa Yesu Kristo, nga gu boro Mbori nasia ní ní ye na agi amaku re fu aboro.

1. Gini kpee ani ka wisigopai tipaha?

AMIRIONI aboro rogo zegino dunduko ima inopa gu kpee dungu aboro ayambaha nga Barani, watadu ga Gbia Kpee. Si nga gu kpee Yesu afuhe ni kpia kparakpee furani. Agu apai Yesu agumbaha rogo gi kpee re si na rogoyo ti ni, na pa wisigo mo agu apai biata ani naasanahe tipaha du ti tonatona gu kpee re nika undoro mo ini gu kura apai Ziazia Kekeapai ayugoho.

2. Gini apai biata Yesu arugu gako abawiriki i nikpari tipaha?

² Ti tonatona gi kpia kparakpee re, Yesu arugu apefuoko ki ya: ‘Oni kpari wa gere tie: Barani du ngbangbaturũ yo, Ani irisi rimoro airisa. Ga ngbii ye, Ani mangi rogo kpotosende wa mo akpinyemuhe, Wa duhe ngbangbaturũ yo.’ (Matayo 6:9-13) Gini nyanyakipa apai biata du rogo tonatona gi kpee re?

3. Ginipai si aida ani inihe tipa ga Mbori Ngbii?

³ Ani aima ino dungu apai tipa rimo Mbori nga Yekova. Na ani aima sakapai a ni betehe tipa gupai Mbori akpinyemuhe, na gupai ko namangihe, gbiati gupai ko nika mangaha ku mbatayo fu awiri aboro. Gine Yesu aafura tipaha ho ko ayani ani takpara niya: ‘Ga ngbii ye’? Ga Mbori Ngbii nga gine? Wai payehe nika sa rimo Mbori si du ni irisiirisihe? Na gini pagume du dagba paye ga Mbori Ngbii na pa manga gupai ko akpinyemuhe auru kpotosende?

GA MBORI NGBII NGA GINE?

4. Ga Mbori Ngbii nga gine, na da nga gaha Bakindo?

⁴ Ga Mbori Ngbii nga gako Kindo, nga gu zogarago ko asigiraha ki sia gaha Bakindo. Da nga Bakindo ga Mbori Kindo? Yesu Kristo du nga gaha Bakindo. Yesu nga bakere Bakindo kisusi agu abazogo nga awiri aboro dunduko, na i nayambako nga “Bakindo ri abakindo, Gbia ri agbia.” (1 Timoteo 6:15) Ko na ome tiko ka manga weneapai susi agu abakindo dunduko nga awiri aboro, zavura guni ngba sinoni gbe dagbayo.

5. Ga Mbori Kindo nika ru wari kaa zogarago, na kurii gine?

⁵ Ga Mbori Kindo nika ru wari kaa zogarago? Ga Mbori Kindo gudu rogo gu ba du Yesu rogoho, bambiko ko nga gaha Bakindo. Mo tingidi gupai nga i aimi Yesu ti ngbunduru ngua-rungosi, Mbori ki zingisiko be kpio. Fuo gure ngbutuko, ko ki ga ku ngbangbaturũ yo. (Amokedi 2:33) Sidu, ngbangbaturũ yo du, du ga Mbori Kindo ni. Si nga ndu gupai Ziazia Kekeapai ayambaha ti ni nga ‘gu ngbii du ngbangbaturũ yo.’ (2 Timoteo 4:18) Wa vura duhe nga ga Mbori Kindo ngbangbaturũ yo, si nika zogarago ku auru kpotosende.​—Mo gedi Yugoti 11:15.

6, 7. Ginipai nasa Yesu ko du kia ti kura abakindo?

⁶ Ginipai nakpara Yesu ti kura abakindo? Pai sa nga, ko nika raka nyeanye kindi zanga kpio. Wa Ziazia Kekeapai aringbisa Yesu na agu abakindo nga aboro, si naya tipa ko wẽ ‘kinako sa ka kpingo ya, nye rogo gu imarago ka boro ambedanga na ni ya.’ (1 Timoteo 6:16) Gure nayugo gupai nga, gu weneapai dunduko Yesu nika mangaha, si nika nyeanye kindi. Na ko nika manga dungu weneapai nga gu nika undo gako aboro.

⁷ Mo makianga gi sangbanebi nga ga Ziazia Kekeapai du tipa Yesu re: “Ga Yekova Toro anyé ri ko, gu toro nga ga tatamana nga toro rugatinapai, nga toro rugapai nga toro tandu, nga toro inahe nga toro gunde ti Yekova. Gako ngbarago adú rogo pa gunde ti Yekova. Ko asápa nga ngbanga kuti bi pai ni bangiriko te, watadu za pai mbiko gia pai ni tuko a te; ono ko asára ngbanga rungorungo aboro na rurupai, ka za pai nzunzu ni ruru sarangbanga fu bayee aboro auru kpotosende.” (Yesaya 11:2-4) Agi afugo re nayugo gupai nga Yesu nika ngia ruru Bakindo na kidu na nunga aboro. Anga ngbatunga Bakindo wa guko re mo aida ko ni gamo bazogo te?

8. Ada nika zogarago na Yesu?

⁸ Gu kura rengo du tipa ga Mbori Kindo nga: Yesu azoganga rago nisako te. Gu kura aboro kinaho nika zogarago na ko. Ni kpiapai, gu mokedi nangia Pauro aya fu Timoteo wẽ: “Ka ani ru fu pai, ani azoga rago a na ko.” (2 Timoteo 2:12) Pauro, Timoteo, na gu kura ruru aboro Mbori nasiayo nika zogarago na Yesu ngbangbaturũ yo. Bange aboro wai nika gbia gu momu re?

9. Bange agu aboro wai nika zogarago na Yesu, na gini regbo Mbori atona siayo?

⁹ A wa duhe rogo Kapita 7 nga ga gi buku re, i afu yuguyugupai fu gu mokedi nangia Yoane. Rogo gu yuguyugupai re, ko abi “Wiri Kandoro [nga Yesu Kristo], ko ru ri gu bagangara nga Siona [nga gako ba zogarago ngbangbaturũ yo], agu yo ki du na ko 144,000, nga agu yo du na rimoko ni keke he ti ngbanda kpakpuyo, na rimo Bako a.” Ada nga agi ­aboro du bangeyo nga 144,000 re? Kina boro fugo Yoane nakaragapai furani niya: “Agi yo re nga agu yo naapeka Wiri Kandoro ku ho ko andu ku ho ni dunduko. I atumo agi yo dagba aboro yo re, i du ni amakawa fu Mbori, na fu Wiri Kandoro a.” (Yugoti 14:1, 4) I nga gu ruru apefuo Yesu Kristo i nasiayo i zogorago na ko. Fuo i zingisi yo be kpio i ki ga ku ngbangbaturũ yo, i nika ‘zogarago yo ku auru kpotosende’ na Yesu. (Yugoti 5:10) Mbori aima digo nisia ruru aKristano tipa gi badona aboro nga 144,000 re rengbe tona ti kina gu regbo nangia ga amokedi.

10. Tipagine du gu mbakadapai nga Yesu gbiati aboro fuoko ­144,000 zogo aboro ti ni ni gu mbakadapai nga ga nyemuse?

¹⁰ Gu mbakadapai nga Yesu gbiati aboro fuoko 144,000 zogo aboro re, si nga gu mbakadapai nga ga nyemuse. Gu bambatapai ngbaha ti ni nga Yesu aima raka ni boro na ki ini agu apai du tipa aboro gbiati gayo arungo. Pauro aya tipa Yesu wẽ: “Ani adu nga na gu gbiamotumo be rani arengba nga na rungo na ani tipa gaani rungbura ya, te; ono i aima asada ko rogo apai dunduko wa kina rani, ono ko adu nga na ingapai te.” (AEbere 4:15; 5:8) Agu aboro ko nika zogarago na yo aima gbiatiyo na arungo a ki hipai wakina rani. Kurigure, i aima hi gu gbegberẽ apai nga ga zangarengba gbiati ngbatunga akaza dunduko. Sidu, i nika rugatiyo aruga wenengai na gu kpakaraapai nagbia aboro!

GINI APAI GA MBORI KINDO NIKA MANGAHA?

11. Tipagine si aidi ti ni ga Mbori Kindo duho tipa gupai Mbori akpinyemuhe rengbe kaa manga ngbangbaturũ yo zanga pai duho nagberesa paha?

¹¹ Ho Yesu ayani fu gako abawiriki i nikpari tipa ga Mbori Kindo ye, ko aya berewe wẽ si naida i nikpari tipa gupai Mbori akpinyemuhe ‘mangi rogo kpotosende, wa duhe ngbangbaturũ yo.’ Mbori naraka ngbangbaturũ yo na amaraika aima digo nimangi gupai ko akpinyemuhe yo. Ono tie, rogo Kapita 3 nga ga gi buku re, ani aini gupai nga gbegberẽ maraika ambu manga gupai Mbori akpinyemuhe ki sa Adamu na Eva i mangi ingapai. Rogo Kapita 10, ani nika wirika kura apai Ziazia Kekeapai ayugoho tipa gu gbegberẽ maraika re, du rimoko nga Satana Bakitingbanga. Mbori aidihe fu Satana gbiati agu amaraika nangbe na ko i ayamba yo nga adaimona i sungu ngbangbaturũ yo tipa bete regbo. Ti gu regbo re, anga agu aboro dunduko naadu ngbangbaturũ yo naamanga gupai Mbori akpinyemuhe te. Gupai re adigi ho ga Mbori Kindo atona zogarago ni. Fuo maayo Yesu Kristo ni bakindo, ko akimbo Satana na vura.​—Mo gedi Yugoti 12:7-9.

12. Gini bakere apai ue namangi gumbayo paha rogo Yugoti 12:10?

¹² Yoane agumbapa gupai ko abihe ku mbatayo si namangi tingbafuo gu vura re ki ya: “Mi ki gi bakere fugo ­ngbangbaturũ yo niya, ‘Awere bata da na tandu, na gu ngbi nga ga gaani Mbori, pa zoga ahe ki du ni ga gako Kristo; bambiko i aba bakitingbanga awirinarani ku sende yo, nga gu ko nakiti ngbanga awirinarani barangba gaani Mbori na uru na yuru.’ ” (Yugoti 12:10) Ya mo mo kparia apai ue nga gu gumbayo paha rogo gu veresi re? Bambatapai nga, ga Mbori Kindo atona zogarago. Ue pai nga, Yesu Kristo aba Satana ku sende no.

13. Gine nangia sangbana ba Satana kusayo ngbangbaturũ yo?

¹³ Gine nangia sangbana agu apai naadu ue re? Nibipa gupai namangi ngbangbaturũ yo, ani nagedaha were: “Ako angbangbaturũ, si du ka oni ngi angi ti ni, na agu roni naraka rogo ho.” (Yugoti 12:12) Gere angia regbo tipa ruru amaraika ngbangbaturũ yo du na ngbarago mbiko i aima ba Satana na gako adaimona ku sende no kina ruru aboro ki nye ngbangbaturũ yo. Ti gi regbo re, kina zereda du yo zanga tagbagatagbaga apai. Gure nga, gupai Mbori akpinyemuhe namanga amanga ngbangbaturũ yo zanga boro duho nasogaha.

14. Ginipai mangi ni sangbana bayo Satana ku auru kpotosende?

¹⁴ Ono ginipai tigaha namangi tipa kpotosende? Ziazia Kekeapai naya: “Rungo du fu kpotosende na baime, bambiko bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.” (Yugoti 12:12) Rago agberẽ ti Satana mbiko i abako ku sende no na mbiko kina bete regbo gbua nye fuko. Gi gako imisiringbaduse re nasako ko niye na “rungo” fu aboro auru kpotosende no. Ani nika wirika kura apai tipa gu “rungo” re rogo gu kapita naye fuo gere. Ono wai rengbe ga Mbori Kindo ka manga gupai auru kpotosende Mbori akpinyemuhe wa duhe tie nga Satana kina no?

15. Gine nga gupai Mbori akpinyemuhe tipa kpotosende?

¹⁵ Mo tingidinga pa gupai Mbori akpinyemuhe tipa kpotosende. Mo aima inopai tipaha rogo Kapita 3. Mbori ayugu gupai Edene yo nga gupai ko akpinyemuhe tipa kpotosende nga si du ni paradizo ruru aboro ki hisihe kini raki zanga kpio. Satana asa Adamu na Eva i mangi ingapai, si ki rugusi gupai Mbori akpinyemuhe tipa kpotosende, ono si aagbarasanga paha nyeanye kindi te. Ga Yekova ringbisapai kindi nga ‘ruru aboro di kumbo ringara, ki nye anye kindi.’ (Atambuahe 37:29) Ga Mbori Kindo nika manga gupai re. Rogo gini gene?

16, 17. Ginipai Daniere 2:44 agumbaha furani tipa ga Mbori Kindo?

¹⁶ Ani bingo gu sangbanebi du rogo Daniere 2:44. Si naya: “Rago agu abakindo re Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.” Ginipai gipai re ayugoho tipa ga Mbori Kindo?

¹⁷ Ni bambatapai, si nafura tipa ga Mbori Ngbii, watadu Kindo ya i asigiraha “rago agu abakindo re,” nga ti gu regbo kura abakindo nikaa zogarago azoga. Ni uepai, si naya furani wẽ gu Kindo re nika nyeanye kindi. I adianga be gu Kindo re te. Ni biatapai, si naya wẽ vura nika du dagba ga Mbori Kindo na agu azogarago du rogo gi zegino re. Ga Mbori Kindo nika du na diabese. Si nika ngia gu yangara zogarago nikaa zoga aboro dunduko. Fuo mangaha wo, aboro kini ru tie ka gbia ngbarago be gu bawene zogarago ngbatungaha aadunga mbata ya.

18. Rimo gu yangara vura nika du dagba ga Mbori Kindo na gu zogarago nga ga awiri aboro nga gine?

¹⁸ Ziazia Kekeapai nagumba dungu apai tipa gu yangara vura nika du dagba ga Mbori Kindo na agu azogarago nga ga aboro re. Ni kpiapai, si naya wẽ wa digido zegino ambeda, gbegberẽ atoro nika mera na aziree ka nanga “abakindo zegino dunduko.” Tipagine? Tipa “ka dungura yo sa gu vura nga ga gu bakere rago nga ga Mbori, nga gu ko du na tandu apai dũ.” I nika dungura agu abakindo nga ga kpotosende yo ku rogo “gu ba i niya ti ni rogo pa Ebere yo, Aramegido.” (Yugoti 16:14, 16) Mbiko agu apai gumbayo ho rogo agi averesi du ue re, i nayamba gu yangara vura nika du dagba gu zogarago nga ga awiri aboro na ga Mbori Kindo nga Aramegido.

19, 20. Gini apai nasa gupai nga ka gupai Mbori akpinyemuhe naamanganga awere ya?

¹⁹ Ginipai Aramegido nika saha si mangi? Mo berẽnga berewe tipa ga Mbori ringbisapai tipa kpotosende. Yekova Mbori ambakadi kpotosende tipa ruru aboro ni rengberengbeyo hihe kini raki rogoho. Gine nasa gupai nga ka raka dunga wo awere ya? Bambatapai nga, ani nga aboro-ingapai, na ani nakaza na kini kpiki. Ono tie, ani abi gupai rogo Kapita 5 nga, Yesu akpi tipa gupai nga ani raki nyeanye kindi. Si nawira wa mo natingida gupai atingida du rogo gu wene pangbanga nga ga Yoane naya: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”​—Yoane 3:16.

²⁰ Uepai nga, dungu aboro namanga gbegberẽ apai. Aboro nape ziree, kini dĩ he, na kini mangi wasiwasi mangaapai. I aidanga ka manga gupai Mbori akpinyemuhe te. I nika gbarasa agu aboro agbarasa namanga gbegberẽ apai ti regbo gu ga Mbori vura nga Aramegido. (Atambuahe 37:10) Kura ndupai gupai Mbori akpinyemuhe amanganga ti ni ya nga, gu zogarago nga ga aboro angarasanga aboro i mangihe te. Dungu azogarago na ome ti ni tipa ka nyasariipa gu gbegberẽ apai namanga te. Kuba gure, i namanga kina agu apai du ni gbegberẽhe, watadu gu mangaapai nga ga biriki. Ziazia Kekeapai nape gupai ziazia nga: ‘Boro nidu nigbia kurii kurani ka imisa ní.’​—Batungusipai 8:9.

21. Wai ga Mbori Kindo nika sa gupai Mbori akpinyemuhe si mangi auru kpotosende?

²¹ Tingbafuo Aramegido, aboro nika du tii zogarago gbua kina sa, nga ga Mbori zogarago. Gu zogarago re nika sa gupai Mbori akpinyemuhe si mangi, na ki ye na amaku. Ni kpiapai, si nika dia Satana na gako adaimona kusayo. (Yugoti 20:1-3) Gu ome duti gu motumo tumorii Yesu afuhe nika tona mangasunge tipa ka ruru aboro naakazanga na kini kpiki ya. Aboro nika raka nyeanye kindi. (Mo gedi Yugoti 22:1-3.) Kpotosende nika da ni paradizo. Gu Kindo re nika sa gupai Mbori akpinyemuhe si mangi auru kpotosende na ki sa rimoko si du ni irisiirisihe. Agu aboro dunduko nikaa raka auru kpotosende tiibe ga Mbori Kindo nikaa irisa rimo Yekova.

GA MBORI KINDO ATONA ZOGARAGO

22. Ani naino wai nga ga Mbori Kindo aayengo ti gu regbo Yesu adu auru kpotosende watadu nibasa fuo zingako be kpio ki ga ku ngbangbaturũ yo te?

²² Ho Yesu ayani fu apefuoko i nikpari nga, ‘Ga ngbii ye,’ si aima du ziazia nga, anga gu ngbii re aima ye ti gu regbo re te. Ya mo si aye ti gu regbo Yesu aga ku ngbangbaturũ yo? Oó, bambiko aPetero na Pauro aya wẽ tingbafuo zinga Yesu be kpio ki ga ku ngbangbaturũ yo, gu sangbanebi du rogo Atambuahe 110:1 adigisitihe kutiko, nga gu naya: “Yekova niya fu gi gbia: ‘Mo súngu ku kumbabere, daho mi ka sa avuraro ni ni gbada nduro.’ ” (Amokedi 2:32-35; AEbere 10:12, 13) Si aidi Yesu sungu mbataano ko kini ru ka tona zogarago.

23. (a) Gini regbo ga Mbori Kindo atona zogarago? (b) Ginipai i nika sakapai tipaha rogo gu kapita naye fuo gere?

²³ Si aidi Yesu sungu tipa bagizo regbo wai ko kini ru ka tona zogarago? Tona rogo 19 kama agarã kada ku rogo 20 kama agarã, ndikidi abawisigi Ziazia Kekeapai aini gupai nga ga Mbori Kindo nika tona zogarago rogo 1914. (Nibipa gi garã re, mo bi Kura Apai ti kpewaraga 247-249.) Agu apai natona ka manga rogo 1914 ayugu gupai nga, kina rengo du agu ­abawisigi Ziazia Kekeapai re ada kutini. Digisidigisi asangbaanebi nayugo gupai nga, rogo 1914, Kristo ada ni Bakindo na ga Mbori Kindo atona zogarago. Sidu, ani naraka vuru gu ‘bete regbo’ nye fu Satana. (Yugoti 12:12; Atambuahe 110:2) Si naida mo ini gupai tie nga, ga Mbori Kindo ima mbeda ka sa gupai Mbori akpinyemuhe si mangi auru kpotosende. Ya mo wene pangbanga nga gipai re te? Ya mo mo idi kuti gipai re nga rengo du? Gu kapita naye fuo gere nika undoro mo bi gupai nga Ziazia Kekeapai nayugo agi apai re ayugo nzunzu.