Ya Mo Pa Vungayo Boro Berewe Nga Gene Bataa?

WAI rengbe oni ka karagapai sa gu sanahe nga, “Ya mo i vunguro berewe?” Badungu amirioni agu aidipase nga aKristano rogo zegino rengbe ka karapai sa gi sanahe re nga, “Ii, i aima vungare berewe!” I idi kuti gupai nga, vunga boro berewe nga gupai i aino ndikidi Kristano ti ni, na si nga gene bata. I naagumba gupai abarumbatayo rogo pambori naagumbaha, wa guko nangia Robert C. Sproul nakepai ki yaa: “Kinagu ka i vungu boro berewe, . . . si ka ní du ti ni ni Kristano.”

Ya mo oni dagba agu aboro idi kuti gupai nga, vunga boro berewe nga gene bataa? Ka si duwo, oni naida aida a ka undo agumeroni na abakurearoni tipa i gbia gu gene re na kini ndu ngbaha. Ono tipa i gbia gu gene re na kini ndu ngbaha, si naida i rugutiyo na gu kparakparapai du dagba gu boro vunguyo ní berewe, na guni i avunganga ní ya. Wai rengbe oni ka undoyo i rugutiyo na rogo gupai yo nga ga vunga boro berewe?

Badungu aboro nayawee gu boro vunguyo ní berewe, ní nga gu boro mangi zungahe fu Mbori na fu Kristo tipa ka mangasunge fuyó, si ki tadu wo, ní kini da nigu boro du niungani rogo toro yo.

Ya mo si airiwo tironi ka gia gupai nga, Ziazia Kekeapai agumbanga pai wa gure tipa pa vungayo boro berewe tee? Oni nakpinyemu ka ino gupai Ziazia Kekeapai ayugoho nzunzu tipa pa vungayo boro berewe? Ka oni ini gupai Ziazia Kekeapai ayugoho tipa gipai re, oni agbia undo agbia bakere gbe, bambiko si aria gaoni raka aʹaria gbiati agu apai oni amaabangironi tipaha.

Ginipai Ziazia Kekeapai Ayugoho?

Aba ue gbua rogo Ziazia Kekeapai gumbayo pa ‘vungayo boro berewe’ rogoho. Gu sa rogo 1 Petero 1:3, 23. Gu kuraha rogo Yoane 3:1-12, nga gu nafura tipa gu fugo nadu dagba Yesu na gu barumbatayo rogo pambori nangia Nikodemo. Gu pangbanga re naabaha dunduko rogo gu sanduki du pati gi kekepai re. Ani nahõpai beroni, oni gedihe wenengai.

Yesu afura tipa badungu apapara pa gu ‘vungayo boro berewe’ re rogo gu pangbanga re. Afugo Yesu naundo rani ani gbia karapai sa gu nyanyakipa asanahe du bisue, nga:

◼ Wai nyakipa vungayo boro berewe?

◼ Ya mo kina boro rengbe ka ida i vungu ní berewe?

◼ Tipagine i avunga boro ti ni berewe?

◼ Wai i avunga boro berewe?

◼ Pa vungayo boro berewe naye na gini ariapai kurogo gani raka?

Ani wisigingo agi asanahe re nibasasa.

[Gu kpiahe du ti kpewaraga 4]

“I ka Vunga Roni Avunga Berewe”

[Gu kpiahe du ti kpewaraga 4]

“Were kumba adu yo dagba aFarusi, rimoko angia Nikodemo, nga gbia aYudo. Ko ki ye koyo du Yesu ni yuru ki ya fu ko: ‘Rabi, ani ini ya bayugupai nga mo ye yo du Mbori ni; bambiko a nga boro sa ka mangi agi apai i aina pai ti ni mo amanga te re, kina gu ka Mbori du na ni.’ Yesu ki karaga ha fu ko ki ya, ‘Mi nagumba ha foro ni rengo, ni rengo, ka boro bi nga ga Mbori ngbi te kina gu ka i vungu ni avunga berewe.’ Nikodemo ki ya fu ko, ‘Ho boro nidu ni ni gbinza ni i niwiri pa vunga ni wãi? Ni nirimi arima ku rukumbu nani yo berewe i vungu ni?’ Yesu ki karaga ha ki ya, ‘Mi nagumba ha foro ni rengo, ni rengo, ka boro rimi nga ku rogo ga Mbori ngbi yo te, kina gu ka i vungu ni avunga be ime na Toro. Gu vungu vungu yo be boro si nga boro boro; na gu vungu vungu yo be toro, si nga toro. Ka mo báki nga bangiro ti gu pai ya mi foro, “I ka vunga roni avunga berewe” ya. Yuge naya kina ku ho si akpi nyemu ni, mo ki nigi woroho agia, ono mo naina nga ho si aye ni, na ho si andu ku ho ni te; wo du gu boro i nivungu ni be Toro.’ Nikodemo ki karaga ha fu ko ki ya, ‘Ka agi apai wiri pa du wãi re?’ Yesu ki karaga ha fu ko ki ya, ‘Ga aYisaraere bayugupai nga mo, mo aruga nga tiro na agi apai te re? Mi nagumba ha foro ni rengo, ni rengo, ani nagumba kina gu pai ini ani, ani nidu ni dezire kina gu pai bi ani. Oni adia nga gaani dezire ku gume te. Wa mi nagumba pa ũzegino fu roni, ka oni aida nga ha ya, ka mi gumba pa ũngbangbaturũ fu roni, oni wiri pa ida ha wãi?’”—Yoane 3:1-12.

Wai Nyakipa Vungayo Boro Berewe?

TI GU regbo naabaha dunduko Yesu aafura na Nikodemo, ko anyakasipa vungayo boro berewe. Wai ko ayugu gupai re ziazia?

Ho Yesu aafura ni na Nikodemo, ko ape gupai nga: ‘Ka boro binga ga Mbori ngbii te kinagu ka i vunguni avunga berewe.’ (Yoane 3:3) Gu fugo nga, ‘ka boro binga . . . ’ na ‘kinagu,’ si nanyakasapa vungayo boro berewe. Ani yugunga ha na kpiapai: Ka boro yaa, “Ka boro bingo ima uru te kinagu ka uru kuru,” si nayugo gupai nga, tipa ima uru du, uru duwa ka si kuru. Teketeke wakina gure a, Yesu ayawee, pa vungayo boro berewe ninyanyakipa pai tipa ní rimi kurogo ga Mbori ngbii.

Yesu anyakasi gupai re berewe ki yaa: “I ka vunga roni avunga berewe.” (Yoane 3:7) Ringbisihe kuti Yesu, pa vungayo boro berewe nigupai si aidaha tipa boro ‘rimi kurogo ga Mbori ngbii.’—Yoane 3:5.

Wa duhe ziazia nga, Yesu abi pa vungayo boro berewe ninyanyakipa pai, si naida aKristano girogo gupai re wenengai. Nikpiapai, ya mo oni naberã gupai nga, Kristano rengbe ka sia gupai nitiní nga i vunguni berewe?

[Gu kpiahe du ti kpewaraga 5]

“Ka boro bingo ima uru te kinagu ka uru kuru”

Ya Mo Kina Boro Rengbe ka Ida I Vunguni Berewe?

DA NASA gupai nga i vungu boro berewe? Kura abayugupai nga ga akanisa yó naazinahe fu gayó aboro kini yawee si naida i da ni agu aKristano vunguyo yó berewe. I naaya fuyó wee: “Oni duwa ka i vungu roni avunga berewe.” Gu fugoyo re naayugo gupai nga, kina idipase nitiní nadiaberã ka manga agu apai nika sa gupai nga i vunguni berewe. Ya mo gure nga rogo gupai yo nzunzu Yesu agumbaha fu Nikodemo?

Yesu aayanga wee kina boro rengbe ka diaberã nitiní tipa i vunguni berewe te. Tipagine gumba ani he ti ni wo? Gupai Yesu agumbaha gbua nga: “I ka vunga roni avunga berewe.” (Yoane 3:7) Gu fugo Giriki i asaha kurogo pa-Zande nga ‘vunga boro berewe,’ kura rogoyo nga “ka gbia gu vungu naye ariyo.”a Rogoho yo ngawee gu vungu re naye “ariyo” be Mbori nga ‘Baa.’ (Yoane 19:11; Yakoba 1:17) Nirengo, Mbori du nasa gupai nga i vungu boro berewe.—1 Yoane 3:9.

Gi fugo nga “naye ariyo” re, si rengbe ka undo rani ani rugutirani na gupai duhe ti ni nga, boro arengbanga ka sa gupai nitiní nga i vunguni berewe te. Oni berẽnga pa wai i avunguroni. Ya mo oni du nitironi nasa gupai nga naroni vunguroni? Wagusa te! Baroni na naroni du nasa gupai nga i vunguroni. Teketeke a, i rengbe ka vunga rani berewe kinagu ka si du nga Barani nga Mbori idi i vungurani. (Yoane 1:13) Sidu, gu mokedi nangia Petero afura afura nzunzu ki yaa: ‘I táasirimo Mbori, Ba gaani Gbia Yesu Kristo, wa du ko navungu rani berewe nigako bakere inapai.’—1 Petero 1:3.

Ono gu kurapai kinaho si aida ani inihe berewe tipa vunga boro berewe. Gu sanahe si aida ani ini karagapai kuti ni nga, ‘Tipagine i avunga boro ti ni berewe?’ Ka ani ini karagapai sa gu sanahe re, si rengbe ka undo rani ani rugutirani wenengai na gupai nga vunga boro berewe.

[Gu rukutu kekeapai du bandu kpewaraga yo]

[Gu kpiahe du ti kpewaraga 6]

Gini wiratise du dagba vunga boro berewe na ndikidi vunga boro?

Tipagine I Avunga Boro Ti Ni Berewe?

BADUNGU aboro idi kuti gupai nga, pa vungayo boro berewe nga gene bata. Ani bingo gupai Yesu apehe tipa vungayo boro berewe. Ko ayaa: “Ka boro bi nga ga Mbori ngbi te kina gu ka i vungu ni avunga berewe.” (Yoane 3:3) Sidu, si naida i vungu boro avunga berewe tipa ní rimi kurogo ga Mbori ngbii, angianga tipa ka gbia bata ya. Kura aboro rengbe ka yaa, ‘Ono anga pa rimo boro ga Mbori ngbii naapa gbia ní bata, si kina sa tee?’ Oó, si wo te. Tipa ani girogo gipai yo re, si naida ani ini guhe nga “ga Mbori ngbi.”

Ga Mbori ngbii, watadu ga Mbori Kindo, si nga zogarago. Sidu, ga “Mbori ngbii” nga “gu zogarago nga ga Mbori.” Ziazia Kekeapai nayugo gupai nga, Yesu Kristo nga “Wiri boro,” ko nga Bakindo ga Mbori Kindo, na kura aboro kinaho nika zogarago naako. (Daniere 7:1, 13, 14; Matayo 26:63, 64) Kurigure, gu yugoti i ayuguhe fu Yoane, si nayugo gupai nga, agu aboro nika zogarago na Kristo re, i nga agu aboro sia yó yó ‘dagba angbatunga aboro yo, na angbatunga afugoyo, na aboro, na arikaaboro dunduko,’ na ‘i nika zogarago auru kpotosende.’ (Yugoti 5:9, 10; 20:6) Ziazia Kekeapai nayugo gupai berewe nga, agu aboro nika zogarago na Kristo re, i nga “umba rika aboro” bangeyo nikadu nga 144,000. I nga agu aboro “i atumo yo rogo kpotosende.”—Ruka 12:32; Yugoti 14:1, 3.

Wari du ga Yesu Kristo mbatabakindo ni? I nayamba “ga Mbori ngbi” ayamba a nga “gu ngbi nga ga ngbangbaturũ,” si kini yugu gupai nga, Yesu na gako abadiazogarago nika sungo ngbangbaturũ yo kaa zogarago. (Ruka 8:10; Matayo 13:11) Sidu, ga Mbori ngbii watadu Kindo nga gu zogarago du ngbangbaturũ yo du Yesu nga gaha bakindo gbiati gu kura aboro dagba arikaaboro.

Ginipai tie nzunzu Yesu aberẽhe ho ko ayani wee “ka boro bi nga ga Mbori ngbi te kina gu ka i vungu ni avunga berewe”? Gupai nadu berãko yo nga, si naida i vungu boro avunga berewe tipa ní ndu ka zogarago na Yesu ngbangbaturũ yo. Sidu tie, gu ndupai i avunga aboro ti ni berewe nga, ka mbakada yó i ndu ka zogarago na Yesu ngbangbaturũ yo, na kina bete aboro gbua i avungayo berewe.

Ka da ku awere, ani bi gupai nga, si ninyanyakipa pai gbe i vungu boro berewe, kina Mbori nasa gupai nga i vungu boro berewe, na kinako nambakadapai tipa ka roga bete aboro i ndu ka zogarago ngbangbaturũ yo. Ono wai du i avunga boro berewe?

[Gu kpiahe du ti kpewaraga 7]

Gu ndupai i avunga aboro ti ni berewe nga, ka mbakada yó i ndu ka zogarago na Yesu ngbangbaturũ yo, na kina bete aboro gbua i avungayo berewe

[Gu kpiahe du ti kpewaraga 7]

Yesu Kristo gbiati gu kura aboro dagba arikaaboro, i nika zogarago rogo ga Mbori Kindo

Wai I Avunga Boro Berewe?

YESU afura na Nikodemo tipa wai nyakipa vungayo boro berewe, gu boro nasaha si mangi, na gupai si amanga ti ni. Yesu aima fura a tipa wai si amanga. Ko ayaa: “Ka boro rimi nga ku rogo ga Mbori ngbi yo te, kina gu ka i vungu ni avunga be ime na Toro.” (Yoane 3:5) Sidu, ime na toro nga agu ahe nasa boro ní du nivovo vungu. Ono rogo gupai yo nzunzu nga “ime na Toro” nga gine?

“Ime na Toro”

Wa duhe nga Nikodemo angia wene bawirikipai rogo gu pambori nangia ga aYuda, ko aima ino rogo gu fugo yo nga “gu Toro nga ga Mbori” a wa duhe rogo Kuru Ndika. Gu toro re nga ga Mbori zaaza ome nga gu rengbe ka sa aboro i mangi iiriwoapai. (Bambata Pai 41:38; Gate 31:3; 1 Samuere 10:6) Sidu, ho Yesu amangisunge ni na gu fugo nga “Toro,” Nikodemo aima rugatiko nani nga ziazia toro du ngaha watadu ga Mbori zaaza ome.

Ginipai tigaha du tipa ime? Oni makianga pa agu apai namangi mbata fu Yesu fura na Nikodemo na tingbafuo ho. Agi apai re nayugo gupai nga Yoane na ga Yesu abawiriki anaabapatizi aboro rogo ime yo. (Yoane 1:19, 31; 3:22; 4:1-3) Bapatiza aima du nigu mangapai aboro Yerusarema aima inopai tipaha wenengai. Sidu, ho Yesu afura ni tipa ime, Nikodemo aima ino gupai nga ko afura tipa gu ime nga ga bapatiza angianga kungba ime gbua ya.a

Bapatiza “ni Ziazia Toro”

Ka si du nga ‘pa vungayo boro be ime’ nga bapatiza boro rogo ime, gine nga ‘vunga boro be toro’? Mbata fu Nikodemo fura na Yesu, Yoane Bafu Bapatiza aima takapande gupai nga i abapatiza aboro niziazia toro na niʹime. Ko ayaa: “Mi abapatizi roni ni ime; ono ko abapatizi roni ni Ziazia Toro.” (Marako 1:7, 8) Gu bake wene pangbanga nangia Marako afura tipa gu bambata regbo gu ngbatunga bapatiza re amangi. Ko akehe ki yaa: “Si ada ni gu rago re Yesu aye Nazareta yo, Gariraya yo, Yoane ki bapatizi ko rogo di nga Yaradene. Ko ki ya guari ime yo, ki bi ngbangbaturũ abi ni ba sa, si naza, Ziazia Toro nizorõ wa mbipo ku ri ko.” (Marako 1:9, 10) Ho i azogo Yesu ni ku ime yo, gure nga i abapatizi ko na ime. Ti gu regbo ziazia toro ngbangbaturũ yo azoro kurii Yesu, gure nga i abapatiziko na ziazia toro.

Fuo susa agarã biata tingbafuo bapatiziyo Yesu, ko akido gako abawiriki ki yaa: “Oni araka ngbutuko i ki bapatizi roni ni Ziazia Toro.” (Amokedi 1:5) Ti gini regbo gupai re amangi?

Ti regbo Pendekote rogo gu garã nangia 33 F.B.K., ga Yesu abawiriki bangeyo adu nga 120 adunguratiyo kporo Yerusarema yo. “I ki ya gi woro si niwo awo ari yo wa ka kina bakere yuge aya ari yo, si ki du adu vuru gu bambu yo dunduko i asungu ni. I ki bi mirãhe si nikparaka wa kina mirã we. . . . I ki hiki ahika be Ziazia Toro.” (Amokedi 2:1-4) Ti kina gu bangisa uru re, abawiriki angarasi aboro i zi bapatiza rogo ime. Gu mokedi nangia Petero agumba gupai fu aboro nga: “Oni sá gaoni berã i ki bapatizi roni dunduko ti rimo Yesu Kristo i di gaoni ingaapai ti roni; oni ki di gu ũgume nga Ziazia Toro.” Gine nangia gayó karagapai? “Agu yo naka kuti gako pai i ki bapatizi yo; ni gu rago re i ki gedi agu yo na yo i ki du wa ka i du 3000.”—Amokedi 2:38, 41.

Angbatunga Abapatiza Ho Ue Si Aidaha

Gine agi abapatiza re ayugoho tipa pa vungayo boro berewe? Si nayugo gupai nga, pa vungayo boro berewe naye be apai ue. Oni kparia gupai nga Yesu azi bapatiza mbata rogo ime. Fuoho, i ki bapatizi ko niziazia toro. Wakina gure a, agu abawiriki nadu rogo bambata sa kama agarã azi bapatiza mbata rogo ime (gu kurayo azihe be Yoane Bafu Bapatiza), tifuoho, i kini bapatizi yó nitoro. (Yoane 1:26-36) Kina gu bangisapai re nadu tipa agu aboro bangeyo adu nga 3,000 i abapatizi yó mbata rogo ime tifuoho i kini bapatizi yó niziazia toro.

Ani moingo pa gu bapatiza aboro azihe rogo gu garã nangia 33, F.B.K., ani ki sanahe ka ino wai pa vungayo boro berewe amanga ti gi gaani regbo re? Kina gu bangisapai re a namangi tipa ga Yesu amokedi nadu rogo bambata sa kama agarã. Bambatapai nga, si naida boro sa berãni ti gani ingapai ki mbu gani gbegberẽ mangapai, ki kpara gani raka ka mangasunge fu Yekova na ki yuguhe gbaiga nizio ní bapatiza rogo ime. Fuo gure, ka si du nga Mbori sia ní ní zogorago nibakindo, ko nasa gupai nga i mbedi ní niziazia toro. Pa vungayo boro berewe naye be apai ue, bambataha nga (bapatiza nga ga ime) boro amanga asadatise ka gbiaha; uehe nga gu (bapatiza nga ga toro) nga gu Mbori amangaha. Ho boro azio agu abapatiza du ue re ni, gure nga i vunguni berewe.

Ono tie, tipagine Yesu aya ti ni wee i ‘navunga boro be ime na toro’? Ko agumbaha tipa ka nyakasa gupai nga, bakere ariapai namanga rogo gu raka nga ga agu aboro nazio bapatiza nga ga ime na ga toro. Gu papara kekepai naye fuo gere nika fura tipa pa vungayo boro berewe.

[Gu rukutu kekeapai du bandu kpewaraga yo]

[Gu kpiahe du ti kpewaraga 9]

Yoane abapatizi agu aYisaraere nasa gayó berã ni ime

Pa Vungayo Boro Berewe Naye na Gini Ariapai Kurogo Gani Raka?

TIPAGINE Yesu aya ti ni wee i ‘navunga boro be toro’ ho ko afura ni tipa bapatiza nga ga ziazia toro? (Yoane 3:5) Gu fugo nga ‘vunga,’ si nayugopa tonatona he ayugo a. Sidu, gu fugo nga ‘vunga boro berewe,’ si nayugopa ‘tona boro vovo raka.’ Sidu tie, agu afugo nga ‘vunga’ na ‘vunga boro berewe,’ si nanyakasapa gu tonatona pagume du dagba Mbori na agu aboro i abapatizi yó niziazia toro. Wai gupai re amanga?

Gu mokedi nangia Pauro amangisunge na kpiapai nga ga gu ramukporo nga ga aborokporo tipa ka yugo wai Mbori ambakada agu aboro nika zogarago ngbangbaturũ yo. Ko akepai fu aKristano ki yawee i nika ‘roga yó ki sa yó ni awiri Mbori,’ si ki tadu were Mbori kini bi yó ni “awiriko.” (AGaratio 4:5; AEbere 12:7) Gu kpiapai nga, boro nadia gude ki sa ru niwirini, si naundo rani ani rugutirani naapa gu ariapai namanga ho i abapatizi boro ni niziazia toro. Ani bingo gu kpiapai naye re: Rogo gbata sa, asukuru ho nibadunguhe. Gu kuraha ho i nakparaha tipa agu agude nga avuru ringara i naaraka rogoho du kpuyo gbaria yo tuturũu ti gbata. Rogo kura uru sa, gu gude angianga vuru gu ringara re ya aye fuo bangerekurii sukuru ki yaa, ‘Mi naida oni ke rimore rogo gi sukuru re.’ Bangerekurii gu sukuru re aya fuko, “Tipa i ke ro, si naida mo ngia kina wiri boro gi ringara re.”

Gu Ariapai Namanga Fuo Sa Yó Boro Nivuru Ringara

Rogo gu kpiapai re, gu gude re arengbanga ka rimo gu sukuru re te, mbiko vuru gu ringara re nga ko te. Awere tie, ani berẽnga gupai nga, rogo kura uru sa bakere ariapai mangi rogo gako raka. Boro sa dagba aboro-ringara diko ka sonosako niwirini. Gini ariapai si aye nani fu gi gude re? Mbiko wa duhe awere nga i di ko ka sonosako, ko awere na arengo beko wakina gu dube kura agude nga awiri vuru ringara, na i rengbe arengba ka ke rimoko rogo gu sukuru re. Pa dia yó ko ka sonosako ima manga ariapai rogo gako raka.

Gipai re nga kpiapai tipa agu aboro i avungayo berewe. Ani makianga gu bete awiratise duho dagbaha. I rengbe ka ke rimo gi gude re rogo gu sukuru re kinagu ka ko sa tiko niboro ringara. Ono ko nitiko arengbanga ka manga agu apai i aidaha beko te. Teketeke a, kura aboro rengbe ka gbia gu mamu nga ga rimo ga Mbori Kindo kinagu ka gupai mangi i aidaha beyo nga ka ‘vungayo berewe.’ Ono tie, i nisayo arengbanga ka manga gupai re te, Mbori du nga gu boro namangaha.

Gine namangi ariapai rogo ga gu gude raka re? Si angia pa dia ko ka sonosako ringbisihe kuti ndiko na ko adu kindi nga kina gu gude re. Fuo mangayo agu apai nadu tipa sonosako ringbisihe kuti ndiko, pako aʹariatihe. Ka pepai nimasaku, i avunguko berewe watadu ko atona vovo raka. Ko asa tiko niwiri gu boro nadiko ka sonosako ku dagba awiriko na si kini fu gu rengo fuko nga i ke rimoko rogo gu sukuru du tipa awiri vuru ringara.

Teketeke a, Yekova ima manga ariapai rogo gu raka nga ga kpakpa aboro tipa ka sa yó ni awiriko. Gu mokedi nangia Pauro du dagba gu rikaaboro re. Ko akepai fu akurako aidipase ki yaa: “Oni di kina gu Toro ku gume nga ga mbutiawirinyaure ko, ani nakpara mbiko ko ki ya ‘Aba!’ ‘Buba!’ Toro nga dezire ni tiko na tororani ya awiri Mbori nga ani.” (Rom. 8:15, 16) Mbori adi agu aKristano re ku dagba gako aborokporo ki sa yó ni ‘awiriko.’—1 Yoane 3:1; 2 AKorindo 6:18.

Pa dia Mbori yó ku dagba gako aborokporo aamanganga ariapai ti kpotoyo te mbiko i adu kindi nga kina kpakpa aboro. (1 Yoane 1:8) Ono tie, gi pa dia yó ku dagba ga Mbori aborokporo re atumba payo kuari. Ti kina gu bangisa regbo re, ga Mbori toro ayugu gupai rogo yó yo nga i nika ndu ka raka na Kristo ngbangbaturũ yo. (1 Yoane 3:2) Gi maabangirise ziazia toro aye nani fuyó re, nga gu maabangirise adunga kango tipaha ya, si nasa yó i naabi raka kia ti gu kura aboro abihe. (2 AKorindo 1:21, 22) Gipai re nasa yó i tona vovo raka watadu vovo vungu, ka pepai nimasaku.

Wa Ziazia Kekeapai afura tipa agu awiri Mbori ko adiyo ka mbu tiyó, si nayaa: “I adú ni aboromotumo nga ga Mbori yo, na ga Kristo yo, i azóga rago na ko agarã ki du 1000.” (Yugoti 20:6) I nika zogarago na Kristo rogo ga Mbori Kindo ngbangbaturũ yo. Gu mokedi nangia Petero ake waraga fu akurako aidipase tipa gu zogarago re ya si nga gu “ũkumbo azirã nga ya, agberã nga ya” na i amoihe ‘niʹigiʹigihe fuyó ngbangbaturũ yo.’ (1 Petero 1:3, 4) Si nga wene mosoro nirengo!

Ono tie, kina sanahe nakura tipa gi zogarago re. Ka singia agu aboro i avungayo berewe nika zogarago ni abakindo ngbangbaturũ yo, ada i ka zogarago kuriyó? Ani nika karagapai sa gu sanahe re rogo gu papara kekepai naye re.

[Gu kpiahe du ti kpewaraga 10]

Ginipai Pauro agumbaha wa Mbori adi aboro ki sa yó ni awiriko?