Gu Sunge Nyakipaha Kisusi
1. Pa bi ani sunge tungusapai na kikiipaha rengbe ka fõngbaduraniyo ani mangi gine?
1 Tipagine i angarasa rani ti ni dedede ani mangisunge na gaani regbo, omerani, gbiati agu ahe du berani tipa ka songoda sunge tungusapai? Si wo mbiko sunge ho nyakipaha kisusihe sunge tungusapai te! Pa berã ani kurii pa wai du sangbana gu sunge re rengbe arengba ka fõngbaduraniyo ani mangihe sirisiri mbiko ka regboho nyasi i afugöngaho berewe te.—Amo. 20:24.
2. Rogo gini gene gaani sunge tungusapai ataasarimo Yekova?
2 Si na Taasarimo Yekova: Sunge tungusapai nanyakasa gupai nga, ga Mbori Kindo vuru be Kristo nika diaba agu azogarago du awere na ki nyasi riipa agu apai nafuda aboro. (Mt. 6:9, 10) Kina Yekova sa nga gu boro rẽ tipa ka batasarani be kaza na kpio. (Yes. 25:8; 33:24) Wa duhe nga rimo Yekova du ri rani, gaani wene mangapai gbiati gu kakaka nyemuse du ani nani tipa ko rengba arengba ka sa agu aboro nabi gaani wene mangapai i taasirimoko. (1 Pet. 2:12) Naairiwo gu bawenepai nga ani yugu rimo Yekova nga Bakere Bakindo fu aboro dunduko rogo zegino!—Tam. 83:18.
3. Gini amaku naye fu agu aboro nadia wene pangbanga kugume?
3 Batasa Unga Aboro: Yekova “akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Pet. 3:9) Ono wa vura duhe wo, wai rengbe agu aboro re ka wirikapai tipa gupai Yekova abihe niwenehe watadu nigbegberẽhe ka aboro adunga ho tipa ka yugopai fuyó ya? (Yona 4:11; Rom. 10:13-15) Ho aboro amangapai ni ringbisihe kuti wene pangbanga, si nambakada gayó raka na ki sayo i mbu gbegberẽ mangapai. (Mika 4:1-4) Kurigure, si nasayo i du na maabangirise tipa nyenye unga. Gaani sunge tungusapai nabatasa rani gbiati agu aboro nagiaha kungba rani. (1 Tim. 4:16) Nagba gu momu du ani na berani ti ngba gi nyanyakipa sunge re!
4. Tipagine si aida ani mangisunge tungusapai gbiati sunge sa aboro ni abawiriki ti ni kakaka?
4 Barambeda kumbatayo, bakere gberãngbii nika nyasa riipa gi gbegberẽ zegino re kusayo. Kina agu aboro nairiso Yekova nika bata. Mbiko gipai re, sunge tungusapai gbiati sunge sa aboro ni abawiriki nga gu nyanyakipa sunge si aida ani mangihe niipiipihe mbiko si nga gu sunge nafu undo fu aboro areme. Si naida ani moihe rogo bambata ba rogo gaani raka yo!