Oni Mangisunge na Agu Apai Fugo Mbori Afura Tipaha—Tipa ka Tona Fugo na Boro
1. Gini ngbatunga vovo ũsunge ani nagbiaha tipa sunge tungusapai?
1 Vovo wiri tooni buku kuru du rimoho nga Agu Apai Fugo Mbori Afura Tipaha. Waigu rengbe ani ka mangasunge na gi vovo ũsunge re ho ani ambakada gaani tonatona fugo ni nga ga tungusapai? Wa duhe nga gi wiri buku re na averesi rogoho tii dungu ngbatunga riiapai nga gu Ziazia Kekeapai afura tipaha, a wakina wai du gu buku nga Reasoning, si ima rengba ka ngba tipa tona fugo na boro.
2. Waigu rengbe ani ka mangasunge na “Agu Apai Fugo Mbori Afura Tipaha” rogo gaani sunge tungusapai?
2 Oni rengbe ka mangasunge na muambe sanahe ki ya: “Ani nata areme kaa fura na gaani amurakporo niwiri guruhe bambiko badungu aboro nabaka bangiriyo nga, ‘Ya mo Mbori du si aida i bira ko tipa gu rungo nga ga aboro?’ [Rogo kura adagbarago, si ni wenepai ka yugo gu sanahe re fu irakporo.] Ga berãpai nga gine? [Oni mbu ní tipa ní karagapai.] Ziazia Kekeapai nafu wene karagapai kuti gu sanahe re.” Oni gedi na ki saki veresi sa watadu susi sa dagba agu averesi keyo paha yo rogo Ziazia Kekeapai. Ka irakporo yugu nyemupai, oni ki yugu agu asanahe funi du ti tonatona gu wiri buku re na ki sana ni ni sia sanahe sa nga gu oni nika sakaha na ni ti gu regbo oni nika ndu berewe fuoni. Watadu oni rengbe ka fu waraga sa funi dagba agu awaraga ani naawirikaha na aboro nga gu du na dungu apai rogoho nibi gupai oni nasakihe re.
3. Wai rengbe ani ka mangasunge na “Agu Apai Fugo Mbori Afura Tipaha” tipa ka tona fugo ho ani atungusapai ni rogo agu adagbarago du agu aboro rogoho adunga rogo agu apambori nga ga aKristano ya?
3 Biama sanahe gbiati bawe-na-biata sanahe ka ndu kuti bawe-na-saba Sanahe ima rengba kadu ni wenehe tipa mangasunge na ni ho ani atungusapai ni rogo agu adagbarago du agu aboro rogoho adunga rogo agu apambori nga ga aKristano ya. Ni kpiapai, oni rengbe ka mangasunge na gupai du rogo Bawe-na-Saba Sanahe ki ya: “Ani nata areme rogo akporo kaa fura na aboro. Ya mo mo idi kuti gupai nga aborokporo nagbiatiyo areme na dungu kpakaraapai? [Oni mbu ní tipa ní karagapai.] Badungu arogotise ima bi gi afugo tatamana re ni pa undo: ‘Dia boro nigunde agunde ti kumbani.’ [Si aidanga oni gumba gupai nga si rogo AEfeso 5:33 te. Ka si du nga oni nafura fu dee, oni rengbe ka pe agu afugo furi du rogo AEfeso 5:28.] Ya mo mo nabihe nga mangasunge na gu rugute re ima rengba ka undo rogo rogatise?”
4. Ginipai rengbe oni ka mangaha ti digido gaoni fugodagbase na gu boro adunga rogo gu pambori nga ga aKristano ya?
4 Ti digido gaoni fugodagbase, oni mangi mbakadapai tipa ka ndu ku mbatayo na gaoni sakapai ti gu regbo oni nika ye berewe fuoni. Oni rengbe ka manga mbakadapai tipa ka fura tipa veresi sa dagba agu averesi du tii gu sanahe oni nasakihe na ni. Ti gu regbo rẽarẽ, oni sa irakporo ni ini gupai nga agu afugo tatamana oni naasaka ha na ni re, ti rogo Ziazia Kekeapai. Ringbisihe kuti agu apai oni asakihe mbata na ni gbiati gani bipai tipa Ziazia Kekeapai, oni fu gu waraga nga gu oni abihe nga si ima rengba ka ngba tini.—Oni bi gupai du rogo gu Gaani Sunge Nga ga Kindo nga ga Banduru 2013.