Gine Mbori Amangaha?

“Ako Yekova, tipagine mo narunda ti ni tuturũ? Tipagine mo naoka tiro ti ni ti arago fudifudipai?”a​—ATAMBUAHE 10:1.

HO Ani angera kina kungbo ngera ni gbua kuti bangua rii apangbanga, ani nada kuti gupai nga ani naraka nzunzu ti “arago fudifudipai.” Na ho aboro amanga rani ni gbegberẽe, na ho ani amanga béno ni, watadu ho kpii gaani boro ni, ani nisana he ki yaa, Mbori abingo agi apai re te? Ko naberã parani nzunzu? Boro ko ho ti ni?

Ono tie, ya mo oni ini gupai nga, gu berã du ani nani tipa agu apai ani akpinyemu Mbori nimangihe, si rengbe arengba kadu niirairaha? Ani bingo kpiapai: Gude na gberarago mbiko gupai nga bai ndu ku basunge yo. Gu gude re nakpara tipa bai na kini kpinyemu ko yego. Gu gude re nabi gupai nga bai ima mburu. Rogo gu uru re, u nasungo na kina gu sanahe ngbaru nga, “Baba tie wari?”

Ani ima ino gu iraira berã du gu gude re nani. Gupai u ainongo ho ya nga, bai nindu ka mangasunge tipa ka ngera kina fuoru. Ani rengbe kadu na kina gu ngbatunga iraira berã re a ho ani akpara ni kini yaa, “Mbori tie wari?”

Nikpiapai, kura aboro naida gupai nga ka Mbori du nigu boro du gani bambata sunge nga sapangbanga amangi gbegberẽ apai nikina ipo. Agu akurayó nabiko nigu boro du gani sunge gbua nga kaa fuka ahe fu aboro, wa gu nga ka fu sunge-marã, ka fu badiarogatise, watadu ka fu momu fu boro tipa weneapai nimangi funi.

Agu aberãpai du ue re nayugo gupai nga, ka Mbori asaranga ngbanga niipo ya, watadu ka ko afunga guhe furani ani nasanako tipaha ya, gure nga sunge tiko na gaani arungo na azingo te. Ono ka gumba rengo nzunzu, Mbori namangasunge amanga wadu rago re nga gu nika undo aboro dunduko, ono angianga ngba gu gene badungu aboro asanako ko mangihe ngbaha ya.

Ono gine Mbori amangaha nzunzu? Tipa ka gbia karagapai sa gu sanahe re, ani bingo gupai namangi ho ga aboro pagume na Mbori agberẽ ni nikerehe ti kina gu regbo Mbori akusi aboro.

Agu Apai Naye Mbiko Ingapai

Oni berẽnga pa bambu aboro arakanga tiihe ya tipa dungu agarã. Riihe ima kpataka, angbadimoho ima titiwa, atukpuhe ima kukuadi, na angbari ima ri kura abarapaha. Gu bambu re adumbata nikina wene bambu, ono si awere wo te. Wa duhe nga dungu apai si aida i mbakadihe ti gu bambu re, si naida bakere sunge; nga gu sunge nika dia arame adia.

Awere tie, oni berẽnga pa agu apai nagberẽ kubara aboro yo agarã wa 6,000 kusayo ho gu toro nga Satana asa Adamu ni na Eva i samungu kuti Mbori. Mbata fu manga gupai re, Adamu na diako aduna wene kpotoyo na kidu na maabangirise kaa raka araka kindi na atitayo zanga kpiko. (Bambata Pai 1:28) Ono ho i aingipai ni, gure adu wa i gberesipa tiyo gbiati agu aboro naye tifuoho.

Ka oni berẽnga gupai nga wiri taatapai du gbua gayó samungu aye nani ya. Ziazia Kekeapai nayawee: “Gbegberẽpai akuru ku zegino mbiko boro sa [nga Adamu], kpio ki du mbiko gbegberẽpai.” (ARomo 5:12) Ingapai aye na kpio, ki gberesi gaani pagume na Bakusirani, na ki ye na dungu apai kuti kpotorani, ku berãrani yo, na ku ngbaduraniyo. Nisangbana gipai re, apai kini du tipa rani wakina gu du tipa kpata bambu. Gu ruru kumba nangia Eyobo afura afura nzunzu tipa rani ho ko ayani wee agu ‘arame nga ga boro nikina guruhe gbua, ki hi ahi be fudifudipai.’​—Eyobo 14:1.

Ono ya mo Mbori aima mbu aboro fuo manga Adamu na Eva ingapai? Wagusa te! Tona ti kina gu regbo i aingipai re kada ku awere, Mbori namangasunge tipa ka mbakada agu apai nagberẽ re. Tipa ka rugatise wenengai naapa gu sunge ko amangaha tipa rani, ani bingo agu apai biata boro naamangaha tipa ka mbakada kpata bambu kubaha, na ani ki bingo wai agu apai re awiratihe na gupai Mbori namangihe tipa rani.

■1 Gu boro duna kpata bambu beni rengbe ka diaberã tipa ka mbakadaha watadu ka gburuwaha.

Nibasa tingbafuo gu samungu namangi Edene yo, Yekova Mbori ape gupai nga ko nika mbakada agu apai ambakada nagberẽ kubaha. Ko aya fu Satana wee: “Mi amáa sogote dagba roni na de, dagba atitaro na atitari a; ko ki mburu riro, mo ki mburu gidako.”​—Bambata Pai 3:15.

Gipai Yekova agumbaha re ayugu gupai nga, ko nika imo Satana aimo; nga gu boro nasa Adamu na Eva i samungu. (ARomo 16:20; Yugoti 12:9) Kurigure, Yekova ayawee ‘tita dee’ nika tumorii aboro be ingapai.b (1 Yoane 3:8) Agu apai Yekova agumbaha nayugo gupai nga: Ko nika sa aboro asa i duwa gu i adumbata, angianga ka nyasa riipa yó ya. Ono si aidi gbanga regbo tipa ko mangi gipai re.

■2 Boro nagbaka kpia gu bambu re wenengai na ki bi wai sungehe nika ndu.

Yekova Mbori afu andiko fu aYisaraere na ki ringbisipa yekaru fuyó i duaha kaa irisoko tiihe. Ziazia Kekeapai nayaa: ‘Si angia kpia agu ahe nikaye.’ (AKorosaio 2:17) Wakina kpia bambu, si angia kpia bakereapai kumbatayo.

Nikpiapai, aYisaraere anaafu anyaa nimotumo tipa Mbori nimbupai fuyó ti gayó aingapai. (Pa Amotumo 17:11) Gu mangaapai re ayugupa gu bakere motumo boro nika fuhe fuo badungu agarã kumbatayo, nga gu motumo narengbe ka kusa goro aboro be ingaapai nzunzu.c Wai i agbaki kpia banye gbiati yekaru ayugupa agu apai Masiya nika mangaha tona ti kpiko ki dati gate ko ku ngbangbaturũ yo.​—Oni bi kpewaraga 7.

■3 I nasia gu bamebambu nika mbakada gu bambu re ringbisihe kuti gu kpiaha i agbakihe.

Yesu du nangia gu Masiya i agumba paye ko, nafu ungako ka tumorii aboro, a wa aYisaraere anaafu amotumo mbata kusayo. Nirengo, Yoane Bafu Bapatiza aya tipa Yesu wee ko nga “gu Wiri kandoro nga ga Mbori ru, nadia gu ingapai nga ga zegino ku sa yo!” (Yoane 1:29) Yesu aima ida ka fu ungako nimotumo. Ko aya ningbako wee: “Mi aye nga ngbangbaturũ yo ka manga wa mi akpi nyemu he te, ono wa kina gu ko akpi nyemu he nakedi re.”​—Yoane 6:38.

Gupai Mbori aringbisihe tipa Yesu nga ko “tumo dungu [aboro] ni ungako” na ki mangi mozunga na apefuoko tipa Kindo. (Matayo 20:28; Ruka 22:29, 30) Mbori nika mangasunge na gako Kindo tipa ka digiso gako ringbisapai tipa aboro. I nayamba gu pangbanga du tipa gu Kindo re nga “wene pangbanga” bambiko si nagumba gupai nga Mbori ima sigira gako Kindo ngbangbaturũ nga gu nikadu kurii kpotosende dunduko!​—Matayo 24:14; Daniere 2:44.d

Sunge Mbakadaapai Kubaha Nandu Kina Kumbatayo

Mbata fu ga Yesu ku ngbangbaturũ yo, ko aya fu apefuoko wee: “Oni . . . sa arikaaboro dunduko ni abawiriki, ki nibapatizi yo ku rogo rimo Mbori nga Ba na Wiri na Ziazia Toro; . . . Oni ngere, mi na oni ti arago dũ, ki da ti digida zegino.”​—Matayo 28:19, 20.

Sidu, si aadunga nga sunge mbakadaapai kubaha nika digo na kpio Yesu te. Ono si adu nga si nikaa ndu kumbatayo kindi “ki da ti digida zegino,” nga gu regbo ga Mbori Kindo nika tona ka zogarago ku auru kpotosende. Gu regbo re ima mbeda gbe. Ani naino gipai re mbiko gupai nga, agu apai i aino apai ti ni Yesu agumbapaha nibipa “digida rago,” si naringbisatihe awere.e​—Matayo 24:3-14; Ruka 21:7-11; 2 Timoteo 3:1-5.

Areme rogo aringara 236, aDezire Yekova nairisa gu sangba Yesu du tipa tungusa gu wene pangbanga nga ga Mbori Kindo. Gi magazini oni agedaha awere re, i kehe tipa si undo roni oni inipai tipa ga Mbori Kindo na tipa agu apai si nika mangaha. Ti kpewaraga 2 nga ga gi magazini nga Ngbaõbambu Sinziri re rogo adiwi dũ, kekepai nidu yo nga: “Gi magazini re . . . nafu wasa fu aboro na gu wene pangbanga nga, ga Mbori Kindo, nga ndikidi zogarago du ngbangbaturũ yo, si nika digiso gbegberẽ apai dunduko na ki sa kpotosende niparadizo. Si nangarasa aboro i duna idapase kuti Yesu Kristo, nga guko nakpi tipa ani rengbe ka gbia nyenye unga. Na Yesu nazogarago awere ni Bakindo rogo ga Mbori Kindo.”

Apai kinaho namanga awere, wagu abamoi amangaha watadu gu gberango naye be gu mangaapai nga ga ome zegino, watadu gu kurapai rengbe ka manga roni. Ono ka oni wisigi Ziazia Kekeapai, oni nika rugatironi na gupai nga, Mbori ambunga aboro te. “Ko aturã nga na ani wa sa te.” (Amokedi 17:27) Na ko nika mbakada agu apai ambakada bambata avungurani agberesihe.​—Yesaya 55:11.

[Gu rukutu kekeapai du bandu kpewaraga yo]

[Gu kpiahe du ti kpewaraga 7]

KPIA “NDIKIDI HE”

Guhe Banye Arukubaha

ZIAZIA BA KISUSI

Ngbangbaturũ. ​AEBERE 9:24.

REMU DADA RAGO

Kpoto Yesu, nga guhe nakpara gu raka nga ga kpotosende ti gu nga ga ngbangbaturũ.​—1 AKORINDO 15:44, 50; AEBERE 6:​19, 20; 10:19, 20.

ZIAZIA BA

Yesu, fuo mbeda yó ko niziazia toro.​—MATAYO 3:​16, 17; AROMO 8:​14-​17; AEBERE 5:​4-6.

BAMOTUMO

Pa kpinyemu Mbori ka ida na gu motumo Yesu afuhe. ​—AEBERE 13:10-​12.

GBIAMOTUMO

Yesu.​—AEBERE 9:​11.

1

Rogo Uru Dada Ingapai, gbiamotumo anaafu motumo tipa agu aingapai nga ga aboro.​—PA AMOTUMO 16:15, 29-31.

2

Gbiamotumo anikuru kugii gu remu yo nanaakpara Ziazia Ba ti Ziazia Ba Kisusi.

3

Ho gbiamotumo anidu ni rogo Ziazia Ba Kisusi, ko anidi bete kure gu nyaa i afuru nimotumo ki migidihe barabangiri sanduki mokido.​—PA AMOTUMO 16:12-14.

1

Rogo Nisana 14, 33 F.B.K., Yesu afu ungako nimotumo tipa rani. ​—AEBERE 10:5-10; 1 YOANE 2:1, 2.

2

Fuo zinga Yesu bekpio, ko ‘akuru kugii remu dada rago yo’ nigako ku ngbangbaturũ yo ‘ka du ku bangiri Mbori tipa rani.’​—AEBERE 9:24-28.

3

Yesu afu gu undo nadu ti kureko fu Mbori, na si angia ndikidi tumorii tipa gaani aingapai.​—AEBERE 9:12, 24; 1 PETERO 3:21, 22.