Gu Waraga Naye be Riigbu Bipasunge

Fu Wene Awirinarani:

Rogo dungu afugo na rogo dungu aringara rogo zegino, i akusi kekeapai rogo aNgbaõbambu Sinziri tipa dungu agarã nga gu riihe adu nga “Oni Wiriki Gayo Idapase.” Gu kekeapai re afura tipa agu aboro du payo rogo Ziazia Kekeapai nga aguyo naadu na bakere idapase. I akehe tipa si undo rani ani berẽkuriipa wai agu akumba na adee re ayugu gu ngbatunga idapase i ayuguhe rogo gu kpakaraapai i adu rogoho.

Ginipai aboro agumbaha tipa gu kekeapai re? Kura boro sa nagedi gupai i akehe tipa Marata aya: “Mi amamu ni kerehe ho mi agedihe ni bambiko mi wakina ri. Mi naaida kadu ti aregbo dũ ni gu boro nadia agino kugume gbe na ki fu tire sa kina manga riahe, na ti kura aregbo, bangire ki go ago ka ye ka sungo na agino tooni.” Kura degude sa agedipai tipa Esetere ki pe sangbari ki ya: “Mi abihe nga kina rengo du nga boro rengbe arengba kaa berãpa aroko na vovo ahe susi ome. Si naida aida ani mbakadi kpotorani wenengai; ono si aidanga ani fu tirani sa mbakadatise susi ome te.” Ri agbia gupai kuti fugori nga: “Gupai Yekova aberãpaha gbe nga gu boro nga ani kpotoraniyo.” Kura wirina sa nagedipai tipa Petero ape sangbari ki ya: “Mi arimisi tire naabare ku rogo gu pangbanga re. Si aduwa mi adu kina yo!”

Agi aboro nake sangbayo ka yugo gayo tambuahe re, na gu dunguyo ani agumbanga payo ya, i nayugo gupai nga rengo du gu mokedi nangia Pauro apehe bakuru kusayo ki ya: “Agu apai i ake mbata rogo Ziazia Kekeapai i ake he tipa gaani wirikapai.” (Rom. 15:4) Nirengo, Yekova aidi i ke agi apangbanga re rogo Ziazia Kekeapai tipa si yugu nyanyakipa apai furani. Ani dunduko rengbe ka wirikapai be agi apangbanga re, ka ani vura dia agarã ku rogo rengo yo kina wai vurũ.

Agu apai i akehe rogo aNgbaõbambu Sinziri re, i aakusanga ha rogo agu nga ga pa-Zande te. Ani na ngbarago ka kusaha awere ni buku. Dungu apai i nakehe rogo gi buku re nga gu i aakenga ha rogo agu aNgbaõbambu Sinziri re ya. Ani nangarasa roni oni gedi gi buku re nibasa fuo gbia oni he. Oni wirikihe ti regbo gaoni Irisombori Nga ga Aborokporo. Si nika ngba angba ti agude gbe! Ho dungurati nika wisigoho ni ti regbo Gu Wisigo Ziazia Kekeapai Nga ga Dungurati, ka oni kpanga rogo poso kandara sa ya! Oni di regbo tipaha; oni gedihe zezeredi na kini berẽkuriihe. Oni berẽkurii agu apai naamanga; kini bihe wa oni adu kina yo. Oni asadi ka maa tironi ku rogo agu apai agu aboro du payo rogo Ziazia Kekeapai adu rogoho, na ki bi agu apai i abihe. Oni berẽkuriipa wai i amangipai sa agu apai i adu rogoho na wai oni abihe nga ka oni amangipai wa ka si adu nga oni du.

Ani na bakere ngbarago ka kusa gi buku re furoni rogo gaoni fugo. Si undongo roni aundo wenengai na gaoni aborokporo! Ani kedi bakere sene furoni nga ga nyemuse. Oni du zezeredi.

Riigbu Bipasunge Nga ga ADezire Yekova