Oni Yugu Rengo

Tona rogo Mbirinvuo, Waraga Dunguratise Nga ga Gaani Raka na Sunge nika du na vovo gene kpia kparaka awaraga rogoho nga “Oni Yugu Rengo.” Gaani sásá nika ngia ka pe gu rengo fu aboro du rogo Ziazia Kekeapai ka ani avura funga waraga fu ni ya.

Gi ngbatunga gene fugo re nikaa fura tipa gu tonatona mburu inohe nga ga rengo, si nika du na sanahe gbiati gu veresi na songodaha. Ka gu boro re du na nyemupai, ani rengbe ka pe gupai ani ka ye berewe tipa ka fura na ni riihe ni mbu ani trakte, waraga watadu yugo ani vidio rogo jw.org fu ni. I nikaa rogoda apai rogo gu gurusigurusi akapita nga ga gu buku nga What Can the Bible Teach Us? Rogo gi buku re, ani nikaa gbia kura asanahe na averesi nga gu nikaa undo rani tipa ani rengbe ka manga karagatise fuo boro watadu ka wisigo Ziazia Kekeapai na boro ni manga ani sunge na kina Ziazia Kekeapai. Si naida ani mangi ome tipa ka karagatirani fuo bete aˈuru tipa ka sonosa gu nyemupai ani afura rii he.

Gene ho sa gbua nandu koyo du unga ni. (Mt 7:13, 14) Wa duhe nga ani nafura fu aboro rogo dungu apambori na gayo gene raka ki du ni bakiakia, si naida ani mangisunge na agu arengo nga ga Ziazia Kekeapai nika rẽ na yo ni basasa. (1Tim 2:4) Wa ani nikaa inido tirani na agu apai du rogo Ziazia Kekeapai na kini mbakadi gaani gene tungusapai ‘niyugo ga rengo pai nzunzu,’ gaani ngbarago nikaa kio kina kumbatayo, na ani nika du na diabese rogo yugo rengo fu kura aboro.​—2Tim 2:15.