GU BA AWARAGA DU ROGO INTERNET nga ga Ngbaõbambu Sinziri
Ngbaõbambu Sinziri
GU BA AWARAGA DU ROGO INTERNET
Zande
ã
  • ã
  • ẽ
  • ũ
  • á
  • ö
  • ò
  • ĩ
  • ä
  • BAIBIRI
  • AWARAGA
  • ADUNGURATISE
  • mwbr19 Marungu kpe. 1-8
  • Awetekapai Tipa Waraga Dunguratise Nga ga Gaani Raka na Sunge

Vidio ho tipa gipai mo nasiaha re te.

Akoo, wiri ingahe ima manga ho gu vidio re naambakada tihe ka tona ni.

  • Awetekapai Tipa Waraga Dunguratise Nga ga Gaani Raka na Sunge
  • Awetekapai Tipa Waraga Dunguratise Nga ga Gaani Raka na Sunge—2019
  • Umbariiapai
  • MARUNGU 4-​10
  • MARUNGU 11-​17
  • MARUNGU 18-​24
  • MARUNGU 25-​31
Awetekapai Tipa Waraga Dunguratise Nga ga Gaani Raka na Sunge—2019
mwbr19 Marungu kpe. 1-8

Awetekapai Tipa Waraga Dunguratise Nga ga Gaani Raka na Sunge

MARUNGU 4-​10

AŨKUMUKO ROGO FUGO MBORI YO | AROMO 12-​14

“Gupai Yugo gu Nyemuse Nga ga AKristano Ayugoho”

(ARomo 12:10)

it-1-E kpe. 55

Nyemuse

Si naida gu nyemuse nga ga awirina (Pa-Giriki, phi·la·del·phiʹa, du rogoyo nga, “nyemuse tipa wirina”) du dagba agu aboro dunduko du rogo gu dungurati nga ga aKristano. (Rom 12:10; Eb 13:1; oni bi 1Pet 3:⁠8.) Sidu, si naida gu pagume du rogo dungurati du ni mbembedi he, ni nyanyakihe, na si naida si du wa gu nyemuse nga ga ndikidi aborokporo. Wa vura duhe nga agu aboro du rogo dungurati nayugo gu nyemuse ayugo nga ga awirina, si naida i yuguhe susi gure.​—⁠1Tesa 4:​9, 10.

Gu pa-Giriki nga phi·loʹstor·gos, du rogoyo nga “ka du na nyemuse,” i mangisunge na ni tipa gu boro du mbedimbedi na kurani gayó pagume ki du dawedawe. Gu fugo nga sterʹgo gi fugo re aenge ti ni, i naamangasunge na ni dedede tipa ka yugo ndikidi nyemuse, wa ngbatunga gu du dagba aborokporo. Gu mokedi nangia Pauro angarasi aKristano i sonosi gi sino re. (Rom 12:10) Pauro agumba gupai a nga rogo yangara arame aboro adu ni “airasakparakpa [watadu aboro adunga na nyemuse te]” (Pa-Giriki, aʹstor·goi) na ngbatunga agu aboro re rẽ na kina kpio.​—⁠2Tim 3:3; Rom 1:​31, 32.

(ARomo 12:​17-​19)

w09 10/1 kpe. 16 genewa. 3

“Oni Du Zezeredi Na Aboro Dũ”

3 Oni gedi ARomo 12:17. Pauro aya wẽ ho aboro arungosi rani ni, ka ani iringo bapehe ya. Degatue kuti gako arugute rengbe arengba ka undo agu aborokporo adunga rogo bangisa pambori ya. Si naundo badiarogatise tipa ka ní karaganga gbegberẽpai kuba gu gbegberẽpai kurani namangi ní nani ya. Anga wenepai ho du ti ‘karaga gbegberẽpai kuba gbegberẽpai te.’ Ono kuba gure, ngbatunga gu sino mangapai re nazingisa zinga kina kumbatayo.

w07 7/1 kpe. 26-​27 genewa. 12-​13

“Ka Oni Karaga Nga Gbegberẽpai Fu Boro Ku Ba Gbegberẽpai Wa Sa Ya”

12 Pauro afu rugute tipa wai si aida ani naamanga akuarani aidipase na agu aboro adunga na ani ti idapase ya. Ko aya: “Ka oni karaga nga gbegberẽpai fu boro ku ba gbegberẽpai wa sa ya.” Gu fugo re nga ruru digisidigisi gu fugo ko agumbaha mbata fu gure nga: “Oni né gu pai ane nga gbegberẽpai.” Nirengo, wai ka boro ya wẽ ni nasoga gbegberẽpai asoga ka singia ní nika karaga gbegberẽpai kuba gbegberẽpai? Pa manga ní he wo rengbe kadu nga gu nyemuse ‘duna biriki.’ Fuo gure, Pauro aya: “Oni niberẽ kina agu apai iri aira bangiri aboro dunduko.” (ARomo 12:​9, 17) Wai ani amangapai kuti agu afugo re?

13 Mbata kusayo, rogo gu ga Pauro waraga ko akehe fu aKorindo, ko afura tipa gu rungosi nagbia amokedi. Ko aya: “I sa rani ni aũ ngana he fu zegino, fu amaraika na fu aboro. . . . I nasenga rani, ani ki fu maku; i narungosi rani, ani ki hi he. I nagberẽsa rimorani, ani ki zungadi yo.” (1 AKorindo 4:​9-13) Teketeke a, aboro zegino nabi ndikidi aKristano abi. Ho agu aboro du pati rani abi gu weneapai ni ani amangaha zavura ho aboro amanga rani ni gbegberẽ, si rengbe ka sa yó i tona kaa bi gaani pangbanga na irisa.​—⁠1 Petero 2:⁠12.

(ARomo 12:​20, 21)

w12 11/1 kpe. 31 genewa. 13

Oni Mbupai fu Akuaroni na Ngbaduroniyo Dunduko

13 Aregbo kinaho rengbe oni ka bihe nga si naida oni undo gu boro ingipai kuti roni ní rugu tiní na pa nyaka sino aKristano. Pauro aya: “Ka vuraro du na gomoro, mo ki rigi ni ariga, ka ni du na gomoro ime, mo ki fu he afu fu ni ni mbiri he, bambiko manga mo wo, mo ka ba guta mbusa ti ni ku ri ni. Ka gbegberẽpai di nga be roni ya, oni di adia be gbegberẽpai ni wenepai.” (Rom. 12:​20, 21) Ka oni karagapai ni wenehe zavura ho boro naimisi ngbaduroni ni, si rengbe ka aria ngbaduniyo ní da ni wenesino boro. Ka oni du na rugatinapai gbiati nunga gu boro ingipai kuti roni, si rengbe ka sa roni oni undo ní ní wiriki gu rengo du rogo Ziazia Kekeapai. Ka si vura du nga kina ginipai du, zezeredi karagapai nafu momu fu gu boro re ní asadi ka berãkurii gaoni wene mangapai.​—⁠1 Pet. 2:12; 3:⁠16.

Gbata gu Nyanyakipa Ahe Nga ga Toro

(ARomo 12:⁠1)

lvs kapi. 6 genewa. 5-6

Wai Ka Sia Gaani Aũngbarago

5 Agu apai dunduko ani amangaha du ni kodikodihe kuti gaani irisombori. Pauro asakipai tipaha ho ko aya ni: “Oni fú tironi ni unga ũmotumo, ni ziazia ha, si ngba fu Mbori.” (ARomo 12:⁠1) Yesu aya: “Mo kpi nyemu Gbia nga ga Mbori kpotoro yo dunduko, na mbisimoro dũ, na ga berã dũ, na omero dũ.” (Marako 12:30) Ti aregbo dunduko ani aida ka fu guhe fu Yekova du ni bawenehe kisusi. Rogo gu ringara aYisaraere naadu mbata, ho aboro anaafu motumo ni nga anya fu Yekova, si anaaida i fu gu nya naanidu zanga serõ. Ka si du nga gu motumo re aniidu ni gbegberẽhe, Mbori anaaidanga ha te. (Pa Amotumo 22:​18-20) Wakina gure, gaani Mbori ima rengba ka ká gaani iriso. Ngba gini gene?

6 Yekova nagumba gupai furani nga: “Oni dú ziazia bambiko mi du ziazia.” (1 Petero 1:​14-16; 2 Petero 3:11) Yekova rengbe ka ida na gaani irisombori kina gu ka si du ziazia, watadu ni gigirihe. (Pa Fu Rugute ni Ue he 15:21) Gaani irisombori arengbanga ka du ni gigirihe te ka si du nga ani namanga agu apai Yekova asogaha, wa agu apai nga wasiwasi mangaapai, zuu, watadu agu apai nakodapa sino adaimona. (ARomo 6:​12-14; 8:13) Ono si ima rengba a ka fu gberãrago fu Yekova ka si du nga ani nagbia ngbarago ti agi apai re. Si ima rengba ka sa gaani irisombori si du ni bibirikoho na ki sa Yekova ka ko idinga na ani ya, na si ima rengba ka gbarasa gaani pagume na ko.

(ARomo 13:⁠1)

w08 6/1 kpe. 31 genewa. 4

Memeapai Rogo gu Waraga Pauro Akehe fu ARomo

13:1​—⁠Rogo gini gene “Mbori namoi” abaira tandu rogo gayó aba? Agu baira tandu duho “kina Mbori namoi yo” rogo gu gene nga kina Mbori nambugene fuyó i nizogorago, na Mbori aima inopai tipaha mbu regbo kindi kumbatayo. Gipai re gbaiga nibipa bange agu abazogo Ziazia Kekeapai aima fura tipa yó kumbatayo.

Geda Ziazia Kekeapai

(ARomo 13:​1-​14)

MARUNGU 11-​17

AŨKUMUKO ROGO FUGO MBORI YO | AROMO 15-​16

“Oni Ngere Koyo du Yekova ni Tipa Zera Gbiati Wasa”

(ARomo 15:⁠4)

w17.07 kpe. 14 genewa. 11

“Oni Kpari na Agu Yo Nakpara”

11 Gu pangbanga du tipa ga Yesu bakere imisiri ti gu regbo Razaro akpi nga veresi sa dagba agu averesi yo nga ga wasa du rogo Fugo Mbori yo. Na gipai re airiwongo te, “bambiko agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.” (Rom. 15:⁠4) Ka si du nga mo rogo imisiri, mo ima rengba ka gbia wasa be averesi wa agu nga:

▪ “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.”​—⁠Tam. 34:​18, 19.

▪ “Wa du sakapai ku kpotore yo ni badungu he, gamo [ga Yekova] wasawasa apai nangarãsa mbisimore.”​—⁠Tam. 94:⁠19.

▪ “Gaani Gbia Yesu Kristo tigako, na Mbori nga Barani nakpi nyemu rani ki fu nyenye wasa fu rani na wene maabangirise mbiko undahe, ko ngárasi kpotoroni yo ki ninyakasi he rogo wene mangaapai na wene apai dunduko.”​—⁠2 Tesa. 2:​16, 17.

(ARomo 15:​5)

w16.04 kpe. 14 genewa. 5

“Oni Ídi fu Zadapase si Mangi Gaha Ziazia Sunge”

5 Mo ngere ku be Yekova ko fu ome foro. Yekova nga “gu Mbori nga ga [hipai] ko na wasa.” (Rom. 15:⁠5) Anga ko rugu tiko sa na kina agu akpakarapai ani agbiatirani na ni te ono gu gene du apai rogoho rogo gaani dagbarago, gaani abipai, zavura wai ani aasona a. Ko nga gu boro rẽ tipa ka undo rani ani hipai. Ziazia Kekeapai naya: “Ko nadigisa gu nyemuahe nga ga agu yo nagunde ti ko; ko nagia gayo kpe ku ari a, ki nibatasi yo.” (Tam. 145:19) Ono wai tie, Mbori nika karaga gaani kparakpee tipa ome ka hipai?

(ARomo 15:13)

w14 6/1 kpe. 9 genewa. 11

“Mo Kpí Nyemu Gbia Nga ga Mbori”

11 Yekova nafu ‘maabangirise si hiisi rani na ngbarago na zereda.’ (Rom. 15:13) Gu maabangirise Mbori afuhe furani naundo rani ahi agu apai naˈasada gaani idapase. Gu mbedimbedi aKristano nika ‘ngarã angarã da ti kpio, i nika fu kpakpari unga fuyo ngbangbaturũ yo.’ (Yugo. 2:10) Agu aboro du na maabangirise ka raka auru kpotosende, ka i kakuti ruru mangapai, i nika raka rogo Paradizo. (Rk. 23:43) Gaani karagapai nga gine kuti agi amaabangirise re? Ya mo ani na ngbarago, na zereda kodihe na nyemuse fu gu Boro ‘nagamahe dunduko, na ziazia ũgamahe dunduko’?​​—⁠Yak. 1:⁠17.

Gbata gu Nyanyakipa Ahe Nga ga Toro

(ARomo 15:27)

w89-E 12/1 kpe. 24 genewa. 3

‘Si Yugu gu Rengo du ti Gaoni Nyemuse’

Nirengo, si aima ida si fõngbadu agu awirinayo nangia aGendiria i mangipai kuti gu kpakarapai i adu rogoho. Gu kurapai berewe nga, i adu nga aboro “bape” fu agu aKristano naadu Yerusarema yo. Anga Yerusarema yo du wene pangbanga aru ni ka gbandaka fu aGendiria te? Pauro aya: “Ka si du nga agu aYudo nangia aKristano agamu gu gayo aũkumuko nga ga toro fu aGendiria, tindiro du nangia ha fu aGendiria i mangipai kuti gu gayó azingo nga ga borose.”​—⁠ARomo 15:​27, The New English Bible.

(ARomo 16:25)

it-1-E kpe. 858 genewa. 5

Ka du na Inohe Tipa Pai Mbata fu si Mangi, Ka Ringbisapai Mbata fu si Mangi

Si adu nga Masiya, watadu Kristo, nika ngia gu Tita Dee i akido pako ni gu boro ruru aboro dunduko auru kpotosende nika gbia maku vuru beko. (Gara 3:​8, 14) Gu bambata regbo i apepa ‘tita dee’ ti ni adu tifuo gu samungu naadu ati Edene yo mangi, ono mbata fu i batika Ebere. (Bam. P. 3:15) Gipai re adu agarã 4,000 mbata fu i yugu “gu gbugbu pai” naadu tipa ino gu “tita dee” nga Masiya. Sidu, si nirengo nga, “i aoko ho tipa gbanga rago.”​—⁠Rom 16:​25-​27; Ef 1:​8-​10; 3:​4-​11.

Geda Ziazia Kekeapai

(ARomo 15:​1-​16)

MARUNGU 18-​24

AŨKUMUKO ROGO FUGO MBORI YO | 1 AKORINDO 1-3

“Ya mo Mo Nga gu Boro Naberã Kina Agu Apai Nga ga Borose Watadu ga Toro?”

(1 AKorindo 2:​14)

w18.02 kpe. 19 genewa. 4-5

Rogo Gupai yo Nga Kadu Wenengai Rogo Toro yo Nga Gine?

4 Bambatapai nga oni bingo agu asino du ti boro borose. Ni namerafuo agu asino du ti aboro zegino, nga agu aboro du yangara nyanyakipa pai rogo gayo raka yo nga kina gayo nyemuapai. Pauro afura tipa gu sino re ya si nga “gu toro namanga pai awere rogo agu awiriyo nakeretu.”(Ef. 2:⁠2) Gu toro re nagbarasa rii badungu aboro yo i naapeka kina fuo agu aboro du yo dagbayo. Gu yangarapai nyakipaha bangiriyo nga kina agu apai nga ga borose. Ni sangbana gupai re, badunguyo namanga kina gupai ngba bangiriyo zanga manga ome ka raka ringbisihe kuti ga Mbori arugute. Gu boro naberã kina pa agu apai nga ga borose, ni nabaka bangirini gbe kina tipa worimo ni gbiati du na aũkumuko beni watadu tipa ka sovura tipa gupai ni abihe nga si nga gani rengo.

5 Gini kura apai berewe nayugo gu boro nga boro borose? Boro borose namanga “agu apai borose amanga” ha. (Gara. 5:​19-21) Ga Pauro bambata waraga fu gu dungurati nangia ga aKorindo nayugo badungu asino nga gu duti agu aboro du na gu berã nga ga borose. Agu asino re nakoda: kparakaro, ngbe na kina kura aboro rogo tagbagapai yo, ngarasa kura aboro i samungu, yamba awirina ku ngbangayo, zanga du na irisa koyo du agu aboro ni nangera kurii apai, na bi riahe gbiati mbirahe na nyanyakipaha kisusi rogo raka yo. Gu boro du na gu berã nga ga borose, ho ni agbia tiní ni na asada, ni narungbura na ni ki ti ku rogoho. (Snz. 7:​21,22) Yuda afura tipa agu akurayo si adu nga i nika gberã ki da ti gu bangiriba nga ka i “adu nga na Toro ya.”​—⁠Yuda 18,19.

(1 AKorindo 2:​15, 16)

w18.02 kpe. 19 genewa. 6

Rogo Gupai yo Nga Kadu Wenengai Rogo Toro yo Nga Gine?

6 Ginipai tie si ayugoho kadu “na toro”? Gu boro du na toro naberãpa agu apai nga ga Mbori, ni wa boro borose te. Agu aboro naberãpa agu apai nga ga toro, i namanga nyanyaki asadatise ka ‘wirika Mbori.’ (Ef. 5:⁠1) Gure nayugo gupai nga i namanga ome kaa berã kina wai Yekova aberã na kini bi apai kina wai ko abihe. I nabi Mbori ni ndikidi boro. I kia ti agu aboro du na gu berã nga ga borose mbiko i naasada ka manga apai dunduko ringbisihe kina kuti ga Yekova arugute. (Tam. 119:33; 143:10) Kuba gupai nga ka maa berãni fuo gu mangaapai nga ga borose, gu boro du na gu berã nga ga toro namanga nyanyaki asadatise ka sonosa “zuzu Toro.” (Gara. 5:​22, 23) Sidu, gu boro nabi agu apai nga ga toro na nyanyakipaha, ni du nga gu boro du na toro.

w18.02 kpe. 22 genewa. 15

Rogo Gupai yo Nga Kadu Wenengai Rogo Toro yo Nga Gine?

15 Wadu ani ni basasa dũ, wai du rengbe ani ka wirika Kristo? Rogo1 Akorindo 2:​16, Ziazia Kekeapai nagumba gupai nga si naida ani du na “ga Kristo berã.” Na ARomo 15:5 nagumba gupai furani nga si naida ani du na “berã sa ku sangba Kristo Yesu yo.” Sidu tie, tipa kadu wa Kristo, si naida ani ini gako gene berãpai gbiati asinoko wenengai. Fuani, si naida ani pekefuoko. Gupai nyakipaha bangiri Yesu kisusi nga pa gako pagume na Mbori. Sidu, padu ani wa Yesu nasarani ani du wa Yekova. Gure nga gu nduapai duhe ti ni ni nyanyakipa pai furani ani wiriki kaa berã kina wai Yesu anaaberã.

Gbata gu Nyanyakipa Ahe Nga ga Toro

(1 AKorindo 1:​20)

it-2-E kpe. 1193 genewa. 1

Tatamana

Sidu, zegino na gaha tatamana akà gu gamunihe Mbori afuhe vurube Yesu, kini bihe nga sunge ti ni te; wa gaha abazogo avura du na rengba na ki du ni agu aboro nasarangbanga ni ruruhe, “i awagi Gbia taarimo.” (1Kor 1:18; 2:​7, 8) Ono Mbori ayugu gupai nga gu tatamana nga ga zegino na sunge ti ni te, ko aba zee ti gaha airatatamana ni mangako sunge na guhe i aabihe ni “ga Mbori mungo,” kodihe na agu aboro i aabi yó ni ‘mumungo aboro, rurungbura aboro, na agu aboro adunga ni pai ya,’ tipa ka manga gu Gako ringbisapai i abingo ho ya. (1Kor 1:​19-28) Pauro agumba gupai fu agu aKristano naadu Korinda yo nga “gu tatamana nga ga gi zegino re, na ga abazogo gi zegino re” adu nga na sunge ti ni te; sidu, gu tatamana re aadunga ni papara ga gu mokedi re pangbanga nga ga toro te. (1Kor 2:​6, 13) Ko afu zahe fu agu aKristano naadu Korosai yo nga ka i nanginga yo na gu “nyemu tatamana na kungba nangahe, wa du pa aboro” ya.​—⁠Koro 2:8; oni ringbisihe na vss 20-​23.

(1 AKorindo 2:​3-5)

w08 7/1 kpe. 31 genewa. 6

Memeapai Rogo ga Pauro Awaraga fu AKorindo

2:​3-5. Wa Pauro aatungusapai Korinda yo, nangia ga aGiriki gbata nga ga wirikapai, ko avura kaa bakabangiriko singia ko arengba ka zomia bete aboro i ye ku rogo rengo ke. Ono tie, ko ambunga rungbura watadu gunde si gbarasipa gu sunge Mbori afuhe fuko te. Wakina gure a, si aidanga ani mbu agu apai nika kura sa rani si ká na ani ti tungusa gu wene pangbanga du tipa ga Mbori Kindo te. Si naida ani ngere kube Yekova tipa undo.

Geda Ziazia Kekeapai

(1 AKorindo 1:​1-​17)

MARUNGU 25-​31

AŨKUMUKO ROGO FUGO MBORI YO | 1 AKORINDO 4-6

“Toni Agbooro Nandu Rogo Boro Kakputu he Dunduko”

(1 AKorindo 5:​1, 2)

(1 AKorindo 5:​5-8)

(1 AKorindo 5:​13)

it-2-E kpe. 230

Agbooro

Gu mokedi nangia Pauro amangisunge na kina gu bangisa fugo sanza re ho ko afu zinahe ni fu gu dungurati nga ga aKristano naadu Korinda yo tipa i kusi gu kumba kusayo rogo dungurati naamanga wasiwasi kodaba, nipe ko gupai nga: “Oni aina nga ya toni agbooro nandu rogo boro kakputu he dunduko te? Oni kusi kuru agbooro ku sa yo, oni ki du ni vovo kakputu he, a wa du nga oni na agbooro ya. Bambiko i atumo ni gaani kandoro susiri a, nga Kristo.” Ko agumba gupai ko aaida ka pehe nga si nga “agbooro”: “Were ani mangi pumbo tie; ni kuru agbooro te, ni agu agbooro nga sogote na gbegberẽpai a te. Ono ni kina gu kpokuta du nga na agbooro ti ni ya, nga rurupai na rengo.” (1Kor 5:​6-8) Herẽ, Pauro adi gi kpiapai re ti gu ga aYudo Pumbo nga ga gu Kpakuto Naadunga na Agbooro Ya, nga gu naanidu nibasa tingbafuo Pumbo susiri. Kina wai wiri agbooro naasa putaputa ngungo si fukö, kinawo a dungurati arengbe ka da ni bibirikoho bangiri Yekova ka i aakusanga gu kumba namangi wasiwasi kodaba kusayo na gako gbegberẽ maapai kurii ya. Si aaida i mangipai tipa ka kusa gu “agbooro” re dagbayo kusayo, kina wai aYisaraere anaambunga agbooro rogo akpuyo ti regbo pumbo susiri ya.

it-2-E kpe. 869-​870

Satana

Rogo gupai yo nga ‘ka fu boro fu Satana tipa gbarasa borose’ nga gine?

Ho gu mokedi nangia Pauro afu rugapai ni fu gu dungurati naadu Korinda yo tipa wai ka mangapai na gu kumba naamanga kodaba na dia bako, ko akepai ki ya: ‘oni fu gi ni re fu Satana tipa gbarasa borose.’ (1Kor 5:⁠5) Gipai re angia zinahe tipa i kusi gu kumba re kusayo rogo dungurati, ka mbu kodatise na ko. (1Kor 5:13) Ka fu ni fu Satana nika sa gupai nga ni kuru kusayo rogo dungurati ku rogo gu zegino du Satana ni gaha Mbori na ni gaha bazogo. Wakina “toni agbooro” rogo “boro kakputu he dunduko, gi kumba re nga “borose,” watadu gu boro naberã kina agu apai nga ga borose rogo dungurati; ni kusayó gu kumba kusayo nakodiba na diabako re, agu aboro naberãpa agu apai nga ga toro rogo dungurati arengbe ka gbarasa gu “borose” re dagbayo kusayo. (1Kor 5:​6, 7) Wakina gure a, Pauro afu Umenaio na Aresanduro fu Satana, mbiko i ambupa gayó idapase na wene sangbakpotoseyo na pa gayo idapase aima gberã.​​—⁠1Tim 1:​20.

(1 AKorindo 5:​9-​11)

lvs kpe. 241, rukutu kekeapai

Kusa boro kusayo rogo dungurati

Ho gu boro mangi kere ingapai aká ni ka saberã ni na ki ká ka pekafuo ga Yekova arugute, ni arengbanga kadu berewe rogo dungurati te. Si naida i kusi ni kusayo. Ho i akusa boro ni kusayo rogo dungurati, pai ho berewe si aida si du dagbarani na ni te, na ani afuranga berewe na ni a te. (1 AKorindo 5:11; 2 Yoane 9-11) Gu mbakadapai nga ga kusa boro kusayo rogo dungurati nabanda rimo Yekova gbiati dungurati. (1 AKorindo 5:⁠6) Rugute du a nga ka kusa boro kusayo rogo dungurati, mbiko si rengbe ka undo gu boro re ni saberã ni tipa ka karaga tiní fuo Yekova.​—⁠Ruka 15:⁠17.

▸ Kapita 3, genewaraga 19

Gbata gu Nyanyakipa Ahe Nga ga Toro

(1 AKorindo 4:⁠9)

w09 5/1 kpe. 26 genewa. 16

Mbori Nakeda Amaraika I Undo Agu Aboro Nika Gbia Bata

16 Agu aKristano du rogo asada, i nga ‘aũ ngana he fu amaraika.’ (1 Kor. 4:⁠9) Amaraika nangiangi na ngbarago ho i abi rani ni ani nakakuti ruru mangapai na ho boro asaberã ní ni ti gani ingapai. (Ruka 15:10) Amaraika nabi agu awene sino mangaapai abi nga ga agu adee nga aKristano. Ziazia Kekeapai nayugoho nga si naida dee “du na ũyugo pa zoga ri ti riri, bambiko amaraika.” (1 Kor. 11:​3, 10) Ii, amaraika na bakere ngbarago ka bi agu adee nga aKristano na gu ga Mbori amoyambu dunduko du auru kpotosende i nindu kuti gu ringbisapai nga ga siokrasia na kini ra fu agu aboro du kuriyó. Ngbatunga gu giasangba re amaraika atingidapaha dedede.

(1 AKorindo 6:⁠3)

it-2-E kpe. 211

Ndiko

Ndiko fu Amaraika. Amaraika, du payo kuari ti aboro, i tiibe agu andiko gbiati arugute nga ga Mbori. (Eb 1:​7, 14; Tam 104:⁠4) Yekova afu arugute fu vurako nga Satana na ki kà na ko ti manga kura apai. (Eyobo 1:​12; 2:⁠6) Mikaere nga bakumba maraika aima idapa ga Yekova bangiriba nga ga du ni Bakere Basapungbanga ho ko ayani ti gu regbo ko aatikango ni na Bakitingbanga: “Gbia [Yekova] za ro.” (Yuda 9; oni ringbisihe na Zek 3:⁠2.) Yekova Mbori ima maa amaraika tiibe ga Yesu pagbia. (Eb 1:6; 1Pet 3:22; Mt 13:41; 25:31; Frp 2:​9-11) Rogo gi gene re, Yesu afu rugapai tipa Maraika ndu fuo Yoane. (Yugo 1:⁠1) Ono tie, rogo 1 AKorindo 6:3 gu mokedi nangia Pauro fura tipa awirina Yesu nga ga toro yo i nasia yó i sapungbanga amaraika, si nirengo mbiko i nika mangapai sa tipa ka sapangbanga gbegberẽ atoro.

Geda Ziazia Kekeapai

(1 AKorindo 6:​1-​14)

    Agu Awaraga Nga ga Zande (2000-2025)
    Mo Kuru
    Mo Rimi
    • Zande
    • Mokedihe
    • Wai mo aida apai du
    • Copyright © 2025 Watch Tower Bible and Tract Society of Pennsylvania
    • Agu Andiko du Tipa Mangasunge na Ni
    • Pa Banda Agu Apai du Tipa Boro
    • Privacy Settings
    • JW.ORG
    • Mo Rimi
    Mokedihe