Fugo Yekova Niungaha Memeapai
Rogo agu Awaraga aYoane na Yuda Akekehe
SI NAWIRA gupai nga Yoane akeke gako awaraga Efesa yo rogo gu garã nangia 98 F.B.K. Agu awaraga du biata Yoane akehe re, si du dagba gu yangara akitabu nga ga Ziazia Kekeapai. Gako bambata waraga na gu uehe nangarasa aKristano i naata kindi rogo imarago na kini sovura kuti gu mangaapai nga ga abasamungu kuti ndikidi pambori. Rogo ga Yoane biata waraga, ko afura tipa pa ta rogo rengo yo na ki ngarasi aKristano a i du nikodikodiyo.
Gu wirina Yesu nangia Yuda, ko ake gako waraga Paresitina yo bara rogo gu garã nangia 65 F.B.K. Ko arugu aKristano i bandatiyó be gu gbegberẽ aboro naye kurogo dungurati, na ki fu arugute tipa wai rengbe aKristano ka sovura kuti gbegberẽ soapai. Ka ani awisigo agu awaraga du biata Yoane akehe, na gu Yuda akehe, si rengbe ka undo rani ani nye nyanyakii rogo idapase yo fudifudiapai ki vura du vurũ.—Eb. 4:12.
ANI NAATA KINDI ROGO IMARAGO NA ROGO NYEMUSE NA NIʹIDAPASE
(1 Yo. 1:1–5:21)
Yoane ake gako bambata waraga fu agu aboro dunduko du rogo kodatise na Kristo. Gi gako waraga re na wene arugute rogoho nga gu rengbe ka undo aKristano i ru nyanyakii sa gu mangaapai nga ga abasamungu kuti ndikidi pambori na ki ru nyanyakii ka songoda rengo na tipa rurupai. Ko anyakasipa wai si aida ani naata kindi rogo imarago na rogo nyemuse na niʹidapase.
Yoane ayaa: “Ka ani ata rogo imarago, wa du [Mbori] rogo imarago, ngbanya du adu dagbarani.” Wa duhe nga Mbori nyemuse aenge tiko, Yoane ayaa: “Nyemu akuarani du adu tirani.” “Nyemu Mbori” nafõngbaduraniyo ani ‘kakuti gako arugute,’ ono ani nadiabe zegino ‘nigaani idapase’ kuti Yekova Mbori, kuti Fugoko, na kuti Wiriko.—1 Yo. 1:7; 4:7; 5:3, 4.
Akaragapai sa agu Asanahe Nga ga Ziazia Kekeapai:
2:7, 8—Gini rugute Yoane aya tipaha wee si nga “kuru he” na kidu berewe nga ‘vovoho’? Gu rugute ko afura tipaha re, si nga gu du tipa gu nyemuse nga ga awirina. (Yo. 13:34) Yoane aya ti gu rugute re wee si nga “kuru he” mbiko gupai nga, gu regbo ko ake gu gako bambata waraga re, agarã aima manga susi 60 fuo fu Yesu gu rugute re. Sidu, agu aidipase ko ake gu waraga re fuyó aima gia gu rugute re “ho pai aenge ni,” du rogoyo nga, ho i avunguyo ni. Gu rugute re a ‘nivovoho’ rogo gu gene nga, anga si nasa rani gbua ‘ani kpinyemu akuarani wagu ani akpinyemu tirani’ te, ono si nasa rani a ani mbupa kura gaani apai ka manga gu nga ga akuarani.—Pa Mot. 19:18; Yo. 15:12, 13.
5:5-8—Wai du ime, kure, na toro ni adezire gupai nga, ‘Yesu nga Wiri Mbori’? Ime nga dezire mbiko gupai nga, ho i abapatiza Yesu ni rogo ime, Yekova afura ningbako ki yawee Wiriko du. (Mt. 3:17) Kure Yesu, watadu gako unga ko afuhe “ni motumo tipa aboro dũ,” si ayugu gupai a nga ko angia Wiri Mbori. (1 Tim. 2:5, 6) Ziazia toro adu nidezire Yesu ho si azoro ni kuriko fuo zioko bapatiza, ki undoko ko ‘nindu kirikiri nimangi wenepai, nihusi agu aboro dunduko bakitingbanga amangi yó’ gbegberẽe.—Yo. 1:29-34; Amo. 10:38.
Agu Apai Rengbe Ani ka Wirikaha:
2:9-11; 3:15. Ka Kristano mbu kurapai watadu ka mbu boro ní gbarasi gu nyemu awirina du tiní kusayo, gure nga ní nata kina rogo bitimo zanga ino wari ní andu ni.
ONI “NITA ROGO RENGO YO”
(2 Yo. 1-13)
Yoane atona gako ue waraga na agi afugo re: “Gu bakumba fu siasia nagbia na awiriri.” Ko afura tipa gu ngbarago ko adu nani ka gia gupai nga ‘gu kura awiri gu dee re nata kindi rogo rengo yo.’—2 Yo. 1, 4.
Fuo Yoane ngarasi akurako tipa i duna nyemuse, ko akepai ki yaa: “Gi nga nyemuse re nga ani nita fuo gako rugute.” Yoane arugu aKristano a i bandatiyó be ‘iranangahe nga vurakristo.’—2 Yo. 5-7.
Akaragapai sa agu Asanahe Nga ga Ziazia Kekeapai:
1, 13—Da du nga gu “siasia nagbia” re? Si rengbe arengba kadu nga Yoane ake waraga fu bangisa dee sa ko ayambu ri nga “nagbia.” Watadu masaku du ko aagumbaha tipa kura dungurati sa, tipa ka sa gupai nga ka agu aboro nasoga aKristano iningo agu aboro ko ake gu waraga re fuyó ya. Kangia masaku nadu, awiri gu dee re rengbe kadu tie nga agu aboro nadu rogo gu dungurati re, na agu ‘agude nga ga wirina gu dee re’ rengbe kadu nga agu aboro nadu rogo kura dungurati.
7—Gini ‘paye’ Yesu Yoane afura tipaha ane, na wai airanangahe ‘akusanga’ paye Yesu ya? Anga gu ‘paye’ Yesu re nga gu ko ka ye kumbatayo ka aboro abingo ko ya te. Si nga gu ye ko aye niboro borose naapa mbeda yó ko nitoro ko da ni Kristo. (1 Yo. 4:2) Airanangahe aidanga kuti gupai nga ko aye niboro borose te. Si rengbe kadu a nga i aidanga kuti gupai nga Yesu araki auru kpotosende te, watadu i ambedi ko niziazia toro te.
Agu Apai Rengbe Ani ka Wirikaha:
2, 4. Pa ino ani “rengo,” nga agu ayugopai dunduko nga ga aKristano du rogo Ziazia Kekeapai, na ki kakuti ni, si rengbe ka undo rani ani gbia bata.—3 Yo. 3, 4.
8-11. Ka ani aidanga ka zanga ‘undahe, inapai, na zereda be Mbori nga Ba, na be Yesu Kristo ya,’ na ka zanga gu kodatise du ani nani na akuarani aidipase ya, si naida ‘ani bitirani’ rogo toro yo na ki ká gupai nga ga agu aboro “anye nga rogo ga Kristo yugopai yo ya.”—2 Yo. 3.
‘ANI MONGO DU TI SUNGE NAAYÓ SA RENGO’
(3 Yo. 1-14)
Yoane ake gako biata waraga fu bakureako nangia Gayo. Ko akepai ki yaa: “Bakere ngbarago ti re susi gi te re, ya mi gi pa awire i nita rogo rengo.”—3 Yo. 4.
Yoane atambua Gayo tipa gu weneapai ko anaamangaha fu agu awirina naye rogo kura aringara. Yoane ayaa: ‘Ani di ngbatunga aguyo re kugume tipa ani mongo du ti sunge naayó sa rengo.’—3 Yo. 5-8.
Akaragapai sa agu Asanahe Nga ga Ziazia Kekeapai:
11—Tipagine kura aKristano naamanga gbegberẽ mangaapai ti ni? Gu kura aboro naamanga gbegberẽ apai mbiko gupai nga, i nyanyakii rogo rengo yo te. Aguyo abingo Mbori berãyo yo te. Wa duhe nga i arengbanga ka bi Mbori nibangiriyo te, i namangapai si kidu wa ko abingo yó te.—Yeze. 9:9.
15—Ada nangia “abadiangba” Yoane? Anga agu “abadiangba” Yoane re angia kina agu abakureako sa ko anaasungo naayó gbe te, ono i angia aidipase dunduko.
Agu Apai Rengbe Ani ka Wirikaha:
4. Agu aboro naima ima kurogo rengo yo, i nidu na bakere ngbarago ka bi gu paranga aboro du rogo dungurati “i nita rogo rengo” yo. Avunguagude nidu na bakere ngbarago gbe ho i asonosa awiriyo ni wenengai i ki da niga Yekova amoyambu.
5-8. Bete agu aboro ninaamangasunge nyanyakii mbiko nyemuse tipa ka undo awirinayo, i nga agu ababiapai ninaata ata, amokedi, agu aboro namangasunge Betere yo, gbiati abazakigene. Si ngbaangba ani wiriki gayó idapase, na kini undoyo.
9-12. Si naida ani pekefuo gu kpiapai nga ga Demeturio angianga gu nga ga Dioturepe ya, nga gu kumba nangia iranangahe.
“ONI BÁNDA TIRONI [KU]ROGO GA MBORI NYEMUSE YO”
(Yuda 1-25)
Yuda afura tipa agu aboro narimi kurogo dungurati ka gbarasaha ki yawee i nga “agumbarimo, akpakana aboro, napeke gayo nyemuhe, ngbayo nagumba bakere bapai, nizomia aboro ka bi mosoro.”—Yuda 4, 16.
Wai rengbe aKristano ka bandatiyó be agu aboro nagbarasa dungurati? Yuda akepai ki yaa: “Oni abadiangba, oni tíngidi agu apai ga gaani Gbia Yesu Kristo amokedi anagumba ha mbata.” Ko aya berewe wee: “Oni bánda tironi [ku]rogo ga Mbori nyemuse yo.”—Yuda 17-21.
Akaragapai sa agu Asanahe Nga ga Ziazia Kekeapai:
3, 4—Tipagine Yuda azungudi aKristano ti ni i ‘so vura zaaza tipa idapase’? Ko azungudi yó na gu nduhe nga, ‘azangasinombori aima rimo nigbuko’ kurogo dungurati. Agu akumba re ‘asa ga Mbori undahe niwasiro.’
20, 21—Wai rengbe ani ka ‘banda tirani kurogo ga Mbori nyemuse yo’? Ani rengbe ka manga gipai re ngba agene biata: (1) nisonosa ani tirani rogo gaani “ziazia idapase,” nga gupai ani amangaha niwisigo ani Fugo Mbori zanga nyomoro na nitungusa ani pai kakaka; (2) nikpara ani “rogo Ziazia Toro yo”; (3) nidu ani na idapase kuti gu motumo tumorii nga ga Yesu Kristo, bambiko si nga guhe rengbe ka undo rani ani gbia nyenye unga.—Yo. 3:16, 36.
Agu Apai Rengbe Ani ka Wirikaha:
5-7. Ya mo gbegberẽ aboro rengbe ka zubo be ga Yekova sapangbanga? Agu akpiapai biata Yuda afuhe re, si nayugo gupai nga i arengbanga ka zubo behe te.
8-10. Si naida ani pekefuo gu kpiapai nga ga Mikaere nga bakumba maraika niʹirisa ani agu aboro Mbori nafu pagbia fuyó.
12. Gu nyemuse nga ga abasamungu kuti ndikidi pambori, si rengbe arengba ka gbarasa gaani idapase, bambiko ndikidi nyemuse ngaha te. Zire abayugupai rengbe ka manga tiyó wa wene sino aboro, ono tie, i wakina gu dubo zanga ime, mbiko he beyo rogo toro yo rengbe yó ka undo rani nani te. I wakina agu angua naima kpiko, akpehe ki ima nyokora, na kaa zungo ya. Mbori nika gbarasa yó a wa i nimo ngua sendeyo na atarãha. Si naida ani sogo gu mangaapai nga ga abasamungu kuti ndikidi pambori.
22, 23. Ndikidi aKristano nasoga gupai du nigbegberẽhe. Agu aboro du rogo dungurati naima nyaka rogo toro yo, gbe, abaakumba, i naʹasada tiyó ka batasa “agu yo nasaka pai.” I nabatasa yo be gu we nga nyenye gbarasahe.
[Gu kpiahe du ti kpewaraga 30]
Ime, toro, na kure aduni adezire gupai nga, ‘Yesu nga Wiri Mbori’