Awetekapai Tipa Waraga Dunguratise Nga ga Gaani Raka na Sunge
MBIRINVUO 7-13
AŨKUMUKO ROGO FUGO MBORI YO | GATE 23-24
“Ka Oni Pekenga Fuo Rimbasa Aboro Ya”
(Gate 23:1)
Ya Mo Arengo Dunduko Bero?
Ya mo mo nga ngbatunga gu boro ninaagbia ngbarago ti keda e-mail gbiati kekeapai fu abakureamo gbiati agu aboro mo akoda tiro na yo? Kangia wo duhe, ho mo abi vovo pangbanga ni rogo ũgbandaka pangbanga watadu ho mo agia pangbanga ni tipa boro, mo ima rengba kada wakina bagumba pangbanga nga guni naida kadu ni bambata boro ka pe gu vovopai mangi fu aboro. Ono tie, mbata fu mo kedi gu vovo pangbanga re fu boro, mo sananga tiro nga: ‘Ya mo mi ima du na gu kido nga gu pangbanga mi aida ka gbandakaha re nga rengo? Ya mo agu arengo du tipaha bere nzunzu?’ Ka mo adunga na kido tipaha ya, mo ima rengba ka gbandaka gu pangbanga angianga rengo ya dagba awirina ka mo ainongo ya. Ka si du nga mo nakapa akapa kuti gu pangbanga re, mo gbandakaha kusayo zanga kedaha.
Kura kerepai kinaho berewe duti keda kekeapai ni ipo fu boro zanga berã aberã mbata. Kura aringara kinaho i aidanga pa gaani sunge dunduko rogoho ya watadu zavura i naima rugusaha rogoho. Agu asogorani du rogo ngbatunga agu aringara re ima rengba ka gbandaka agu apangbanga i nakusihe tipa si ba gunde ku kpotorani yo watadu si sarani ka ani dunga na kido kuti akuarani ya. Oni bingo gupai namangi rogo gu ringara naadu mbata nga Soviet Union. Agu abanzengere nga ga bitimo yo i aayamba yo nga KGB, agbandaka gu pangbanga naadunga ni rengo ya nga, agu awirina i aima inoyo wenengai aima biriko ga Yekova aboro. Badungu awirina aima kido kuti gu ziree pangbanga re, na ni sangbana gipai re, dunguyo ki kparatiyo kusayo ti ga Yekova riigbu. Gipai re aima gberã ni kerehe! Ono si ni wenepai nga dunguyo aima karagatiyo kusa, ono tie, agu akurayo aakaraganga tiyo berewe te. I aima mbu gu ziree pangbanga re si gberesipa gayo idapase. (1 Tim. 1:19) Wai du rengbe ani ka ne ngbatunga kerepai wa gure? Si aidanga mo gbandaka iraira apangbanga watadu agu apangbanga adunga arengo tipaha ya te. Ka mo dunga ni iramungo kini idi pa apai dunduko ya. Mo du mbata na arengo bero tipa gupai re.
(Gate 23:2)
it-1-E kpe. 11 genewa. 3
Arona
Rogo agu aingahe biata dunduko Arona amangihe ko naatona ha te, ono kuba gure, si nangera wa ko ambu gu sosodahe nga ga kura aboro watadu gu maapai kurii nga ga kura aboro si sa ko ko mangi irairapai. Gbe, ti regbo gako bambata ingahe, si aima ida ko mangisunge na gu bangua rengo nga: “Ka mo peke nga rimbasa aboro ka amanga gbigbita pai ya.” (Gate 23:2) Wa si avura duwo, i aima mangasunge na rimoko ngba iriiri gene rogo Ziazia Kekeapai yo, na ti gu regbo Wiri Mbori adu auru kpotosende ane ko aima rugatiko na pa gu sunge aboro motumo nangia ga ngbatunga Arona.—Tam 115:10, 12; 118:3; 133:1, 2; 135:19; Mt 5:17-19; 8:4.
(Gate 23:3)
it-1-E kpe. 343 genewa. 5
Vurari
Zanga mangasunge na ruru sarangbanga ti regbo sarangbanga aarukuba vurari, na dungu azinahe duho rogo Ndiko yo tipa, fu marã mobirimo, fu gamahe, watadu du na iraira bipai tipa kura aboro, mbiko agi apai re ima rengba ka sa basapungbanga ni irasi sarangbanga. “Bambiko marã mobirimo ninafu vurari fu agu yo nangera.” (Gate 23:8) “Marã mobirimo navurasi bangiri iratatamana avurasi.” (Pa Rug 16:19) Ka si vura du nga basapungbanga ni ruru ni wai vuru, gamahe ima rengba ka vurasi bangiri ni. Ga Mbori ndiko afuranga sa tipa kina sangbana gu vurari naye mbiko gamahe te, ono si ima fura a tipa gu sangbana vurari du ti iraira bipai tipa kura aboro ho si ape gupai ni nga: “Ka oni nibérẽ nga padu boro ni rungorungo ni ya, watadu gunde ti gu ni du ni bakere ni a ya.” (Pa Mot 19:15) Sidu, si anaaidanga gupai nga basapungbanga saringbanga ni wene fu boro mbiko gupai gbua nga ni nga irakumuko te.—Gate 23:2, 3.
Gbata gu Nyanyakipa Ahe Nga ga Toro
(Gate 23:9)
“Ka Bangironi Gó Nga Tipa Yugo Nyemuse fu Agu Aboro Naye Koyo du Oni ni Ya”
Kuba gupai nga Yekova zinahe fu aYisaraere gbua nga i du na irisa tipa ayeaye, ko aya i du na nunga yo. (Oni gedi Gate 23:9.) I aima ino wai gberẽhe ‘kadu ni kungba boro.’ Zavura mbata fu aEbere da ni akanga, si nawira wa aEzipeto anaasoga yo asoga mbiko ngbatunga yo watadu gbegberẽ bipai tipa ga aEbere pambori. (Bam. P. 43:32; 46:34; Gate 1:11-14) Raka aima gberã fu aYisaraere ho i adu ni nga ayeaye, ono Yekova aida i mangipai fu ayeaye “wa wiri ringara” dagbayo.—Pa Mot. 19:33, 34
(Gate 23:20, 21)
it-2-E kpe. 393
Mikaere
Mikaere nga gu yangara ziazia maraika kparakusayo ti Gaburere i nayambu rimoko rogo Ziazia Kekeapai yo, na ko nga gu yangara boro i ayamba ni nga “bakumba maraika.” (Yuda 9) Gu rimo re kuru ni bambataha rogo kapita bawe nga ga Daniere, yo i nafura ni tipa Mikaere nga ko nga “gbia abazogo”; ko aye ka undo gu maraika pako adu kusende nga guko “bazogo ngbi nga ga Parasa” adika ko. I ayambu Mikaere nga gu “bazogo nga ga ga [Daniere] aboro,” “bakere bazogo naruga pa ga [Daniere] aboro.” (Da 10:13, 20, 21; 12:1) Gipai re nayugo gupai nga Mikaere du nangbembatayo fu aYisaraere ngbakungbo yo. (Gate 23:20, 21, 23; 32:34; 33:2) Gupai nasongoda gipai re nga gu rengo nga ‘Mikaere bakumba maraika, aso vura na bakitingbanga na ki ti kangu tipa kangba Mose.’—Yuda 9.
Geda Ziazia Kekeapai
(Gate 23:1-19)
MBIRINVUO 14-20
AŨKUMUKO ROGO FUGO MBORI YO | GATE 25-26
“Gu he Paha Anyaki Anyaka Gbe Banye Yo”
(Gate 25:9)
it-1-E kpe. 165
Sanduki Mokido
Wai i Ambakadihe. Gu bambata he Yekova afuhe fu Moize ho ko aafu rugapai ni fuko tipa mbakada banye angia, gbakigbaki kpia sanduki mokido na wai si aaida i mbakadihe, na nirengo, si angia gu he naadu na nyanyakipaha banye yo na rogo gu bataya dunduko nangia ga aYisaraere. Bagizo gu sanduki re adu wa mbiribe ue na beberehe, patihe kidu wa bagizo mbiribe sa na beberehe, na basonaha kidu wa bagizo mbiribe sa na beberehe a. I ambakadihe rogo gu ngua du wa mbegure, na i ki dadi vuruhe yo gbiati kpotoho na ndikidi dahabu. I akendege pangbaha “kirikiri rogo dahabu” yo nga gu naangera wa kpakpari.” Na i ambakadi pipi ngba sanduki mokido rogo ndikidi dahabu yo, angianga rogo ngua yo ni dadi dadihe na dahabu ya, na bagizoho adu sa na bagizo sanduki. I ambakadi akeruba ue rogo dahabu yo na ki moi he ri pipi ngba sanduki mokido, gu sa adu ti digidoho kubani gu kuraha ki du kubani, na apopo agu akeruba re ki zaraga tihe ki dadi Sanduki Mokido. (Gate 25:10, 11, 17-22; 37:6-9) Gi pipi ngbaha sanduki mokido re, i aayambaha ayamba a nga, “bainapai” watadu “basunga motumo.”—Gate 25:17; Eb 9:5; mo bi PROPITIATORY COVER.
(Gate 25:21)
it-1-E kpe. 166 genewa. 2
Sanduki Mokido
Sanduki Mokido angia ziazia baigoahe nga gu i anaabanda ziazia atingidapai rogoho watadu dezirepai, gi nyanyakipa ahe re angia sekeseke ambia ue nga ga dezirepai, watadu Agu Andiko Naadu Bawe. (Gate 25:16) I amoi “akoro dahabu nadu na manu rogo ho, na gu ga Arona ngbondo nafuna” ku rogo Sanduki Mokido yo, ono kusa, i aima kusaha yo bara ti gu regbo naadu mbata fu i dua ga Soromo yekaru. (Eb 9:4; Gate 16:32-34; Geda 17:10; 1Aba 8:9; 2Peka 5:10) Mbata fu Moize kpi, ko afu “kitabu nga ga rugute” fu aRevi na ki fu gu rugapai nga oni bandaha angia vuru Sanduki Mokido yo ya, ono oni moihe “pati sanduki mokido nga ga Yekova gaoni Mbori, . . . ni dezire kuti roni.”—Pa Rug 31:24-26.
(Gate 25:22)
it-1-E kpe. 166 genewa. 3
Sanduki Mokido
Si adu na ngbanya dagbaha na pa du Mbori ho. Rogo gu pangbanga yo nga ga Sanduki Mokido nabaha, si adu na ngbanya dagbaha na pa du Mbori ho. Yekova akidohe nga: “Yo mi ka angbisa ro ni ki nifura na mo ba ri bainapai, dagba agu akeruba du ue ba ri sanduki dezirepai.” “Mi ayugo tire rogo dubo kuri bainapai.” (Gate 25:22; Pa Mot 16:2) Samuere ake gupai nga Yekova “nasunga ri akeruba” (1Sam 4:4); sidu, akeruba aaru kuba “kpia ngbagidavura” nga ga Yekova. (1Peka 28:18) Mbiko agi apai re, “ho Mose anindu ni ku bamburoko dungurati yo ka fura na Yekova, ko ki nigi fugo si nifura koyo du ko ni ari ba ri bainapai nga gu nadu ku ri sanduki dezirepai, dagba agu akeruba nadu ue; Yekova ki nifura koyo du ko ni.” (Geda 7:89) Kusa, Yosua na Finasa nangia Gbiamotumo asana Yekova barangba Sanduki Mokido. (Yos 7:6-10; Abasa 20:27, 28) Ono tie, kina Gbiamotumo nanaarimo ku rogo Kparakpara Ziazia Ba Kisusi na ki bi Sanduki Mokido, bara sa vuru garã yo, angianga ka fura na Yekova ya, ono kafu gu motumo nga ga Uru Dada Ingapai.—Pa Mot 16:2, 3, 13, 15, 17; Eb 9:7.
Gbata gu Nyanyakipa Ahe Nga ga Toro
(Gate 25:20)
it-1-E kpe. 432 genewa. 1
Keruba
Kpia akeruba adu kina dagba agu ahe i afongo banye na ni nga gu i adua ha ngbakungbo yo. Akeruba adu rii pipi ngba Sanduki Mokido ti digidoho kubani na kubani nga gu i ambakadi he rogo dahabu yo. Si aangera ngba bangirihe na ki dua rihe kurii pipi ngba Sanduki Mokido rogo gu sino nga ga irisombori. Agi akeruba re dunduko adu na apopo ho ue ni tai tai he kuari yo na ki zaraga tihe kurii pipi ngba Sanduki Mokido ngba gu gene nga gu naayugo pa bandahe. (Gate 25:10-21; 37:7-9) Berewe a, gu roko naadada vuru banye yo gbiati gu roko naakparaka Ziazia Ba ti Kparakpara Ziazia Ba Kisusi adu na kpia akeruba ti ni.—Gate 26:1, 31; 36:8, 35.
(Gate 25:30)
it-2-E kpe. 936
Kpokuta yugopai
Angia akpokuta bawe na ue nga gu i anaama ha rii mbisa rogo Ziazia ba nga ga banye watadu yekaru yo na i anaaye na vovoho kubaha na aRago Sabiti dunduko. (Gate 35:13; 39:36; 1Aba 7:48; 2Peka 13:11; Nem 10:32, 33) Gu pa-Ebere i namangi sunge na ni tipa kpokuta yugopai nga “kpokuta nga ga kpakpuse.” Gu fugo nga “kpakpuse,” ti kura regbo si nayugo padu “bara bangirise” (2Aba 13:23), sidu, kpokuta yugopai adu bara bangiri kpakpu Yekova ni gu motumo naadu bara bangiriko ti aregbo dunduko—Gate 25:30.
Geda Ziazia Kekeapai
(Gate 25:23-40)
MBIRINVUO 21-27
AŨKUMUKO ROGO FUGO MBORI YO |
GATE 27-28
“Ginipai Rengbe Ani ka Wirikaha ti ga Aboromotumo Aroko?”
(Gate 28:30)
it-2-E kpe. 1143
Urima na Tumima
Badungu agu aboro nafura tipa Ziazia Kekeapai idi kuti gupai nga Urima na Tumima angia ake. I nayamba ra nga “ziazia ake” rogo gu sasa Gate 28:30 nga ga James Moffatt. Gu kura aboro naya si adu na apaparaha biata, gu adu na kekepai ti ni nga “ii,” gu kuraha ki du na “oó,” na ka gu kuraha adunga na kekepai ti ni ya. I anaagbe he na ki fu karagapai kuti gu sanahe i ani fuhe, sidu, ho i ani gbe gu ni naadunga na kekepai ti ni ya, gure ayugo gupai nga karagapai ho te. Gu kura aboro naberãha nga si angia kpakakpaka ambia ue, gu kuraha adu ni bibiri he kubani, gu kura paparaha kubani ki du ni pusi he. Ho i anaaba ha ni kusende, ka si du nga gu paparaha ue du ni pusi he ariatihe kuari, gure nga “ii,” ka gu paparaha ue du ni bibiri he ariatihe kuari gure nga “oó,” na ka gu bibiri he na gu pusi he ariatihe kuari gure nga karagapai ho te. Ti kura regbo sa, ho Saura aida ka inopai ni vurube boromotumo singia si naida ko ndu kumbatayo na sovura kuti aFereseto, ko aagbianga karagapai te. Ko aabihe nga boro sa dagba gako akumba ima manga ingapai, ko azungodi he nga: ‘Ako ga Yisaraere Mbori, mo fu Tumima furani!’ I adi Saura na Yonatana barabangiri agu aboro naadu ho; fuoho, i ki ba ake dagbayo ue. Rogo gi pangbanga re, gu zungodihe nga, ‘Mo fu Tumima furani,’ nayugo gupai nga kparakparapai kina ti ni na kungbo ba ake, wa vura duhe nga wiri wiratise kina bangbandaha ue.—1Sam 14:36-42, NW.
(Gate 28:36)
it-1-E kpe. 849 genewa. 3
Ngbanda kpakpuse
Ga Yisaraere Gbiamotumo. Yisaraere yo, ga gbiamotumo rokori anidu na kpasakpasa saani ni dahabu kumbatayo ti kpakpu gbiamotumo, nangia “kparakpara ziazia kpakpari,” nga gu i ‘agbaki’ agu afugo ti ni nga “Kparakpara he ziazia fu Yekova.” (Gate 28:36-38; 39:30) Wa duhe nga gbiamotumo anaarukuba iriso Yekova, si arẽarẽ ko banda gako basunge gigiri, na gu gbakigbaki he re adu ni tingidapai fu aYisaraere nga i du ziazia rogo gayo asunge fu Yekova. Si aayugo pa gu bakere Gbiamotumo nga Yesu Kristo, na nga guko gako sunge boromotumo ayugo padu Mbori ziazia.—Eb 7:26.
(Gate 28:42, 43)
Oni Fu Irisa Fu Yekova
Ziazia Kekeapai nayugo gupai nga, ani du ni iriiri rani, gbe, ho ani andu ni ka iriso Yekova. Si naya: ‘Mo banda nduro ho mo ka ndu ni ku rogo ga Mbori bambu yo.’ (Batu. 5:1) Yekova aya fu Moize na Yosua wẽ i uru rakata nduyo yo ho i adu ni rogo ziazia ba. (Gate 3:5; Yos. 5:15) Si aidi i mangi gipai re nipa irisa. Mbori arugu aboromotumo i naavoda asorondu nigiri nzibi “ka dada kundiri yo” na ni. (Gate 28:42, 43) Gipai re nasa gupai nga ka kundiriyo dunga ni yuguyuguhe kurii bamotumo ho i amangasunge ni ya. Agu aborokporo dunduko nangia ga aboromotumo yó si anaaida gupai beyo nga i du ni iriiri yo.
Gbata gu Nyanyakipa Ahe Nga ga Toro
(Gate 28:15-21)
w12-E 8/1 kpe. 26 genewa. 1-3
Oni Ini Gipai Re?
Wari du i agbia gu nyanyakipa ambia ni naadu ti gu mangu ngbaduse nangia ga ga aYisaraere gbiamotumo?
Tingbafuo aYisaraere guari Ezipeta yo na ki ndu ku ngbakungba yo, Mbori afu rugapai fuyo nga i mbakadi gu mangu ngbaduse re. (Gate 28:15-21) Gu mangu ngbaduse re adu na ambia sadio, topazo, bareketa, zumeradi, safero, yaroma, yakino, sebu, amesute, berure, oniki, na yasipi. Ya mo aYisaraere adu na rengba ka gbia gi nyanyakipa ambia re?
Ti agu aregbo i aake Ziazia Kekeapai ti ni, aboro anaamaa gino kurii nyanyakipa ambia na kini bagihe. Ni kpiapai, agu aEzipeto naadu mbata anaaye na nyanyakipa ambia rogo tuturũ aba wa agu arago du awere nga Iran, Afghanistan, isoke, na India yo. Agu age ahe sende yo nga aEzipeto anaage nyanyakipa ambia sende yo. Agu abakindo nga aEzipeto aniidu na pagbia beyo kurii gu aba ge ahe sende yo naadu rogo gayo dagbarago. Gu tita aYisaraere nangia Eyobo afura tipa wai i anaage arago sende yo tipa ka gbata nyanyakipa ambia. Dagba agu ahe i anagehe sende yo, safira na topazo Eyobo afura tipaha.—Eyobo 28:1-11, 19.
Gu pangbanga du rogo gate nagumba gupai nga aYisaraere ‘agbu ahe be aEzipeto’ ho i aguari ni rogo gayo ringara. (Gate 12:35, 36) Sidu, si ima rengba ka du nga i agbia agu ambia naadu ti gu mangu ngbaduse nangia ga gbiamotumo Ezipeta yo.
(Gate 28:38)
it-1-E kpe. 1130 genewa. 2
Du ziazia
Anya na Aũati. Bambata wiri babagara, kandoro, na meme nga agu ra nga abara adu ni ziazia ra fu Yekova, na si anaaidanga aboro mangisunge na ami te. Si anaaida i tumo na ami, na yangada ra anaandu fu gu boro motumo re. (Geda 18:17-19) Bambata zuzuahe na sa-dagba-bawe adu ni ziazia ha kina wai gu kura amotumo na agamahe dunduko adu ni ziaziaha tipa gu sunge nga ga ga Mbori kparakpara ba. (Gate 28:38) Agu ahe dunduko naadu ni ziaziaha fu Yekova adu ni kparakparaha na si anaaidanga i bihe na paha kusende te watadu ka mangasunge na ni tipa kungbopai gbua te. Kpiapai nga gu ndiko naabipa sa-dagba-bawe. Ani ya nga we ka boro animoi nganu tipa si du ni sa-dagba-bawe, na fuoho, ni watadu kura boro dagba gani aborokporo kini ka mangasunge na ni zanga ni inihe, wa gu nga ka mangaha ni riahe, si angia kuo gu ga Mbori andiko du tipa ziazia ahe. Ndiko aniidu tipaha nga ni nika karaga gu kubaha nga ue bawe rii kama ku banye yo, na ki fu kandoro ni motumo kupati ni. Rogo gi gene re, i anaayugo bakere irisa tipa gu ziazia ahe naadu fu Yekova.—Pa Mot 5:14-16.
Geda Ziazia Kekeapai
(Gate 27:1-21)
MBIRINVUO 28–TANVUO 4
AŨKUMUKO ROGO FUGO MBORI YO | GATE 29-30
“Gamahe fu Yekova”
(Gate 30:11, 12)
it-2-E kpe. 764-765
Ke rimo aboro
Sinai Yo. Kuti sangba ga Yekova rugapai, i ake rimo aboro ni bambataha ti gu regbo i azi bataya Sinai yo, rogo gu ue diwi nga ga ue garã tingbafuo i kuru Ezipeta yo. I asia abaakumba rogo ngbatunga aYisaraere ni basasa tipa i undo Moize na gu sunge nga ga keka rimo aboro rogo angbatungayo yo. I akenga kina rimo agu aboro sa garã yo adu nga 20 na kuari narengbe na ka ndu ku ba vura yo te, ono ndiko aida agu aboro i ake rimo yo re ni tumo na bebere sekere (dorari 1.10) ni mara ngbeti tipa gu sunge naamanga yekaru yo. (Gate. 30:11-16; Geda. 1:1-16, 18, 19) Bange agu aboro i ake yo adu nga 603,550, kpara kusayo ti aRevi nga aguyo naadunga na ũkumbo rogo ringara ya. I anaatumongo marã ngbeti te, na si aaidanga i mangisunge asekere a te.—Geda. 1:44-47; 2:32, 33; 18:20, 24.
(Gate 30:13-15)
it-1-E kpe. 502
Gamahe
Kura agamahe kinaho ndiko aida boro fuhe. Ho Moize ake namba aYisaraere ni agu akumba garã yo adu nga 20 ka ndu kuari, si aaida i fu motumo tipa unga yo nga “bebere sekere [nga gu narengbe kadu wa dorari 1.10] gu sekere nga ga kparakpara ba.” Si adu ni “gamahe nga ga Yekova” tipa gupai nga ka dada gayo aingapai na “sa sunge bamburoko dungurati.” (Gate 30:11-16) Ringbisihe kuti gu ga aYudo bakeke kuru apangbanga nangia Yozefasi (The Jewish War, VII, 218 [vi, 6]), gi “ruhe” watadu kparakpara ngbeti re, i anaafuhe rogo agarã dunduko.—2Peka 24:6-10; Mt 17:24; mo bi TAXATION.
(Gate 30:16)
w11-E 11/1 kpe. 12 genewa. 1-2
Oni Ini Gipai Re?
Wai gu i anaagbia marã tipa ka ngerafuo agu asunge naadu rogo ga Yekova yekaru Yerusarema yo?
Gu dungu asunge naadu yekaru yo i anaangerafuo ho na marã ngbeti, gbe gu sa-dagba-bawe aboro anaafuhe kuti andiko. Ono i anaamangasunge amanga a na kura ngbatunga marã ngbeti. Ni kpiapai ti gu regbo i ambakada banye, Yekova afu rugapai fu Moize nga ko dungura bebere sekere be agu aYisaraere i ake rimoyo ni “gamahe fu Yekova.”—Gate 30:12-16.
Si nawira gupai nga, si aye ka da tie ni sino fu aYudo dunduko nga i naafu ringbisiringbisi gamahe ni ngbeti nga ga yekaru na agarã dunduko. Gi marã ngbeti re du Yesu anya fu Petero ko tumo ru na gu marã i akusi ru ngba tĩo yo.—Matayo 17:24-27.
Gbata gu Nyanyakipa Ahe Nga ga Toro
(Gate 29:10)
it-1-E kpe. 1029 genewa. 4
Bese
Maabe Ri. Ku pati gupai nga ga kungbo zada boro, i anaamaabe ri boro watadu rihe tipa dungu ndu apai. Ono tie, rogo gupai re yo anidu gbe nga i ima maa boro ti sunge watadu i ima kpara guhe re tipa sunge. Ti gu regbo i amaa Arona na awiriko ni boromotumo i amoi beyo ri gu babagara na akandoro ue si adu nga i nika tumo ra, ngba gi gene re i aayugo gupai nga agi anya re, i afu ra ni motumo tipa yo tipa i da ni ga Yekova aboromotumo. (Gate 29:10, 15, 19; Pa Mot 8:14, 18, 22) Ho Moize amaa Yosua ni kubako kuti sangba ga Yekova rugapai ko amoi beko ri Yosua na ko “ki hi be toro tatamana” tipa ka ngbe fu aYisaraere kumbatayo wenengai. (Pa Rug 34:9) I anaamaabe ri boro ho i nasia ni tipa ni gbia maku. (Bam. P 48:14; Mk 10:16) Yesu azadi kura aboro watadu ka maabeko riiyo tipa ka husa yo. (Mt 8:3; Mk 6:5; Rk 13:13) Ti kura aregbo aboro anaagbia gu gamahe nga ga ziazia toro ho amokedi anaamaabe ni riiyo.—Amo 8:14-20; 19:6.
(Gate 30:31-33)
it-1-E kpe. 114 genewa. 1
Mbedimbedi boro, Mbeda
Rogo gu ndiko yo Mbori afuhe fu Moize ko aima yugo pai tipa wai si anaaida i mangi gu nzeme naadu tipa mbeda boro. I anaambakadaha rogo gu kparakpara ahe nangia—mure, kinanona, nzinziri koko, banga, na nzeme ngua wa banga. (Gate 30:22-25) Gipai re angia kere ingapai nga gu naaye na kina kpio ka boro akodi agi ahe re na ki mangisunge na ni ka uka ha kurii kungbo boro. (Gate 30:31-33) Gipai re anaayugo pa wai gu maa boro ti sunge naadu vuru be uka yo nzeme kurii ni ani du na nyanyakipaha na ni ziaziaha.
Geda Ziazia Kekeapai
(Gate 29:31-46)