Waigu Yekova Nika Tingida Paro?

“AKO gi Mbori mo tíngidi pa re.” Nemaya azungadi Mbori ni agu afugo re bara dunguhe. (Nemaya 5:19; 13:14, 31) Si ni sino aboro nga ho du yo ni rogo kere rungo, i na’aria tiyo koyo du Mbori ni na ngbatunga azungadihe wa gure.

Ono tie, ginipai nidu berã aboro yo ho i naasana Mbori ni tipa ko tingidi payo? Ziazia tie, i namaabangiriyo nga Mbori mangipai susi gu gbua nga ka tingidapa arimoyo. Zanga kapa, i na maabangirise kina rogo gu bangisa gene guni sa dagba agu abakuo ndika i aimi ko pati Yesu kubani adu nani. Nidu ko kia ti gu kurako, gi ko re azungadi Yesu ki ya: “Mo tíngidi pa re ho mo ka da ni ku rogo ga [kindo].” Anga ko aida kina gupai gbua nga Yesu tingidipa gini boro nangia ko te, ono ko aida gupai nga ko mangipai tipa ko—ka zingisa ko bekpio.—Ruka 23:42.

Na pagume na gipai re, Baibiri nayugo kina gu bangisa pai re tipa Mbori, ka ‘tingidapa boro’ nayugo gupai nga ka mangapai tipa ni. Ni kpiapai, fuo ime akangbii fu ri kpotosende tipa auru 150, “Mbori . . . [a]tingidi pa Noa. . . . Mbori ki kedi yuge si ya auru kpotosende, ime ki ugudi.” (Bambata Pai 8:1) Fuo akama agarã kusa, Samusona, nga guko aFereseto asako ni iravurari na ki vo ko na azogbo, akparikpee yaa: “Ako Gbia Mbori, mi nazungadi ro, mo tíngidi pa re, mi nazungadi ro, mo nyákasi re ti kina gere bara sa.” Yekova afu ome fu Samusona nga gu susi ga aboro tipa ko rengbe ka irabape bangiriko ti avura Mbori. (Abasapungbanga 16:28-30) Tipa Nemaya tigako, Yekova afu maku kurii gako asadatise, sidu i akaraga ndikidi iriso kubaha Yerusarema yo.

“Agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa,” wogu gu mokedi nangia Pauro akehe. (ARomo 15:4) Ka ani atingidapa Yekova ni gbata ani gene ka manga gupai ko akpinyemuhe, a wa gako ruru amoyambu amangihe ti agu aregbo nadu mbata, ani rengbe ka duna kido nga Yekova nika tingidapa rani ni undo ko rani ani gbia agu ahe si aidaha tipa rani na auru dunduko, kini songodi rani rogo gaani a’asada, na ki batasi rani ho ko ka ye ni na sapangbanga kurii azanga sinombori.—Matayo 6:33; 2 Petero 2:9.