Oni Fu Wasa fu agu Aboro Gayó Boro Nakpi, A Wa Yesu Amangihe

RAZARO nangia boro Betania ati na kaza ti kura regbo nikerehe. Agu adawiriko nangia Marata na Maria ki kedi sunge fuo gu bawene bakureayo nangia Yesu. Ono mbata fu Yesu da, gu kaza re adibe Razaro ko ki kpi. Wa ko adu muro yo, abakurea Marata na Maria gbiati gayó amurakporo aye tipa ka “ngarasa yo.” (Yoane 11:19) Fuo bete aʹuru, Yesu ada Betania yo ki ndu ka bi agu anakureako re. Ka ani wisigi agu apai ko agumbaha na ki mangihe, ani nika wirikapai awirika tipa wai rengbe ani ka fu wasa fu agu aboro narungo tipa gu gayó boro kpii.

Padu Oni Yo Nayugo Gupai Nga Oni Naberã Payo Aberã

Tipa ka da Betania yo, si aidi Yesu ndu nunguro nga ga aʹuru ue, ki si Yaradene na ki dakpa gu tumbatumba arago nadu ngbagene Yereo. Marata adusio Yesu niipo kutingba gbata yo ka uda ko. Kusa, ho Maria agi gupai ni nga Yesu ima ye, ri aipisi tiri a tipa ka biko. (Yoane 10:40-42; 11:6, 17-20, 28, 29) Zanga kapa, padu Yesu yo aima fu wasa fuyó.

Areme a, pa ndu ani ka bi agu aboro narungo tipa gu gayó boro kpii rengbe arengba ka ngarasayo. Wirina du rimoko nga Scott na diako du rimori nga Lydia, wiriyo akpi mbiko béno garãko kidu sita, agumba gupai nga: “Guhe ani aaidaha nga aboro ye ka songoda rani. I aye bebere yuru ku bambungua yo nibasa.” Ginipai agi aboro re agumbaha ho i ayeni? “Ti gu regbo re, anga fugo ani aaida ka giaha te. Padu yó yo aima yugo gupai nga i naberã parani aberã.”

Ziazia Kekeapai nagumba gupai nga ho Yesu abi aboro ni i nikpari niaume, “nunga ki zi ko toroko yo” na ko “ki nikpari ni aume.” (Yoane 11:33-35, 38) Yesu aabingo ho nga si nipazee fu kumba ní kpari dagba aboro te. Yesu aima rugatiko naapa gu rungo i adu nani. Ginipai ani awirikaha ti gipai re? Ho ani andu ni ku kporokpee yo, si aidanga ani bihe nipazee ka kpara na agu aboro nakpara te. (ARomo 12:15) Ono si aidanga ani zinahe fu boro ní kpari ngbaome te. Gu kura aboro rengbe ka ida ka kpara ho du yó ni nisayo.

Oni Degeturoni Ninunga

Si nawira wa afugo ngarasaro adu kina ngba Yesu tipa ka gumbaha fu aMarata na Maria, ono ko ambuyo i fura mbata. (Yoane 11:20, 21, 32) Ho ko afura ni na Marata, ko asana ri na sanahe, na ki degetuko.​—Yoane 11:25-27.

Ho boro adegatuni ni wenengai, si nayugo gupai nga ní na berãpa gu boro re aberã nzunzu. Tipa ka ngarasa agu aboro narungo tipa gu gayó boro kpii, si naida ani degeturani wenengai. Ani rengbe ka yugo gupai nga ani nga wene adegetue nisana ani agu asanahe nika sayo i pe gupai du kpotoyo yo. Ono tie, ka oni sosodinga yó i fura baraho i aidanga ka fura ni ya ya. Si rengbe kadu nga omeyo ima bata na i naida ka ongoda.

Ti kura aregbo, berã gu boro gani boro nakpi ima rengba ka ru watadu ní rengbe kaa fura nisani. Aguyo nakusa gayó nunga akusa gbaiga. Maria agumba kina gu bangisapai Marata agumbaha fu Yesu nga: “Gbia, ka mo adu erẽ, ka kawire akpi nga te.” (Yoane 11:21, 32) Ginipai Yesu amangihe? Ko adegetuko yee ninunga. Ko aasadanga ka aria gu bipai i adu nani te. Ko aima rugatiko naapa gu igira na rungo i adu nani.

Ka si du nga oni ainongo gupai ka oni gumbaha ho oni andu ni ka bi gu boro gani boro nakpi te, oni rengbe ka tonaha nisana oni gu sanahe nga, “Ya mo oni nakpinyemu ka fura riipa gupai mangi re?” Oni degeturoni wenengai tipa karagapai. Oni degeturoni wenengai ka gia gupai ní agumbaha. Oni ngana kina boro ní na kini asadi ka rugatironi naapa gani aberãpai.

Anga si nitaatapai tipa ka rugatise na agu aberãpai nga ga gu boro narungo kpotoni yo te. Gu wirina ani nifura tipa ri ti tonatonaha ayawee: “Agu apai ani aaidaha aima satihe. Ti kura aregbo, ani aniti nikpee nikerehe barabangiri agino. Si aaida agu agino re du na ruru bipai tipa rani. Agu abakurearani re aima manga ome tipa ka rugatiyo naapa gu rungo naamanga rani.”

Yesu amangi gipai re ngba wene gene. Yesu aima inoho nga aboro dunduko du na “gayo gberãngbi ni ba sa sa, na gayo rungosi.” (2 Pekapai 6:29) Yesu afura na adawiri Razaro ngba agene nibakiakia. Ko afura na Marata nigbangaha mbiko ri naafura afura. Ono wa Maria aakpara akpara tigari, ko aafuranga na ri nigbangaha te. (Yoane 11:20-28, 32-35) Ginipai rengbe ani ka wirikaha ti gi gako kpiapai re? Si rengbe kadu niwenepai ka ani mbu kina gu boro narungo kpotoni yo re tipa ní ninungusi fugo. Pa dega oni turoni ka gia gupai i agumbaha rengbe ka fu bakere wasa fuyó.

Agu Afugo Nafu Wasa

Ho aMaria na Marata ayani fu Yesu wee: “ka mo adu erẽ,” ko aabiranga boro watadu ka zinga naayó tipa gupai i agumbaha re te. Ko afu gu karagapai nafu kido fu Marata ki yaa: “Kawiro azínga azinga berewe.” (Yoane 11:23) Na gu guru fugo re, Yesu aundo ri ri ngere kumbatayo na ki tingidi ri na gupai nga maabangirise kinaho.

Ho ani afura ni na agu aboro gayo boro nakpi, si naida ani ini gupai nga wene afugo ima rengba kadu na bakere undo ka si vura du vurũ nga si gbua niguruhe! Oni ima rengba ka pe afugo nunga ningbaa watadu ka kehe rogo waraga. Wa duhe nga waraga nga guhe rengbe boro arengba ka gedaha tipa gbanga regbo, si rengbe ka fu wasa fu boro tipa gbanga regbo fuo kpio gani boro. Dee nga Kath adi agu awaraga berewe aboro akehe furi ka gedaha tifuo adiwi ribua fuo kpi kumbaari nangia Bob. Ri ape gupai nga: “Mi abi gupai nga agu awaraga re aundo re gbe ti gu regbo re. Gure nzunzu nga gu regbo mi agbia wasa.”

Ka si du nga oni sia ka kepai niwiri guruhe fu gu boro gani boro nakpi, ginipai rengbe oni ka kehe? Oni rengbe ka kepai tipa gu boro nakpi re, oni rengbe ka ke pangbanga pa gupai namangi furoni na ní, watadu oni rengbe ka kepai tipa gu wene sino ní naaningba tironi gbe. Kath ani nifura tipa ri aya berewe wee: “Gu wene apai aboro akehe tipa Bob na tipa gu wene sino naanidu tiko anaasa re ti kura aregbo mi momu watadu mi kpari. Gu wene apangbanga i akehe tipa ko anaasa re mi naamoma ti ngbare na kini tingidi pa gu wene raka ani anaarakaha naako. Dungu averesi aboro akehe fere nga gu ngba awere tire nikerehe.”

Oni Fu Undo Rogo Mangimangipai Yo

Tipa ka undo ga Razaro aborokporo, Yesu amangi gupai ka ani amanganga ha ya, nga ka zingisa Razaro bekpio. (Yoane 11:43, 44) Ono ani rengbe arengba ka manga agu apai rẽ na omerani, nga agu apai du wa manga riahe, mbakada ba agu agino naye ka bi gu boro re, zunda arokoo, ngerafuo rukutu agude, otoka gene wiri apai yo, na gbata ũnduge fu aboro. Gi ngbatunga rukutu apai ani amangaha funi mbiko gupai nga ani na ndikidi nyemu nί re, nί nika duadu na tambuahe tipaha.

A wa du sino aboro, gu boro gani boro nakpi ima rengba ka ida kadu nisani tipa bete regbo. Wa vura duhe wo, oni rengbe ka manga gupai ka du tipa kaa bi ní abi watadu kaa fura na ní. Navungu gude sa ayawee: “Digido gu rungo re ti ni te, uru ho sa rengbe boro kadu zanga gberarago te.” Gu kura aboro ninaandu kaa bi agu aboro gayó boro akpi ti ngbatunga agu aʹuru duwa gu uru i amangi rogatise watadu gu uru gu gani boro re akpi ti ni. Nduge ti ngbatunga agu aregbo re rengbe ka sa rani ani du niwene badia ngbanya ti gu kere regbo re.—Asanza 17:17.

Gu wasa Yesu afuhe akodi gu kido ko agumbapaha fu gako abawiriki ki yaa: “Badiangbarani ti ni rame nga Razaro, mi nandu ka zingisa ko rame yo.” (Yoane 11:11) Yesu akido apefuoko nga zingabekpio aduadu tipa kpikpi aboro. Ko asana Marata ki yaa: “Mo idi pa gere?” Ri akaragapai ki yaa: “Ii, Gbia.”—Yoane 11:24-27.

Ya mo oni idi kuti gupai nga Yesu nika zingisa kpikpi aboro azingisa? Kangia wo duhe, oni pe pa gi maabangirise re fu agu aboro narungo tipa pakpio gayó boro. Oni undoyo rogo mangimangipai yo. Gupai oni kaa gumbaha na kini mangihe rengbe arengba ka ye na wasa fuyó.—1 Yoane 3:18.

[Gu kpiahe du ti kpewaraga 9]

(For fully formatted text, see publication)

PEREA

Yereo

Betania

Yaradene

Baime Tikpo

Yerusarema

SOMORONA