Agene Tipa ka Kiiso Gamo Sunge Ngbaha fu Mbori

HO REGBO ada ni be Yesu ko kedi gako abawiriki i ndu ni abatungusi pa Kindo, ko aya fuyo: “Zuzuhe ni bakere he ni rengo, ono abamangisunge ni kina umba yo.” Bakere sunge aima du tipa mangaha, sidu, ko ape kurapai nga: “Oni kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe.” (Mt. 9:37, 38) Yesu aima pepa wai rengbe abawiriki ka manga gayo sunge fu Mbori. Afugoko ayugu gupai nga si aaida i mangihe ni ipiipihe: “Oni atá nga rogo ga a Yisaraere abaakporo dunduko mbata Wiri boro nikaye te.”​—Mt. 10:23.

² Areme a, sunge tungusapai ima kio ni bakerehe gbe. Si naida i tungusi gu wene pangbanga nga ga Kindo re mbata fu digido rago da, na regbo naora ni kerehe gbe! (Mk. 13:10) Wa duhe nga gu ati re nga zegino, gu sunge du berani wakina gu naadu tipa Yesu na gako abawiriki ono gaani ima kio kisusi gayo. Bangerani ni umbaha nibi wai du bange aboro nga abirioni rogo zegino, ono ani du na kido nga Yekova nika undo rani aundo. I nika tungusa gu wene pangbanga nga ga Kindo rogo zegino dunduko, na ti gu regbo da bangiri Yekova, na digidoho ki da. Ya mo ani amaa ga Mbori Kindo mbatayo rogo gaani raka yo tipa ka manga gi sunge re? Gini asásá nga ga toro rengbe ani ka otoka fuoho da ti digidoho?

³ Yesu afura tipa agu apai Yekova aidaha be gu gako amoyambu kparatiyo fuko nga: “Mo kpi nyemu Gbia nga ga Mbori kpotoro yo dunduko, na mbisimoro dũ, na ga berã dũ, na omero dũ.” (Mk. 12:30) Si naida ani mangisunge fu Mbori na kpotoraniyo dunduko. Gure nayugo gupai nga si naida ani mangi ome nyanyaki ka yugo na ni nga ani ima kakuti Mbori na ki fu tirani tipa ka manga gako sunge. (2 Tim. 2:15) Amomu kinaho furani ni basasa ringbisihe kuti agu apai du tipa rani na gu ome du ani na ni. Mo wisigingo bete agi amomu re, na ki diberã tipa gini ngbatunga asásá nga ga toro rengbe mo ka maaha tipa ka pekafuoho.

DA NI BATUNGUSIPAI ROGO DUNGURATI

⁴ Agu aboro dunduko di rengo kugume na momu beyo tipa ka takapandepa wene pangbanga. Gere nga gu sunge Yesu afuhe fu gako abawiriki tipa i mangihe. (Mt. 24:14; 28:19, 20) Ga Yesu Kristo bawiriki natona fura tipa wene pangbanga nibasa tingbafuo gia ní he. Gere nga gupai Andarea, Firipo, Korunerio na gu kura aboro amangihe. (Yo. 1:40, 41, 43-45; Amo. 10:1, 2, 24; 16:14, 15, 25-34) Ya mo gere nayugo gupai nga boro ima rengba ka pepa wene pangbanga fu kura aboro zavura mbata fu ni zi bapatiza? Ii! Bara sa kindi boro nada ni gu batungusipai ata ziongo bapatiza ya, ní ima rẽ tipa gu momu nga ga tungusapai kporo na kporo. Berewe a, ní ima rengba ka manga gu kura ngbatunga atungusapai ringbisihe kuti omeni na agu apai du tipa ní.

⁵ Ka batungusipai zi bapatiza, zanga kapa, ní na nyemu ka manga ome nyanyaki tipa ka undo kura aboro i wiriki wene pangbanga. Akumba na adee dunduko na gu momu beyo nga ga sunge tungusapai. Momu du ngaha furani tipa ka manga gupai rengbe omerani na ni tipa ka sa sunge ga Mbori Kindo si ndu kumbatayo. Gu boro ka kiisi gani sunge tungusapai ni manga ní gu kura angbatunga asunge fu Mbori nika du na ngbarago nirengo.

MANGASUNGE ROGO GU BA DU NA BAKERE ZINGO ROGOHO

⁶ Si rengbe ka du nga gu dagbarago nga ga dungurati tungusapai ima manga rogoho ni bakerehe na dungu aboro ima gbia dezirepai. Kangia wo duhe, mo ima rengba kaa bihe nga mo rengbe ka kiiso gamo sunge tungusapai ni ndu mo ku rogo gu kura aba du na bakere zingo abatungusipai rogoho. (Amo. 16:9) Kangia mo awere nga bakumba watadu moundo abaakumba, si rengbe kadu nga dungurati kinaho rengbe kadu na ngbarago tipa mo fu undo fuyo. Gamo babi rimbasa ima rengba kadu na aberãpai tipa wai rengbe mo ka undo dungurati rogo gamo badona nga ga adungurati. Kangia mo naida ka ndu ka undo rogo gu kura ringara, be-basunge ima rengba ka fu wene aberãpai rengbe ka undo ro.

⁷ Ya mo mo nakpinyemu ka mangasunge rogo gu kura ringara? Kangia wo duhe, si naida mo wisigipa gu nduge re na rubangirise. Si angba gbe ka mo saki gupai re na gamo abaakumba rogo dungurati. Gu ngbatunga nduge re rengbe kadu na nyanyaki surungbaha kurii ro na agu aboro rengbe ka ndu na mo. (Rk. 14:28) Ono tie, ka si du nga mo aimanga koyo te, si adu ni wenehe mo berẽkuriipa mangasunge rogo gu dagbarago mbedi na mo rogo gamo ringara.

⁸ Rogo gu kura aringara, agu awirina nangerakurii apai rogo dungurati ni vovo yo ku rogo rengo yo. Mbiko umbasitise, agu abaakumba du rogo gu rago re nambu agu awirina du na bakere inohe ye ku rogo gayo dungurati i ningbembatayo rogo apai yo. Kangia bakumba nga mo naberãpa ga ku rogo ngbatunga rago wa gure, si naida mo ini gupai nga anga gamo sásá nga ka diaba agu awirina du rogo gu rago re te. Kuba gure, mo mangisunge na yo. Mo ngarasiyo i mangi sonakumbatayo tipa ka dia agu atindiro nga ga dungurati. (1 Tim. 3:1) Mo du na zerangbaduse ho duhe ni nga kurapai kinaho amanganga wai duhe rogo gu ringara ye mo rogoho ya. Mo mangisunge na gu inohe du mo na ni ni bakumba tipa ka undo awirina. Ka si du nga regbo nika da tipa mo ga ku rogo gamo ringara, si naida mo mbu agu abaakumba duho ni agu aboro nika rengba ka ngerafuo dungurati wenengai.

⁹ Mbata fu be-basunge fu rimo agu adungurati rengbe ka gbia undo be gamo inohe, si nika ida Rondo Sunge Tungusapai Rogo Dungurati kedi waraga nayugo na ni nga mo ima rẽ ka manga gupai re. Ka si vura du nga mo nga bakumba, moundo abaakumba, bazakigene, watadu ni batungusipai, si naida gi waraga re aida. Rondo sunge tungusapai rogo dungurati nika keda waraga tambua rimo ro na ki yuguhe nga mo ima rẽ kodihe na gamo nyemupai fu gu be-basunge mo aida ka mangasunge rogo gaha ringara re.

TUNGUSAPAI ROGO GU KURA FUGO

¹⁰ Tipa ka kiiso gamo sunge, mo ima rengba ka berãpa wirika gu kura fugo, kodihe na fugo nibee. Ka si du nga mo na gu sásá nga ga wirika gu kura fugo tipa ka tungusapai rogoho, si angba gbe ka mo fura na abaakumba gbiati babi rimbasa. I ima rengba ka fu aberãpai foro gbiati gu ngarasaro mo aida na ni. Vurube gu rugapai nga ga be-basunge, gu kura abadona nga ga adungurati ima manga mbakadapai ka yugopai fu agu abatungusipai na abazakigene rengbe ka wirika gu kura fugo kaa tungusapai rogoho.

SUNGE ABAZAKIGENE

¹¹ Si naida abatungusipai dunduko ini gupai si aidaha tipa boro da ni moundo abazakigene, bazakigene, gbiati kparakpara abazakigene kodihe na gu kura asunge du tipa mangasunge Kindo ti aregbo dunduko. Si naida bazakigene ngia gu Kristano naima zio bapatiza du nga wene kpiapai, na rengbe agu apai du tipa ní ka mbu ní nifu gu namba asa si aida ní dihe kuti ngba tungusa wene pangbanga. Rondo Sunge Tungusapai Rogo Dungurati naidaha fu boro ní da ni moundo abazakigene gbiati bazakigene, na tipa kparakpara bazakigene, be-basunge naidaha fu boro.

¹² Moundo abazakigene, i rengbe ka sia ni tipa diwi sa, watadu dungu adiwi, watadu tipa gbanga regbo da kinaho ka kina ni mbuhe ni ni tiní ringbisihe kuti agu apai du tipa gani raka. Dungu abatungusipa Kindo nidu na ngbarago kaa mangasunge ni amoundo abazakigene ti gu kura aregbo wa ti regbo Tingida Pakpio Yesu, watadu ho babi rimbasa aye ni ka bi dungurati. Aguyo nasia regbo ongoda ti sunge. Agu awirina naima zio bapatiza du sukuru yo rengbe ka mangaha ti gu regbo i aongoda ti sukuru. Abatungusipai ima rengba ka sia ka mangasunge amoundo abazakigene tipa ka fu agu asa du kusende bara rogo agu adiwi nga Marungu na Zerekpe gbiati gu diwi babi rimbasa naye ka bi dungurati. Ringbisihe kuti agu apai du tipa gamo raka, kangia mo nga gu boro du gani mangaapai ni wenehe na niruru he, na mo rengbe arengba kada ti bakio agu asa si aidaha, na mo nabihe nga mo ima rengba ka dia diwi sa watadu susi gure kuti sunge moundo abazakigene, rago angbaangba ti abaakumba ka wisigo gamo fuomu tipa gi momu nga ga sunge re.

¹³ Tipa ka rẽ tipa sunge bazakigene, si naida mo du ni gu boro nika daada ti agu asa si aidaha bero rogo garã sa. Nidu mo ni bazakigene, si nika ida mo mangisunge sa na gamo dungurati. Agu abazakigene natungusapai kakaka nga maku fu dungurati, mbiko i na banyemupai ku kpoto aboro yo i du zaaza tipa tungusapai na kini ngarasi kura aboro i mangisunge abazakigene. Ono tie, mbata fu mo da ni bazakigene, si naida mo du ni gu batungusipai nga wene kpiapai niima zio bapatiza kandara tipa adiwi sita.

¹⁴ Kparakpara abazakigene, i nasia yo gbe dagba agu abazakigene du gayo sunge tungusapai na wene sangbanaha ti ni. Si naida i du a ni agu aboro rengbe ka mangasunge rogo ai gu ba be-basunge asia ka keda yo ku rogoho. Dedede, i nakeda yo ku rogo gu dagbarago adunga na abatungusipai rogoho ya tipa i tungusipai fu aboro na ki kusi vovo dungurati. Ti gu kura aregbo, i nakeda kparakpara abazakigene ku rogo agu adungurati naida na undo tipa ka tungusapai fu aboro rogo gayo dagbarago. Gu kura kparakpara abazakigene nga abaakumba, i nakeda yo ti kura aregbo i ndu ka undo rukutu adungurati, zavura ho adunga zingo ni ya tipa abatungusipai vurũ. Kparakpara abazakigene nagbia wiri undo agbia tipa si undo yo na agu apai si aidaha ka raka. Gu kura kparakpara abazakigene i nasia yo tipa kina bete regbo gbua.

AMOKEDI

¹⁵ Gu Rondo Nangerakuriipa Sunge Tungusapai nga ga Riigbu Bipasunge nasia amokedi, nga aguyo be-basunge nga ga ringara akeda yo i ndu ka mangasunge rogo agu adagbarago du na dungu aboro rogoho. I naundo ni bakerehe rogo nyakasa adungurati na kini undo ho si nyaki rogo tungusapai na manga agu apai nga ga toro. Dedede, i naraba amokedi rogo gu Sukuru Nga ga Abatungusipa Kindo. I naundo yo na abambu gbiati bete marã tipa raka.

BABI RIMBASA

¹⁶ Agu aboro Riigbu Bipasunge asia yo ni ababi rimbasa, i nagbia rabahe mbata na fuo gure i ki kedi yo i ndu ka mangasunge ni ababi rimbasa tipa bete regbo tipa ka gbia inohe. Agu awirina re ima kpinyemu tungusapai gbiati awirinayo. I nga agu abazakigene du zaaza, ni wene awisigi Baibiri, na ni wene abagumbapai gbiati abayugupai. Rogo gayo raka yo i nayugo apapara zuzu toro, i arõanga kina kubani sa te, na i na ruru bipai gbiati rugatinapai. Ka gu wirina re ngia rogotise, si naida diako ngia gu nazakigene nga wene kpiapai rogo mangaapai yo na kini mangi fu awirina ngba wene gene. Ri nga wene natungusipai. Ri ima rugatiri na pa gu irisa si aida gu diakumba nga Kristano du na ni, angianga kaa fura kuba kumbari watadu kadu na pagbia kuriko ya. Babi rimbasa na diako na dungu apai beyo tipa ka mangaha, sidu, agu aboro si aida i mangi gi sunge re si naida kpotoyo du wenengai. Abazakigene asananga he asana tipa gu sunge nga ga babi rimbasa te. Kuba gure, i nayugo gayo nyemupai fu gayo babi rimbasa nga gu boro rengbe ka fu aberãpai fuyo tipa gupai rengbe yo ka mangaha.

AGU ASUKURU NGA GA SIOKRASIA

¹⁷ Gu Sukuru Du Tipa Abatungusipa Kindo: Bakere zingo gu du ho tipa abatungusipa Kindo tipa i tungusipai rogo agu adagbarago tungusapai ata danga rogoho ya na i fu undo fu adungurati rogo toro yo. Sidu tie, agu awirina nga akumba na adee gbiati arogotise ima rengba ka sanahe tipa i idihe fuyo i gbia rabahe rogo gu Sukuru Du Tipa Abatungusipa Kindo. Fuo nyasa sukuru, i nakeda agu agude sukuru re ni abazakigene ku rogo agu aba du na bakere zingo abatungusipai rogoho rogo gayo aringara. Ono tie, agu agude sukuru ka idaha, i ima rengba ka fu kura sunge fuyo rogo gayo ringara watadu ku rogo gu kura ringara. I rengbe ka keda beteyo ni kparakpara abazakigene tipa bete regbo watadu nyeanye kindi. Agu abazakigene naida ka manga gi sukuru re ima rengba ka ino agu apai si aidaha tipa ka rẽ ti regbo gu dunguratise nga ga gu sukuru re ninaamanga ba bakere dunguratise yo nga ga aˈuru biata.

¹⁸ Gu Sukuru Nga Girada: Agu awirina nga akumba na adee, gbiati arogotise i asia yo tipa gi sukuru re du wa ka i pe pa-Ingirisi na kingia agu aboro namangasunge Kindo ti aregbo dũ. Si naida i du ni agu aboro duadu na rengba tipa ka ngarasa awirina na ka nyakasa sunge tungusapai, watadu abe-basunge. I ima yugoho nga i nga agu aboro du na nyemu ka undo awirinayo na i rengbe arengba ka undo gu kura aboro ngba wene gene i wiriki Ziazia Kekeapai na kini mangi agu arugute du rogoho gbiati agu arugapai nga ga riigbu. Gu Rondo Be-basunge nga ga gu ringara re, nasia agu agude sukuru naima rẽ i hiisi fuomu. Agu agude sukuru mangi gi sukuru re, i nakeda yo i ndu ka tungusapai watadu ku rogo be-basunge rogo gu kura ringara watadu gayo ringara.

SUNGE BETERE

¹⁹ Mangasunge Betere yo nga bakerepa momu. Gu rimo nga Betere rogoyo nga “Ga Mbori Bambu,” na gu rimo re ima rẽ mbiko agu aba re du agu apai nga ga toro amanga rogoho. Agu awirina du Betere yo namanga nyanyakipa sunge nga gu nakodapa kusa gaani awaraga du mburuhe rii Baibiri, ka saha ku rogo kura afugo na ka kparakaha. Riigbu Bipasunge nabi gu sunge i amangaha na nyanyakipaha, nga gu nangerakurii apai na kini fu arugapai fu adungurati rogo zegino dunduko. Dungu agu aboro Betere nga abasafugo, i namangasunge na kini raki rogo gu dagbarago i ape gu fugo i asaha rogoho. Gere nasayo i nidegetuyo kuti wai aboro ape gu fugo re na aˈuru dunduko. Si ima rengba ka undo a i ini singia aboro nagiarogo gu fugo i asaha wenengai ho awirina amangasunge ni na agu awaraga re.

²⁰ Bakere agu asunge namanga Betere yo nga nyanyaki asunge naida kpoto boro du wenengai. Mbiko gipai re, agu aboro i ayambayo ku Betere yo, i nga agu aboro naima kpara gayo raka fu Yekova na ki zi bapatiza nga paranga aboro du na wene kpotoyo na ome rogoyo yo. Kangia gu be-basunge du rogo gamo ringara na zingo, na mo na nyemu ka mangasunge Betere yo, mo ima rengba ka inopai ni bakerehe tipa wai rengbe mo ka rẽ be agu abaakumba du rogo gamo dungurati.

SUNGE MEKAARAGO

²¹ Sunge dudua agu abambu nga ga siokrasia nga ziazia sunge, si teketeke wakina gu sunge nangia ga dua ga Soromo yekaru. (1 Aba. 8:13-18) Dungu awirina nga akumba na adee nafu tiyo zaaza ka mangasunge na gayo regbo gbiati agu ahe du beyo tipa gi sunge re.

²² Ya mo rengba bero ka undo? Kangia mo nga gu batungusipai naima zio bapatiza naida ka manga gi sunge re, agu awirina nangerakurii sunge mekaarago rogo gamo dagbarago adu na bakere tambuahe tipa gamo undo na i nika du na ngbarago tipa ka raba ro ka si vura du vurũ nga mo na inohe te. Tipagine ka mo apenga ha ti ni fu abaakumba nga mo naida ka undo ya? Gu kura abatungusipai niima zio bapatiza rẽ tipa gi sunge re aima futiyo tipa ka mangasunge mekaarago nga ga riigbu rogo gu kura aringara.

²³ Dungu amomu duho tipa ka mangasunge mekaarago. Agu abatungusipai nga wene kpiapai du na bete inohe rengbe ka undo sunge mekaarago mbembedi na akpuyo ima rengba ka mangasunge ni gu baundosunge fu tini ka undo gu Sunge Mekaarago Namanga Rogo Dagbarago (Local Design/Construction volunteers). Agu akurayo na rengba beyo tipa ka songoda agu asunge du tuturũ tipa bete regbo na gayo be-basunge nasia yo nga i ima rẽ ka futiyo ka ndu ka mangasunge ni agu aboro nafutiyo ka mekaarago tipa aposo ue watadu adiwi biata. Agu aboro i nasia yo du gayo sunge nga mekaarago i nayamba yo nga agu amoyambu nga ga mekaarago yo. Gu moyambu namangasunge mekaarago i nakedi ni ku rogo gu kura ringara i nayamba ni nga gu moyambu namangasunge mekaarago rogo gu kura ringara. Gu Badona Nga ga Amekerago nakoda agu aboro na mekaarago gbiati aguyo nafutiyo ka undo sunge na i du nangerafuo asunge yo kodihe na agu abamekerago nagbaka akpia abambu watadu agu awirina futiyo rogo adungurati tipa ka songoda sunge me bambu. Gu badona nga ga abamekerago, i nandu ka mekaarago rogo aba ni bakiakia rogo gu dagbarago nga ga ga gayo be-basunge.

GAMO ASÁSÁ NGA GA TORO NGA GINE?

²⁴ Kangia mo aima kpara gamo raka fu Yekova, gamo nyemupai nga ka mangasunge fu Yekova nyeanye kindi. Ono gini asásá nga ga toro mo namoihe wa mo airiso Yekova? Du na agu asásá nga ga toro nika undo ro mo ini wai ka mangasunge na gamo ome gbiati gu kura gamo ahe na tatamana. (1 Kor. 9:26) Pa maa ngbatunga agu asásá nga ga toro re nasa boro ni sono rogo toro yo na si rengbe ka undo ro mo moiberã ro fuo agu apai nyakipaha gbe wa mo agbata gu kura amomu nga ga sunge.​—Frp. 1:10; 1 Tim. 4:15, 16.

²⁵ Gu mokedi nangia Pauro amoi wene kpiapai furani si aida ani wirikihe nibipa gaani sunge fu Mbori. (1 Kor. 11:1) Pauro afu tiko nyanyaki tipa ga Yekova sunge. Ko aima ino gupai nga Yekova aima fu dungu asunge fuko. Ko akepai fu agu awirina naadu Korinda yo nga: “Bakere ngbadimo ni zaza ha fere na bakere sunge.” Anga gupai re a nga rengo tipa rani te? Nirengo, dungu amomu du berani tipa ka mangasunge fu Yekova rogo dungurati, gbe nibipa tungusa gu wene pangbanga nga ga Kindo. A wa si adu ti rago Pauro, rimo ku rogo gu “bakere ngbadimo” re nakoda sovura kuti “dungu avura” rani. (1 Kor. 16:9) Pauro aima du na nyemu ka za tiko. Mo kparianga gupai ko apehe nga: “Mi namanga borore, ka sa ha ni kanga fere.” (1 Kor. 9:24-27) Ya mo kina gu bangisapai re ani amangaha?

²⁶ Aboro ni basasa i angarasa yo i moi agu asásá nga ga toro ringbisihe kuti agu apai du tipa gayo raka gbiati omeyo. Kura aboro namanga sunge Kindo na aregbo dunduko mbiko i aima maa agu asásá nga ga toro rogo gayo raka yo mbata fu i da ti ni. Zavura ho i adu ni kindi ni agude, avunguyo aima ngarasa yo gbiati kura aboro tipa i moi agu asásá re. Rogo gi gene re, i ima gbia ngbarago ti mangasunge ni bakerehe fu Yekova​—na i abiranga tiyo tipa mangaha te. (Snz. 10:22) Gu kura nyanyakipa sásá rengbe kadu nga ani tungusipai na aposo dunduko, wai ka tona fugo na boro na ki tona ka wisigo Baibiri na ni, watadu ka dia regbo ka mbakada adunguratise. Gupai nyakipaha gbe nga ani kakuti gaani ida nyanyaki na kini mangi gaani sunge fu Mbori wenengai. Ka ani mangihe wo, ani nika fu taarimo fu Yekova na ki da ti gaani asásá nga ga mangasunge fuko nyeanye kindi.​—Rk. 13:24; 1 Tim. 4:7b, 8.