Zereda Wai du Rengbe Mo ka Gbiaha?

MBIKO ani naraka rogo kpakarakpakara zegino, si naida ani mangisunge nyanyaki tipa ka gbia zereda. Wa vura duhe wo, zavura ho ani agbia bete zereda ni, dedede, ani naasota asota ka bandaha. Ginipai Fugo Mbori agumbaha nga gu rengbe ka undo rani ani du na ndikidi zereda kpotoraniyo? Na wai du rengbe ani ka undo gu kura aboro i gbiaha.

GINIPAI SI AIDAHA TIPA BORO GBIA ZEREDA NGA GA KPOTOSE?

Tipa ka du na zereda kpotoseyo, ani du wa ka ani du ni bandabanda rani na kidu zezeredi kpotorani yo. Si naida a ani sonosi nyanyaki pabakure na kura aboro. Ka gbia zereda kpotoseyo, gu nyaki paha anyaka gbe nga, si naida ani sonosi mbembedi pagume na Mbori. Wai du rengbe ani ka manga gipai re?

Ho ani airisa ga Yekova ruru azinahe gbiati arugute ni, ani nayugoho nga ani nakido kuti ko na ani nakpinyemu kadu na zezeredi pagume na ko. (Yere. 17:​7, 8; Yak. 2:​22, 23) Tipa ko tigako, ko nadu mbembedi na ani na ki fu zereda furani nga ga kpotoseyo. Yesaya 32:17 naya: “Gu sunge nga ga rurupai si adú ni pa zereda, gu pai ka kura be rurupai ki ngia du zezeredi na du zukazuka nye anye kindi.” Ani rengbe ka gbia ndikidi zereda nga ga kpotoseyo ni gia ani sangba Yekova kina boro kpotoraniyo.​​—⁠Yes. 48:​18, 19.

Ani nagbia undo a tipa ka sonosa gu zereda nga ga kpotoseyo vurube gu iiriwo gamahe nga ziazia toro nga gu naye be Barani du ngbangbaturũ yo.​​—⁠Amo. 9:​31.

GA MBORI TORO NAUNDO RANI ANI DU NA ZEREDA KPOTOSEYO

Gu mokedi nangia Pauro agumba gupai nga zereda nga biata papara “zuzu Toro.” (Gara. 5:​22, 23) Wa duhe nga zereda kpotoseyo naye be ga Mbori toro, si naida ani mbu ziazia toro si du na maapai kurirani tipa ani sonosi gu zereda nga ga kpotoseyo. Ani makianga pa agene ue nga gu rengbe ga Mbori toro ka undo rani ani gbia zereda ngbaha.

Bambataha nga, ani nagbia undo ka sonosa zereda ni geda ani Fugo Mbori dedede gako toro adu kugiipa kehe. (Tam. 1:​2, 3) Wa ani nikaa berãkurii gu pangbanga nga ga Ziazia Kekeapai, ga Mbori toro nika undo rani ani rugutirani na ga Yekova berãpai tipa dungu apai. Ni kpiapai, ani naye ka bi gupai nasako ko nye ni boro zereda na wai du zereda na nyanyakipaha fuko. Ho ani amanga gu ngbatunga apai ani awirikaha rogo Fugo Mbori yo re ni, ani nadu na bakere zereda rogo gaani raka yo.​​—⁠Snz. 3:​1, 2.

Uehe nga, si naida ani kpari tipa ga Mbori ziazia toro. (Rk. 11:13) Yekova kidohe nga ka ani gbata undo beko, “gu zereda nga ga Mbori nagasi rugatinapai dunduko, si abánda [kpotoraniyo] na [gaani] berã rogo Kristo Yesu yo.” (Frp. 4:​6, 7) Ho ani akpara ni dedede kini sana Yekova tipa gako toro, gaani Mbori na hiiso kpotoraniyo na gu zereda nga gu du sa kina be agu aboro du na wene pagume na ko.​​—⁠Rom. 15:⁠13.

Wai du gu kura aboro namangipai kuti gu rugute nga ga Ziazia kekeapai re na ki mangi agu aariapai nga gu naundoyo i du na zereda dagbayo na Yekova, zereda na tiyo, na zereda dagbayo na kura aboro?

WAI I AGBIA NDIKIDI ZEREDA KPOTOSEYO

Gu kura aboro kinaho areme du rogo gu dungurati nga ga aKristano naadu mbata ni ‘aboro zinga’ ono i awere nga agu aboro naberãpa akurayo, namangapa akurayo, du na zerangbaduse, na kini mangipai na aboro ngba zereda.a (Snz. 29:22) Mo bingo wai gipai re adu nirengo tipa kura abatungusipai ue nga aguyo nagbia undo tipa ka dia be gu sino nga ga zinga na ka sonosa zereda na kura aboro.

Ga David gbegberẽ sino aima du na maapai kurii gu gene ko anaafura ngbaha. Mbata fu ko gi rengo, ko anaabisirapa kura aboro dedede na kini fura na kina zinga na gako aborokporo. Kusa, David abi gupai nga si naida ko mangi ariapai na ki da ni boro zereda. Wai du ko awiriki ka da ni boro zereda? Ko aya, “Mi atona ka mangapai kuti agu arugute nga ga Ziazia Kekeapai rogo gimi raka yo, ni sangbana gipai re, mi asonosi irisa dagba tire na gimi aborokporo.”

Gu rago Rachel asono rogoho adu na maapai kurii gari sino mangapai. Ri aya, “Zavura awere, Mi nasota asota na gu sino nga ga zinga bambiko mi asono rogo gu kporo aboro anidu na zinga rogoho dedede.” Ginipai naaundo ri ri ye kada ni zezeredi boro kisusi? Ri akaragapai ki ya, “Kido kuti Yekova rogo kparakpee yo.”

ADavid na Rachel nga gu kpiapai du ue nga gu nayugo gupai nga ho ani amangaapai ni kuti agu arugute nga ga Ziazia Kekeapai na kini kido kuti ga Mbori toro si undo rani, ani naduadu na zereda. Si tie ziazia nga, wa vura duhe nga ani naraka rogo gu zegino du ni zingizingi he, ani ima rengba ka du na gu zereda kpotoseyo nga gu nasarani ani du na kodatise na gaani aborokporo gbiati akuarani aKristano. Wa vura duhe wo, Yekova na zungadi rani nga ani ‘dú zezeredi na aboro dũ.’ (Rom. 12:18) Ya mo ka pai mangi amanga wo nzunzu, na gini aundo naye ti gu ome ani amangaha ka manga zereda?

ONI DU ZEZEREDI NA KURA ABORO

Ho ani atungusapai ni, ani nayamba aboro i gbia undo ti gaani zezeredi pangbanga du tipa ga Mbori Kindo. (Yes. 9:​6, 7; Mt. 24:14) Si nafu kina ngbarago furani nga badungu aboro ima dia gu pangbanga re kugume. Ni sangbana gipai re, i ima diabe gu bakere gberãrago watadu gu zinga i adu na ni tipa agu apai i abihe namanga rogo gu ba du yo rogoho. Kuba gure, i awere na ndikidi maabangirise kumbatayo na si nafõngbaduyo yo i “gbáta zereda, ki dusia ha.”​​—⁠Tam. 34:⁠14.

Ono tie, anga aboro dunduko nadegatuyo kuti gaani pangbanga ti bambata regbo te. (Yo. 3:​19) Wa vura duhe wo, ani nagbia undo be ga Mbori toro tipa ka tungusa wene pangbanga fuyo ngba zereda na rogo irisa yo. Rogo gi gene re, ani napekafuo gu ga Yesu arugute tipa sunge tungusapai du ni kekehe rogo Matayo 10:​11-​13, ko afu gu rugute nga: “Oni ki ta rima ku bambu yo, nipoi kuti aboro. Ka gu bambu rengbe tipa roni, gaoni zereda ki ye ku ri he. Ono ka si arengba nga tipa roni ya, gaoni zereda ki karaga tihe furoni.” Ho ani apeka fuo ga Yesu rugute ni, ani ima rengba ka guari kidu na kina gaani zereda kpotoraniyo kini moibangirani nga gu boro re nika dega tuni adega ti kura regbo.

Ani nafubee a tipa zereda ho ani afura ni na agbia ngbi rogo irisa yo, kodihe na aguyo nasoga gaani sunge asoga. Ni kpiapai, kura irangbii nga ga kura ringara sa Afirika yo adu na iraira bipai si ki sa gupai nga ka i idinga ha furani ani naameka aBambu Kindo ya. Mbiko awirina adu na gu maabangirise nga ka mbakada gupai re ngba zereda, i asia gu wirina naaima manga sunge ni mokedi rogo gu papara Afirika re ko ndu ka bi gu Mokedi nga ga gu ringara re London ringara aNgirisi yo. Si adu nga ko ndu ka pepa gu zezeredi sunge nga ga aDezire Yekova nga gu naamanga rogo gu ringara nga ga gu bakerepa boro re. Wai du sangbana gipai re adu?

Ko ape gupai nga, “Ho mi adani rogo gu ba nga gu i adia aboro rogoho kugume, gu boro nga gu ni naadia aboro kugume, kina wai ni avo roko asa re mi dakuti gu digisopai ni kina boro ipo nga ri nga ngbatunga agu aboro mi awiriki gayo fugo. Sidu mi afu sene furi rogo payo yo. Gipai re aima iriwo tiri, ri ki sana re nga, ‘Gini ndupai ye mo ti ni kono?’ Mi agumba gupai fu ri zezeredi nga mi nakpinyemu ka bi Mokedi. Ri ayambu gu kiki pa boro re rogo terefuni, na ho ko aye ni ka gbia re, ko afu sene fere kina rogo payo yo. Tingba fuo gure, ko adegetuko fere wenengai ho mi aapeka pa gu zezeredi sunge ni nga ga aDezire Yekova.”

Wai gu wirina re asakipai na irisa aima dia bakere gu iraira bipai gbiati sogote gu Mokedi re adu na ni nibipa gaani sunge. Fuo bete regbo kusa, agu agbia ngbi nga ga gu ringara du Afirika yo re ki idipa meka aBambu Kindo fu awirinarani. Nairiwo wai awirina angi na ngbarago tipa gu zezeredi sangbanapai re! Nirengo, mangapai na kura aboro na irisa naye na wene aundo kodihe na zereda.

DU NA ZEREDA NYEANYE KINDI

Areme, ga Yekova aboro na ndikidi zereda dagbatiyo. Mo nika duadu na gu ngbarago re wa mo nikaa mangasunge ka sonosa agu apapara zuzu toro re rogo gamo raka yo. Gu nyakipaha anyaka gbe nga, Yekova nika ida namo na mo ki gbia bakere nyenye zereda rogo ga Mbori vovo zegino.​​—⁠2 Pet. 3:​13, 14.