“Mi Na Oni Ti Arago Dũ”

“Dungu aboro nikaora koyo na kono, inahe amáa pai.”—DAN. 12:4.

GAONI KARAGAPAI NGA GINE?

Rogo gi gaani regbo re, wai gu aboro nagbia ‘ndikidi inohe’?

Wai gu agu aboro nadia inohe kugume nada ‘nidungu’ yó?

Rogo gini agene ndikidi inohe ‘namoipai’?

1, 2. (a) Wai gu ani aino gupai nga Yesu na kina gako azogo awere na ko nikadu adu naayo kumbatayo? (b) Ringbisihe kuti Daniere 12:4, ginipai si adu nga si nika manga mbiko wisigo Ziazia Kekeapai sirisiri?

ONI makianga gupai nga oni awere Paradizo yo. Awiso dunduko oni azinga rameyo kpotoroni kidu wenengai tipa ka tona uru. He ho nga aigitere berewe te. Agu asigaro nga ga gbinza berewe a te. Oni nangera wenengai, kini gi fuo he wenengai, kini zadi he wenengai, na kini hia he wenengai. Ome tironi wenengai, oni nagbia ngbarago agbia ti gu sunge oni amangaha, oni na dungu abakurearoni, na wiri baka bangirise ho du oni nani te. Agi apai du kuari re dunduko nga agu amaku aboro nika gbiaha tii ga Mbori Kindo. Kristo Yesu, nga gu boro i namoi ní ni Bakindo nika fu amaku fu agu aboro ko nika zogarago kuriyo na ki yugupai fuyo tipa gu inohe nga ga Yekova.

² Ti gu regbo re, Yekova nika undo gako ruru amoyambu aundo tipa i yugupai fu gu kura aboro tipa ko. Mbori gbiati Wiriko aima digo niundo ruru aboro tipa dungu kama agarã. Mbata fu Yesu ga ku ngbangbaturũ yo, ko akido gako ruru abawiriki ki ya ko nikadu adu naayo. (Oni gedi Matayo 28:19, 20.) Tipa ka nyakasa gaani idapase kuti gu mokido Yesu amangihe re, ani wisigingo gupai ga Mbori toro adu kugii pa kehe, nga gu i akehe rogo gu Babera nadumbata agarã wa 2,500 kusayo. Nibipa gi ‘digido rago’ ani araka rogoho awere re, gu nebi nangia Daniere akepai ki yaa: “Dungu aboro nikaora koyo na kono, inahe amáa pai.” (Dan. 12:4) Gupai du rogo gi veresi re nga “dungu aboro nikaora koyo na kono,” si narukuba wisigopai dudunguro. Gi sangbanebi re nayugo gupai nga agu aboro nawisigo averesi wenengai, i nagbia gu maku nga ga ino gu ndikidi rengo nga ga Fugo Mbori. Gu sangbanebi re agumba gupai a nga dungu aboro nika dia ‘ndikidi inohe’ kugume. Si adu nga gu inohe re amaapai. Na si adu a nga gu inohe re agbandaka rogo dungu aba na kidu kpaima. Wa ani kaa wisigopai tipa wai gu sangbanebi re nadigisi tihe, ani nika bi gupai abi nga Yesu na kina gako abawiriki areme na Yekova gu duadu na rengba beko ka manga agu apai dunduko kido ko he tipaha.

NDIKIDI AKRISTANO AGBIA ‘NDIKIDI INOHE’

3. Ginipai namangi tipa ‘ndikidi inohe’ tifuo kpio amokedi?

³ Tifuo kpio amokedi, gu samungu kuti ndikidi pambori i agumbapaha nisangbaanebi dagba ndikidi aKristano atona ka manga na kini gbandaka wakina we. (Amo. 20:28-30; 2 Tesa. 2:1-3) Tipa dungu kama agarã fuo gure, ‘ndikidi inohe’ adu gbua tooni angianga kina dagba agu aboro yo naainongo pai tipa Ziazia Kekeapai kandara tooni ya, ono dagba agu aboro a naamanga tiyo nga aKristano nga ami. Wa agu abangbembatayo rogo agu akanisa i aya tipaha wee si nga ga aKristano avura kaa gumba gupai nga i naida aida kuti Ziazia Kekeapai, i aayugo azire tipa pambori. ‘Agu ayugopai nga ga adaimona’ nga gu afunga irisa fu Mbori ya. (1 Tim. 4:1) Nisangbana gipai re, dungu aboro aainongo gu rengo du tipa Mbori te. Kuba gure, i ayugu agu azire fuyo nga Mbori nga Tirinita, mbisimo boro akpingo te, na kura mbisimo aboro kinaho nagbi rogo we-iferno nyeanye kindi.

4. Wai gu du umba riko aKristano atona ka gbata ‘ndikidi inohe’ rogo agu agarã nangia 1870?

⁴ Ono apai aˈariatihe rogo agu agarã nangia 1870, agarã wa 40 mbata fu “kusa rago” tona. Umba riko nga ga ruru aKristano adunguratiyo kurogo gu ba nga Pennsylvania, U.S.A., tipa ka wisigo Ziazia Kekeapai sirisiri na ki gbata ndikidi inohe. (2 Tim. 3:1) I anaayamba tiyo nga Abawiriki Ziazia Kekeapai. I angianga agu “airatatamana na arugutinapai” nga aguyo Yesu agumba gupai nga i nika oka inohe beyo te. (Mt. 11:25) I angia aboro umbasitise na kidu na ndikidi nyemu ka manga gupai Mbori akpinyemuhe. I anigedi Ziazia Kekeapai, ki sakipai tipaha, ki berẽkurii agu averesi re, na ki kpari tipa ga Mbori rugapai. I anaaringbisa averesi rogo Ziazia Kekeapai na akuraha, na ki niwisigi agu apai gu kura abawetekepai tipa Ziazia Kekeapai akehe. Tooni tooni, agi Abawiriki Ziazia Kekeapai re aye ka ino agu arengo du rogo Ziazia Kekeapai nga gu naadu nigbugbuhe tipa dungu kama agarã.

5. Gini asásá naadu rii Abawiriki Ziazia Kekeapai yo i akusi agu atrakte ti ni rimoho adu nga The Old Theology?

⁵ Rago aima ngba ti agu Abawiriki Ziazia Kekeapai re nikerehe na agu apai i awirikaha re, ono si aasanga yó i du na rukö te. I aima rugatiyo na gupai nga agi arengo re aima du rogo Ziazia Kekeapai tona bakuru kusayo. Sidu, i agumbanga gupai fu kura aboro nga i gbia vovopai te. (1 Kor. 8:1) Kuba gure, i akusi atrakte rimoho adu nga The Old Theology tipa ka yugo agu arengo re fu kura aboro. Gayo sásá adu nga ka undo aboro i rugutiyo naapa agu arengo i akehe kurogo Ziazia Kekeapai. Gu bambata trakte i akusihe aundo aboro tipa i “wiriki Ziazia Kekeapai tipa wa ka i ruho ka ká agu asino atitase nga ga aboro na ki idi na gu rengo ayugopai tipa agu aida nga ga pambori Yesu gbiati amokedi ayuguhe.”—The Old Theology, Na. 1, Zerekpe 1889, kpe. 32.

6, 7. (a) Gini arengo i aundo rani ani inihe natona rogo agu agarã nangia 1870? (b) Gini arengo nzunzu ngba tironi gbe?

⁶ Tipa agarã naima susa 100 awere natona ti regbo gu umba riko aboro re, badungu arengo kuru kuyangura.a Ho ani awirika agi apai re ni, anga ani nawirikapai gbua te, ono ani nawirika agu arengo rengbe ka mbakada gaani raka. Si naundo rani ani ini Yekova, asinoko gbiati gako aringbisapai. Si nasakapai a tipa ga Yesu sunge, si nasaka ndu gupai ko araki ti ni auru kpotosende ane na ki kpi, na kini yugu gupai ko amangaha awere. Gi nyanyakipa arengo re nayugo ndu gupai furani Mbori ambu gbegberẽ apai ti ni si nimangi, ndu gupai ani akpi ti ni, gu gene si aida ani kpari ngbaha, na wai rengbe ani ka gbia ndikidi ngbarago.

⁷ Ani gu duadu awere na rengba berani ka giarogo agu arengo yo naadu ‘ni kisi kisihe’ tipa dungu kutu agarã nga gu nadigisotihe rogo gi yangara arame re. (Dan. 12:9) Agi arengo re nakoda agu du rogo Ziazia Kekeapai naabaha, gbe agu du rogo aKitabu Wene Pangbanga gbiati gu buku nga Yugoti. Yekova ima undo rani a ani rugu tirani na rogo agu apai yo ani aarengbanga ka bihe nibangirani ya. Ngbatunga agu apai duwa pa maa yó Yesu nibakindo, gu vura namangi ngbangbaturũ yo, na wai i aba Satana ku auru kpotosende no. (Yugo. 12:7-12) Mbori ima sarani a ani inipai tipa agu apai rengbe ani arengba ka bihe. Ngbatunga agu apai duwa avura, abazigizo, riri akaza, zingo riahe, gbiati agu azanga sinombori nasa gupai nga gi regbo ani araka rogoho re du ‘nigbegberẽhe.’—2 Tim. 3:1-5; Rk. 21:10, 11.

8. Da ani atambua ní tipa agu ahe ani nabihe na ki gihe?

⁸ Si taata furani ani idi kuti gupai Yesu agumbaha fu gako abawiriki ki yaa: “Bangironi ni betedi he bambiko oni nabi agi apai re! Bambiko ya mi fu roni, dungu anebi na abakindo akpi nyemu ka bi agu apai oni abi, ono i abi nga ha te; na ka gia agu apai oni agia, ono i agia nga ha te.” (Rk. 10:23, 24) Ani nafu tambuahe fu Yekova wa ko nasa rani ani bi ngbatunga agu apai re na ki gihe. Nairiwo gu ngbarago du ani nani ka ino gupai nga Mbori namangasunge na gako ziazia toro nga ‘moundo’ tipa ka undo rani ani rugutirani na rengo! (Oni gedi Yoane 16:7, 13.) Si angba wa pai ka ani aandu kindi kumbatayo kaa bi gu inohe re na nyanyakipaha na kini gumbapaha a fu kura aboro zanga nye nani fu kina tirani!

‘BADUNGU’ ABORO DI ‘NDIKIDI INOHE’ KUGUME

9. Ginipai i agumbaha rogo gu magazini nangia ga Zerekpe rogo gu garã nangia 1881?

⁹ Rogo Zerekpe nga ga gu garã nangia 1881, fuo garã sa na bete adiwi fuo i kusi bambata Ngbaõbambu Sinziri, i akusi kekeapai sa nga gu riihe aya, “I Naida Abatungusipai 1,000.” I agumba gupai rogo gu kekeapai re nga si naida agu aboro duna rengba beyo ka dia bakere regbo ku gene tungusapai yo da ni abazakigene. Si agumba gupai nga i ndu kurogo agu aba dunduko rengbe yó ka ndu kurogoho ka gbata gu ndikidi aKristano du na nyemu Mbori ono adunga na ndikidi inohe ya na ki yugupai fuyo tipa gu rengo du tipa Mbori gbiati Ziazia Kekeapai.

10. Ginihe nangia ga aboro karagapai kuti gu yambahe i afuhe nga i naida aboro da ni abazakigene?

¹⁰ Pa gumba agu Abawiriki Ziazia Kekeapai re gupai nga i naida abatungusipai ayugu gupai nga i aima inoho nga gu nyanyakipa sunge si aida aKristano mangihe nga sunge tungusapa wene pangbanga. Ono ti gu regbo i afu gu yambahe re, bete kama aboro gbua naandu tipa agu adunguratise nga ga Abawiriki Ziazia Kekeapai, sidu, dungu aboro adianga gu yambahe re kugume wa gu i aberẽhe te. Ono dungu agu aboro nagedi trakte watadu magazini aini gupai nga i aima gbia rengo, na i ki idi ka undo kura aboro. Nikpiapai, tifuo gu kura kumba sa naadu London yo rogo ringara aNgirisi gedi kekeapai rogo Ngbaõbambu Sinziri gbiati buku Abawiriki Ziazia Kekeapai akusihe rogo gu garã nangia 1882, ko akepai ki yaa: “Mi nahõpai beroni, oni yugu wai fere rengbe mi ka tungusapai tipa gupai Mbori akpinyemuhe digisitihe.”

11, 12. (a) Gini asásá du ani nani areme nga gu nawira kinagu agu abazakigene nadumbata adu nani? (b) Wai gu agu abazakigene re anaatona adungurati?

¹¹ Rogo gu garã nangia 1885, agu Abawiriki Ziazia Kekeapai naamangasunge ni abazakigene, bangeyo aima dati 300. Agu abamangisunge tungusapai ti aregbo dũ re adu na kina gu bangisa sásá du ani nani areme, nga ka sa aboro niga Yesu Kristo abawiriki. Ono tie, gu gene i anaasa aboro ngbaha ni abawiriki adu kia ti gaani areme. Areme, ani nawirika Ziazia Kekeapai na aboro nibasasa, kini fu arugute fuyo nibasasa. Fuo gure ani ki yambu yó tipa i ye tipa dunguratise kurogo agu adungurati i naima sigiraha. Ono ti agu aregbo re, gupai Abawiriki Ziazia Kekeapai anaamangaha nga i anikparaka abuku, ki dungura agu aboro naadu na nyemupai kurogo ba sa nidunguyo tipa ka sakapai naayo rogo Ziazia Kekeapai. Kuba gupai nga i naawisigopai na aboro nibasasa, gupai i anaamangaha nga kaa sigira “riko nga ga aboro” watadu adungurati.

¹² Nikpiapai, rogo gu garã nangia 1907, badona nga ga abazakigene ata rogo gbata sa kaa gbata agu aboro naadu na gu buku beyo nga Millennial Dawn (gbiati gu nga Studies in the Scriptures). Ngbaõbambu Sinziri agumba gupai nga: “I anidungura agi aboro [agu aboro naadu na nyemupai] re tipa tooni dunguratise kurogo kporo sa. Ki fura naayo riipa ga Mbori ringbisapai tipa aboro tipa Rago Poso sa naabaha, na gu Rago Poso naaningbe tifuo gure, i ki ngarasi agu aboro re tipa i naamanga adunguratise amanga dedede.” Rogo gu garã nangia 1911, agu awirina re aˈaria gayo gene tungusapai. Awirina ti barayo nga 58 andu kurogo dungu aba rogo agu aringara nga Amerika gbiati Canada tipa ka manga agu agumbapai yo du tipa aboro dũ. Agi awirina re ani rogo rimo agu aboro naadu pati agu agumbapai re gbiati gayo adresi na ki mangi mbakadapai tipa i nidunguratiyo kurogo akporo tipa ka kusa vovo dungurati. Kada rogo gu garã nangia 1914, bange agu adungurati nangia ga Abawiriki Ziazia Kekeapai rogo zegino dunduko aima dati 1,200.

13. Ginipai nazeresa ngbaroni nibipa sunge tungusapai areme?

¹³ Areme, bange adungurati ima da ti 109,400 rogo zegino dunduko, na bange awirina nga akumba na adee nga aguyo namangasunge ni abazakigene ima da ti 895,800 rogo zegino dunduko. Bange agu aboro di ‘ndikidi inohe’ kugume na kini mangipai kutini rogo gayo raka yo ima mbeda awere kada ti amirioni 8. (Oni gedi Yesaya 60:22.)b Kina ngbarani nazera ka bi wai namba agu aboro nadia rengo kugume asona kumbatayo bambiko Yesu agumba gupai tipa gako abawiriki nga ‘aboro asoga yó asoga’ mbiko rimoko. Ko agumba gupai berewe nga i arungosi yó, ki ba yó ku bambukiso yo, na ki imi yó. (Rk. 21:12-17) Wa ga Mbori aboro navura kaa gbiatiyo na arungo be Satana, gako adaimona, gbiati gu kura aboro vurũ, i ima du na bakere diabese rogo gu gayo sunge yo nga ga sa aboro ni abawiriki. Areme, i natungusapai “rogo zegino dunduko,” rogo agu arago du na bakere faarago rogoho gbiati agu duna bakere zere rogoho, rii ambia yo, rogo ugu-angbii-ngume, rogo kikindigi agbata, na rogo agu aba kina bete aboro araka rogoho gbua. (Mt. 24:14) Kina ga Yekova ome sa nga gu he naundo yó i mangi agi apai re dunduko.

NDIKIDI INOHE ‘MOIPAI’

14. Wai gu ‘ndikidi inohe’ namoipai rogo zegino vurube abuku gbiati amagazini?

¹⁴ ‘Ndikidi inohe’ moipai bambiko gupai nga dungu aboro natungusa wene pangbanga. Si gbandaka a be gu undo nga ga abuku gbiati amagazini. Rogo Bamburu rogo gu garã nangia 1879, Abawiriki Ziazia Kekeapai akusi gayo bambata Ngbaõbambu Sinziri. Ti gu regbo re, i anaayambaha nga Zion’s Watch Tower and Herald of Christ’s Presence. I atumo marã fu kura basunge kusa awaraga sa tipa i kusi gu magazini re. Gu ba kusa awaraga re akusi bangehe gbua nga 6,000 rogo pa-Ngirisi. Charles Taze Russell garãko adu ti gu regbo re nga 27 i asiako ni bake agu amagazini re na ki sia kura awirini ni akumba bisue nga aguyo naima du na wene inohe nga ga Ziazia Kekeapai tipa i naake kura kekeapai kurogo agu amagazini re. Areme, i nakusa Ngbaõbambu Sinziri rogo afugo du bangehe nga 195. Si nga gu magazini i akparakaha rogo zegino kisusi kura amagazini dunduko, bange gu i akparakaha dunduko ima dati 42,182,000. Gu kura magazini du rimoho nga Awake! ngbe tifuo Ngbaõbambu Sinziri. I nakusa bangehe nga 41,042,000 rogo afugo du bangehe nga 84. Agu abuku gbiati Ziazia Kekeapai i akusaha rogo garã sa, bangehe ima dati amirioni 100.

15. Wai gu ani agbia marã tipa kaa kusa gaani abuku?

¹⁵ Gi bakere sunge re, i nasongodaha na gu gamahe awirina afuhe. (Oni gedi Matayo 10:8.) Gipai re nazeresa ngba dungu agu aboro namangasunge ba kusa abuku yo bambiko i ima ino gu bakio marã nagberã gene agu ahe yo duwa kpewaraga, ime kepai, gbiati gu kura ahe du tipa ka kusa abuku. Wirina sa nga gu ko ninaandu kaa ngbe agu ahe nga ga gbingbida abuku fu Betere agumba gupai nga: “Ho aboro sunge-bagaahe ayeni ka bi agu asunge ani amangaha na gu marã awirina afuhe nigamahe, kina ngbayo nazera. Kina ngbayo nazera ka bi gupai nga agu ahe i agbingbida abuku nani nga gu nakusa badungu abuku kina berani si ki vura du vurũ nga marãha ima kio. Gu kurapai berewe nazeresa ngbayo nga agu aboro namangasunge Betere yo, dunguyo nga aparanga na i dunduko du na ngbarago.”

GU INOHE NGA GA MBORI NIKA HI KPOTOSENDE

16. Tipagine Yekova ayugu ‘ndikidi inohe’ ti ni fu aboro?

¹⁶ ‘Ndikidi inohe’ moipai tipa kina boro wene ndupai. Gupai Mbori akpinyemuhe nga “aboro bati dunduko, ki ye sa gu inahe nga ga rengo.” (1 Tim. 2:3, 4) Yekova naida gupai nga aboro ini rengo tipa ka irisoko ngba wene gene na ki gbia amaku beko. Niyugoko ‘ndikidi inohe’ fu aboro, Yekova dungura ruru yangara mbedimbedi aKristano. “Dagba rika aboro dunduko, na angbatunga yo, na aboro, na angbatunga afugo dunduko,” Yekova nadungura “bakere rimbasa aboro” tipa i raki nyeanye kindi auru kpotosende ane.—Yugo. 7:9.

17. Ginipai gu sonakumbatayo namanga rogo ndikidi irisombori yo ayugoho?

¹⁷ Namba ndikidi airisimbori ima sona nibakerehe rogo agu agarã 130 susi kusayo re. Gi sonakumbatayo re nayugo gupai nzunzu nga Mbori gbiati gu boro ko amoi ní nibakindo nga Yesu Kristo aima digo ninungusi ga Yekova amoyambu, nibanda yó, nimbakadi yó, na niyugupai fuyo. Pa sona yó wa gure nayugo gupai a nga agu amokido Yekova namangihe tipa kumbatayo duwa ka si digisitihe. Ziazia Kekeapai nagumba gupai nga: “Kpotosende ahí be ina pa Yekova wa aime nahisa gango baime.” (Yes. 11:9) Nairiwo agu amaku ngbatunga aboro dunduko nika gbiaha re!

[Footnotes]

[Gu sura du ti kpewaraga 14]

Agu Abawiriki Ziazia Kekeapai nadumbata angia agu aboro naadu na umbasitise na i adu na ndikidi nyemu ka manga gupai Mbori akpinyemuhe

[Gu sura du ti kpewaraga 15]

Yekova nabi gu ome oni amangaha tipa ka gbandaka gu ‘ndikidi inohe’ nga ga Mbori na nyanyakipaha