Fu Iriso fu Beere, Ba-waraga, Gbiati gu Sunge Akodanga Sunge Asekere Ya

Fu iriso fu beere. ADezire Yekova idi kuti gupai nga nugodi fu beere watadu fu iriso fu he gbiati bi agu abia nasambuo ringara, nga gu iriso nayugo gupai nga ringara watadu bangbembatayo rogo ringara du naye na bata, angianga Mbori ya. (Yesaya 43:11; 1 AKorindo10:14; 1 Yoane 5:21) Ngbatunga bangbembatayo wa gu re angia Bakindo Nebukadenesara naadu rogo gu Babera naadu mbata. Tipa ka yugo wai fu aboro pako akii na wai ko adu zaaza tipa gako pambori, ko ambakadi kpiahe tipa aboro ni nugodi barabangirihe ki nibi abia tipa ka sambuo ho na ni. Ono tie aEbere biata nga Sadaraka, Mesaka, gbiati Abedenego aima ká ka nugodi fu gu kpiahe re, ki gumba gupai nga ka i vura rungosiyo dati kpio vurũ.​—Daniere, kapita 3.

Ba keke kuru apangbanga sa agumba gupai nga, “ti gi gaani regbo re, guhe aboro akiiso paha gbe na kidu na bakere idapase kutini gbe nga beere, ho i asusa ni na beere pati akumba, i nadia kpakpari riyo yo kusa yo; aboro nakeka wene apai tipaha na agude kini bi abia iriso tipaha.” Aˈuru kinaho aboro airiso ho tipa ka kiisopa gayo ringara wa gu i naamangaha Amerika yo ti ramediwi biama nga ga Bamburu gbiati agu auru ongoda nga ga ‘asanto’ gbiati ‘ayekaru.’ Ti regbo pumbo rogo gu ringara nga Brazil, barutiriivura sa agumba gupai nga: “Beere nga nyanyakipa he na aboro nairiso ho kina wai i airiso gayo ringara.” Gu buku nga Encyclopedia Americana nagumba gupai nga: “Beere, wa kina wagiwagi ngua, nga ziazia he.”

Gu buku furayo tipaha kuari re agumba gupai barambeda kusayo nga “agu abia i abihe kaa sambuo ringara na ni, afugoho nasongoda agu apai nga ga birĩ-zogarago na si na agu asanahe rogoho du tipa Mbori fu bandahe fu ringara na aboro gu ringara re.” Sidu, ho ga Yekova amoyambu aká ni ka rimiso tiyo ku rogo agu apai nga ga fu iriso fu beere watadu bi agu abia nasambuo ringara mbiko gupai nga i nabihe ni guhe nafu gu iriso nga ga pambori, anga zingo ruru berã nga ni te. Buku sa du rimoho nga The American Character afura tipa gu awiri aDezire Yekova naká ka fu iriso fu beere sukuru yo na kini bi abia nga gu nasambuo ringara ki ya: “Aboro Bakere Bambu-gumba ngbanga ima da kuti gupai nga fu iriso fu beere gbiati bi abia sambuo ringara nga sino pambori.”

Baraho aDezire Yekova amanganga ngbatunga agu apai ni re ya, i nayugo irisa ayugo tipa gu rengo du kura aboro na ni ka manga agu apai re. I nayugo irisa ayugo a tipa agu abeere nga ga ringara gbiati agu abazogo aboro nasia yo i zogo rago, na i ima inoho nga ‘abaira pagbia’ dunduko namangasunge ni ga ‘Mbori amoyambu.’ (ARomo 13:1-4) ADezire Yekova namangapai kuti gu zinahe nga i naamanga kparakpee “tipa abakindo na aguyo dunduko naru mbata yo.” Ani namangaha wo wa ka “ani raki zezeredi zanga fudifudi pai ni sinombori dunduko na rengo.”​—1 Timoteo 2:2.

Ba waraga. ADezire Yekova nayugo irisa ayugo tipa gu rengo du kura aboro na ni tipa ka ba waraga ti agu aregbo i asia abazogo. I amanganga agu apai nayugo gupai nga i nasoga ba waraga te, i namangapai ringbisihe kina kuti agu apai agu aboro i nasia yo i zogorago agumbaha. Ono i arimisongo tiyo ku rogo agu apai yo nga ga birĩ-zogarago nga ga ringara wagu sa te. (Matayo 22:21; 1 Petero 3:16) Ginipai si aida Kristano mangihe rogo agu aringara duhe rogoho nga boro du wa ka ni ba waraga watadu rogo agu aringara ngbadu aboro aima aima rogoho kuti agu aboro abanga waraga ya? Ka Kristano tingidi gupai nga Sadaraka, Mesaka, na Abedenego aima ndu ki da rogo gu kpasakpasa rago nangia Dura, ni ima rengba ka diaberã ka ndu ku ba ba waraga yo ka sangbakpotoni yo idihe funi. Ono zanga manga gupai yo nika sa ni ni rimisi tini ku rogo agu apai nga ga birĩ-zogarago. Si naida ni berẽkurii agi arugute du sita re:

1. Apefuo Yesu, ‘aboro zegino nga yo te.’​—Yoane 15:19.

2. AKristano naru kuba Kristo gbiati gako Kindo.​—Yoane 18:36; 2 AKorindo 5:20.

3. Gu dungurati nga ga aKristano na bangisa ida sa, na avuruhe ni kodikodi yo rogo nyemuse yo.​—1 AKorindo 1:10; AKorosaio 3:14.

4. Agu aboro nasia boro ni zogorago, i nafubee afu a sa agu apai ni amangaha.​—Oni makianga gu rugute du rogo agu afugo du rogo 1 Samuere 8:5, 10-​18 na 1 Timoteo 5:22.

5. Ho aYisaraere agumba gupai ni nga i naida gu bazogo i abi ni abi ni bangirise, si ayugu gupai fu Yekova nga i aima ká ko.​—1 Samuere 8:7.

6. Si naida aKristano naafura afura na gigiri sangba kpotose yo ho i afura ni na aboro birĩ-zogarago tipa gu zogarago nga ga ga Mbori Kindo.​—Matayo 24:14; 28:19, 20; AEbere 10:35.

Gu sunge akodanga sunge asekere ya. Rogo gu kura aringara, ndiko nagumba gupai nga gu boro amanganga sunge asekere ya, ni mangi gu kura asunge akodanga sunge asekere ya tipa gu regbo i aringbisaha. Ho Kristano agbia tini ni na diaberã rogo gi bangiriba re, si naida ni mangi kparakpee, ki sakipai tipaha na gu kura Kristano naima nyaka rogo toro yo, na ki mangi wene diaberã ringbisihe kuti gupai ni nawirikihe tipa gipai re.​—Asanza 2:1-5; AFiripoio 4:5.

Fugo Mbori nagumba gupai fu aKristano nga i “nigi sangba, ki du ni mbakadimbakadi yo tipa gu mangaapai ngba angba dunduko, . . . i dú yee.” (Tito 3:1, 2) Na gipai re berãrani yo, ani ima rengba ka sana tirani na ngbatunga agi asanahe re: ‘Ka mi idi ka manga gu sunge re, ya mo si gbarasi pa gi kparatise ti agu apai nga ga birĩ-zogarago watadu si sa re mi rimisi tire ku rogo agu apai nga ga zire pambori?’ (Mika 4:3, 5; 2 AKorindo 6:16, 17) ‘Ya mo pa manga mi gu sunge re rengbe ka ká na mi ti manga mi agu apai nga ga aKristano?’ (Matayo 28:19, 20; AEfeso 6:4; AEbere 10:24, 25) ‘Na ka mi idi ka manga gu sunge re, ya mo si ambu regbo fere mi kiisi gi sunge tungusapai, wa gu nga kaa mangasunge tungusapai ti aregbo dunduko?’​—AEbere 6:11, 12.

Ka Kristano da kuti gupai nga ni ima rengba ka manga gu sunge re kuba gu nga i ndu na ni ku bambukiso yo, si naida gu kura aKristano irisi gani bipai airisa. (ARomo 14:10) Ono ka ni bi gupai nga ni arengbanga ka manga gu sunge re te, si naida gu kura aKristano irisi gani bipai airisa a.​—1 AKorindo 10:29; 2 AKorindo 1:24.