Bange aDezire Yekova wai mo naini yó? Isoke agurani kinaho nga gamo amurakporo, agu aboro mo amangasunge naayo, watadu agu aboro mo awirikapai naayo sukuru yo. Gini ngbatunga aboro nga ani nzunzu, na tipagine ani naagumbapa gaani aida ti ni fu aboro gbayaga?

Kura ngbatunga aboro nga ani kia te. Ani ye rogo angbatunga na asinoraka nibakiakia. Agurani adu rogo kura apambori mbata, na agurani kinaho naaidanga kuti Mbori mbata ya. Ono mbata fu ani da ni aDezire Yekova, ani dunduko naadi regbo ka wisigo agu ayugopai nga ga Ziazia Kekeapai wenengai. (Amokedi 17:11) Ani aidi kuti agu apai ani awirikihe, na ani ki diberã nitirani ka iriso Yekova Mbori.

Ani nagbia undo ti wisigo Ziazia Kekeapai. Ani nasota na kpakaraapai gbiati gaani arungbura wakina kura aboro a. Ono wa ani aˈasada ka mangapai ringbisihe kuti agu arugute nga ga Ziazia Kekeapai na aˈuru dunduko, ani ima sa gaani raka si du niwenehe susi wai si adu mbata. (Atambuahe 128:1, 2) Gure nga ndupai sa dagba agu akuraha nga gu ninaasa rani ani nigumba gu wene pangbanga fu aboro ani nagihe rogo Ziazia Kekeapai.

Ani naraka ringbisihe kuti agu arugute nga ga Mbori. Agi arugute re nasa rani ani niberẽpa akuarani na kini irisiyo, na si nasa rani ani ne gu ngbatunga asino duwa biriki na du kpakpasiraa. Agu arugute nga ga Mbori re nasa aboro niwene aboro rogo agu arago i araka rogoho, na si nasa aborokporo i du nikodikodiyo na ka i amanganga pa wasiro ya. Wa ani naini gupai nga “Mbori akpara nga aboro te,” ani rogo zegino dunduko nabi tirani ni awirina sa, na sogote ho du dagbarani nga ga angbatunga watadu gu du tipa zogarago te. Wa vura duhe nga kura ngbatunga aboro nga ani kia te, gaani mangaapai kia.​—Amokedi 4:13; 10:34, 35.

• Gini apai du tipa aDezire Yekova nga gu du tipa kura aboro a?

• Agu arugute nga ga Ziazia Kekeapai nasa aDezire Yekova i du nigini ngbatunga aboro?

Dungu aboro naberã gupai nga gu rimo nga aDezire Yekova nga rimo vovo pambori. Ono tie, agarã susi 2,700 kusayo, bangisa ndikidi Mbori aya tipa gako amoyambu wee i angia gako “adezire.” (Yesaya 43:10-12) Mbata fu gu garã nangia 1931, i anaayamba rani nga aBawiriki Ziazia Kekeapai. Tipagine tie ani adi gu rimo ti ni kurirani nga aDezire Yekova?

Gu rimo nga aDezire Yekova nayugo gaani Mbori. Rimo Mbori nga Yekova ima du susi bara 7,000 rogo gu kekeapai nga ga Ziazia Kekeapai i aima kehe bakuruyo. Ono rogo gu dungu asasa fugo Ziazia Kekeapai du awere, i ima dia gu rimo re kusayo ki moi kina agu afugo kubaha du rogo pa-Zande nga Gbia watadu Mbori. Ono tie, ndikidi Mbori aima yugo tiko fu Moize ti rimoko nga Yekova, kini yaa: “Gi nga rimore re kindi.” (Gate 3:15) Gure nga ko akpara tiko ti kura kungbo ambori. Si nipa irisa furani ani duna ziazia rimo Mbori rirani.

Gu rimo nga aDezire Yekova nayugo gaani sunge. Badungu agu aboro nadumbata kusayo namangi dezirepai tipa gayo idapase kuti Yekova, tona ti kina gu ruru kumba nangia Ebere. Vuru dungu akama agarã yo, Noa, Abarayama, Sara, Moize, Davide, na kura aboro agbiatiyo kuti gi badungu ‘adezire naadu wa ndurõo re.’ (AEbere 11:4–12:1) A wa rengbe boro kadu nidezire ngbangayo tipa kura boro, ani nga aDezire Yekova bambiko ani nakusa gu rengo du tipa ko fu kura aboro.

Ani nawirika Yesu. Ziazia Kekeapai nayamba Yesu nga “ndikidi dezire.” (Yugoti 3:14) Yesu aya ningbako wee ko ‘ayugu rimo Mbori’ na ko ‘aamanga dezirepai tipa gu rengo’ du tipa Mbori. (Yoane 17:26; 18:37) Sidu tie, ndikidi apefuo Kristo duwa ka i ata na rimo Yekova na kini yuguhe fu aboro. Gere nga gupai aDezire Yekova aˈasadatiyo kaa mangaha.

• Tipagine aBawiriki Ziazia Kekeapai adi gu rimo ti ni kuriyo nga aDezire Yekova?

• Gini regbo Yekova atona kadu na adezire beko auru kpotosende?

• Da nga bakere Dezire Yekova?

Ziazia Kekeapai aima pe gupai nga, fuo kpi Kristo, zire abayugupai nika kura dagba aKristano na ki gberesi rengo. (Amokedi 20:29, 30) Kina boro gupai re namangi. Gu zire abayugupai re akodi agu ayugopai nga ga Yesu na agu ayugopai nga ga apagano, si kini kusi zire pambori nga ga aKristano. (2 Timoteo 4:3, 4) Wai rengbe ani ka ino singia ani areme na ndikidi giarogopaiyo tipa agu apai nzunzu Ziazia Kekeapai ayugoho?

Regbo aima da fu Yekova ko kusi rengo kuyangura. Yekova ape gupai rogo nebi yo nga, ‘ti digida rago, ndikidi inohe amaapai.’ (Daniere 12:4) Rogo gu garã nangia 1870, tooni badona nga ga abagbata rengo aye ka bi gupai nga badungu agu ayugopai nga ga kanisa aangianga agu ayugopai nga ga Ziazia Kekeapai te. Sidu, i atona ka gbata ndikidi giarogopaiyo tipa gu ndikidi yugopai nga ga Ziazia Kekeapai, na Yekova aima fu maku fuyo i girogo Ziazia Kekeapai yo.

Abagbata rengo awisigi Ziazia Kekeapai sirisiri. Agu aBawisigi Ziazia Kekeapai re anaawisigo Ziazia Kekeapai kina ngba gu gene ani amangaha areme rogoho. I anidi banguapai i ki tona ka wisigoho. Ho i anida ni ti gu papara Ziazia Kekeapai du nikpakarakpakaraha tipa ka giarogoyo, i anigbata kura averesi nga gu rengbe ka sakarogoyo. Ho agu averesi re aniundo yó ni i dakuti bangisa giarogopaiyo, i anike gu gayo giarogopaiyo re rogo waraga. Wa i ambu kina Ziazia Kekeapai si sakirogo tihe yo nitihe, i akuru bara gu rengo du tipa rimo Mbori na ga Mbori Kindo, ga Mbori ringbisapai tipa aboro na kpotosende, gupai du tipa kpikpi aboro, na pa zingabekpio. Gayo wisigo Ziazia Kekeapai naundoyo i ra niriyo be dungu zire aida na amangaapai.​—Yoane 8:31, 32.

Rogo 1879, aBawiriki Ziazia Kekeapai aini gupai nga si naida i yugu rengo fu kura aboro. Nigu garã re, i atona kusa gu magazini i akusaha areme kindi, nga Ngbaõbambu Sinziri Natakapande ga Yekova Kindo. Ani natungusa gu rengo nga ga Ziazia Kekeapai awere rogo aringara nga 240 na rogo afugo susi 750. Regbo ho ndikidi inohe amoipai wa gu du areme te!

• Fuo kpi Kristo, ginipai namangi tipa gu rengo nga ga Ziazia Kekeapai?

• Gine undo rani ani kurubara gu rengo nga ga Ziazia Kekeapai?

ADezire Yekova aima mangasunge na dungu asasa fugo Ziazia Kekeapai tipa dungu agarã. Ono ani aye ka bi gupai nga si naida ani kusi vovo sasa fugo Ziazia Kekeapai nga gu nika undo aboro wenengai i gbia gu ndikidi “inahe nga ga rengo,” nga gupai Mbori akpinyemuhe tipa aboro dunduko. (1 Timoteo 2:3, 4) Si ki tadu wo, rogo 1950, ani atona ka kusa vovo sasa Ziazia Kekeapai, nga gu i ayambaha rogo pa-Ngirisi nga New World Translation. I ima sa gi Ziazia Kekeapai re niruruhe kurogo afugo susi 130.a

Si aidi i kusi gu Ziazia Kekeapai nikadu niˈaakpuraha ka giarogoyo. Afugo nasakatihe asaka wa regbo andu, na dungu asasa fugo Ziazia Kekeapai duna agu afugo rogoho kina bete aboro naini rogoyo watadu du nikpakarakpakaraha ka giarogoyo. Berewe a, agu aZiazia Kekeapai i aima kehe bakuru kusayo nga gu mbedi ambeda gbe kuti gu bambataha i akehe, i akuru baraha, si kini undo abasa fugo Ziazia Kekeapai i girogo Ziazia Kekeapai yo wenengai a wa i akehe rogo pa-Ebere, pa-Arama, na pa-Giriki.

Si aidi i kusi gu Ziazia Kekeapai i nikaa arianga sangba Mbori rogoho ya. Si aidanga abasa fugo Ziazia Kekeapai ngimbaro na sangba Mbori te. Si naida i sa kina boro gupai du nikekehe. Ono tie, rogo dungu aZiazia Kekeapai areme, abasafugo aima dia rimo Mbori nga Yekova kusayo.

Si aidi i kusi gu Ziazia Kekeapai nika fu taarimo fu Mbori. (2 Samuere 23:2) Rogo New World Translation, i aima karaga rimo Yekova kubaha kurogo agu aba duhe rogoho susi 7,000 rogo gu kekeapai nga ga Ziazia Kekeapai du nikuruhe kisusi, a wa du kpiaha kusende re. (Atambuahe 83:18) Wa aDezire Yekova adi dungu agarã ka wetekarago tipa gu kuru kekeapai nga ga Ziazia Kekeapai, surungba gayo wetekarago nga i akusi gu Ziazia Kekeapai boro agbia ngbarago agbia ho ní agedaha ni, bambiko si nakusa ga Mbori aberã ziazia. Singia gu sasa Ziazia Kekeapai nga New World Translation bero watadu si te, ani nangarasa ro mo nigedi sangba Yekova na aˈuru dũ rogo gu Ziazia Kekeapai du bero.​—Yosua 1:8; Atambuahe 1:2, 3.

• Tipagine ani adiberã ti ni ka kusa vovo sasa fugo Ziazia Kekeapai?

• Ginipai si aida gu boro naida ka ino gupai Mbori akpinyemuhe nimangihe na aˈuru dũ?