Apasita watadu abarani ho rogo gaani riigbu te. Ono a wa si adu ti gu regbo gu dungurati nga ga aKristano atona, ababiapai i amaa yó i ‘nirigi ga Mbori kanisa.’ (Amokedi 20:28) Agi abaakumba re aziongo marã tipa gayo sunge te. I nga agu aboro naima nyaka rogo toro yo. I nangerafuo kanisa, watadu dungurati, angianga ‘mbiko du yó niziziyo kutini ya, ono ninyemuhe; tipa gbegberẽ ũkumuko a te, ono ni idapaha kpotoyo yo.’ (1 Petero 5:1-3) Gini sunge i amangaha tipa rani?

I nangerafuo rani na kini banda rani. Abaakumba nafu arugute rogo Ziazia Kekeapai na kini undo rani ani du wenengai rogo toro yo. Wa abaakumba naini gupai nga Mbori du nafu gi nyanyakipa sunge re fuyo, i amanganga sunge wa abazogo aboro te, ono i namangasunge ngba gu gene nafu ngbarago afu furani. (2 AKorindo 1:24) A wa babanda akandoro naangerafuo gani akandoro dunduko nibasasa, abaakumba naˈasadatiyo ka ino agu aboro dunduko du rogo dungurati nibasasa.​—Asanza 27:23.

I nayugo wai furani rengbe ani ka manga gupai Mbori akpinyemuhe. Rogo aposo dunduko, abaakumba nangerakurii agu adunguratise nga ga irisombori tipa ka nyakasa gaani idapase. (Amokedi 15:32) Agi abaakumba re nangbembatayo a rogo sunge tungusapai fu aboro, na ani dunduko naayo sa nandu kaa tungusapai fu aboro. I naraba rani ani ini tungusapai wenengai ngba dungu agene.

I nafu ngarasaro fu aboro nibasasa. Abaakumba rengbe ka ye ka bi rani kpuraniyo watadu i rengbe ka fura na ani Bambu Kindo yo tipa ka undo rani na ka fu wasa furani rogo Ziazia Kekeapai yo.​—Yakoba 5:14, 15.

Kurii agu asunge nga ga dungurati dube abaakumba, dungu abaakumba gu duadu na asunge beyo a nga ga zegino nga gu i araka mbikoho, na kidu na aborokporo beyo nga aguyo si aida i di regbo adia naayo na kini moiberãyo fuoyo. Agi awirina namangasunge nyanyakii re rẽarẽ ani irisiyo.​—1 ATesaroniko 5:12, 13.

• Gini asunge agu abaakumba nga ga dungurati yó amangaha?

• Rogo gini agene abaakumba ayugo nyemuse tipa rani wadu ani nibasasa?

Ziazia Kekeapai nagumbapa ngbatunga akumba ue nga aguyo duna asunge kuriyo rogo dungurati, nga ‘ababiapai na adiakona.’ (AFiripoio 1:1) “Ababiapai” nga abaakumba na “adiakona” nga amoundo abaakumba. Rogo dungu adungurati, agu akumba re gu ngeange. Gini sunge amoundo abaakumba amangaha si undo rani?

I naundo abaakumba. Amoundo abaakumba nga agu aboro naima nyaka rogo toro yo, kidu ni agu aboro rengbe awirina arengba ka kido kutiyo, na kingia wene abamangisunge. I nangerafuo agu asunge nga ga dungurati nga gu si aida boro mangihe nibeni. Gipai re naundo abaakumba tipa i moiberãyo sa yugopai gbiati ngarasa akandoro.

I namanga agu asunge duho si aida i mangihe. I nasia kura amoundo abaakumba i duni abambakadi ba aboro na kini di aboro kugume ho i ayeni tipa adunguratise. Abaakumba rengbe ka asia aguyo i nimangisunge na ũkiiso worofugo, ga aguyo kingia kparaka awaraga, ngerafuo gu marã nga ga dungurati, na kparaka adagbarago nga ga tungusapai ti abatungusipai. I naundo sunge ngerafuo Bambu Kindo a. Abaakumba rengbe ka sanayo a i undo sosono aboro. Singia gini sunge du amoundo abaakumba agbiaha, mangayo ho nasa gupai nga awirina dunduko niirisiyo.​—1 Timoteo 3:13.

I namaa wene kpiapai. I nasia aboro ni amoundo abaakumba mbiko gu wene asino nga ga toro du tiyo. Ho i amanga apapara dunguratise ni, wagu nga gumbapai, i nanyakasa gaani idapase anyakasa. Ho ani abiyo ni i nimangi sunge tungusapai wenengai, si nasa rani asa ani asadi kaa mangaha wa yó. Wadu yó na giatise dagbayo na abaakumba, i nasa gupai nga ngbarago na kodatise du rogo dungurati. (AEfeso 4:16) Fuo bete regbo, i rengbe arengba ka rẽ kadu ni abaakumba a.

• Gini ngbatunga akumba nga amoundo abaakumba?

• Wai amoundo abaakumba aundo dungurati si niindu wenengai?

Gu papara Ziazia Kekeapai nga Vovo Ndika ima fura bara dunguhe tipa Barunaba na Pauro. Agi akumba re angia agu ababiapai nata ata. I anaata kaa biko agu adungurati nga ga aKristano naadu ti gu regbo re. Tipagine? Bambiko i anaabaka bangiriyo abaka gbe tipa agu awirinayo nga ga toro yo. Pauro ayawee ko aidi ‘i karagatiyo ka bi awirina’ tipa ka ino gupai kaa mangayo. Ko anaandu dungu amairo tipa ka nyakasa awirina. (Amokedi 15:36) Kina boro gupai re agu ababiapai nata ata areme amangaha.

I naaye ka ngarasa rani. Ababi rimbasa ni basasa nandu ku rogo adungurati wa 20 watadu susi gure, na kini di poso sa na adungurati ni basasa bara ue rogo garã sa. Ani rengbe ka gbia bakere undo be agu akpiapai nga ga agi awirina re na adiayo, ka si du nga adee beyo. I naˈasadatiyo ka ino paranga aboro na kuru aboro a, na i na nyemu ka ndu na ani ka tungusapai watadu fuo agu aboro ani ayugo Ziazia Kekeapai fuyo. Agi ababiapai re naandu andu na abaakumba a ka biko agu awirina kpuyo yo si aida i undoyo, na i namanga bawene agumbapai ti regbo agu adunguratise nga ga dungurati gbiati kikindigi adunguratise nga gu nanyakasa rani gbe.​—Amokedi 15:35.

I nayugo nyemuse tipa awirina dũ. Ababi rimbasa na bakere nyemu gupai nga dungurati du wenengai rogo toro yo. I naasungo na abaakumba gbiati amoundo abaakumba tipa ka pekapa gu sonakumbatayo mangi rogo dungurati na tipa ka fu bete agu arugute rengbe ka undo. I naundo abazakigene i niimangi gayo sunge wenengai, na i na nyemu ka ino gu vovo aboro naye kurogo dungurati na wai i asona kumbatayo rogo toro yo. Agi awirina re dunduko nafutiyo kadu ‘ni abadiasunge furani.’ (2 AKorindo 8:23) Si ngba angba ani wiriki gayo idapase na wai i nakakuti Mbori.​—AEbere 13:7.

• Tipagine ababi rimbasa naandu ti ni kaa biko adungurati?

• Wai rengbe mo ka gbia undo mbiko yeyo kurogo dungurati?

Ho gberãngbi amanga ni, aDezire Yekova namanga mbakadapai nikina ipo tipa ka undo agu awirinayo gberãngbi namangiyo gbegberẽe. Gipai re nayugopa gu ndikidi nyemuse du ani nani tipa akuarani. (Yoane 13:34, 35; 1 Yoane 3:17, 18) Ani naundo rogo gini agene?

Ani nafu marã. Ho bakere ngbongi amangi ni Yuda yo, agu aKristano naadu Andiokia yo akedi marã na ahe fu agu awirinayo naadu yo. (Amokedi 11:27-30) Wakina gure a, ho ani agia gupai ni nga kura awirinarani rogo kura papara zegino rogo kpakarapai, ani nafu marã fu gaani dungurati si kedihe fu agu awirina du rogo kere zingo i ngbeke agu ahe nani zingoho amanga yó.​—2 AKorindo 8:13-15.

Ani nafu kura aundo si aidaha. Agu abaakumba du rogo gu rago gberãngbi namangi rogoho nagbata gene ka inopai tipa ai gu Dezire Yekova du rogo gu rago re tipa ka ino agini yó pai namangiyo. Gu rondo du tipa undo rengbe ka manga mbakadapai tipa gbia riahe, gigiri mbirimbiri ime, arokoo, abambu, gbiati gu undo nga ga amunganga. Dungu agu aDezire Yekova rengbe ka mangasunge dagba agere naguari ngba gayo marã nitiyo ka ndu ka undo sunge dagba agu ani natangaraha re watadu ka mbakada agu akporo na aBambu Kindo gberẽ. Gu kodatise du ani nani na gu inohe ani agbiaha ho ani amangasunge ni sa, si nasa rani ani mangipai niipo ho gberãngbi nati ni kurogo kura rago. Wa vura duhe nga ani naundo agu aboro ‘du idapase yo’ na ani, ani naundo kura aboro aundo a ho du gene ni tipa mangaha, ka si vura du nga i rogo kura pambori kia.​—AGaratio 6:10.

Ani nafu wasa rogo Ziazia Kekeapai yo na ki yugu gaani nunga. Agu aboro gberãngbi nati kuriyo, si naida aida i fu wasa fuyo nzunzu. Ti ngbatunga agu aregbo re, ani nafu gu wasa naye be Yekova, “nga Mbori wasa dunduko.” (2 AKorindo 1:3, 4) Ani napepa gu kidohe du rogo Ziazia Kekeapai fu agu aboro du rogo rungo, kini kidoyo nga, ga Mbori Kindo ima mbeda ka ye ka dia agu apai kusayo dunduko naye na arungo.​—Yugoti 21:4.

• Gine nasa aDezire Yekova i mangipai niipo ho gberãngbi ati ni?

• Gini wasa ani afuhe rogo Ziazia Kekeapai fu agu aboro bati be gberãngbi?

Nimbedi kuti kpio Yesu, ko afura nirondo na gako abawiriki biama, nangia Petero, Yakoba, Yoane, na Andarea. Wa Yesu aape paye yangara arame, ko akusi nyanyakipa sanahe ki yaa: “Da nga gu kangara moyambu tie du na tatamana, gani gbia amoi ni ri gako aboro kporo ni fu gayo riahe fu yo ti ragoho?” (Matayo 24:3, 45; Marako 13:3, 4) Gupai Yesu aagumbaha fu gako abawiriki nga, wangia ko gayo “gbia,” ko nika maa kura aboro i nifu gu riahe nga ga toro fu apefuoko ti gi digida regbo re. Ada du si adu nga i nikadu nigi moyambu re?

I nga gu ndikidi apefuo Yesu du nimbedimbediyo na ziazia toro. Gu “moyambu” re nga gu Riigbu Bipasunge nga ga aDezire Yekova. Ni nafu gu riahe nga ga toro fu airisi Yekova ti ragoho. Ani nakido kina kuti gi ruru moyambu re tipa kaa gbia ‘gaani riahe ti ragoho.’​—Ruka 12:42.

I nangerafuo ga Mbori dungurati. (1 Timoteo 3:15) Yesu afu gu bakere sunge fu gi gako moyambu re nga, ní ningere kurii agu asunge dunduko namanga rogo gu papara ga Yekova riigbu du auru kpotosende no, nga gu nakoda ngerafuo agu ahe ani amangasunge nani rogo ga Yekova riigbu, rugapa sunge tungusapai, na yugopai rogo adungurati dũ. Tipa ani gbia agu ahe ani aidaha ti gu regbo ani aidaha ti ni, ‘ruru kangara moyambu’ nakusa gu riahe nga ga toro rogo awaraga yo nga gu ani atungusapai nani, kodihe na agu apai ani agiaha ba adunguratise yo.

Gi moyambu re niruruko bambiko ko nayugo kina agu apai du rogo Ziazia Kekeapai na kini tungusi gu wene pangbanga Yesu aya i tungusihe. Ko nikangarako mbiko ko nangerafuo gu ga Kristo ahe du auru kpotosende nitatamana. (Amokedi 10:42) Yekova nafu maku afu kurii gu sunge gu moyambu re amangaha bambiko ani nabi wai abi bange airisi Yekova ange na wai riahe nga ga toro akura kpaima.​—Yesaya 60:22; 65:13.

• Da Yesu amoi ní ní nirigi gako abawiriki rogo toro yo?

• Rogo gini agene du gu moyambu re niruruko na nikangarako?

Rogo bambata sa kama agarã, ‘agu amokedi na abaakumba naadu Yerusarema yo’ anaamangasunge nigu riigbu naadu tipa bi pa sunge. I nanaamanga nyanyakipa adiaberã kuba kura mbedimbedi aKristano dunduko. (Amokedi 15:2) Ho pai aniru ni bangiriyo, si anidu wo fuo wisigo yó gupai Ziazia Kekeapai apehe mbata na fuo nduyo kuti gu rugapai nga ga ga Mbori ziazia toro. (Amokedi 15:25) Kina gu bangisapai re namanga rogo gu riigbu bipasunge du areme.

Mbori namangasunge nani ka manga gupai ko akpinyemuhe. Agu awirina du nimbedimbediyo niziazia toro namangasunge rogo Riigbu Bipasunge, i na bakere nyemu Fugo Mbori, na i na bakere inohe nibipa mangasunge gbiati agu apai nga ga toro. I naadunguratiyo na aposo dũ tipa ka wisigo agu apai nabipa awirina rogo zegino dunduko. A wa si adu rogo bambata sa kama agarã, i nafu agu arugute du mburuhe rii Ziazia Kekeapai rogo awaraga yo watadu kube agu ababiapai nata ata gbiati kura awirina. Gipai re nasa gupai nga ga Mbori aboro dunduko duna berã sa na i kini mangipai kina sa. (Amokedi 16:4, 5) Riigbu Bipasunge nangerakurii pa mbakada gu riahe nga ga toro, kini nyakasi aboro i peresipa tungusapa ga Mbori Kindo mbatayo, na kini ngerekurii pa fu asunge fu kura awirina rogo ga Yekova riigbu.

Si nandu kuti gu rugapai nga ga ga Mbori toro. Riigbu Bipasunge nangera kina kube Bakindo Zegino dunduko nga Yekova tipa arugute, na kube Barii Dungurati nga Yesu. (1 AKorindo 11:3; AEfeso 5:23) Agu aboro du rogo gu riigbu re abingo tiyo nga i nga abaira ga Mbori aboro te. I gbiati kura mbedimbedi aKristano dunduko ‘napeka Wiri Kandoro [nga Yesu] ku ho ko andu ku ho ni dunduko.’ (Yugoti 14:⁠4) Agu awirina du rogo gu riigbu re nafu bakere tambuahe ho ani akpara ni tipa yó fu Yekova.

• Ada naadu rogo riigbu bipasunge rogo bambata sa kama agarã?

• Wai gu Riigbu Bipasunge du areme agbata ga Yekova rugapai?

Betere nga gu rimo i adihe rogo pa-Ebere du rogoyo nga “Ga Mbori Bambu.” (Bambata Pai 28:17, 19) Si nga wene rimo tipa agu abambu dube aDezire Yekova rogo zegino dunduko nga agu aba i arugapa sunge tungusapai rogoho na kini songodihe. Riigbu Bipasunge namangasunge rogo gu riibasunge nga ga aDezire Yekova du New York State, U.S.A. yo, na yo du si angera ni kurii agu asunge abe-basunge amangaha rogo aringara. Agu aboro namangasunge yo i nayambayo nga avuru Betere. I wa aborokporo sa. I naraka sa na kini mangisunge sa, kini ri he sa na kini wisigi Ziazia Kekeapai sa.​—Atambuahe 133:1.

Si nga gu ba du kia, na agu aboro namangasunge yo i nafutiyo nitiyo ka mangaha. Rogo aBetere dunduko, akumba du yo na adee nga aKristano nga aguyo futiyo nyanyakii ka manga gupai Mbori akpinyemuhe na ka manga sunge ga Mbori Kindo ti aregbo dũ. (Matayo 6:33) Boro ho dagbayo i atumo ní tipa gani sunge te, ono i dunduko i afu vurubambu fuyo i niraki rogoho na riahe i nirihe gbiati wiri tooni marã nga gu naundoyo rogo kura wiri apai. Agu aboro du Betere yo dunduko duna sunge beyo, singia biroo yo, madaba yo, watadu zunda aũriahe. Aguyo namangasunge kusa awaraga watadu ka gbingbidaha, girisorago, zunda arokoo, mbakada agu ahe nagberã, watadu gu kura asunge.

Si nga gu ba duna bakere sunge rogoho nga gu nasongoda sunge tungusapai. Gu banguapai i adua Betere ti ni nga ka sa gu rengo nga ga Ziazia Kekeapai badungu aboro inihe. Gi burosua re nga kpiapai tipa gipai re. Riigbu Bipasunge nangere kurii pa kehe. Fuo keyo ho, i akedihe na kompiuta fu gu badungu abasafugo du rogo dungu aBetere rogo zegino, i ki kusihe ti waraga na kere tatamanatatamana aũkusa awaraga, na ki kedihe kurogo adungurati susi 100,000. Avuru Betere namangasunge nyanyakii tipa ka sa gupai nga awaraga da fu aboro i gedihe, bambiko sunge tungusa wene pangbanga nyakipaha rogo zegino dunduko.​—Marako 13:10.

• Ada namangasunge Betere yo, na gini mbakadapai duho tipa yó?

• Gini nyanyakipa sunge avuru Betere rogo zegino dunduko asongodaha?

Betere na dungu ngbatunga asunge rogoho nga gu naundo sunge tungusapai rogo ringara sa watadu dungu aringara. Kura avuru Betere namanga sunge sapai, aguyo nagbingbida amagazini na abuku, aguyo nangerafuo pa banda agu awaraga re, aguyo nadefugo na kini kusi avidio, na aguyo kini mangi kura dungu ngbatunga asunge.

Gu Rondo Nga ga Be-basunge nangerakurii sunge. Riigbu Bipasunge asiapa agu asunge nga ga be-basunge fu Gu Rondo Nga ga Be-basunge nga gu du na abaakumba rogoho biata watadu susi biata. Agu abaakumba re nagumbapa gu sonakumbatayo namanga rogo gu ringara du tiibehe fu Riigbu Bipasunge, na gu kura kpakaraapai ka kuru. Agu atingidapai re naundo Riigbu Bipasunge si diberã tipa agu apai si aida i fura tipaha kumbatayo rogo gaani awaraga na ti regbo adunguratise gbiati kikindigi adunguratise. Agu aboro narukuba Riigbu Bipasunge, i naakeda yó dedede i niindu kaa biko abe-basunge na ka ruga pa kura asunge fu Gu Rondo Nga ga Be-basunge. (Asanza 11:14) Dungu ambakadapai du tipa gu ye nga ga gu boro narukuba riigbu, kodihe na gu nga ni namanga gumbapai fu agu awirina naraka rogo agu arago du tiibe gu be-basunge re.

I naundo agu adungurati du rogo gu ringara re. Kura awirina kina be-basunge yo na idapa zaka vovo adungurati. Awirina narugapa gu sunge a nga ga abazakigene, amokedi, na ababi rimbasa nga aguyo namangasunge tiibe gu be-basunge re. I namanga ambakadapai tipa kikindigi adunguratise, pa meka vovo aBambu Kindo, na pa keda awaraga kurogo adungurati fu awirina. Agu apai dunduko namanga rogo be-basunge nasa gupai nga sunge tungusapai nimangi ngba wene gene.​—1 AKorindo 14:33, 40.

• Wai Gu Rondo Nga ga Be-basunge aundo Riigbu Bipasunge?

• Gini asunge namanga rogo be-basunge?

Tipa ka manga gu sunge wenengai gbe nga ga tungusa “wene pangbanga” fu “arikaaboro, na ngbatunga aboro, na ngbatunga afugoyo, na aboro” dunduko, ani nakusa awaraga rogo afugo susi 750. (Yugoti 14:6) Wai ani amanga gi kpakarakpakara sunge re? Ani namanga gi sunge re na gu undo nga ga gaani abakeapai nga aguyo du rogo dungu aringara, gbiati gu badona nga ga agu awirina futiyo ka sa fugo. Agi aboro re dunduko nga kina aDezire Yekova.

I nakehe rogo pa-Ngirisi. Riigbu Bipasunge nangerakurii gu sunge nga ga Gu Basunge Nga ga Kepai du rogo gaani bakere basunge Amerika yo. Gi basunge re nabi agu asunge nga ga agu abakeapai namangasunge rogo gu gaani bakere basunge re na aguyo du rogo kura abe-basunge. Padu ani na abakeapai berani rogo dungu aringara naundo rani ani nike agu awaraga naundo aboro rogo zegino dunduko.

I nakeda gu kekeapai re fu abasafugo. Fuo mbakada yó gupai i nakehe na ki bihe nga si ngba angba i kusihe, i nakedaha na kompiuta fu gaani abasafugo rogo zegino dũ, i kini saha kurogo gayo afugo. Abasafugo naˈasadatiyo nyanyakii ka siaka kina gu ndikidi afugo nika kusa gupai wenengai i agumbaha rogo pa-Ngirisi kurogo gayo fugo.​—Batungusipai 12:10.

Akompiuta naipiso sunge. Kompiuta arengbanga ka sapai wa aboro te. Ono wa vura duhe wo, akompiuta naipiso sunge aipiso gbe, bambiko dungu apai si amangaha. ADezire Yekova akusi kura ringbisapai nga ga kompiuta nga gu rengbeyo ka kepai rogoho rogo dungu akama afugo, ki kodi gu kekeapai re na asura, na ki mbakadihe tipa ka kusaha ti waraga.

Tipagine ani amanga gi bakere apai re ti ni wa gure, zavura tipa agu afugo kina wiri bete akutu aboro apehe? Ani namangaha wo mbiko Yekova nakpinyemu gupai nga “aboro bati dunduko, ki ye sa gu inahe nga ga rengo.”​—1 Timoteo 2:3, 4.

• Wai i ake gaani awaraga?

• Tipagine ani asa gaani awaraga ti ni kurogo badungu afugo?

Gaani riigbu nakusa badungu amirioni aZiazia Kekeapai na kura awaraga na agarã dũ na kini fukuhe fu aboro angianga ti marã ya. Ani nadudua aBambu Kindo na abe-basunge na kini ngerefuoho. Ani nasongoda akutu avuru Betere na amokedi, na ani nafu undo kurogo agu arago gberãngbi nati kurogoho. Ono mo rengbe ka bakabangiro nga, ‘Wari i agbia marã ni tipa agi apai re dunduko?’

I arogodanga marã be aboro te. Wa vura duhe nga gaani sunge naida bakere marã gbe, ani ahõnga marã be aboro te. Agarã susi 100 kusayo, ue kusikusi Ngbaõbambu Sinziri ape gupai nga, ani idi kuti gupai nga Yekova nga basongodi rani na ani “ahõnga he be aboro watadu ka zungodi aboro i fu marã te,” na si aamanganga wo te.​—Matayo 10:8.

Ani namanga gaani sunge na agu agamahe aboro afuhe mbiko i idi ka fuhe. Dungu aboro duna tambuahe tipa gu sunge nga ga yugo Ziazia Kekeapai fu aboro na i nafu marã tipa si songodi gu sunge re. ADezire Yekova nitiyo nafu gayo regbo, ome, na marã gbiati gu kura gayo ahe tipa ka manga gupai Mbori akpinyemuhe auru kpotosende dunduko. (1 Pekapai 29:9) Bambu Kindo yo na rogo agu aba du gaani kikindigi adunguratise rogoho, asanduki gamahe du yo fu agu aboro nakpinyemu ka fu gamahe tipa i baha kurogoho, watadu boro rengbe kafu gamahe a rogo gaani bangiriba nga ga Internet nga jw.org. Dungu gu marã ani agbiaha naye be agu aboro angianga airakumuko ya, wakina gu rungorungo dekurugbo Yesu afura wenengai tipa ri nga guri naba rukutu marã sirigi ue kurogo sanduki gamahe. (Ruka 21:1-4) Sidu, ai boro rengbe ‘kaa maa wiri he ni igiigihe’ ka fuhe “wa i akpi nyemu he kpotoyo yo.”​—1 AKorindo 16:2; 2 AKorindo 9:7.

Ani ini gupai nga Yekova nikaa fõngbadu agu aboro yo kindi nakpinyemu ka ‘irisako na gayo ahe’ i niisongodi gu sunge nga ga Kindo, tipa gupai mangi ko akpinyemuhe.​—Asanza 3:9.

• Gine nasa gaani riigbu si du kia ti kura apambori?

• Wai i amangasunge na agu agamahe aboro afuhe?

A wa gu rimo nga Bambu Kindo ayugoho, gu banguapai i afura yo tipaha nga pa ga Mbori Kindo, watadu ga Mbori Ngbii. Si nangia gu banguapai Yesu anaatungusapai tipaha.​—Ruka 8:1.

Si nga aba ndikidi irisombori. Bambu Kindo yo du nga gu ba aDezire Yekova ambakadatiyo rogoho ka tungusa gu wene pangbanga nga ga Kindo. (Matayo 24:14) ABambu Kindo na abakioho nibakiakia, na angbatungaha nibakiakia. Dungu aBambu Kindo du na adungurati rogoho susi sa. Vuru gu bete agarã susi kusayo, ani ima dudua dungu akutu aBambu Kindo tipa gu sonakumbatayo namanga rogo dungurati. Ka i kparaka bange agu aBambu Kindo re dunduko ti aˈuru nibasasa, gure duwa aˈuru dunduko i adua aBambu Kindo bisue. Wai i amanga gi bakere sunge re?​—Matayo 19:26.

I naduaha na gu marã i afuhe tipa dudua aBambu Kindo. I nakeda gi marã re ku be-basunge yo tipa i mangisunge nani ka dudua aBambu Kindo rogo agu aba du zingo rogoho tipaha watadu ka mbakada akuruhe.

I atumongo agu aboro namehe te. Rogo dungu aringara, agu Abadona Du Tipa Dudua ABambu Kindo gudu ho. Abadona nga ga abamebambu nata rogo adungurati rogo ringara, zavura rogo agbaria, tipa ka undo adungurati na sunge me Bambu Kindo. Rogo kura aringara, i ima sia agu aDezire Yekova du na inohe i ni ngerekurii sunge meka aBambu Kindo na kini mbakadi agu akuruhe rogo gayo dagbarago. Agu abaakumba duna inohe tipa meka abambu nangerakuriipa meka abambu daho si nika digo ni, na kura abamangisunge nibee nafutiyo ka undo gu papara sunge iniyo ho. Rogo agu aba dunduko i adua bambu rogoho, agu aboro du rogo gu dungurati re nafutiyo dunduko tipa ka undo sunge. Ga Yekova toro gbiati gu ome gako aboro amangaha na ngbaduyo yo dũ nasa gupai nga gipai re nimangi.​—Atambuahe 127:1; AKorosaio 3:23.

• Tipagine ani ayamba gaani abairisombori ti ni nga aBambu Kindo?

• Ani naru wai kaa dua aBambu Kindo rogo zegino dũ?

ABambu Kindo nga ga aDezire Yekova dunduko duna rimo Mbori ti ni. Wadu he wo tie, ani nabihe nipa momu kaa girisoho na kini mbakadihe na si nga nyanyakipa papara gaani irisombori. Aboro dunduko rengbe ka fubee tipa gi sunge re.

Mo futiro tingbafuo dunguratise ka girisorago. Tingbafuo adunguratise dunduko, awirina nga akumba na adee nagiriso Bambu Kindo tipa ka mbuhe nigigirihe. Rogo aposo du, i nagiriso Bambu Kindo sirisiri bara sa. Bakumba watadu moundo abaakumba nangerakurii gi sunge re, kidu na waraga beni naapa agu asunge rogoho si aida i mangihe. Abagirisirago rengbe ka wegarago, zunda vurubambu na ime, tada nvutu kusayo, mbakada abasungo, giriso piti yo, giriso abangiri bambu na abitirobi, kusuko abiriko, watadu ka mangasunge vurukporo Bambu Kindo yo. I nakpara uru kandara bara sa rogo garã ka manga bakere girisorago. Ka ani ya fu awirani i kodi beyo kuti gi sunge re, gure nga ani nayugopai fuyo i duna irisa tipa gaani bairisombori.​—Batungusipai 5:1.

Mo futiro ka manga sunge mbakada Bambu Kindo. Rogo agarã dũ, i naawisigo Bambu Kindo wenengai, dimoyo na zegiyo. Fuo wisigo yó Bambu Kindo, i nambakada agu abarapaha si aida i mbakadihe tipa si du niwenehe ti aregbo dũ, angianga ka mbuhe si gberẽ si kini idi kina bakere marã ya. (2 Pekapai 24:13; 34:10) Gigiri Bambu Kindo nga gu i angerafuoho wenengai nga bawene ba tipa iriso gaani Mbori. Ho ani afu tirani ni ka manga gi sunge re, ani nayugopa gaani nyemuse fu Yekova na pa wai ani abi gaani bairisombori na kikiipaha. (Atambuahe 122:1) Gipai re nazio ngbadu agu aboro yo azio a du rogo gu rago du Bambu Kindo rogoho.​—2 AKorindo 6:3.

• Tipagine si aidanga bangirani go ti ni ti gaani bairisombori ya?

• Gini ambakadapai duho tipa banda Bambu Kindo si du nigigirihe?

Ya mo mo naida ka weteka kura apai tipa ka kiiso gamo giarogo Ziazia Kekeapai yo? Ya mo mo naida ka ino kura apai tipa kura veresi watadu tipa kura boro, kura he, watadu ba nga gu gumbayo paha rogo Ziazia Kekeapai? Watadu mo naida ka ino singia Fugo Mbori rengbe ka undoro rogo agu akpakarapai du mo rogoho? Ka si duwo, mo ndu kurogo gu ba awaraga du Bambu Kindo yo.

Si naundo tipa wetekaapai. Si nawira gupai nga kura awaraga kinaho nga ga aDezire Yekova rogo gu fugo mo naima inoho nga gu adunga bero ya. Ono gu ba awaraga du Bambu Kindo yo ima duna badungu agu awaraga rogoho kuru bambeda kusayo. Si rengbe arengba kadu a na dungu angbatunga sasa fugo Ziazia Kekeapai rogoho, buku sakarogo afugo yo, gbiati kura abuku nga gu rengbe ka undo. Mo rengbe ka geda agu awaraga re mbata fu dunguratise watadu tingbafuoho wa mo akpinyemuhe. Ka si du nga kompiuta ho ba agu awaraga yo re, Watchtower Library nadu adu rogoho. Si nga ringbisapai nga ga kompiuta nga gu duna agu awaraga dunduko rogoho nga ga aDezire Yekova na si nitaatapai ka zakaha na ka wetekaapai rogoho.

Si naundo agu agude sukuru namanga gu Dungaratise Nga ga Gaani Raka na Sunge. Ka si du nga mo rimi gu sukuru re, mo rengbe arengba ka mangasunge na agu awaraga re tipa ka mbakada gamo agumbapai. Gu babiapai nangerakurii gu Dunguratise Nga ga Gaani Raka na Sunge ko du nangerakurii agu awaraga re. Ko naye na gu vovo awaraga nakura kurogo gu ba awaraga re na kini bi gupai nga si niwene mbakadimbakadihe. Ko watadu gamo bayugu Ziazia Kekeapai rengbe arengba ka yugo wai foro rengbe mo ka gbia gupai mo aidaha. Ono tie, buku ho dagba agu abuku du tipa Bambu Kindo si aida boro dihe ka ga nani te. Na si naida ani ngerefuo agu abuku re wenengai angianga ka gbaka he rogoho ya.

Ziazia Kekeapai nape gupai nga, tipa ka gbia “gu inahe nga ga Mbori,” si naida ani gbataha agbata “wa okooko ũkumuko.” (Asanza 2:1-5) Agu awaraga du Bambu Kindo yo rengbe ka undoro mo tona manga gipai re.

• Gini ngbatunga awaraga du tipa wetekapai Bambu Kindo yo?

• Ada rengbe ka undoro mo ini mangasunge wenengai nani?

Yesu aya fu apefuoko wee: “Imaroni hasi rago ahasa ku bangiri aboro i bi gaoni ruruapai, ka taasa rimo Baroni du ngbangbaturũ yo.” (Matayo 5:16) Tipa ka manga gupai re, ani namangasunge wenengai na gu vovo apai nakura awere rogo birĩ-ino-mangaahe, kodihe na Internet. Gu gaani bangiriba nga ga Internet nga www.pr2711.com, si nga gu ba rengbe mo ka gbia dungu apai rogoho tipa agu aida nga ga aDezire Yekova gbiati gayo mangaapai. Gini apai du rogoho?

Agu akaragapai Ziazia Kekeapai afuhe kuti agu asanahe aboro naasanaha gbe. Mo rengbe arengba ka gbia akaragapai yo sa bete gu nyanyakipa asanahe aboro naasanaha. Ni kpiapai, agu atrakte nga Ya Mo Rungo Atingidi Nyasi? na Ya Mo Agu Aboro Naima Kpi Araka Berewe? nga gu duadu rogo Internet rogo afugo susi 600. Gu Ziazia Kekeapai nga New World Translation rogo niima susa afugo nga 130 na agu abuku du tipa wirika Ziazia Kekeapai, kodihe na gu buku nga Gini Apai Nzunzu Ziazia Kekeapai Ayugoho? gbiati vovo aNgbaõbambu Sinziri na Awake! Mo rengbe arengba ka geda dungu agi awaraga re rogo Internet watadu ka degaturo kuti gu fugoho i adehe. Mo rengbe arengba ka kusaha ti kpewaraga tipa ka fuhe fu gu boro duna nyemu rengo nga guni adunga waraga bero rogo fugoni ya! Agu awaraga nga ga vidio kinaho a rogo dungu afugo nga ga agu aboro afuranga watadu giapai ya. Mo rengbe arengba ka kusa dede fugo Ziazia Kekeapai a nga gu i agedihe rogo bawene gene, na agu adrama nga ga Ziazia Kekeapai, gbiati bawene amanzigo tipa kaa giaha ti regbo gamo ongoda.

Gu rengo du tipa aDezire Yekova. Vovo apangbanga kina yo a na guruguru avidio tipa gaani sunge, tipa agu apai namanga tipa aDezire Yekova, gbiati gu undo ani afuhe kurogo agu arago gberãngbi nati kurogoho. Mo rengbe arengba ka bi pa gu kikindigi adunguratise naye gbiati agu aˈadresi nga ga abe-basunge.

Gipai re nasa gupai asa nga gu imarago nga ga rengo kí kini da rogo agu apapara kpotosende turũ gbe. Aboro rogo zegino dunduko, kodihe na aguyo du rogo gu batuturũ rago du nibazezerehe digida sende yo nagbia undo. Ani nakpara fu Yekova ya ‘gako pai nioro aora’ kindi kurogo apapara kpotosende dunduko, si kini fu taarimo fuko.​—2 ATesaroniko 3:1.

• Wai gu bangiriba nga ga Internet nga www.pr2711.com aundo badungu aboro i wiriki gu rengo nga ga Ziazia Kekeapai?

• Ginipai mo akpinyemu ka wisigoho rogo gu gaani bangiriba re?