Badungu aboro mbu nduge tipa agu adunguratise nga ga akanisa mbiko i agbianga agu ariahe nga ga toro watadu wasa te. Ono tipagine tie si aida ti ni mo ndu tipa agu adunguratise nga ga irisombori aDezire Yekova amangaha? Ginipai mo nika bihe yo?

Mo nika gbia bakere ngbarago mbiko du mo dagba aboro nyemuse. Rogo bambata sa kama agarã, aKristano adu rogo adungurati, na i anaamanga adunguratise tipa ka irisombori, ka wisigo Ziazia Kekeapai, na ka ngarasa tiyo dagbayo. (AEbere 10:24, 25) I anaabi tiyo dagba ndikidi abakureayo, nga agu awirinayo nga ga toro yó. (2 ATesaroniko 1:3; 3 Yoane 14) Ani namanga kina gu bangisapai re areme na kini gbia kina gu ngbarago re.

Mo nika gbia undo ti wirika wai ka mangasunge na agu arugute nga ga Ziazia Kekeapai. A wa si adu mbata kusayo, akumba, adee, na agude naadunguratiyo wa sa. Agu abayugupai duna inohe naundo rani ani ini wai rengbe ani ka mangasunge na agu arugute nga ga Ziazia Kekeapai rogo gaani raka. (Pa Fu Rugute ni Ue he 31:12; Nemaya 8:8) Aboro dunduko rengbe ka bibia na ka ya beyo kuari ka fu karagapai ho i afu sanahe ni nga gu naida karagapai. Gure nga regbo tipa ka kusapa gaani maabangirise.​—AEbere 10:23.

Gamo idapase kuti Mbori nika nyaka. Gu mokedi nangia Pauro aya fu dungurati wee: “Nyemu bi roni namanga re, . . . nga, ani mongo wasa na oni dagba roni yo, ani ni ba sa sa be ga akuarani idapase, gaoni na gimi a.” (ARomo 1:11, 12) Pa koda ani tirani na akuarani aidipase dedede nanyakasa gaani idapase na kini nyakasi rani ani naaraka gu raka kindi nga ga aKristano.

Ani nayambaro na ngbarago mo yengo kadu pati agi adunguratise re ka bingo agu apai ani napekehe re. Ani ka diaro kugume wenengai. Marã ho i arogodaha be agu aboro naye tipa agu adunguratise re te.

• Ani namanga gaani adunguratise wagu ada anaamangaha?

• Wai rengbe ani ka gbia undo mbiko ndu ani kupati agu adunguratise nga ga aKristano?

Ani naandu tipa gaani adunguratise nga ga aKristano dedede ka si vura du nga ani nandu tipaha rogo kere ngbakungbo watadu rogo kere uru singia kere zere. Tipagine aDezire Yekova naaˈasadatiyo ti ni wa gure kaa ndu tipa adunguratise zavura ho du yó ni rogo fudifudiapai na ho i naima mbu ni be sunge?

Si nasa rani ani du wenengai. Pauro ayawee “ani bérẽ pa akuarani,” nga aguyo ani akodatirani naayo rogo dungurati. (AEbere 10:24) Gu fugo re nayugo gupai nga ani asadi ka inoyo wenengai. Ho ani aˈasada ni ka inopai tipa kura aKristano, ani naye ka ino gupai nga agu akurayo kinaho naima gbiatiyo na kina ngbatunga gu kpakaraapai ani ambu behe ono i ki ima diabehe, na i rengbe arengba ka undo rani ani dibe gaani a.

Si nanyakasa gaani pabakure. Ba gaani adunguratise yo, ani nakoda tirani na agu aboro nga bawene abakurearani. Ti kura aregbo, ani naadungura tirani kurogo kura aba tipa ka fu wasa fu kpotorani. Wai ngbatunga agu adunguratise re aundo rani? Ani naye ka ino awirinarani wenengai, na gipai re kini nyakasi gaani nyemuse tipa yó. Na ho awirinarani ambu ni be apai, ani naundoyo nibasa bambiko nyemuyo ima du tirani gbe. (Asanza 17:17) Ho ani akoda tirani ni na agu aboro dunduko du rogo dungurati, ani nayugo gupai nga ani naberãpa akuarani aberã.​—1 AKorindo 12:25, 26.

Ani nangarasa ro mo sia agu aboro namanga gupai Mbori akpinyemuhe ni abakureamo. Mo rengbe ka gbia ngbatunga agu abakure re dagba aDezire Yekova. Ani nazungodi ro ka mo mbunga ai pai si ká na mo ti koda mo tiro na ani ya.

• Tipagine duhe ti ni nibawenepai ani naakoda tirani na akuarani ba adunguratise yo?

• Gini regbo mo akpinyemu ka tona ndu tipa gaani adunguratise ka tona inido tiro na agu awirina du yó?

Agu adunguratise nangia ga bambata aKristano anidu na abia rogoho, na akpee, gbiati geda Ziazia Kekeapai na kini sakirogoyo. (1 AKorindo 14:26) Mo nika bi apai wakina ngbatunga gure ba gaani adunguratise yo.

Agu arugute i afuhe yo mburuhe rii Ziazia Kekeapai. Rago Poso, rogo adungurati dunduko, i naamanga gumbapai tipa aminiti 30 ka sakapa wai rengbe Ziazia Kekeapai ka undo rani rogo gaani raka na wai Ziazia Kekeapai asakapa gi regbo ani araka ti ni re. Aboro dunduko nazara gayo aZiazia Kekeapai ka geda agu averesi bagumbapai agedaha. Tifuo gu gumbapai re, Wisigo “Ngbaõbambu Sinziri” namanga tipa saa sa, nga gu aboro dunduko asaka gupai du rogo gu papara Ngbaõbambu Sinziri du tipa gu poso re. Gi sakapai re naundo rani ani ini wai ka mangasunge na agu arugute nga ga Ziazia Kekeapai rogo gaani raka. Kina gu bangisa Ngbaõbambu Sinziri re i awisigoho rogo agu adungurati nga ga aDezire Yekova du rogo zegino dunduko nga gu bangehe naima susa 100,000.

Ani nagbia undo yo tipa wai ka mbakada gaani gene yugopai. Ani ni naadungura tirani a bebere poso tipa gu mbakadapai du na apaparaha biata du riihe nga Gaani Raka Nga ga AKristano na Gaani Sunge, nga gu du mburuhe rii agu apai du rogo Waraga Dunguratise Nga ga Gaani Raka na Sunge nga gu i akusaha rogo adiwi ni basasa. Bambata papara gu dunguratise re nga Aũkumuko Rogo Fugo Mbori Yo, naundo rani ani inidi tirani na gu papara Ziazia Kekeapai i afuhe fu dungurati i gedihe mbu regbo koyo kindi. Gu paparaha ngbefouho nga Mo Fu Tiro Sa Sunge Tungusapai, si nakoda kpia wai ka saka Ziazia Kekeapai na kura aboro. Bafurugute nafu rugute furani nga gu naundo rani ani mbakadi gu gene ani agedapai ngbaha na kini fura ngbaha. (1 Timoteo 4:13) Gu yangara paparaha du nga Raka Ni AKristano, si nasakapai tipa wai rengbe ani ka mangasunge na gu bangua arengo nga ga Ziazia Kekeapai rogo gaani raka yo na aˈuru dunduko. Si nakoda gu sakapai du na asanahe na akaragapai nga gu nadungurosi gaani inohe nga ga Ziazia Kekeapai.

Ani nabihe nga ho mo nika ndu ni tipa gaani adunguratise, rago nika ngba angba tiro gbe ka bi gu ngbatunga wirikapai ani agbiaha.​—Yesaya 54:13.

• Ginipai si aida mo moibangiro nga mo nika giaha ba agu adunguratise yo nga ga aDezire Yekova?

• Gini gaani dunguratise mo aida ka ndu tipaha mbata tingbafuo gi regbo re?

Ya mo mo kparia wai agu aDezire Yekova du asurayo rogo gi burosua re navo rokoo niwenehe ho du yó ni pati gayo adunguratise nga ga irisombori? Tipagine ani amaa berãrani ti ni wa gure tipa gaani vorokoo na mbakadatise?

Ani namangaha wo ka yugo irisa tipa gaani Mbori. Rengo nga ha nga, Mbori abingo aboro kina kuti tamayo te, ono ko nangera ku kpoto aboro yo. (1 Samuere 16:7) Ono tie, ho ani adunguratirani ni tipa ka irisombori, ani na nyemu gupai nga ka fu irisa fu Mbori na fu agu akuarani ani airisoko naayo. Ka si du nga ani nandu kubarabangiri basapungbanga ngbangayo, ani idi aida ka vorokoo ki mbakaditirani wenengai tipa ka yugo irisa tipa gani bangiriba. Teketeke a, gu gene ani avorokoo ngbaha tipa adunguratise nayugopa gaani irisa koyo du “Basapungbanga zegino dunduko” ni nga Yekova Mbori, na tipa gu ba ani airisoko rogoho.​—Bambata Pai 18:25.

Ani namangaha wo ka yugopa agu arugute ani araka kutini. Ziazia Kekeapai naruga aKristano ki ya i ‘ukadi tiyo na gu rokoo adunga na enda ti ni ya’ wa agu aboro “idi pa sinombori.” (1 Timoteo 2:9, 10) ‘Gu rokoo adunga na enda ti ni ya’ nga gu ngbatunga rokoo i abingo kpotoboro abi ti ni ya, gu rokoo azingisanga nyemu kodaba ti kura aboro ya, watadu gu rokoo boro avonga ha tipa ka yugo tiní fu akurani tipa ka kiiso pa tiní ya. Kurigure, ‘gu rokoo adunga na enda ti ni ya’ nga gu rokoo ngba bibihe angba, na si naida i voho ngba wene gene. Ono gi rugute re ayanga wee si naida boro ngbe bangisa ngbatunga rokoo te. Gaani wene mbakadatise rengbe arengba ka ‘fonga gu yugopai nga ga Mbori Batasirani’ na “ki taasi rimo Mbori.” (Tito 2:10; 1 Petero 2:12) Ho ani ambakadatirani ni wenengai tipa agu adunguratise nga ga irisombori, si nasa kura aboro i duna wene bipai tipa gaani irisombori.

Ka si vura du nga wene arokoo bero nga gu rengbe mo ka voho ka ye tipa gaani adunguratise te, mo vo kina gu du bero. Ka si vura du nga roko-rungo du bero, ka mo zunduhe ki voho ngba wene gene, si nadu niwenehe bangiri Mbori.

• Tipagine nyakipa gupai ti ni nga ani vorokoo wenengai ho ani andu ni tipa irisombori?

• Gini arugute nasa rani ani naavo rokoo na kini mbakaditirani wenengai?

Ka si du nga mo nawirika Ziazia Kekeapai na aDezire Yekova, ani nabihe nga mo naangera angera rii gupai mo nika wirikaha mbata fu regbo wirikaha da. Kina gu bangisapai re si aida mo niimangihe mbata fu mo ndu tipa agu adunguratise nga ga dungurati, bambiko mangaha wo rengbe arengba ka undoro gbe. Mo rengbe ka gbia undo gbe ka mo amangaha wo ti aregbo dũ.

Mo sia gu regbo mo nika wisigopai ti ni na gu ba mo nika mangaha rogoho. Gini regbo rengbe mo ka berãkuriipai gbe? Ya mo wiso du mbata fu mo tona gamo sunge nga ga gu uru re watadu yuru du fuo ndu agude ka pi? Ka si du nga mo arengbanga ka wisigopai tipa gbanga regbo te, mo sia gu bakio regbo mo nikaa mangaha kuti ni, na ki asadi ka kurapai gberesinga paha ya. Mo gbata gu ba adunga na waawaa rogoho ya, na ki kisi agu ahe duwa radio, terevizioni, na terefuni si andu ka fuda ro. Mo kpari fu Mbori mbata fu mo tona gamo wisigopai bambiko si nika undoro mo di berãro ti agu apai nga ga gu uru re na ki moiberãro tipa agu apai mo awisigoho rogo Fugo Mbori.​—AFiripoio 4:6, 7.

Mo gbaki he tii memeapai, na ki mbakaditiro ka fu karagapai. Gu bambatapai si aida mo mangihe nga ka asada ka rugatiro na gupai i afura tipaha. Mo berẽkurii gu riipai i nika sakapai tiihe, na ki berẽpa wai gu umba ariipai du rogoho andu na bangua riipai, ki wisigi agu asura ka du rogoho, na agu asanahe nga ga fugöpai nga gu du tipa ka nyakasa memeapai. Fuoho, mo gedi agenewaraga nibasasa, na ki ngere tipa agu akaragapai du kuti agu asanahe du nikekehe. Mo zara agu averesi keyo ho ki gedihe, na mo ki berẽkurii wai si andu na gupai i afura tipaha. (Amokedi 17:11) Ho mo abi karagapai ni kuti sanahe, mo gba he tii bete gu meme afugo du rogoho tipa si undoro mo tingidi gu karagapai re. Fuo gure, badunguratise yo, mo ki ya bero kuari ka mo idihe na ki fu karagapai niguruhe ringbisihe kuti wai mo agirogo gupai mo agedihe.

Ka mo awisigo agu apai i awisigoho badunguratise yo na aposo dũ, mo nika kiiso gu gamo “kumuko” nga ga gu inohe nga ga Ziazia Kekeapai.​—Matayo 13:51, 52.

• Wai si aida mo sia regbo na ba tipa mbakadatise tipa adunguratise?

• Wai rengbe mo ka mbakadatiro ka fu karagapai badunguratise yo?

Tona ti kina gu regbo nangia ga awiri Yisaraere, Yekova nakpinyemu gupai nga aborokporo di regbo ka sungo sa, ka nyakasatiyo rogo toro yo na ka nyakasa gayo ramukporo. (Pa Fu Rugute ni Ue he 6:6, 7) Si nga ndu gupai aDezire Yekova nakpara regbo ti ni na aposo dũ tipa aborokporo irisi Mbori sa, kini saki agu apai nga ga toro nga gu rengbe ka undoyo. Ka si vura du nga mo naraka nisaro, mo rengbe arengba ka dia regbo na Mbori niwisigo mo Ziazia Kekeapai na agu awaraga mo aidaha.

Si nga regbo tipa mbeda gbe na Yekova. Ziazia Kekeapai nazungodi rani kini yaa: “Oni mbédi na Mbori, ko ki mbedi na oni.” (Yakoba 4:⁠8) Ani naino Yekova wenengai ho ani awirikapai ni tipa asinoko na gako mangaapai rogo gu keke Sangbako nga Ziazia Kekeapai. Gu taata gene rengbe oni ka tona gaoni irisombori nga ga aborokporo ngbaha nga ka dia regbo ka geda Ziazia Kekeapai wasa na fugo roni kuari, isoke, ni geda oni gu geda Ziazia Kekeapai nga ga poso du rogo Waraga Dunguratise Nga ga Gaani Raka na Sunge. Oni rengbe ka kparaka apapara Ziazia Kekeapai ti gaoni aborokporo nibasasa tipa i gedihe, fuoho, oni dunduko ki sakipai tipa agu apai oni nawirikihe rogo Ziazia Kekeapai.

Si naundo aborokporo i du nikpamiakpamiayo wenengai. Akumbakuadee na dereakumba, kodihe na avunguagude na agude, nanyakasa gu nyemuse du dagbayo ho i awisigo Ziazia Kekeapai ni sa. Si naida si du niregbo ngbarago na zereda, na nigu regbo du aborokporo adu na nyemu si da niipo. Ringbisihe kuti garã agude, avunguagude rengbe ka siaka apai nga gu i nika sakapai tipaha, wa gu nga rogo Ngbaõbambu Sinziri watadu kura awaraga. Oni rengbe arengba ka fura tipa agu apai awironi agbiatiyo na ni sukuru yo na wai rengbeyo ka mangapai sani. Oni rengbe ka bi gu mbakadapai du rogo JW Broadcasting (tv.jw.org) na tingbafuoho oni ki sakipai tipaha wa sa. Oni rengbe arengba ka wirika agu abia oni ka bihe badunguratise yo na ki ngi wiri mbaro fuoho watadu ka ri kura wiri wene riahe.

Gi regbo aborokporo adiaha na aposo dunduko ka iriso Yekova wa sa re naundo aborokporo dunduko i nigbia ngbarago mbiko Fugo Mbori, na ko nafu maku afu kurii gu asadatise i amangaha.​—Atambuahe 1:1-3.

• Tipagine ani naakpara regbo ti ni tipa gu irisombori nga ga aborokporo?

• Wai rengbe avunguagude ka sa gi regbo re si du niregbo ngbarago fu aborokporo dunduko?

Tipagine du agi aboro re ti ni na bakere ngbarago wa gure? I pati bakere dunguratise sa nga gaani. Ani naamanga kikindigi adunguratise amanga, wakina gu ga Mbori amoyambu naadu mbata kusayo, nga aguyo i aruguyo ya i niimangi kikindigi adunguratise bara biata rogo garã sa. (Pa Fu Rugute ni Ue he 16:16) Ani na bakere adunguratise biata rogo agarã dunduko: gu bakere dunguratise nga ga uru sa bara ue gbiati gu bakere dunguratise nga ga aˈuru biata. Wai du ani agbia undo be agi adunguratise re?

Si nanyakasa gaani riigbu nga ga awirina. A wa aYisaraere anaangi mbiko sambuoyo Yekova “dagba arika rimbasa aboro yo,” ani naangi angi gbe ho ani airiso Yekova ni ti regbo kikindigi adunguratise. (Atambuahe 26:12; 111:1) Si nga wene regbo furani ani gbiatirani na kura aDezire Yekova nga aguyo ye rogo kura adungurati watadu kura aringara. Bebere uru, ani naari he sa na awirinarani ba bakere dunguratise yo, si kini sa gupai nga ani gbia ngbarago gbe naayo. (Amokedi 2:42) Ba agi adunguratise yo re, ani nabi gu nyemuse abi nzunzu nakpamia “awirina” rogo zegino dunduko.​—1 Petero 2:17.

Si naundo rani ani sono rogo toro yo. AYisaraere anaagbia undo agbia a mbiko ‘rugayo tiyo’ na agu apai i anaasakarogoyo fuyo rogo Ziazia Kekeapai. (Nemaya 8:8, 12) Ani nabi agu arugute nga ga Ziazia Kekeapai ani agbiaha ti regbo kikindigi adunguratise a na nyanyakipaha. Kikindigi adunguratise dunduko du mburuhe rii Ziazia Kekeapai. Agu agumbapai i amangaha na akpiapai, si naundo rani ani ini wai rengbe ani ka manga gupai Mbori akpinyemuhe rogo gaani raka. Ani nagbia nyakasaro agbia ho ani agia agu apangbanga ni du tipa agu aboro nadiabe agu akpakarapai aKristano agbiatiyo nani ti gi kere regbo re. Ti regbo gu bakere dunguratise nga ga aˈuru biata, i namanga drama nga gu nasa agu apangbanga du rogo Ziazia Kekeapai si duwa gupai namanga kina awere na si kini yugu dungu apai furani. Ti regbo kikindigi adunguratise dunduko, aboro naazio bapatiza nga aguyo naida ka yugopa gayo kparatise fu Mbori.

• Tipagine du regbo kikindigi adunguratise ti ni niregbo ngbarago?

• Gini aundo rengbe mo ka gbiaha mbiko ndu mo tipa bakere dunguratise?

Nimbedi kuti regbo kpio Yesu, ko ayaa: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.” (Matayo 24:14) Ono wai si aidi i mangi gi sunge re tipa ka nyasaha? Si aidi i mangihe nipeka yó fuo gu kpiapai Yesu amoihe ho ko adu ni auru kpotosende.​—Ruka 8:1.

Ani naˈasada ka gbia aboro kpuyo yo. Yesu arugu gako abawiriki i nitungusi wene pangbanga nitanga nani rogo akporo. (Matayo 10:11-13; Amokedi 5:42; 20:20) I anaafu rago afu fu agu abatungusi wene pangbanga re i ndu ka tungusapai rogoho. (Matayo 10:5, 6; 2 AKorindo 10:13) Wakina gure, gaani sunge tungusapai nimbakadimbakadihe, na adungurati dunduko nibasasa i afu rago fuhe tipa si nyasihe na tungusapai. Gipai re nasa rani ani mangi sangba Yesu, nga gu ko agumbaha ki yawee ‘ani tungusipai fu aboro’ sirisiri.​—Amokedi 10:42.

Ani naˈasada ka gbia aboro rogo ai gu ba du yó rogoho. Yesu anaatungusapai atungusa a rogo agu arago aboro adunguratiyo kurogoho, wa gu nga pangba ime watadu pati guga. (Marako 4:1; Yoane 4:5-15) Ani natungusapai a rogo ai gu ba ani agbia aboro rogoho, singia bangiri gene, babagaahe yo, watadu rogo terefuni. Ani namanga dezirepai amanga a fu gaani amurakporo, gaani abadiasunge, gaani abadiawirikapai, na agumerani ho ani agbia gene ni ka mangaha wo. Agi apai re dunduko sa gupai nga amirioni aboro rogo zegino dunduko gi ‘pa ga Mbori bata.’​—Atambuahe 96:2.

Ya mo boro ho du pani riro yo mo akpinyemu ka gumba gu wene pangbanga nga ga ga Mbori Ngbii funi, na wai rengbe gu wene pangbanga re ka undoni? Ka mo kanga na gi wene pangbanga re tipa kina ro ya. Mo gumbaha fu kura aboro niipo!

• Gini “wene pangbanga” duho si aida i tungusihe?

• Wai aDezire Yekova apekafuo gu gene tungusapai nangia ga Yesu?

“Bazakigene” nga gu boro nandu kurogo vovo ba ki zaki gene koyo tipa kura aboro ndu koyo. Yesu aduwa kina bazakigene, bambiko Mbori akedi ko ku sende no ko ye ka manga sunge batasa aboro na ka zaka gene tipa aboro gbia bata. (Matayo 20:28) Areme, apefuoko nawirika ko nidia yó bakere regbo kuti sunge ‘sa aboro ni abawiriki.’ (Matayo 28:19, 20) Akurayo aima dia gu sunge kubeyo ani ayambaha nga sunge abazakigene.

Bazakigene nga gu batungusipai natungusapai ti aregbo dũ. ADezire Yekova dunduko nga abatungusi wene pangbanga. Ono wa vura duhe wo, aguyo namanga ariapai amanga rogo gayo raka tipa kadu ni abazakigene, nga agu aboro nadia asaa 70 kuti tungusapai rogo adiwi dũ. Tipa ka manga gipai re, i amanganga sunge zegino nga tona wiso ku nyemu te, ono i namangaha tipa bete asaa gbua. I nasia kura abazakigene i duni kparakpara abazakigene rogo agu arago duna bakere zingo abatungusipa ga Mbori Kindo rogoho. Agiyo re nadia asaa 130 watadu susihe kuti tungusapai rogo adiwi dũ. Abazakigene naraka taata raka, kidu na gu kido nga Yekova nika fu agu ahe afu fuyo nasongoda unga. (Matayo 6:31-33; 1 Timoteo 6:6-8) Aguyo arengbanga ka mangasunge ní agu abazakigene natungusapai ti aregbo dũ ya rengbe ka mangasunge ni amoundo abazakigene ka gene du beyo tipa mangaha. Agiyo re nakiiso gayo regbo tungusapai kuti asaa 30 watadu 50 rogo diwi.

Nyemu Mbori na nyemu aboro nasa abazakigene i futiyo sa sunge. Wakina Yesu, ani ima bi gu kere rungo nga ga toro du dungu aboro rogoho areme. (Marako 6:34) Ono ani na gu inohe berani rengbe ka undoyo awere, na ki fu ndikidi maabangirise fuyo kumbatayo. Nyemu aboro nafõngbadu abazakigene yo i di bakere gayo regbo na ome ka undo aboro rogo toro yo. (Matayo 22:39; 1 ATesaroniko 2:8) Nisangbana gipai re, gayo idapase nanyaka, i ki mbedi na Mbori gbe, na i ki gbia bakere ngbarago.​—Amokedi 20:35.

• Gini sunge gaani abazakigene amangaha?

• Gine nafõngbadu kura abatungusipai yo i rimi sunge abazakigene?

Agu asukuru nga ga siokrasia aima du ni sino aDezire Yekova. Kparakpara asukuru kinaho du tipa agu aboro naima fu gayo raka tipa ka tungusapa Kindo na aregbo dunduko wa ka i “digisi” gayo sunge.​—2 Timoteo 4:5.

Sukuru Nga ga Abazakigene. Ho bazakigene amangasunge ni tipa garã sa zanga ru gene, ni narẽ tipa ka manga gu sukuru nga ga abazakigene du tipa poso sa Bambu Kindo yo. Mburu manga gu sukuru re nga ka sa abazakigene i mbedi na Yekova, na ki du na inohe tipa ka manga ngbatunga atungusapai dunduko, na ka undo yo i ni ndu na ni kumbatayo.

Gu Sukuru Du Tipa Abatungusipa Kindo. Gu sukuru du tipa adiwi ue re, si fu agu abazakigene du na inohe du na nyemu ka mbu akpuyo ka ndu ka mangasunge rogo gu ba du na bakere zingo. Gure wa ka i aya, “Mi du re! Mo kédi re” ho gu bakere Batungusipai nga Yesu Kristo adunga gu kurani berewe wa ko ya ayamba yo ni. (Yesaya 6:8; Yoane 7:29) Ho i aguari ni kpuyo, gure nga i ima ida ka raka gu raka du taata. Sino mangapai, rago na riahe ima rengba ka du kia ti gu i ainidi he. Si ima rengba ka du a nga si naida i wiriki kura fugo. Gi sukuru re naundo abakuparanga na anakuparanga gbiati arogotise nga aguyo du garãyo natona ti 23 kuti 65, i sonosi agu asino nga ga toro i nika ida na ni rogo gayo sunge yo gbiati gu birĩ nika sa gupai nga Yekova mangisunge na yo wenengai rogo gako riigbu.

Gu Sukuru Nga Girada. Rogo pa-Ebere, “Girada” wa ka i ya “Gangara Dezirepai.” Tona rogo gu garã i asigira Girada nangia 1943 kada ku awere, agude sukuru susi 8,000 naima gbia rabahe Girada yo i ki kedi yo ni amokedi i ndu ka manga dezirepai “dati kina digida sende yo,” na i ima du na bakere diabese. (Amokedi 13:47) Ni kpiapai, ho amokedi adani Peru yo, dungurati aadunga yo nga ga aDezire Yekova te. Awere, adungurati yo niima susa 1,000. Ho gaani amokedi atona sunge ni Giapani yo, aDezire Yekova aadanga ti bawe rogo gu ringara re te. Awere, i ima susa 200,000. Agu adiwi bisue du tipa gu Sukuru Nga Girada re, si nakoda dudunguro wirikapai tipa Fugo Mbori. Agu aboro namangasunge ni kparakpara abazakigene, amokedi, agu awirina du Betere yo, watadu aguyo namangasunge ababi rimbasa, i du i ayambayo tipa gi sukuru re tipa i gbia nyanyaki rabahe tipa i ndu ka sigira watadu ka nyakasa sunge Kindo rogo zegino dunduko.

• Sunge gu Sukuru Nga ga Abazakigene Nga Gine?

• Sukuru Du Tipa Abatungusipa Kindo fu ada?