1-3. Gini asanahe aboro naasanaha tipa kpio, na wai du kura apambori akaragapai kutini?

BAIBIRI nakido rani nga uru adu kinaho “kpio adú nga berewe te.” (Yugoti 21:4) Rogo Kapita 5, ani awirikipai yo nga ga Yesu motumo nasaha furani taata tipa ani gbia nyenye unga. Ono aboro nakpi kindi. (Batungusipai 9:5) Sidu, gu nyanyakipa sanahe sa dagba agu asanahe ani asanaha nga, Ginipai ninaamanga rani ho ani akpi ni?

² Gu karagapai du tipa gu sanahe re nada na nyanyakipaha gbe ho gaani boro akpi ni. Ani rengbe ka bakabangirani nga: ‘Wari ndu gu boro re ni? Ya mo ni nabi rani? Ni rengbe ka undo rani? Ya mo ani abi ni berewe?’

³ Apambori nafu akaragapai kuti agi asanahe re ni bakiakia. Aguyo nayugo gupai nga ka mo du ni wene boro, mo nandu ku ngbangbaturũ yo, na ka mo ngia gbegberẽ boro mo nandu ku we yo. Aguyo naya, ho mo akpi ni mo nada ni toro na ki ga fuo agu atoro agumero naima kpiko. Ayugo naya, fuo mo kpi na i ki sapungbanga ro, i nabatika ro berewe, watadu mo nakaraga tiro ka raka na gu kura kpoto kia, isoke singia ka da ni gu kura boro kia watadu ni nya.

4. Gini yugopai dungu apambori ayugoho tipa kpio?

⁴ Apambori nayugo gupai du kia. Si nawira wa apambori dunduko nayugo kina bangisapai sa. Si nayugo gupai nga ho boro akpi ni, gu kura papara ni kinaho akpingo ya. Ya mo rengo du?

WARI DU ANI ANDU KUONI FUO KPIO RANI?

5, 6. Ginipai ninaamanga rani ho ani akpi ni?

⁵ Yekova ima ino gupai ninaamanga rani ho ani akpi ni, na ko ima ya furani wẽ ho boro akpi ni, gani raka nadigo. Kpio nga zanga unga. Sidu, ho boro akpi ni, gani aberãpai ti ni berewe te.a Ho ani akpi ni, ka ani bingo he, ka ani ginga pai, watadu ka berãpai a te.

⁶ Bakindo Soromo ape gupai nga ‘kpikpi aboro ainanga pai te.’ Kpikpi aboro arengba ka kpinyemu boro watadu ka soga ni te, na “sunge rogo Baatoro kpikpi aboro yo yo mo andú ku ho ni te, berãpai na inahe na tatamana a te.” (Mo gedi Batungusipai 9:5, 6, 10.) Na rogo Atambuahe 146:4, Baibiri nape gupai furani nga ho boro akpi ni, “gani berã pa apai” nakpi a.

GUPAI YESU AGUMBAHA TIPA KPIO

7. Ginipai Yesu apehe tipa kpio?

⁷ Ho wene bakurea Yesu akpi ni nangia Razaro, ko aya fu gako abawiriki wẽ: “Badiangbarani ti ni rame nga Razaro.” Ono anga gupai Yesu aaida ka gumbaha nga Razaro naongoda te. Yesu kini mo ka ya gbaiga wẽ: “Razaro kpi.” (Yoane 11:11-14) Sidu, Yesu aringbisi kpio kuti rame. Ko ayanga wẽ Razaro gu du ngbangbaturũ yo watadu ko na agu agumeko naima kpiko te. Na ko aapenga gupai a nga Razaro gu du rogo we narungo watadu i ima vunga ko ni gu kura boro watadu nya a te. Si adu bangiriko wa Razaro rogo bakere rame. Gu kura averesi naringbisa kpio kuti dudunguro rame. Baibiri nape gupai nga ho i aimi Setefano ni, ko ‘ati ni rame’ rogo kpio yo. (Amokedi 7:60) Gu mokedi nangia Pauro ape gupai a nga bete aKristano ‘ati ni rame.’—1 AKorindo 15:6.

8. Wai du ini anihe nga Mbori aakusanga aboro i kpiki te?

⁸ Ya mo Mbori akusi aAdamu na Eva nga i raki na ki kpi niyangaraha? Oó! Yekova akusiyo i gbia ngbarago rogo raka yo nyeanye kindi na wene kpotoyo. Ho Yekova akusi aboro ni, ko afu gu nyemupai fuyo nga ga raka nyeanye kindi. (Batungusipai 3:11) Avunguagude ho naida ka bi awiriyo i ni gbinza na kini kpi te, kina gu bangisa bipai re du Yekova na ni tipa rani. Ono ka si du nga Mbori akusi rani ani raki nyeanye kindi, tipagine ani akpi ti ni?

TIPAGINE ANI AKPI TI NI?

9. Tipagine gu zinahe Yekova afuhe fu Adamu na Eva arẽarẽ ti ni?

⁹ Ati Edene yo, Yekova aya fu Adamu wẽ: “Agu angua du ati yo dunduko mo nirí zuzuhe ari a wa mo akpi nyemu he; ono gu ngua nga ngua ina wenepai na gbegberẽpai ka mo rí nga zuzuhe ya, bambiko ni gu rago ka mo ri zuzuhe mo akpí akpi ni rengo.” (Bambata Pai 2:9, 16, 17) Gu zinahe du ziazia re aadunga ni kpakarakpakaraha tipa ka mangapai kutini te, na Yekova adu na kina rengo beko tipa ka gumba gupai fu Adamu du ni wenehe na gu du ni gbegberẽhe. Ni gia yo sangba Yekova, ka i a yuguhe nga i nairisa gako pagbia airisa. Gure a ka yugu gayo tambuahe tipa agu ahe dunduko ko afuhe fuyo.

10, 11. (a) Wai du Satana anangi Adamu na Eva? (b) Tipagine si aaidanga i bi gupai Adamu na Eva amangihe ti ni na taatapaha ya?

¹⁰ Si nafu kina gberãrago nga, aAdamu na Eva asia ka basasangba Yekova. Satana asana Eva nga: “Ati Mbori aya, ‘Ka oni rí nga agu angua du ati yo dunduko ya’?” Eva akaragapai nga: “Gu zuzu angua du ati yo ka ani ri he ari; ono zuzu gu ngua du bebere ati yo, Mbori aya, ‘Ka oni rí nga zuzuhe ya, ka oni zádi nga ha wa sa ya, oni ka kpi.’”—Bambata Pai 3:1-3.

¹¹ Fuani Satana ki ya: “Oni akpí nga wa sa te. Bambiko Mbori ini ya ni gu rago ka oni ri zuzuhe bangironi azá aza, oni ki du wa kina Mbori, niini wenepai na gbegberẽpai.” (Bambata Pai 3:4-6) Satana aida Eva berẽ gupai nga ri ima rengba ka diaberã tipa tiri nibipa gupai du ni wenehe na gu du ni gbegberẽhe. Ti kina gu bangisa regbo re, ko anangi ri tipa gu surungba pai rengbe ka gbia ri ka ri basasangba. Satana aya Eva akpingo te, sidu, Eva ki ri gu zuzungua re na ki fu gu kuraha fu kumbari. Adamu na Eva aima inoho nga Yekova aima pe gupai fuyo nga ka i ringa gu zuzungua re ya. Ho i arihe ni, i abasa gu zinahe naadu ziazia Mbori afuhe fuyo re. Pa riyo ho ayugu gupai nga i airisanga gu Bayo du ngbangbaturũ yo nga boro nyemuse te. Taatapai nga gupai i amangihe re te!

12. Tipagine duhe ti ni ni gbegberẽpai nga Adamu na Eva abasasangba Yekova?

¹² Nairiwo gu gbegberẽpai bambata avungurani amangihe re nga ka basa Bakusiyo! Gini bipai rengbe mo kadu na ni ka si dunga wiro nga kumbagude na degude mo namangi ome ni bakerehe tipa ka sonosa yo samungu kuti ro na ki mangi gupai nga gu mo aayanga fuyo i mangihe ya? Ya mo gberãrago zingo ro te?

13. Ginipai Yekova aaida ka gumbaha ho ko aya ni wẽ “kina ku nvutu yo mo ka karaga tiro ku ho ni”?

¹³ Ho Adamu na Eva abasasangba ni, i azanga gu momu nga ga raka nyeanye kindi. Yekova aya fu Adamu: “Mbiko mo nga kina nvutu, kina ku nvutu yo mo ka karaga tiro ku ho ni.” (Mo gedi Bambata Pai 3:19.) Gure nayugo gupai nga si adu nga Adamu nika da berewe ni nvutu, si ki du wa ka i ya i aakusanga ko te. (Bambata Pai 2:7) Fuo Adamu mangi ingapai, ko akpi na ka ko adunga ti ni berewe ya.

14. Tipagine ani akpi ti ni?

¹⁴ Ka Adamu na Eva agisangba Mbori, ka i du kina ti unga areme. Ono ho i abasa ko ni, i aingipai, na niyangaraha ki kpiki. Ingapai wakina gu kere kaza ani adihe ti bambata avungurani. Ani dunduko i avunga rani na ingapai, si du nga ndu gupai ani akpi ti ni. (ARomo 5:12) Ono gure aangianga ga Mbori ringbisapai tipa aboro te. Mbori aidanga aboro kpiki te, na Baibiri nayamba kpio nga “vura.”—1 AKorindo 15:26.

RENGO NAFU RANIRII FURANI

15. Gu rengo du tipa kpio na fu gini ranirii furani?

¹⁵ Gu rengo du tipa kpio nafu ranirii furani be dungu gbegberẽ apai. Baibiri nayugo gupai furani nga kpikpi aboro aigirãnga te na rago agberãnga tiyo a te. Ka ani furanga na yo te, na ka i furanga na ani a te. Ka ani undongo yo te, na ka i undongo rani a te. Ka i imisinga rani te, si du si aidanga ani gunde beyo a te. Ono tie, dungu apambori nayugo gupai nga kpikpi aboro naraka araka rogo gu kura ba na ani rengbe arengba ka undo yo ka ani fu marã fu apasita tipa i mangi kparakpee tipa yo. Ono ho ani aino gu rengo ni du tipa kpikpi aboro, ani arengba nga ka ida kuti agu aziree re te.

16. Gini ziree dungu apambori ayugoho tipa kpikpi aboro?

¹⁶ Satana namangasunge na ziree pambori tipa ka nanga rani na ka sarani ani berẽ gupai nga kpikpi aboro naraka araka. Ni kpiapai, gu kura apambori nayugo gupai nga ho ani akpi ni, gu kura papara rani kinaho naraka araka kindi rogo gu kura ba. Ya mo gere nga gupai gamo pambori ayugoho foro, watadu si nayugo gupai Baibiri apehe tipa kpikpi aboro? Satana namangasunge na ziree tipa ka nyaga aboro kusayo ti Yekova.

17. Tipagine ya ani ti ni gupai nga Mbori nazo aboro we yo nga senga ko?

¹⁷ Gupai dungu apambori ayugoho nazeresa kina ngba. Ni kpiapai, aguyo nayugo gupai nga i nika zo gbegberẽ aboro we yo nyeanye kindi. Gu ziree re nga senga Yekova. Ko arengbanga ka rungosi aboro ngba gu gene re te! (Mo gedi 1 Yoane 4:8.) Mo rengbe ka bi gu boro wai nafu mbusa fu gude nga ka zo beru we yo? Mo rengbe ka bi ni ni kere sino boro. Mo idinga ka ino gu boro re a te. Na gere nzunzu nga gu bipai Satana aida ani du na ni tipa Mbori!

18. Tipagine du si aidanga ani gunde be kpikpi aboro ti ni ya?

¹⁸ Gu kura apambori nayugo gupai nga ho aboro akpi ni, i nada ni atoro. Ngbatunga agu apambori re nayugo gupai nga si naida ani irisi agu atoro re na kini gunde tiyo mbiko i ima rengba kadu ni wene abakure watadu ni kere avurarani. Dungu aboro ima ida kuti gu ziree re. I nagunde be kpikpi aboro na kini irisiyo kuba Yekova. Mo tingidi gupai nga kpikpi aboro ainongo pai te, si du si aidanga ani gunde beyo te. Yekova nga Bakusirani. Ko nga ndikidi Mbori, na si naida ani irisi kina ko sa.—Yugoti 4:11.

19. Wai du pa ino ani gu rengo du tipa kpio aundo rani?

¹⁹ Ho ani aino gu rengo ni du tipa kpio, ani nadu na ranirii be agu aziree nga ga apambori. Na gi rengo re naundo rani ani rugutirani na gu bawene akidohe Yekova namangihe tipa gaani raka awere na kumbatayo.

20. Ginipai ani nika wirikaha rogo gu kapita ngbefuo gere?

²⁰ Bakuru kusayo, gu ga Yekova moyambu nangia Eyobo aya: “Ka boro kpi, ni adú ni ungani berewe?” (Eyobo 14:14) Ya mo si taata nzunzu fu gu boro kpi ni da ni ungani berewe? Gu karagapai Mbori afuhe furani rogo Baibiri ima ngba. Ani nika bihe rogo gu kapita ngbefuo gere.

1-3. Ginihe du du ani dunduko ni zizi rani fuhe, na wai du Yekova nika batasa rani behe?

MO Berẽnga gupai nga i saringbanga ro na ki baro ku bambukiso yo tipa gu pai mo aamanganga ha ya. Ka momu adunga bero tipa i kusi ro bambukiso yo ya. Ka maabangirise adu nga tipa gamo raka kumbatayo ya, na ka gene adunga bero tipa ka manga wiri pai a ya. Ono ti kina gu regbo adunga mo na maabangirise re ya, mo kini ini gupai nga gu kura boro kinaho du na ome be ni tipa ka kusa ro na ni ima kidohe ka undoro! Wai du ka mo du ti gu regbo re?

² Ani dunduko nga zizi aboro fu kpio. Ka kina gine vura manga amanga vurũ ka ani ne ngaha te. Ono Yekova na ome beko ka kusa rani kusayo vurube kpio. Na ko ima kidohe nga gu “Yangara vura i nikagbarasa ha nga kpio.”—1 AKorindo 15:26.

³ Mo berẽnga pa gu ngbarago mo nika du na ni ti gu regbo mo ni kaa baka nga bangiro berewe be kpio ya! Ono anga kina kpio sa Yekova nika diaha kusayo te. Ko nika zingisa agu aboro naima kpiko tipa i raki berewe a. Mo wisigingo rogo gupai re berãro yo. Ko kidohe nga “kangba aboro adu ni ungayo”. (Yesaya 26:19) Gere nga gupai Baibiri ayambaha nga zingabekpio.

HO GU BORO AKPI NI ANI AKPINYEMU NI

4. (a) Ginipai rengbe kafu wasa furani ho gumerani watadu bakurearani akpi ni? (b) Ada nangia bete mbembedi abakurea Yesu?

⁴ Ho gumerani watadu bakurearani akpi ni, gu nunga gbiati imisiri du ani rogoho nadu ni bakerehe gbe. Ani kini bi tirani nga gene berani te. Pai ho ka ani mangihe ka sa gu boro re ni raki berewe te. Ono Baibiri nafu ndikidi wasa furani. (Mo gedi 2 AKorindo 1:3, 4.) Ani wisigingo kpiapai sa nga gu nayugopa wai Yekova na Yesu akpinyemu ka zingisa gu gaani aboro naima kpiko tipa i raki berewe. Ho Yesu adu ni auru kpotosende ane, ko anaandu dedede kaa bi Razaro na adawiriko nangia Maria na Marata. I dunduko angia wene abakureako. Baibiri naya: “Yesu anakpi nyemu Marata akpi, na wirinari, na Razaro.” Ono rogo kura uru sa Razaro akpi.—Yoane 11:3-5.

5, 6. (a) Ginipai Yesu amangihe ho ko abi ga Razaro aborokporo gbiati abakureako ni i ni rungo tipa ko? (b) Tipagine duhe ti ni furani ni pa wasa ka ino ga Yesu bipai tipa kpio?

⁵ Yesu andu kafu wasa fu Marata na Maria. Ho Marata agihe ni ya Yesu naye, ri andu ka dusio ko ku gene. Ri adu na ngbarago ka bi Yesu, na ki ya fuko: “Ka mo adu erẽ, ka kawire akpi nga te.” Marata aberẽhe nga Yesu aye gii regbo yo. Tingbafuo gure, Yesu abi wirinari nga Maria, ri nikpari. Ho ko abi gu gberãrago ni i adu na ni, nunga yo ki ziko ko ki kpari a. (Yoane 11:21, 33, 35) Ko ima inopa gu igirã ani agbiatirani na ni ho gu boro akpi ni ani akpinyemu ni.

⁶ Pa ino ani gupai nga Yesu akpari kina wai ani anaakpara nafu wasa afu furani. Na si nayugo gupai nga Yesu wakina Bako. (Yoane 14:9) Yekova na ome beko ka dia kpio kusayo nyeanye kindi, na gere nga gupai ko nika mangaha barambeda.

“RAZARO, MO KÚRU”!

7, 8. Tipagine du Marata aaidanga i di mbia kusayo ti ni ti ngbadimo murã Razaro ya, ono ginipai Yesu amangihe?

⁷ Ho Yesu ada ni pati gu murã i akpisidi kangba Razaro rogoho, ngbadimo murã adu ni kisikisihe na ba mbia. Yesu kini mo ka ya: “Oni dí mbia ku sa yo.” Ono Marata aaidanga i dihe te. Mbiko kangba Razaro aima ra ku murã yo biama. (Yoane 11:39) Ri aainongo gupai Yesu nika mangaha te.

⁸ Yesu ki ya fu Razaro: “Mo kúru”! Gupai Marata na Maria abihe fuo gure azeresi kina ngbayo. “Gu kumba nakpi ko ki kuru, na kãikãi beko ni remu murã na nduko.” (Yoane 11:43, 44) Razaro adu ni unga ko berewe! Ko akodi tiko na gako aborokporo gbiati abakureako. I aima rengba ka dungo ko, ka zada ko, na ka fura na ko. Gere angia iˈiriwopai! Nga Yesu azingisi Razaro.

“DEGUDE, YA MI FORO, MO GÚARI”

9, 10. (a) Da naafu ome fu Yesu tipa ko nizingisi aboro? (b) Tipagine du du gu pangbanga nga ga zingabekpio ti ni na nyanyakipaha furani?

⁹ Ya mo Yesu azingisi aboro na gako ome? Oó. Mbata fu Yesu zingisi Razaro ko akpari fu Yekova, na Yekova ki fu ome fuko tipa ko zingisi Razaro. (Mo gedi Yoane 11:41, 42.) Anga kina Razaro nangia gu yangara boro i azingisi ni te. Baibiri nagumbapa gu tooni degude garãri adu 12 nga gu ri naawoka ni nyanyakihe. Bari nangia Yairo adu rogo bakere rungo, na ko ki zungodi Yesu tipa ko husi ri. Ri angia bangisa wiriko. Ho ko aafura ni na Yesu, kura akumba ki ye ki ya fuko: “Wiro kpi. Tipagine mo afuda Bayugupai ti ni berewe?” Ono Yesu aya fu Yairo: “Ka mo gúnde nga ya, mo ídi kina pa re.” Ko ki ndu na Yairo ku kpuko yo. Ho i ambedi ni na kporo, Yesu agi kpee aboro na kini bi aboro i ni kpari. Yesu ki ya fuyo: “Ka oni kpari nga ya; ri akpi nga te, ri nara ara.” Bari na nari aabaka kina bangiriyo na rogo gupai yo Yesu aaida ka gumbaha. Yesu akusi aboro dunduko ku zegi yo ko ki di bari na nari ki ndu na yo koyo wiriyo adu ni. Yesu ki zi degude ti beri ki ya fu ri: “Degude, ya mi foro, mo gúari.” Mo berẽnga pa gu ngbarago avunguri adu na ni ho ri aguari ni na ki tona nduge! Yesu aima zingisa wiriyo. (Marako 5:22-24, 35-42; Ruka 8:49-56) Natona rogo gu uru re kaa ndu kumbatayo, ho i anaabi gu tooni wiriyo ni re i anaatingida gupai Yekova amangihe fuyo vurube Yesu.a

¹⁰ Agu aboro Yesu azingisiyo be kpio aima kpiko berewe. Ono agu apai ani agedaha tipa agu aboro re na nyanyakipaha mbiko si nafu ndikidi maabangirise furani. Yekova nakpinyemu ka zingisa aboro na ko nika mangaha amanga.

GUPAI ANI AWIRIKAHA TI AGU APANGBANGA NGA GA ZINGABEKPIO

11. Ginipai Batungusipai 9:5 ayugoho furani tipa Razaro?

¹¹ Baibiri nagumba gupai ziazia nga “kpikpi aboro aina nga pai te.” Gure nga gu rengo naadu tipa Razaro. (Batungusipai 9:5) A wa Yesu agumbaha, si adu wa Razaro ara ara. (Yoane 11:11) Ho Razaro adu ni murã yo, ko “aina nga pai te.”

12. Wai du ani aino gupai nga gu zingabekpio nangia ga Razaro aima manga?

¹² Ho Yesu azingisi Razaro ni, badungu aboro na bihe. Zavura asogo Yesu i aima inoho nga ko ima manga gi iˈiriwopai re. Razaro adu ni ungako, na gere kini yugu gupai nga zingabekpio ima manga. (Yoane 11:47) Berewe a, badungu aboro andu kaa bi Razaro, ni sangbana gipai re, i atona ka ida kuti gupai nga Mbori du nakedi Yesu. Asogo Yesu aaidanga na gupai re te, sidu i ki gbata gene tipa ka imo Yesu kodihe na Razaro a.—Yoane 11:53; 12:9-11.

13. Tipagine rengbe ani kadu ti ni na gu kido nga Yekova nika zingisa kpikpi aboro azingisa be kpio?

¹³ Yesu agumba gupai nga aguyo “dunduko du rogo amurã yo” azinga azingabekpio. (Yoane 5:28) Gere nayugo gupai nga agu aboro dunduko Yekova atingida payo nika raka araka berewe. Ono tipa Yekova zingisi boro, ko du wa ka ko tingidi agu pai dunduko du tipa ni. Ya mo ko rengbe ka manga gupai re nzunzu? Sidu, badungu abirioni akerekuru du ariyo. Baibiri nagumba gupai nga Yekova ima ino rimo ra ni basasa dunduko. (Mo gedi Yesaya 40:26.) Ka si du nga ko rengbe ka tingidapa rimo ra ni basasa dunduko, nirengo, si taata fuko tipa ko tingidi agu apai dunduko du tipa agu aboro ko nika zingisa yo. Gu nyakipaha anyaka gbe nga, Yekova nakusi ahe dunduko, ani ima inoho nga ko na ome beko ka zingisa aboro be kpio.

14, 15. Ginipai afugo Eyobo ayugoho furani tipa zingabekpio?

¹⁴ Gu ruru kumba nangia Eyobo aima ida kuti zingabekpio. Ko asanahe nga: “Ka boro kpi, ni adú ni ungani berewe?” Fuani, ko aya fu Yekova wẽ: “Ka mo ayamba he, mi akaraga pai foro; mo akpi nyemu gu he bero amangi.” Nirengo, Eyobo aima ino gupai nga Yekova nangera kumbatayo tipa gu regbo ko nika zingisa aboro be kpio.—Eyobo 14:13-15.

¹⁵ Gu maabangirise nga ga zingabekpio nasa ro mo du wai? Mo ima rengba kaa bakabangiro nga, ‘Ya mo i azingisa agu agumere na agu abakureami nakpiki a?’ Si ni pa wasa furani ka ino gupai nga Yekova na nyemu ka zingisa aboro be kpio. Ani bingo gupai Baibiri agumbaha tipa gu ba i nika raka rogoho na ada du i nika zingisa yo.

I ‘AGIA FUGOKO KI KURU’

16. Gini ngbatunga raka agu aboro i nika zingisa yo ku auru kpotosende ane nika rakaha?

¹⁶ Mbata kusayo, agu aboro i azingisiyo akoditiyo na gayo aborokporo gbiati abakureayo kina auru kpotosende ane. Kina gu bangisa pai re nika manga kumbatayo, ono si nika ngba ki susi gu naadu mbata. Tipagine? Bambiko agu aboro i nika zingisayo ku auru kpotosende ane nika du na gu momu beyo nga ka raka nyeanye kindi zanga kpi berewe. I nika raka rogo gu zegino du kia ti gu ani araka rogoho areme. Vura, gbegberẽ mangaapai, na akaza adunga yo te.

17. Ada i nika zingisa yo?

¹⁷ Ada i ni ka zingisa yo? Yesu aya ‘aguyo agia fugoko dunduko du rogo amurã yo ki kuru.’ (Yoane 5:28, 29) Na Yugoti 20:13 naya: “Baime ki gasi agu akangba nadu rogo ho, kpio na Adisi [murã] ki gasi agu akangba nadu rogo ho.” Nirengo, abirioni aboro araka araka berewe. Gu mokedi nangia Pauro aya “ruru aboro azinga be kpio na iraira yo a.” (Mo gedi Amokedi 24:15.) Rogo gupai re yo nga gine?

18. Ada nga gu “ruru aboro” i nika zingisa yo?

¹⁸ Gu “ruru aboro” re nakoda gu ga Yekova ruru amoyambu naraki mbata fu Yesu ye ku auru kpotosende ane. Aboro wa Noa, Abarayama, Sara, Moize, Ruta, na Esetere, i nika zingisa yo i raki auru kpotosende ane. Mo rengbe ka gedapai tipa agi akumba na adee re rogo kapita 11 nga ga AEbere. Ginipai nika du tipa gu ga Yekova ruru aboro na kpiko ti gi gaani regbo re? I a kina dagba gu “ruru aboro” re, sidu i nika zingisa yo azingisa.

19. Ada nga gu “iraira yo”? Na gini momu Yekova nika fuhe fuyo?

¹⁹ Gu “iraira yo” nakoda gu birioni aboro nga aguyo naadunga na momu beyo tipa ka ino Yekova ya. Wa vura duhe nga i aima kpiko, bangiri Yekova agonga tiyo te. Ko nika zingisa yo azingisa, na i nika du adu na momu ka wirikapai tipa Yekova na ka irisoko a.

20. Ada i nikaa zingisa nga yo ya?

²⁰ Ya mo gipai re nayugo gupai nga aboro dunduko i nika zingisa yo? Oó. Yesu aya gu kura aboro kinaho i nikaa zingisa nga yo ya. (Ruka 12:5) Da du rengbe kada kuti gupai nga singia gi boro re azinga watadu ni azinganga te? Yekova nga yangara basapungbanga aboro, ono ko ima fu pagbia a fu Yesu “ko du ni basapungbanga unga aboro na kangba aboro.” (Amokedi 10:42) Agu aboro i nika sapangbanga yo ni gbegberẽ aboro gbiati agu aboro akpingo nyemu ka sa gayo berã ya, i azingisa nga yo te.—Mo bi gu 19 rukutu kekeapai du ti digido gi buku re.

ZINGABEKPIO KU NGBANGBATURŨ YO

21, 22. (a) Gini ngbatunga kpoto agu aboro i nika zingisa yo i raki ngbangbaturũ yo nika du na ni? (b) Da nangia gu bambata boro i azingisi ni ni ga ngbangbaturũ yo?

²¹ Baibiri nagumba gupai furani a nga gu kura aboro kinaho i nika zingisa yo tipa i raki ngbangbaturũ yo. Ho i azingisa boro ni tipa ni ga ku ngbangbaturũ yo, i azingisa nga ni na gu kpoto nga ga wiri aboro berewe te. I nazingisa ni ni raki ngbangbaturũ yo ni gu boro nga toro.

²² Yesu nangia gu bambata boro naagbia gu ngbatunga zingabekpio re. (Yoane 3:13) Arame biata tingbafuo kpio Yesu, Yekova azingisi ko be kpio. (Atambuahe 16:10; Amokedi 13:34, 35) I aazingisanga Yesu na gu kpoto nga ga aboro te. Gu mokedi nangia Petero asaki rogo gupai re yo nga Yesu “i aimi ko rogo boroboro ono i azingisi ko rogo toro.” (1 Petero 3:18) I azingisi Yesu ko raki ni gu boro nga toro, ko na bakere ome beko! (1 AKorindo 15:3-6) Ono Baibiri naya anga kina ko nika ngia yangara boro te.

23, 24. Ada nga gu “umba rika aboro” Yesu afura tipa yo, na bangeyo wai?

²³ Mbata fu Yesu kpi, ko aya fu gako abawiriki wẽ: “Mi nandu ka mbakada ba fu roni.” (Yoane 14:2) Gere aayugo gupai nga gu kura bete gako abawiriki kinaho i nika zingisayo tipa i raki ngbangbaturũ yo. Bangeyo wai? Yesu aya i adu ni “umba rika aboro.” (Ruka 12:32) Gu mokedi nangia Yoane apepa ndikidi bangeyo ho ko abi Yesu ni ko na “ru ri gu bagangara [ngbangbaturũ] nga Siona, agu yo ki du na ko 144,000.”—Yugoti 14:1.

²⁴ Ti gini regbo du si adu nga i nika zingisa agu Kristano du bangeyo nga 144,000 re? Baibiri nagumba gupai furani nga si adu nga gipai re nika manga tigu regbo Yesu nika tona zogarago ngbangbaturũ yo. (1 AKorindo 15:23) Ani na raka ti kina boro gu regbo re awere, na badungu agu aboro du bangeyo nga 144,000 re i naima zingisayo be kpio awere ku ngbangbaturũ yo. Aguyo du kindi auru kpotosende ane na aguyo nakpiko ti gi gaani regbo re i na zingisayo nibasa kindi ku ngbangbaturũ yo. Sidu tie, gu badungu rikaaboro i nika ka zingisayo kumbatayo i nika raka rogo paradizo auru kpotosende ane.

25. Ginipai ani nika wirikapai tipaha rogo gu kapita ngbefuo gere?

²⁵ Barambeda, Yekova nika batasa aboro dunduko be kpio, na kpio adunga berewe te! (Mo gedi Yesaya 25:8.) Ono ginipai agu aboro nika ga ku ngbangbaturũ yo nikaa mangaha yo? Baibiri nagumba gupai nga i nika zogarago na Yesu rogo gu zogarago nga ga ngbangbaturũ. Ani nika wirika dungu apai tipa gu zogarago re rogo gu kapita ngbefuo gere.