Gu Gene Rengbe Ani ka Ino Ndikidi AKristano Ngbaha

Badungu amirioni aboro naya i nga kina aKristano. Ono gayo aida ni bakiakia, na i arakanga kuti bangisa arugute sa te. Si du, waigu rengbe ani ka ino ndikidi aKristano?

1. Da nga ndikidi Kristano?

Akristano nga abawiriki, watadu apekefuo Yesu Kristo. (Mo gedi Amokedi 11:26.) Waigu du i ayugo gupai nga i nga ga Yesu abawiriki? Yesu aya: ‘Ka oni nye na gi pai, oni du adu tie ni gimi abawiriki ni rengo.’ (Yoane 8:31) Gipai re nayugo gupai nga, ndikidi aKristano du wa ka i raki ringbisihe kuti ga Yesu ayugopai. Kina wai Yesu anaamangasunge na Ziazia Kekeapai tipa ka songoda gako ayugopai, si naida ndikidi aKristano moi mburu gayo aida a kina ri Ziazia Kekeapai.—Mo gedi Ruka 24:27.

2. Waigu ndikidi aKristano ayugo nyemuse?

Yesu aya fu apefuoko wẽ: ‘Oni nikpi nyemu akuaroni, wa gu mi nakpi nyemu roni.’ (Yoane 15:12) Waigu Yesu ayugu gupai nga ko aima kpinyemu gako abawiriki? Ko anaadia regbo nayo, kini ngarasi yo, na kini undo yo. Zavura ko ki fu ungako a tipa yo. (1 Yoane 3:16) Wakina gure a, ndikidi aKristano nayugo nyemuse rogo mangapai yo angianga rogo fugo yo gbua ya. I nayugoho rogo gayo afugoyo gbiati gayo mangapai nga i ima kpinyemu akurayo.

3. Ndikidi aKristano namanga gini sunge?

Yesu aima fu sunge fu gako abawiriki. ‘Ko ki kedi yo i tungusi pa ga Mbori ngbi.’ (Ruka 9:2) Agu aKristano nadu mbata anaatungusapai, angianga kina rogo gayo aba irisombori sa ya, ono rogo agu aba aboro anaadunguratiyo kurogo ho na rogo akporo. (Mo gedi Amokedi 5:42; 17:17.) Wakina gure a, ndikidi aKristano areme nayugo agu arengo nga ga Baibiri rogo agu aba du aboro rogoho. I ima kpinyemu kura aboro, si du i na nyemu ka mangasunge na gayo regbo gbiati omeyo ka yugo gu pangbanga nga ga Baibiri nga gu du tipa maabangirise gbiati wasa.—Marako 12:31.

MO WIRIKI KURA DUNGU APAI

4. I nagbata gu rengo nga ga Baibiri

Anga agu aboro dunduko naya i nga aKristano nabi agu arengo nga ga Baibiri na nyanyakipaha te. Mo bi gu VIDIO re, na tifuoho, mo ki sakipai tipa gu sanahe ngbefuoho.

VIDIO: Wai Biriki Arimi Kurogo gu Pambori Nga ga AKristano (5:11)

• Waigu gu bete aboro naya i nga kina aKristano ni aboro kanisa nakpa ti yugo agu apai Yesu ayuguhe?

Yesu ayugu gu rengo du rogo Fugo Mbori yo. Mo gedi Yoane 18:37, na tifuoho, mo ki sakipai tipa gi sanahe re:

• Ringbisihe kuti Yesu, waigu rengbe ani ka ino agu aKristano “du ni dezire rengo” watadu nga ga rengo yo?

5. I nayugo gu rengo nga ga Baibiri

Mbata fu Yesu ga ku ngbangbaturũ yo, ko afu sunge fu apefuoko nga gu nandu kindi kumbatayo areme. Mo gedi Matayo 28:19, 20 gbiati Amokedi 1:8, na tifuoho, mo ki sakipai tipa gi sanahe re:

• Bakio wai du si adu nga i nika tungusapai na tipa bagizo regbo wai?

6. I namanga gupai rogo gayo raka yo i ayugoho

Ginipai naasa gu kumba nga Tom ko idi kuti gupai nga ko ima gbia ndikidi pambori nga ga aKristano? Mo bi gu VIDIO re, na tifuoho, mo ki sakipai tipa agu asanahe ngbefuoho.

VIDIO: Mi Aadunga na Nyemu Pambori Berewe Te (5:20)

• Rogo gu vidio re ginipai naasa Tom ka nyemu pambori dunga tiko berewe ya?

• Ginipai naasa gupai nga ko idi kuti gupai nga ko ima gbia rengo?

Mangaapai du na ome ti ni ki susi gupai boro apehe. Mo gedi Matayo 7:21, na tifuoho, mo ki sakipai tipa gi sanahe re:

• Ginipai nyakipaha fu Yesu—gupai ani aya ani idi kuti ni watadu gupai gaani mangapai ayugoho?

7. I nakpinyemu akurayo

Ya mo ndikidi aKristano namaa gayo raka ngbapai nzunzu tipa gu raka nga ga akurayo? Mo bi gu VIDIO re, na tifuoho, mo ki sakipai tipa agu asanahe ngbefuoho.

VIDIO: Ko Afu Tiko ka Mbupa Gako Raka ka Kpi (2:55)

• Rogo gu vidio re, ginipai naasa Lloyd ko moi gako raka ngbapai tipa Wiriba Johansson?

• Ya mo mo nabihe nga gupai ko amangihe re nga gupai rengbe ndikidi Kristano ka mangaha?

• Waigu rengbe ga Yesu abawiriki (ndikidi aKristano) ka mangapai na agu aboro du ngbatungayo kia?

• Waigu i narengbe ka mangaha wo ti regbo vura?

GINIPAI MO NAWIRIKIHE?

Ndikidi aKristano napekafuo agu ayugopai nga ga Baibiri, kini yugu gu nyemuse adunga na gbangbati ti ni ya, na kini tungusipa gu rengo nga ga Baibiri.

Fugöpai

• Mburu agu aida nga ga ndikidi aKristano naru rii gine?

• Gini sino i aino ndikidi aKristano ti ni?

• Gini ngbatunga sunge ndikidi aKristano amangaha?

MO WETEKE GU KURA APAI

Mo wiriki dungu apai tipa gu badona nga ga agu aboro nadiaberã ka pekafuo ga Yesu Kristo kpiapai na gako ayugopai.

ADezire Yekova—Ada Nga Yo? (1:13)

Mo bingo gupai naasa gu dee nadu mbata ni narani kanisa yo ri bi gupai nga “ri ima gbia ndikidi aborokporo nga ga toro yo.”

“I Amangisunge na Baibiri Tipa ka Karagapai Kuti Asanahe Dũ!” (Ngbaõbambu Sinziri, Zerekpe 1, 2014)

Mo bingo wai ndikidi aKristano ayugo nyemuse fu akurayo aidipase nga aguyo naida naundo.

Fu Undo fu Awirinarani Ho Gberãngo Namangi Ni—Paparaha (3:57)

Mo wisigingo pai tipa wai agu aKristano nadu mbata na gu ndikidi aKristano du areme amanga kina gu bangisapai Yesu apehe nga si i nikaa ino ndikidi apefuoko ti ni.

“Gini Apai I Aino Ndikidi AKristano Ti Ni?” (Ngbaõbambu Sinziri, Marungu 1, 2012)