Wai Du Dungurati ni Mbakadimbakadihe

Yekova nga gu Mbori namangapai kina ti genehe. (1 AKorindo 14:33) Sidu, ani ima rengba kaa bihe nga gako aboro naamangapai a kina ti genehe. Wai du du apai rogo gu dungurati nga ga aKristano ni mbakadimbakadihe? Wai du rengbe ani ka fu bee kuti pa du he na diabese?

1. Da du nga rii dungurati?

‘Kristo nga rii kanisa.’ (AEfeso 5:23) Yesu ngbangbaturũ yo nangera kurii gu sunge nga ga ga Yekova aboro rogo zegino dunduko. Yesu nasia ‘gu kangara moyambu du na tatamana’—du nga gu umba badona nga ga agu abaakumba i ayamba yo a nga Riigbu Bipasunge. (Mo gedi Matayo 24:45-47.) Wakina agu amokedi naadu rogo bambata sa kama agarã gbiati agu abaakumba naadu Yerusarema yo, Riigbu Bipasunge nafu arugapai fu adungurati rogo zegino dunduko. (Amokedi 15:2) Anga agi abaakumba re du nga aira gaani riigbu te. I nangera koyo du Yekova ni tipa Fugoko gbiati gako arugapai, na kini ra kutii ga Yesu pagbia.

2. Gini sunge abaakumba amangaha?

Abaakumba nga agu aKristano ni akumba naima nyaka rogo toro yo. I nayugopai rogo Ziazia Kekeapai na kini ngerefuo ga Yekova aboro ni undoyo yo na kini ngarasi yo. Marã ho i afuhe fuyo tipa gu sunge i amangaha re te. Kuba gure, i namangasunge ‘ni nyemuhe fu Mbori; tipa gbegberẽ ũkumuko a te, ono ni idapaha kpotoyo yo.’ (1 Petero 5:1, 2) Amoundo abaakumba nga agu akumba du rogo dungurati naundo abaakumba, na i ima rengba ka rẽ kumbatayo ki da ni abaakumba.

Riigbu Bipasunge nasia abaakumba i du ni ababi adungurati. I nata kaa biko adungurati tipa ka fu arugapai gbiati ngarasaro. I nasia abaakumba gbiati amoundo abaakumba nga agu yo rẽ ringbisihe kuti Ziazia Kekeapai.—1 Timoteo 3:1-10, 12; Tito 1:5-9.

3. Gini tindiro du be aDezire Yekova wadu yo ni basasa dunduko?

Aboro dunduko si aida i ‘nitámbua rimo Yekova’ ni mangayo agu apai nga ga gu dunguratise nga ga dungurati na kini tungusipai ringbisihe kuti agu apai du tipa payo.—Mo gedi Atambuahe 148:12, 13.

MO WIRIKI KURA DUNGU APAI

4. Yesu nga wene bangbembatayo

Yesu nafu wene yambahe furani. Mo gedi Matayo 11:28-30, na tifuoho, mo ki sakipai tipa gi sanahe re:

• Wai du Yesu aida ani bi gako ngbembatayo?

VIDIO: Abaakumba amangipai Sa gu Bazigizo Namangi Nepal (4:56)

Baibiri nayugo wai ziazia si aida abaakumba mangi gayo sunge.

Mo gedi Yesaya 32:2 na 1 Petero 5:1-3, na tifuoho, mo ki sakipai tipa agi asanahe re:

• Si nasa ro mo du wai ka ino gupai nga abaakumba naasada ka undo kura aboro wakina Yesu?

• Gini kura agene nga gu abaakumba awirika Yesu ngbaha?

5. Abaakumba nayugopai ni gayo kpiapai

VIDIO: Abaakumba Nangbembatayo! (7:39)

Yesu nafu arugapai fu agu aboro nangbembatayo rogo dungurati. Mo gedi Matayo 23:8-12, na tifuoho, mo ki sakipai tipa gi sanahe re:

• Ginipai ngbatiro nibipa gu kparakparapai du dagba gu rugute nga ga Baibiri tipa abaakumba gbiati gupai ani abihe ti agu abarumbatayo du rogo apambori?

1. A. Abaakumba nabanda tiyo gbiati gayo aborokporo rogo toro yo nyanyaki

2. B. Abaakumba nangerafuo aboro dunduko rogo dungurati

3. D. Abaakumba natungusapai dedede

4. E. Abaakumba nga abayugupai. I naundo aundo a na gu sunge nga ga giriso rago gbiati kura asunge

6. Ani ima rengba kaa mangapai kina kubani sa na abaakumba

Baibiri nafu gu nyanyaki ndupai furani si aida ani ni mangipai ti ni kina kubani sa na abaakumba. Mo gedi AEbere 13:17, na tifuoho, mo ki sakipa tipa agi asanahe re:

• Si rẽarẽ tie nga, Baibiri nangarasa rani ani ni gisangba na kini ra fu aguyo nangbembatayo? Tipagine mo abihe ti ni wo, watadu tipagine mo abingo ho ti ni wo ya?

Mo gedi Ruka 16:10, na tifuoho, mo ki sakipai tipa gi sanahe re:

• Tipagine si aida ani nigisangba abaakumba agia ti ni kindi ka si vura du vurũ nga ani nabihe nga gupai re na nyanyaki paha te?

GINIPAI MO NAWIRIKIHE?

Yesu nga rii dungurati. Ani namangasunge na ngbarago kina sa na agu abaakumba namangasunge kutiibeko mbiko i nafu wasa furani na kini yugupai furani na gayo kpiapai.

Fugöpai

• Da du nga rii dungurati?

• Wai du abaakumba aundo dungurati?

• Gini sunge du be airisi Yekova wa du yo nibasasa dunduko?

MO WETEKE GU KURA APAI

Mo bi gu goapai nga gu nayugo gupai nga Riigbu Bipasunge gbiati kura abaakumba nabakabangiriyo abaka nyanyaki tipa aKristano areme.

Nyakasa Agu Awirina Du Rogo Agu Aba I Narugusi Gaani sunge Rogoho (4:22)

Mo wirikipai tipa pa gu sunge ababi adungurati naamangaha.

Gu Raka Nga ga Babi Adungurati Gbaria Yo (4:51)

Mo gedipai tipa gu sunge du be adee rogo dungurati.

“Ya Mo ADezire Yekova na Adee be Yo Natungusapai?” (Ngbaõbambu Sinziri, Mbirinvuo 1, 2012)

Mo bingo wai abaakumba amangasunge nyanyaki tipa ka ngarasa akurayo aidipase.

“Agu Akristano Nga Abaakumba I ‘Nga Amounda Gaani Ngbarago’” (Ngbaõbambu Sinziri, Ngi 15, 2013)