WIRIKAPAI 34
Wai Rengbe Ani ka Yugo Gaani Nyemuse fu Yekova?
Ya mo mo abingo tiro nga mo nambeda na Mbori gbe natona kinaho mo atona wirika Baibiri ni? Ya mo mo nakpinyemu kaa ndu kumbatayo kindi kaa nyakasa gamo pa bakure na ko? Ka si du nga wo duhe, mo tingidi gupai nga, kina wai Yekova nikaa bi ga nyemuse tipa ko si nisono, kina wo a ko nika kpinyemu ro na kini ngerefuo ro. Wai rengbe mo ka yugoho fuko nga mo ima kpinyemuko?
1. Wai ani ayugoho fu Yekova nga ani ima kpinyemuko?
Ani nayugo gaani nyemuse fu Yekova ni gia ani sangbako. (Mo gedi 1 Yoane 5:3.) Ko aziongo boro ngbaome ni gi sangbako te. Kuba gure, ko nafu mamu furani dunduko ni basasa ani sia singia ani naida ka giasangbako watadu ka zanga giaha. Tipagine? Yekova naida ani gisangba ‘kpotorani yo.’ (ARomo 6:17) Gure nayugo gupai nga Yekova naida mo gisangbako, angianga mbiko si nga gupai si aida mo mangihe ya, ono mbiko mo ima kpinyemuko. I mbakadi agu apaparaha nga ga 3 na 4 du rogo gi buku re tipa si undo ro mo yugu gamo nyemuse tipa Yekova ni manga mo gupai nasa ngbarago tiko na kini ká gu naba gberãrago tiko.
2. Tipagine rengbehe ka du ti ni ni kpakarakpakaraha ka yugo gaani nyemuse fu Yekova?
‘Gbigbitapai namanga ruru boro ngenge.’ (Atambuahe 34:19) Ani dunduko nasota na gaani azangarengba. Ani ima rengba ka gbiatirani na zingo mosoro, gbegberẽ mangapai gbiati gu kura akpakarapai. Ho ani agbiatirani ni na akpakarapai, ani ima rengba ka bihe nga si ima kpakara ka manga gupai Yekova aida ani mangihe. Si wo mbiko gupai nga si ima rengba ka du taata boro merẽ sa gbegberẽ apai. Ono ho mo amanga gupai ni Yekova naya foro wẽ mo mangihe ni ruru ro, mo nayugo gupai fuko nga mo ima kpinyemuko ki susi ai he. Na mo nayugo gupai nga mo ni ruru ro fuko. Ko ni ka du a ni ruru ko foro. Ko ambunga ro wa gu sa te.—Mo gedi Atambuahe 4:3, NW.
MO WIRIKI KURA DUNGU APAI
Mo makianga ndu gupai du gamo giasangba ti ni na nyanyakipaha fu Yekova, na ki wiriki gupai rengbe mo ka mangaha ka nye ni ruru ro fu ko.
3. Gupai nabi ro abi a
Rogo gu buku nga Eyobo du rogo Baibiri yo, ani nageda gupai nga, Satana akitingbanga Eyobo gbiati agu aboro dunduko naida ka iriso Yekova. Mo gedi Eyobo 1:1, 6–2:10, na tifuoho, mo ki sakipai tipa agi asanahe re:
Ringbisihe kuti Satana, gini ndupai Eyobo aagiasangba Yekova ti ni?—Mo bi Eyobo 1:9-11.
Ginipai du Satana apehe tipa aboro dunduko kodihe na mo?—Mo bi Eyobo 2:4.
Mo gedi Eyobo 27:5b, na tifuoho, mo ki sakipai tipa gi sanahe re:
Wai Eyobo ayugu gupai nga ko ima kpinyemu Yekova nirengo?
Eyobo ayugu ga ko nyemuse fu Yekova ni nye ko ni ruru ko fu ko
Ani nayugo gaani nyemuse fu Yekova ni nye ani ni rururani fu ko
4. Mo sa kpoto Yekova yo si ngi
Mo gedi Asanza 27:11, na tifuoho, mo ki sakipai tipa agi asanahe re:
Wai du Yekova ho du mo ni na tatamana na kini gi sangba ko? Tipagine?
5. Mo ima rengba ka du ni ruru yo fu Yekova
Gaani nyemuse tipa Yekova nasarani ani pe pako fu kura aboro. Gaani du ni ruruse fu ko nasarani ani mangihe wo zavura ti gu regbo adunga ha taata ya. Mo bi gu VIDIO re, na tifuoho, mo ki sakipai tipa agu asanahe ngbefuoho.
Ya mo mo abingo ho ni kpakarakpakaraha ka pe pa Yekova fu kura aboro?
Rogo gu vidio re, gini pai naundo Grayson ko dibe gako gunde?
Si taata furani ani du ni ruru rani fu Yekova ho ani akpinyemu gupai ni ko akpinyemuhe na kini sogo gu ko asogaha. Mo gedi Atambuahe 97:10, na tifuoho, mo ki sakipai tipa agi asanahe re:
Ringbisihe kuti gupai mo nawirikihe, gini bete apai Yekova akpinyemuhe? Gini bete apai nga gu ko asogaha?
Wai rengbe mo ka wirika ka kpinyemu gupai du ni wenehe na ka soga gupai du ni gbegberẽhe?
6. Ani nagbia undo ho ani agiasangba Yekova ni
Giasangba Yekova ti aregbo dunduko ni bawenehe gbe. Mo gedi Yesaya 48:17, 18, na tifuoho, mo ki sakipai tipa agi asanahe re:
Ya mo mo nabihe nga ani ima rengba ka du na kido nga Yekova ima ino gupai du ni wenehe ti aregbo dunduko tipa rani? Tipagine mo abihe ti ni wo?
Wai gamo wirika Baibiri gbiati gu ndikidi Mbori nga Yekova naundo ro ni bakerehe gbe?
GU KURA ABORO NAPE GUPAI NGA: “Gimi mangapai nzunzu na nyanyakipaha fu Mbori te.”
Gini veresi rengbe mo ka mangasunge na ni ka yugo gupai nga gaani mangapai na maapai kurii ga Yekova bipai tipa rani?
GINIPAI MO NAWIRIKIHE?
Mo rengbe ka yugo gamo nyemuse fu Yekova ni gia mo sangba ko, na ki nye ni ruru ro fu ko ka akpakarapai vura du wai vurũ.
Fugöpai
Ginipai mo nawirikihe ti gu kpiapai nga ga Eyobo?
Wai mo nika yugo gamo nyemuse fu Yekova?
Ginipai nika undo ro mo nye ni ruru ro fu Yekova?
MO WETEKE GU KURA APAI
Mo bingo wai rengbe mo ka du ni ruru ro fu Yekova gbiati dungurati.
Mo wiriki dungu apai tipa ga Satana kitangbangase kuti aboro.
“Eyobo Abanda Gako Padu ni Ruruse” (Gini Pangbanga du Rogo Baibiri? sita paparaha)
Mo bingo wai rengbe zavura rukutu agude ka yugo gayo nyemuse fu Yekova.
Wai rengbe gu paranga boro nagbia ti ni na sosodahe be akura ni ka nye ni ruru ni fu Mbori?