WIRIKAPAI 47
Ya Mo Mo Ima Rẽ Tipa ka Zio Bapatiza?
Mo ima wirika dungu apai tipa Yekova vurube gamo wisigo Baibiri. Si nawira wa mo ima manga ariapai tipa ka mangapai kuti agu apai mo nawirikihe. Ono wa vura duhe wo, kurapai ima rengbe kaa ká na mo ti manga mo kparatise fu Yekova na ki zi bapatiza. Gi wirikapai re nika sakapai tipa bete agu akpakarapai rengbe ka ká na mo ti bapatiza na wai rengbe mo ka diabehe.
1. Bakio wai mo aida ka inopai mbata mo kini ka zio bapatiza?
Tipa ka zio bapatiza, si naida mo du na gu ‘inahe nga ga rengo.’ (1 Timoteo 2:4) Gipai re ayugongo gupai nga si naida mo ini karagapai sa agu asanahe dunduko nga ga Baibiri mo kini ru ka zio bapatiza te. Zavura agu aKristano naima zio bapatiza bakuru yo i nawirikapai kindi. (AKorosaio 1:9, 10) Ono tie, si naida aida mo rugutiro na gu bangua ayugopai nga ga Baibiri. Agu abaakumba nga ga dungurati yo nika undo ro mo ini singia mo ima gbia gu inohe si aidaha.
2. Gini bete adiandue si aida mo mangihe mbata fu bapatiza?
Mbata fu mo zi bapatiza, si naida mo ‘zúngadi tiro. . . ki sa tiro berewe’ watadu mo saberã ro. (Mo gedi Amokedi 3:19.) Gipai re nayugo gupai nga mo du wa ka mo du na bakere gberãrago tipa ai agu ingapai mo amangihe na mo ki sana Yekova ko mbupai foro. Na mo ru a nyanyaki ka ká gbegberẽ mangapai, na mo ki di berã ka raka ringbisihe kuti gu gene nasa ngbarago ti Mbori. Kurigure, mo natona kaa ndu tipa adunguratise na kini tungusipai na dungurati.
3. Tipagine si aidanga mo mbu gunde ti ni si ká na mo ya?
Gu kura aboro nagunde nga i adunga na rengba ka manga gupai i akido Yekova tipaha te. Rengo ngaha nga, ti kura aregbo mo nika manga aingahe amanga, zavura gu ruru akumba na adee i nagumba payo rogo Baibiri aima manga ingahe a. Ono Yekova aidanga gako amoyambu du ni kina rengberengbe yo mbata te. (Mo gedi Atambuahe 103:13, 14.) Ko na ngbarago ho mo amanga gupai ni rẽ na omero! Ko nika undo ro aundo. Ni rengo, Yekova nakido rani nga he ho ka ‘kpara rani ti [gako] nyemuse’ te.—Mo gedi ARomo 8:38, 39.
MO WIRIKI KURA DUNGU APAI
Mo bingo wai rengbe mo ka diabe ai agu akpakarapai rengbe ka ká na mo ti bapatiza ni ye mo ka ino Yekova wenengai na ki di gako undo kugume.
4. Mo asadi ka ino Yekova wenengai
Bakio wai si aida mo ini Yekova mbata mo kini ru ka zio bapatiza? Si naida mo ini ko wenengai tipa ka kpinyemuko na kini mangi gupai ngba tiko. Mo bi gu VIDIO re ka bingo wai abawiriki Baibiri aima mangaha wo. Na tifuoho, mo ki sakipai tipa gu sanahe ngbefuoho.
Rogo gu vidio re, ginipai naundo kura bete aboro i mbakaditiyo tipa bapatiza?
Mo gedi ARomo 12:2, na tifuoho, mo ki sakipai tipa agi asanahe re:
Ya mo mo nakapa singia agu apai Baibiri ayugoho watadu aDezire Yekova ayugoho nga rengo?
Ka singia wo duhe, ginipai rengbe mo ka mangaha tipaha?
5. Mo dibe agu akpakarapai rengbe ka ká na mo ti bapatiza
Ho ani adiaberã ni ka kpara tirani fu Yekova na ki zi bapatiza, ani dunduko nagbiatirani agbia na akpakarapai. Tipa ka bi kpiapai tipa gipai re, mo bi gu VIDIO re, na tifuoho, mo ki sakipai tipa agu asanahe ngbefuoho.
Rogo gu vidio re, gini akpakarapai si aaida Narangerel dibehe tipa ka iriso Yekova?
Wai Nyemuse tipa Yekova aundo ri ri dibe agu akpakarapai re?
Mo gedi Asanza 29:25 na 2 Timoteo 1:7, na tifuoho, mo ki sakipai tipa gi sanahe re:
Ginipai nafu wingbaduse furani ani di be akpakarapai?
6. Mo kido kuti ga Yekova undo
Yekova nika undo ro aundo mo sa ngbarago tiko. Mo bi gu VIDIO re, na tifuoho mo ki sakipai tipa agu asanahe ngbefuo ho.
Rogo gu vidio re, ginipai naaká na bawiriki Baibiri ka ko zingo bapatiza ya?
Ginipai ko awirikihe nga gu naundo ko ko nyakasi gako kido kuti Yekova?
Mo gedi Yesaya 41:10, 13, na tifuoho, mo ki sakipai tipa gi sanahe re:
Tipagine rengbe mo ka du ti ni na kido nga mo ima rengba ka digiso gu kidohe mo amangihe ti regbo gamo kparatise?
7. Mo kiisi gamo tambuahe tipa ga Yekova nyemuse
A wa mo nika berãpa bakio wai Yekova nakpinyemu ro gbe, kina wo a mo nika du na tambuahe tipa ko na kina wo a mo nika ida ka irisoko nyeanye kindi. Mo gedi Atambuahe 40:5, na tifuoho, mo ki sakipai tipa gi sanahe re:
Gini ga Yekova amaku mo nadu na tambuahe tipaha gbe?
Gu nebi nangia Yeremaya aima kpinyemu Yekova gbiati Fugoko, na ko aima du na bakere tambuahe tipa gu momu nga kadu na rimo Yekova riko. Ko aya: “Ga pai ki sa tihe fere ni ngbarago ni gu pai kpotore yo nangi mbiko ho; bambiko i yambu re ti rimoro, Ako Yekova, Mbori.” (Yeremaya 15:16) Mo karaganga pai kuti agi asanahe re:
Tipagine duhe ti ni ni kparakpara momu ka du ni Dezire Yekova?
Ya mo mo naida ka zio bapatiza ki da ni Dezire Yekova?
Ya mo pai ho naká na mo ti mangaha wo?
Ginipai mo aberãha nga si naida mo mangihe tipa ka da ti gu sásá nga ga zio bapatiza?
GU KURA ABORO NAPE GUPAI NGA: “Mi ainongo nga mi rengbe ka raka ringbisihe kuti agu apai ka mi kidopa ha ti regbo bapatiza te.”
Ya mo wo du mo abihe?
GINIPAI MO NAWIRIKIHE?
Na ga Yekova undo, mo ima rengba ka diabe ai kpakarapai na ki zi bapatiza.
Fugöpai
Bakio inohe wai nga ga Baibiri si aida mo gbiaha mo kini ru ka zio bapatiza?
Gini aariapai si narengbe ka ida mo mangihe mbata fu mo zi bapatiza?
Tipagine si aidanga mo mbu gunde si ka ti ni na mo ya?
MO WETEKE GU KURA APAI
Mo makianga gupai si aida si du nga mburu gupai sa ro mo diberã ka zio bapatiza.
“Ya mo Mo Ima Rẽ Tipa ka Zio Bapatiza?” (Ngbaõbambu Sinziri, Marungu 2020)
Mo wiriki wai ka diabe gu kura kparakpara akpakarapai rengbe ka ga na mo kusayo.
“Ginipai Nadingiso Re ti Zio Bapatiza?” (Ngbaõbambu Sinziri, Marungu 2019)
Mo bingo wai kura kumba sa adu na diabese ni diako be kikindigi akpakarapai tipa ka zio bapatiza.
‘Tipagine Mo Adindiko Adindiko ti ni Ka Zio Bapatiza?’ (1:10)
Ti bambataha, gu kumba du rimoko nga Ataa aadindiko adindiko tipa ka zio bapatiza. Mo bingo gupai nasako ko mangi gi nyanyakipa diandue re.